18.4.12

Educación: as Mocidades da Mesa agardan unha concorrencia masiva á folga estudantil deste xoves 19 de abril

  • A multitude de apoios recibidos e a boa acollida das asembleas e repartos informativos nos centros de ensino así o auguran
  • As organizacións convocantes da xornada reivindicativa no ensino medio medio chaman ao estudantado a “parar” mañá as aulas como mostra de “compromiso” e “responsabilidade” co futuro da lingua
  • Máis de 20.000 estudantes seguen os eventos relacionados coa folga creados en redes sociais como tuenti e seguen a aumentar as mencións ao #19Aestudantespologalego en twitter

 

 

Barbanza e Noia, 18 de abril de 2012.- A folga estudantil en defensa do galego que está chamado a secundar todo o alumnado de 2º ciclo de secundaria, bacharelatos e ciclos formativos de grao medio e superior de Galiza continúa a sumar apoios e adhesións a menos de 24 horas do seu inicio.

 

Se a pasada semana confirmaban o seu apoio á convocatoria a organización xuvenil Galiza Nova, a área de Mocidade de Esquerda Unida e a Mocidade Nacionalista Galega (MNG), cando faltan xa horas para a folga multiplícanse os apoios individuais e colectivos, de xuntas de delegadas/os do alumnado de centros de ensino medio de todas as comarcas galegas ou mesmo de asembleas organizadas polo propio estudantado en apoio ao paro.

 

As organizacións convocantes da xornada de folga que terá lugar esta quinta feira (xoves) 19 de abril: A Mesa pola Normalización Lingüística e a súa sección xuvenil, a Mocidade pola Normalización Lingüística; os Comités; a Liga Estudantil Galega e o Sindicato de Estudantes continuaron na mañá de hoxe a informar nos propios centros de ensino medio das razóns do paro reivindicativo por medio de repartos e asembleas informativas que, segundo explican, “están a ter, polo xeral, unha extraordinaria acollida” por parte do estudantado.

 

Hoxe mesmo realizáronse de novo repartos simultáneos nas portas de varios institutos nas sete principais cidades galegas, como xa acontera tamén a pasada terza feira (martes). Paralelamente, en moitos centros de secundaria e FP as xuntas de delegadas/os xa fixeron chegar a súa adhesión á convocatoria. “É, sen dúbida, un bo indicativo de que o paro vai ter un respaldo masivo na maioría dos centros e en todas as etapas chamadas a o secundar”,  explica Sara Seco, responsábel nacional da Mocidade pola Normalización Lingüística.

 

Outro “bo térmometro” do impacto da convocatoria é, segundo indican as organizacións convocantes, o apoio “tremendo” que está a chegar á folga do día 19 a través das redes sociais; a primeira folga estudantil en defensa da lingua na que, de feito, se empregan estas “novas” ferramentas de difusión social.

 

Os apoios son especialmente numerosos en tuenti, rede social empregada moi maioritariamente pola xente nova, onde os distintos eventos sobre a folga suman xa máis de 20.000 apoios. Tamén se contan por centos os apoios recibidos a través de facebook e as mencións diarias á convocatoria a través de twitter, mediante o hashtag #19Aestudantespologalego, cuxo uso vai en aumento a medida que se achega o inicio da xornada reivindicativa de mañá.

 

As organizacións convocantes, así como as apoiantes, chaman a todo o estudantado de ensino medio a secundar a folga de mañá como un “xesto de compromiso e responsabilidade co futuro do galego”; compromiso e responsabilidade que, aseguran, “é o que lle falta ao goberno galego, ao conselleiro de Educación e Cultura e ao propio presidente Núñez Feijóo cando atacan a nosa lingua”.

 

“Chamamos á folga con independencia de cal sexa a lingua que se use no día a día”, indicou Sara Seco. “Do que se trata”, en opinión da dirixente das Mocidades da Mesa, “é reivindicar que siga a avanzar e non esmoreza unha lingua que é de todas e de todos nós”.





