Mar: o Bng pide á Unión Europea que se pronuncie sobre as gaiolas de salmón da Ría de Muros e Noia

• A formación frentista defende que proxectos de acuicultura industrial non deben perxudicar a pesca e marisqueo artesanais

A instalación das gaiolas de salmón provocou mobilizacións de afectados na ría de Muros e Noia   

Barbanza-Noia, 13 de xaneiro de 2013. O BNG demanda que a Comisión Europea se pronuncie sobre a posible instalación de 20 gaiolas para a cría industrial de salmón na Ría de Muros-Noia, a través dun proxecto que pretende levar a cabo a multinacional North West Food, cunha produción estimada superior ás 5.000 toneladas anuais e que, a día de hoxe, xa posúe dúas gaiolas experimentais no medio deste ecosistema mariño.

Tras un encontro coas asociacións ecoloxistas e do sector pesqueiro que se opoñen a este proxecto, -Asoar-Armega, Adega, Verdegaia, Greenpeace, Oceana, Salva a Selva, Salvemos Montefero e Ecoloxistas en acción-, a eurodeputada nacionalista, Ana Miranda, considera necesario que o Executivo da UE se pronuncie sobre se un proxecto destas características cumpre a normativa comunitaria e os principios que rexen a Política Pesqueira Común (PPC).

“Considerando que as dúas gaiolas experimentais de cría de alevíns de salmón xa instaladas rexistraron unha mortaldade do 82% fronte ao 6% estimado como razoable, segundo os datos da propia empresa, non se cumpre o principio da PPC que defende unha explotación sustentable dos recursos acuáticos vivos e da acuicultura”, salienta Miranda.

Neste sentido, o BNG concorda cos colectivos críticos na “opacidade” da Xunta, “que agocha aspectos clave como o impacto medioambiental, a afectación do fondo e das augas mariñas e o perigo que a cría de salmón pode ter nas especies autóctonas, todo isto sumado ao inasumible nivel de mortaldade”, explica a eurodeputada.

As gaiolas experimentais poden verse enfronte á praia de San Francisco en Muros

“Un proxecto destas características non pode aprobarse de costas ao sector da pesca artesanal, sen exposición pública de toda a información para que os interesados podan alegar e, desde logo, non pode aprobarse sen a realización do correspondente estudo de impacto ambiental, cando todo indica que sería negativo”, recalca Miranda.

A eurodeputada nacionalista tamén avanzou que, como membro titular da Comisión de Peticións do Parlamento Europeo, vai propor que unha delegación dos colectivos pesqueiros e ecoloxistas que denunciaron este proxecto acudan a Eurocámara para explicar directamente os feitos e as consecuencias da cría intensiva de salmón na Ría de Muros-Noia, tanto en termos de preservación deste ecosistema mariño, como en termos socioeconómicos, tendo en conta que a Ría de Muros-Noia alberga catro polígonos de bateas de produción de mexillón e dunha importante frota adicada a pesca artesanal e ao marisqueo tradicional.

“Pensamos que este proxecto non é sustentable nin desde a perspectiva medioambiental, nin económica, xa que incluso pode destruír emprego nos sectores da pesca artesanal e do marisqueo da zona”, conclúe Miranda.

En agosto de 2008, a Xunta aprobou a instalación de dúas gaiolas experimentais para a cría industrial de salmón atlántico, especie allea as Rías galegas, que se instalaron inicialmente na Ría de Arousa. En 2011, as gaiolas foron trasladadas a súa ubicación actual na Ría de Muros-Noia. Ao longo do ano pasado diversos temporais arrastraron restos de gaiolas ata portos e praias, que houbo que retirar.

Posted via email from Certo.gl, o xornal dixital de Barbanza e Noia

A Pobra: outra polémica comida de Nadal

• Ante as críticas da voceira socialista, o alcalde asegura que a comida págaa enteira o restaurante Chicolino de Boiro, concesionario por 20 anos do restaurante que está enriba do mercado municipal
• Na comida, en teoría para traballadores do Concello, hai moita xente á que nunca se viu traballar nel, ademais de integrantes da prensa local
  

Captura de pantalla do Facebook de OQPDAD

A Pobra do Caramiñal, 27 de decembro de 2012. Por se non abondase coas polémicas das comidas da terceira idade, que ano tras ano se producen por seren consideradas un despilfarro só entendible como busca de votos no caladeiro deste segmento de poboación, desta volta o Concello da Pobra voltouna a armar coa de Nadal.