 

 

Posted via email from Certo.gl, o xornal dixital de Barbanza e Noia

Noia: 55 mozos participaron na xornada sobre o dereito á Información da mocidade

093

       Hoxe ás 11,00 h. tivo lugar no Espazo Xove de Noia unha Xornada de información xuvenil , dentro da campaña que a Axencia de Europa de Información e Asesoramento para os Mozos (ERYCA), lanza sobre o Dereito á Información Xuvenil 2012

 

 

Noia, 18 de abril de 2012. A Dirección Xeral de Xuventude e Voluntariado, dependente da Consellería de Traballo e Benestar, uniuse á campaña ‘O Dereito a Información Xuvenil’ con motivo do Día Europeo deste eido, coa posta en marcha de seminarios e xornadas dirixidas á visualización da información especializada e á figura do informador xuvenil. Na Xornada de hoxe no Espazo Xove de Noia participaron ao redor de  55 mozos e mozas de 16 a 30 anos. Participaron Jesús Antelo García, director do Centro coordinador de información xuvenil de Galicia, os responsables dos Espazos Xove de Betanzos, María Doporto Sabín, Curtis, Eduardo Vázquez Sánchez e Pontedeume, Maria Isabel Pena Gregorio, todos eles moderados pola directora da Casa da Xuventude de Noia, Almudena Suárez Torrado.

 

Estas xornadas, que xa tiveron o seu inicio onte no Centro Coordinador de Información Xuvenil  de Santiago, celebrouse hoxe no Espazo Xove da Rede Galega de centros xuvenís de Noia, que está destinada a mozos e mozas de 16 a 30 anos, co obxecto de darlles a coñecer os seus dereitos sobre a información xuvenil e as actuacións que se levan a cabo desde a Dirección Xeral de Xuventude e Voluntariado, e desde o propio Espazo Xove (Casa da Xuventude) de Noia .

 

A campaña, posta en marcha pola axencia europea ERYCA en colaboración co Consello de Europa, pretende sensibilizar á mocidade e aos medios de comunicación sobre o papel especial da información para os mozos e mozas con respecto ao acceso destes  aos  seus dereitos. Tamén se pretende sensibilizar sobre o acceso á información como un dereito en si mesmo para toda a xuventude.  Así mesmo e como requisito previo, establécese o respecto á democracia, aos dereitos humanos e as liberdades fundamentais, así como o dereito a que todos os mozos e mozas teñan acceso a unha información completa, obxectiva, comprensible e fiable sobre todas as súas dúbidas e necesidades.




 

Posted via email from Certo.gl, o xornal dixital de Barbanza e Noia

Ribeira: preto de corenta participantes no roteiro polos montes do Vilar

Cimg0766

Ribeira, 18 de abril de 2012. Xente de tódalas idades participou no roteiro de sendeirismo polos montes do Vilar, que organizou o pasado domingo a Asociación de Veciños de Carreira, presidida por Marivén Sampedro.


Segundo a organización, foi "unha ruta cortiña, de apenas 12 quilómetros, que  descorría por paraxes espectaculares que resultaron do agrado dos perto de 40 participantes". Entre os asistentes, carreirenses coñecidos como José Manuel Pena, Jaime López, Pachicho Reiriz ou a anterior presidenta da asociación veciñal, Ana Gómez Hermo, que disfrutaron tanto do percorrido como das curiosas e personais explicacións do guía, Moncho Sampedro.






Posted via email from Certo.gl, o xornal dixital de Barbanza e Noia

Ribeira: convocan manifestación o sábado 28 de abril contra as matanzas de lobos

Manif_hibridos
ADEGA apoia a convocatoria desta manifestación (Ribeira, praza do Concello ás 18:30) para reclamarlle á Xunta que poña fin aos masacres legais e ilegais de lobos, lubicáns e cans nos montes do Barbanza.

"Acode para reclamar á Xunta que pare os masacres e traballe para garantir a supervivencia do lobo galego en troques de seguir cedendo a xestión desta xoia da nosa fauna ao "lobby" dos escopeteiros.

NIN MASACRES DE ELEFANTES NIN DE LOBOS!

STOP AO EXTERMINIO LEGAL", explican dende esta asociación ecoloxista galega.

Máis información: www.adega.info ou en Facebook

Posted via email from Certo.gl, o xornal dixital de Barbanza e Noia

Ribeira: Francisco Antonio Vidal fala nos Xoves Literarios sobre festas e fastos

  •  Ás oito da tarde no conservatorio, este xoves 19 de abril

A festa máis sonada hoxe en Ribeira é a Dorna, sen discusión

 

Ribeira, 18 de abril de 2012.- Mañá xoves, día 19 de abril, ás 20 horas, terá lugar no Conservatorio a segunda das xornadas dos Xoves Literarios que promove o Concello no marco da programación do Abril Mes dos Libros 2012. Nesta ocasión, será o escritor nado en Palmeira en 1957 Francisco Antonio Vidal Blanco o que imparta unha conferencia e trace un percorrido visual polos mitos de antano e a súa conexión cos festexos da actualidade.

 

Baseándose no seu libro “Dos Fastos aos Festexos”, publicado en 2009 en colaboración con Rosa B. Vizcaya, Francisco Antonio Vidal vai analizar na disertación de mañá as principais festas galegas seguindo a orde que marca o calendario. O autor pretenderá e amosar os paralelismos existentes entre as celebracións de hoxe e os fastos dos que xa falaban Ovidio e outros autores clásicos, demostrando así como son herdeiros dunha tradición de máis de dous mil anos.

 

Ritos de Ribeira

Tamén se aproximará a algúns dos ritos e celebracións propios do municipio de Ribeira, moitos perdidos xa ou en proceso de esquecemento, pero dalgún xeito tiveron unha clara influencia na maneira en que as persoas se relacionan co medio.

 

Francisco Antonio Vidal ten publicado oito novelas (a última delas, “As deusas do Calvario” en 2010) e diversos ensaios e obras de teatro. Entre os seus premios literarios cabe destacar o premio do Concello de Vilalba de novela nos anos 1992 e 1998, o Premio de Literatura Infantil Olisbos en 1993, o da Casa de Galicia de Baracaldo en 1997, o do Concello de Viveiro en 2003 ou o Terra de Melide en 2007.


Moita máis información sobre este autor na Galipedia

Posted via email from Certo.gl, o xornal dixital de Barbanza e Noia

Noia: Servizos Sociais dá conta da actividade realizada en 2011 en dous informes


Cos recortes que están a anunciar día si, día tamén na Xunta e no Goberno central, ambos gobernados polo PP, a continuidade de servizos como a axuda no fogar ou a apertura de novas residencias de ancianos está no aleiro

SS.SS. 2011.pdf Download this file

Posted via email from Certo.gl, o xornal dixital de Barbanza e Noia

Riberia: arranxan catro rúas de Corrubedo preto do peirao

  •  Nas rúas Torreiro, Bandiarrego, Fontenova e unha transversal
  • Supoñen estas obras un investimento de 121.000 euros

 


Ribeira, 18 de abril de 2012.- O Concello informou hoxe da posta en marcha dunha actuación dirixida á humanización e recuperación do casco histórico de Corrubedo e que afecta a catro rúas situadas nas inmediacións da área portuaria: trátase das rúas do Torreiro, Bandiarrego, Fonte Nova e transversal a Fonte Nova. En todas estas vías se está procedendo á pavimentación, saneamento e renovación de pluviais.

 

As devanditas rúas caracterízanse por posuír numerosas vivendas nas súas marxes e rexistran unha grande afluencia de peóns para acceder ás praias da zona (principalmente O Prado). O firme das rúas está formado por pavimento de formigón, bastante deteriorado nalgúns puntos. Non existe rede separativa, de tal xeito que as augas fecais e pluviais están canalizadas por un único colector.