O pasado xoves, 20 de decembro, celebrouse unha comida de Nadal no restaurante Chicolino de Boiro. A ela asistiron, segundo conta o dixital pobrense "O que pasa día a día", máis dun cento de traballadores do Concello da Pobra do Caramiñal "que desfrutaron de boa compaña ata ben entrada a tarde". Ata aí, todo "normal", dentro do que cabe, pois non parece moi lóxico que unha comida dos traballadores dun concello se faga no municipio veciño, deixando o beneficio económico fóra. Mais a lebre non saltou pola noticia do dixital pobrense, que é o que aporta as fotos na rede, senón pola reacción do alcalde da Pobra, o conservador Isaac Maceiras, ás críticas no Facebook da portavoz socialista, María Teresa García Guillán. Tanto lle molestaron que respostou por dúas vías: o seu blog da alcaldía e a web do PP da Pobra, ademais de rebotalo no seu facebook persoal que intitula "A Pobra Caramiñal" e no que sae a súa foto como se a súa faciana representara a todo o municipio.

Na réplica do alcalde chama a atención a explicación sobre esa estrana cláusula nun prego de condicións dunha concesión pública:

"Para quen non o saiba, cousa que ela se está informada, os traballadores e traballadoras da Pobra, así coma o Goberno Municipal, todos os anos celebran un xantar de Nadal pagado integramente pola empresa Chicolino.

E moitos, preguntaranse, e por qué a empresa Chicolino lle paga unha comida. Pois o motivo é ben sinxelo. Cando esta empresa concursou para a concesión do Restaurante do Mercado Municipal, dentro do seu prego de condicións, ofrecía unha comida de Nadal para todos/as os/as traballadores/as do Concello da Pobra do Caramiñal.

Polo que todos os anos cando todas as empresas celebran o Nadal cos seus empregados, no Concello tamén o celebramos todos xuntos, sen que isto supoña gasto algún para as arcas municipais, senón o de celebrar un día de ledicia todos os/as compañeiros/as xuntos".

Isto en si mesmo é un escándalo: hai unha cláusula nesa concesión -sería ben que o alcalde a amosase, inda que é ben complicado para a oposición pedir papeis nese concello- para darlle unha comida de gañote aos traballadores do Concello (incluídos políticos) a costa dos cartos de todos (a concesión é pública, é unha cesión dunha instalación do Concello, na praza de abastos, para poñer un restaurante). E inda se permite na web do PP darlle leccións á oposición por denuncialo:

"Polo que sí señora Teresa os traballadores e traballadoras municipais, xunto cos representantes dos grupos políticos do BNG e do PP, celebran todos xuntos unha comida de Nadal, á que vostede non asiste, porque non quere ou porque igual non ten con quen compartila, xa que o seu lema é enfrontarse a todos e todas as veciñas e veciños deste Concello e non compartir momentos de ledicia con eles.

De todas formas e seguindo como noso lema de concordia e confraternidade desexámoslle que o vindeiro ano entre no seu corazón con máis solidariedade, con máis concordia e con menos enfrontamentos.

Felices Festas!!"

En Certo preguntámonos:

1. Será legal, pero é lexítimo que se empregue unha concesión municipal para beneficiar só aos traballadores do Concello e prensa afín?
   
2. Onde está a ética de empregar os cartos de todos, nestes tempos "difíciles para todos" como o mesmo Concello da Pobra se encarga de lembrarnos na súa postal de Nadal, en pagarlle unha comida nun restaurante de Boiro a máis de cen persoas?
   
3. A terraza de Chicolino comezou a funcionar en 2006: como tardamos tanto en enterarnos, ou tardou tanto en aclarar Isaac Maceiras, que esta comida de Nadal -só para traballadores do Concello- era pagada por esta empresa de Boiro?
   

Unha concesión moi "mimada"

O restaurante "A Terraza de Chicolino" está nunha situación privilexiada na Pobra, enriba do mercado municipal e fronte á praia e o porto. Nalgunha web sobre turismo e gastronomía chegan a calificar as súas vistas como "as mellores de Barbanza". A concesión foi aprobada en maio de 2005 e a empresa Chicolino acordou investir 250.000 euros e contratar a 14 persoas. O restaurante ten zona de comedor de 233 metros cadrados e unha terraza de 91. Ao seu interior pode accederse dende a praza de abastos, pero tamén hai entrada independente, de xeito que o horario do establecemento hostaleiro non estea marcado polo do mercado. Comezou a funcionar a mediados de 2006.

Neste mercado municipal da Pobra, que está noviño, anda cada pouco a meter cartos a Deputación e a facer campañas para promocionalo, do cal, evidentemente, benefíciase o restaurante (cos cartos de todos tamén).

Concesión que reporta 8.000 euros ao ano

Segundo consta nos orzamentos 2012 e 2011, ao municipio da Pobra repórtalle en ingresos por cafetería do mercado municipal de 8.000 euros/ano. Algo ben barato se temos en conta a superficie da que dispón, o lugar privilexiado no que está e as continuas melloras que pagamos todos cos cartos da Deputación.