 

Co fin de adecuar e humanizar a zona de actuación, estase a demoler o pavimento existente e colocar lousas de granito combinadas con adoquíns de granito abuxardado. Ademais, vanse dispor colectores de PVC compacto para residuos fecais e colectores de PVC corrugado para augas pluviais.

 

O orzamento desta actuación ascende a 121.038,90 euros e o prazo de execución é de 4 meses. A empresa Nemesio Ordóñez foi a adxudicataria da obra, que se enmarca dentro do  Plan Provincial de Obras e Servizos (POS 2011) da Deputación de A Coruña.

 


Posted via email from Certo.gl, o xornal dixital de Barbanza e Noia

Ribeira: recepción aos participantes do "Free Minds, Open Hearts", que veñen de sete países distintos

 

 

Ribeira, 18 de abril de 2012.- O alcalde, Manuel Ruiz Rivas, recibiu onte no salón de plenos do Consistorio aos alumnos e profesores de 8 centros escolares de secundaria e de educación preuniversitaria de 7 países que están a participar no proxecto Comenius Regio Free Minds, Open Hearts.

 

Con motivo desta iniciativa de colaboración europea, 51 alumnos e 23 profesores recalaron esta semana no municipio para desenvolver a reunión final do proxecto e, de paso, tomar parte en distintas actividades lúdico culturais na comarca e no seu entorno.

 

Olegario Sampedro como coordinador galego do proxecto; Ana Valdés como directora do IES Número 1; Anton Schicker como coordinador xeral en Munich; e o propio alcalde, sentáronse na mesa presidencial do salón, que estivo totalmente repleto polos docentes e escolares participantes no citado proxecto.

 

Estes procedían do Roberto-Bosch-Fachoberschule de Munich (Alemaña), os Instituto Albe Steiner de Italia, o CC de Noordgouw (Heerde, Holanda), o ISISS Pietro Giordani de Parma (Italia), a Escola Secundaria de Lousada (Portugal), o Can Anadolu Ticarte de Canakkake (Turquía) e o Zespol. S. Ponadgimnazjalnych Nr. I. Ozarow Mazowiecki de Polonia e o citado IES Número 1 local.

 

Ruiz Rivas felicitou aos centros participantes no proxecto Free Minds, Open Hearts e resaltou as cualidades pedagóxicas do mesmo. “Ter a mente libre de prexuízos é o que despois te posibilita coñecer e achegarte aos demais“, afirmou. O rexedor desexou aos visitantes unha grata estancia no municipio.

 

Anton Schicker agradeceu a invitación e manifestou a honra que supón para todos os integrantes no proxecto Comenius Regio poder terminar os traballos deste programa en Ribeira.







Posted via email from Certo.gl, o xornal dixital de Barbanza e Noia

Sanidade: a asociación SOS Sanidade Pública advertiu onte dos recortes e copagos que o PP anunciou hoxe


Entre as medidas anunciadas está o pago de un euro por receita e facerlle pagar aos xubilados os medicamentos, algo que nunca ningún goberno ousou facer

Barbanza, 18 de abril de 2012. Logo de negar reiteradas veces que o fose facer, tanto en campaña como logo de gañar as eleccións, o Partido Popular anunciou hoxe, a través da súa ministra de Sanidade, Ana Mato, que se instaura o copago -inda que ela, nesa neolingua que emprega o actual executivo, que tamén lle chama "activos ocultos" ao "carto negro" de toda a vida, di que non é tal- na sanidade. Hai menos dun mes, nun par de liñas dunha nota de prensa, o PP tamén recortou 10.000 millóns en Sanidade e Educación, tratando de convencernos de que os servizos prestados non se ían resentir. A asociación SOS Sanidade Pública viña advertindo disto dende hai tempo. Esta foi a nota que se leu onte en todas as reunións das diversas plataformas que compoñen esta asociación, entre as que hai unha de Barbanza:

"A crise, a redución do déficit e a insostibilidade do sistema sanitario público están sendo utilizados como coartada para introducir recortes e privatizacións na sanidade galega. Con todo, o noso sistema é dos máis baratos da Unión Europea (o gasto por persoa é de 2.049 dólares,  fronte aos 2.870 dólares da UE en poder paritario de compra), e a nosa presión fiscal é das máis baixas (34% do PIB fronte a 44% da UE), cun nivel de fraude que alcanza o 25% do PIB (90.000 millóns de euros).