E quen é Chicolino? A empresa máis coñecida da zona polo seu negocio de vodas e comunións en Exipto (Abanqueiro, Boiro). E que tamén ten dende este mesmo ano uha empresa "auxiliar" que se chama Happy Park e fai parques infantís, pistas de pádel e instalacións de ocio semellantes. A data de constitución da empresa foi o doce de abril deste ano 2012 e, vese que naceu con boa "estrela" pois este mesmo verán poñía en Boiro (concello gobernado tamén polo PP con maioría absoluta como A Pobra) un dos seus parques, que custou máis de 60.000 euros.

 

Como se observa, parte deste parque foi pagado pola Deputación con cargo ao plan PAC -2 (PLAN ANTICRISE), inda que non está claro se a crise é de Happy Park ou do Concello de Boiro, o máis endebedado da zona logo da obra faraónica do Concello, que foi derrubado e feito de nova planta polo ex alcalde Jesús Alonso, conserveiro conservador dono de Jealsa-Rianxeira e antigo empregador do actual alcalde, Juan José Dieste.

 

Posted via email from Certo.gl, o xornal dixital de Barbanza e Noia

Ribeira: a Asociación Galega de Onomástica denuncia que o Concello segue a quebrar a lei a pesar das queixas ao Valedor sobre o topónimo

O Concello obriga a toda institución que traballa con el a empregar a forma deturpada e equivocadamente aprobada por culpa do finado cronista da vila, García Bayón

A Xunta emprega correctamente o topónimo na súa cartelería de estradas, pero emprégao "ao xeito do Concello" na Rede -vaia paradoxo- de Dinamización Lingüística, anunciando o programa FalaRedes

Ribeira, 26 de novembro de 2012. Está acontecendo dende hai décadas (nada menos que dende 1983, en que se aprobou o lei que fixa a Toponimia de Galicia), pero convén que se recorde de cando en vez. Desta volta foi a Asociación Galega de Onomástica, que ten entre os seus socios ao presidente da Real Academia Galega, Méndez Ferrín, ou a prestixiosos latinistas e intelectuais galegos como Xesús Ferro Ruibal, quen lle recordou ao Concello de Ribeira que está a cometer un delito, pois non cumpre coa Lei de Toponimia.

Segundo explica nunha entrada na súa web hoxe mesmo, titulado "A toponimia desvalida":

"Un cidadán acode ó Valedor para que inste a un concello a cumprir a lei: «Os topónimos de Galicia terán como única forma oficial a galega. Corresponde á Xunta de Galicia a determinación dos nomes oficiais dos municipios…»

O Valedor abre un expediente.

O Valedor escríbelle ó concello: «Lémbroche que tes que cumprir a lei».

O concello non responde.

O Valedor pregúntalle ó concello:» ¿Vas responder o que che preguntei?»

O concello non responde.

O Valedor vólvelle preguntar unhas cantas veces: «¿Vas responder o que che preguntei?»

O concello, por fin, responde: «Non me gusta ó que me obriga a lei e, como xa pedín que o puxesen como a min me gusta, non vou cumprir a lei».

O Valedor sentenza: «O concello acepta parcialmente o meu recordatorio».

O Valedor pecha o expediente.

A toponimia: ten quen a valla?"

O Concello é o de Ribeira e o último documento do Valedor sobre este asunto é o que segue:

valedor_do_pobo_Ribeira.pdf Download this file

Como xa explicamos varias veces en Certo, e aclaran os da Asociación Galega de Onomástica, Riveira co v é unha falacia, unha deturpación que, curiosamente, só se emprega en Santa Uxía. Non atoparán outra "Riveira" en toda Galicia nin en países da lusofonía, onde podemos atopar Ribeira do Pombal, por exemplo, en Brasil, ou Ribeira Grande en Azores (Portugal).

A Xunta, na que goberna a misma cor política -a azul- que no Concello, faise a sueca. E, con toda a faciana -pétrea, que dixo un día Feijóo sobre o pobo galego nunha inauguración na Cidade da Cultura- advirte á Wikipedia, a enciclopedia en liña máis grande do planeta, para que respete os topónimos en galego. Mais ao Concello de Ribeira nin chío. Un Concello no que goberna Manuel Ruiz Rivas, un alcalde que, de ser certo o que contou a presidenta de Galicia Bilingüe, Gloria Lago, paga do seu peto publicidade nunha revista que se adica a denostar as leis de Toponimia e Normalización Lingüística aprobadas polo Parlamento de Galicia no seu día. Trátase de "Vosotros", da que até o de agora só saíu un exemplar e do que xa informamos en Certo no seu día.