Doutra banda o crecemento do gasto sanitario ten pouco que ver coa demanda de asistencia da poboación que está relacionado coa organización, funcionamento e orientación do sistema; coa falta de planificación; coa descoordinación entre hospitais e atención primaria; co abuso das tecnoloxías diagnósticas e terapéuticas (un 23% máis alto que a media europea) e da prescrición farmacolóxica; coa parasitación do sector público polo privado; e co abandono da atención primaria, da promoción da saúde e da prevención da enfermidade.

Despois de que a Xunta de Galicia reducira o orzamentario en 300 millóns o Goberno central pretende que fagamos máis recortes para cumprir co seu obxectivo de reducir o gasto sanitario en 7.000 millóns de euros, a concretar no Consello Interterritorial do próximo día 18 de abril cos conselleiros dos servizos de saúde autonómicos.

Entre as medidas que se están aplicando ou adiantado, a modo de globos sondas, polos responsables de algunhas CCAA e polos ministros de economía e sanidade están:

       Incrementar o copago farmacéutico segundo nivel de renda.

       Acabar coa gratuidade das receitas dos pensionistas.

       Copago por consultas e probas diagnósticas.

       Recorte da carteira servizos ofertados pola sanidade pública.

       Promoción de seguros complementarios con desgravacións fiscais.

       Colaboración Público Privada para construír e xestionar as novas infraestruturas.

       Privatización de servizos sanitarios (radioloxía, laboratorios; servizos clínicos..) e non sanitarios (administración, centrais de chamadas, alimentación, limpeza, hixiene, informáticas, avaliación tecnolóxica, planificación, centrais de compras, etc.)

       Eliminar fondos de cohesión interterritorial.

       Peche de servizos sanitarios: Hospitais e plantas, urxencias, centros de de Saúde e consultorios.

       Eliminar a actividade asistencial dos hospitais pola tarde.

       Redución de persoal e de gastos de persoal: Xubilacións obrigatorias aos 65 anos sen reposición das vacantes, despedimento ou redución do horario do persoal interino, precarización de contratos, redución salarial, laboralización, etc.

A gran maioría destas medidas atentan contra os alicerces fundamentais do noso sistema sanitario como son a universalidade, a accesibilidade, a equidade, o carácter redistributivo, a calidade e a eficiencia, e terán graves consecuencias para a maioría da poboación que recibirá unha atención de menor calidade, e terá dificultado o seu acceso á asistencia que será diferente segundo o seu nivel de renda, pagará máis por menos e deberá procurarse seguros complementarios para ser atendido polos problemas de saúde excluídos do sistema público.

Fronte á política de recortes e privatizacións é posible outra, baseada na mellora da eficiencia e o uso racional dos recursos, para mellorar a calidade e seguridade da atención sanitaria e os niveis de saúde da cidadanía:

Concepto

Recadación copago

Aforro racionalidade

Reducir 50% os medicamentos innecesarios >65 anos

70  millóns

83 millóns

Reducir 50%  ingresos por reaccións adversas aos fármacos

23 millóns

66 millóns

Reducir 30% os efectos adversos durante a hospitalización

0 millóns

27 millóns

Reducir en 1/3 as estancias inadecuadas

0 millóns

263 millóns

Reducir 10% frecuentación  a urxencias hospitalarias non ingresadas

9,4  millóns

23 millóns

Traspasar o 25% das consultas hospitalarias a AP

44 millóns

60 millóns

Reducir en 1/3 as RM e TC innecesarios

4,5  millóns

14,8  millóns

Integración do mutualismo administrativo no SNS

4,5 millóns

12,5 millóns

Total

155 millóns

549,3 millóns

 

Queremos advertir ao presidente da Xunta de Galicia Sr Núñez Feijoo que non imos tolerar que o Consello Interterritorial adopte decisións ou medidas que deterioren ou privaticen o noso sistema sanitario que ten o apoio da grande maioría da poboación e esiximos á Conselleira de Sanidade Rocío Mosquera que defenda o carácter público da nosa sanidade, que se opoña a calquera medida de copago, e que se manteñan os fondos de cohesión interterritorial que compensan a nosa menor capacidade de recadar os impostos que financian a sanidade pública galega

Desde SOS Sanidade Pública facemos un chamamento á cidadanía galega para dar unha resposta contundente no caso de que o Consello Interterritorial do día 18 de abril adopte calquera medida que deteriore, aínda máis, o Sistema Sanitario Público Galego.

SOS Sanidade Pública

Santiago, 17 de abril de 2012

Posted via email from Certo.gl, o xornal dixital de Barbanza e Noia

A Pobra: o Bng pide transparencia nas contratacións do Concello

17.04.12.-STDE. TRANSPARENCIA E OBXECTIVIDADE SELECCIÓN PERSOAL.doc Download this file


O escurantismo e nepotismo do goberno de Isaac Maceiras (á esquerda na imaxe) é denunciado de cote pola oposición, sen resultado algún


A Pobra, 18 de abril de 2012. O BNG presentou onte no rexistro do Concello un escrito e pronunciouse sobre a situación que se vén dando no Concello nos últimos anos respecto das contratacións de persoal, nomeadamente nos contratos temporais de verán.
 

"Diante das convocatorias de subvencións das distintas administracións para este ano 2012, que xa se están a producir, solicitámoslle á Alcaldía a transparencia e obxectividade nas contratacións que non tivo noutras ocasións, así como que se respecten e garantan os principios de igualdade, mérito e capacidade e que sexa riguroso, sobre todo neste momento económico e social, cos dereitos de todas e todos os cidadáns", explican os nacionalistas pobrenses.


Antes, en Certo:


Denuncia: nepotismo e enchufismo descarado, di o Psoe


Política na Pobra: prioridades que xa non lle importan ao alcalde

Posted via email from Certo.gl, o xornal dixital de Barbanza e Noia

Boiro: inauguración da remodelada rúa Bao, nun claro ambiente pre-electoral

Alcalde_dieste_e_javier_guerra

  • Javier Guerra visitou onte as obras desa rúa, na que se invisten 120.00 euros

  • Forma parte esta actuación do Plan Ágora- Agora Re-Comercia, para reactivar a actividade comercial na zona

Boiro, 18 de abril de 2012.- O conselleiro de Economía e Industria, Javier Guerra, visitou onte o concello de Boiro, onde inaugurou as obras de remodelación da rúa Bao, que servirán para reactivar a actividade dos establecementos comerciais da zona con novas infraestruturas, ao mellorar a súa accesibilidade e facela máis atractiva para os cidadáns e os visitantes.

Guerra, que, como se xa se fosen a celebrar eleccións de xeito inminente, estivo acompañado pola delegada da Xunta na Coruña, Belén do Campo, e a directora xeral de Comercio, Nava Castro, así como polo alcalde da localidade, Juan José Dieste, salientou que esta iniciativa, á que a Consellería aportou preto de 120.000 euros e que contou cun investimento total próximo aos 155.000 euros, enmárcase dentro do Plan Ágora- Agora Re-Comercia, onde se recolle a estratexia global do Goberno galego en materia comercial.

O titular de Economía e Industria lembrou que “a protección e modernización do pequeno comercio é un dos eixos estratéxicos da actuación da Consellería” e destacou que o departamento que dirixe leva destinado ao apoio do sector comercial na comarca do Barbanza axudas por máis de 2 millóns de euros no que vai de lexislatura, que supoñen a mobilización de investimentos por máis de 3 millóns.

Estas axudas -sinala a nota propagandística da Xunta- foron encamiñadas a desenvolver as liñas estratéxicas do Plan Ágora, entre as que se encontra o apoio aos mercados e prazas de abastos, que a Xunta quere posicionar como líderes na venda de produto fresco. Entre outras medidas, tamén serviron para impulsar o asociacionismo comercial, ou para mellorar as infraestruturas comerciais en colaboración cos Concellos, unha liña de axudas nas que se enmarca a remodelación da rúa Bao.

Posted via email from Certo.gl, o xornal dixital de Barbanza e Noia

Noia: este xoves 19 de abril, na Aula de Saúde, "Dermatoloxía e patoloxía da pel", ás oito da tarde

https://novasdenoia.files.wordpress.com/2012/04/dermatoloxc3ada.jpg
Será no salón de actos do instituto "Virxe do Mar"

Pode que tamén lle interese:


San Marcos: programa completo das festas e feiras


San Marcos: programación da Sociedade Liceo de Noia


Cursos Cruz Vermella: para primeiros auxilios en bebés e nenos


Pintura: o V Certame "Sesé" ao aire libre é o sábado 21 de abril

Posted via email from Certo.gl, o xornal dixital de Barbanza e Noia

A Pobra: denuncian o desleixo en que se atopa o patrimonio, en concreto o castro da Croa de Postmarcos


Cartel de Arousa Norte onde se alude ao castro esquecido polo equipo de goberno

A Pobra do Caramiñal, 18 de abril de 2012. Un grupo de amigos e veciños da Pobra do Caramiñal denuncian "o abandono do patrimonio arqueolóxico no noso Concello, e sobre todo, a pasividade que durante todo este tempo o goberno do PP mostrou pola recuperación e posta en valor dos importantes vestixios arqueolóxicos cos que conta a Pobra do Caramiñal".

"Calquera achado do noso pasado é importante -explican-: o castro da Croa de Postmarcos, salvo, algunha que outra referencia feita sobre el por Xerardo Agrafoxo, no seu libro Arqueoloxía do Barbanza, ou algún artigo do estudoso barbanzá, Domingo Regueira, quen tamén constata a súa existencia, non hai nada. Ata o día de hoxe, ningunha institución nin ningún organismo se interesou por tomar medidas de protección no seu entorno, e evitar o seu progresivo deterioro. O castro da Croa parece vivir unha existencia máis virtual ca real: algúns pensarán, existirá? Dende logo, o goberno local tampouco deu mostras de interesarse por este importantísimo xacemento castrexo, localizado no mesmo cerne da parroquia de San Isidro de Postmarcos".
 

    Segundo explican na nota, "o castro da Croa, a primeira vista, é un asentamento que chama poderosamente á atención pola súa configuración portentosa, cunha estrutura arquitectónica que nos fai lembrar de inmediato un asentamento militar inexpugnable. Posiblemente, e sen dúbida, esteamos a falar duns dos legados arqueolóxicos máis excepcionais do Barbanza". E proseguen: "Queremos denunciar este abandono, e tamén lembrarlle ao goberno da Pobra do Caramiñal, que logo de trece anos gobernando, seguimos sen unha carta arqueolóxica que nos permita poder protexer o noso patrimonio histórico. Pensamos que a mellor arma para abrirse camiño no futuro é protexer o pasado. Facemos un chamamento ás institucións, sobre todo a Patrimonio, para que interveña o máis axiña posible sobre este importante xacemento castrexo, herdanaza e libro do noso pasado". Asinan Manuel Teira e un grupo de amigos.


Do desleixo do patrimonio en A Pobra do Caramiñal e da continua cementación de toda a costa virxe que queda fala o profesor Manuel Gago no seu blog Capítulo 0 dende hai anos -e denuncia tamén, todo hai que dicilo, o pasotismo dos veciños-:


Proxecto de paseo ameaza praias virxes na Pobra


Desfeita no castro de Punta Ostreira, na Pobra


Un guerreiro en Punta Ostreira



 

 

Posted via email from Certo.gl, o xornal dixital de Barbanza e Noia

Twitter

Related Posts with Thumbnails Banner: Regale selva tropical