Teimudez instalada xa socialmente

Riveira con v gañaron o certame de comparsas de 2009

Mais como aconteceu co topónimo da Coruña, que o turrón e presunto socialista Paco Vázquez aseguraba que tiña que levar o L no artigo e moita poboación o defendía, en Ribeira sucede o mesmo. Tanto é así que hai unha asociación chamada "Riveira se escribe con v" (sic) que ademais adoita gañar os concursos de comparsas no entroido. Mais con iso e todo, esta asociación e o Concello están a comportarse como delincuentes, ou sexa, como alguén que comete un delito. Como ben explica o dicionario da Real Academia Galega, delito é o quebrantamento da lei. E ten un sinónimo: malfeito.

Posted via email from Certo.gl, o xornal dixital de Barbanza e Noia

Outes: polémica e oposición veciñal ao peche dunha farmacia en Ceilán

• Levan máis de tres mil sinaturas contra este peche, pois é un establecemento do que se benefician non só os de Outes, senón tamén veciñanza de Negreira e Noia

PonteNafonso é o lugar contiguo a Ceilán e son os seus veciños os que promoven esta vindicación da farmacia. Agora uníronse moitos máis.

Outes, 26 de novembro de 2012. Unha asociación veciñal do municipio coruñés de Outes reuniu máis de 3.000 sinaturas para tentar frear a orde de peche que pesa sobre unha farmacia situada no lugar de Ceilán, cerca do hospital abandonado poucos anos despois de inaugurarse. Dada a súa proximidade ao límite municipal cos concellos de Noia e Negreira, son moitos os habitantes alleos a Outes que se adheriron á petición por sentirse afectados como usuarios, temerosos de perder este servizo e solidarios ante o que consideran unha inxustiza.

Secuencia histórica do caso

Pascual Rosón López abriu as portas do seu negocio hai agora oito anos, despois de serlle concedida a licenza polo Colexio Farmacéutico Provincial (e confirmada polo Consello Xeral de Colexios Oficiais de Farmacéuticos de España), ao cumprir os requisitos de ratio poboacional e distancia das outras farmacias, situadas no núcleo urbano de Serra de Outes, a 4 quilómetros. Pero xa nese momento empezaron os problemas: dous farmacéuticos da vila non estaban conformes e presentaban un recurso xudicial. O Colexio Farmacéutico obrigaba a Pascual Rosón a abrir a farmacia, ou perdería a súa licenza. A súa intención era instalarse en Ponte Nafonso, pero un novo recurso dos dous farmacéuticos outenses obrígao a facelo en Ceilán. 

En 2005, coincidindo co nacemento dos seus fillos xemelgos, Pascual e os seus opoñentes acoden aos tribunais. A sentenza ditamina que non cumpre un dos requisitos: hai menos de 2.000 habitantes. O propio xuíz entende que a dispersión rural é propia de Galicia, pero obriga ao peche por non acadar a ratio poboacional. A apelación ao Tribunal Supremo non foi admitida. Aínda así o Tribunal Superior de Galicia admite a inexecución da sentenza, por atoparse xa o local no mapa farmacéutico galego, e propoñen que a Xunta de Galicia saque a concurso público a explotación da farmacia. Os outros dous boticarios volven solicitar a execución da sentenza; o mesmo Tribunal Superior de Galicia falla a favor deles, pero invitaba á Consellería de Sanidade a promover a inexecución da sentenza en defensa do interese público da oficina da farmacia.

Hai menos dun ano presentouse unha segunda solicitude de inexecución de sentenza, esta vez ofrecéndolles 30.000 euros a cada un dos outros dous contendentes (isto é, unha execución substitutiva por diñeiro), pero estes néganse. De nada vale que Pascual lles diga que verán incrementadas as gardas mais non os clientes. A xuíza recibe un comunicado da Xunta de Galicia: en Outes sobran farmacias. Ante a negativa ao acordo económico ordénase o peche. A data límite sería o 27 de decembro.

Mobilización veciñal

Cando isto se fai público a Asociación de Veciños de Ponte Nafonso, lugar contiguo a Ceilán, mobilízase e comeza a pedir sinaturas. Reúnense co alcalde para que medie no asunto. Pero a denuncia non se retira. A Asociación de Veciños de Cuns únese á de Ponte Nafonso en busca de solución, e reciben a adhesión das do Freixo e San Ourente.

Pascual Rosón López agradece o apoio recibido dos que foron os seus clientes durante estes oito anos, así como dos demais farmacéuticos da zona. Desexa que polo menos os veciños consigan que a botica saia a concurso público e non perdan así o seu servizo. E lamenta que esvaeza o soño que tivo desde neno. Se nada o remedia, terá que enfrontarse máis indefenso ás súas débedas hipotecarias e, igual que a súa empregada, buscar un novo traballo para poder criar os seus dous fillos pequenos.

Peche o 23 de novembro logo de ameaza de multa

Na tarde do día 22 de novembro os veciños (que non entenden as razóns desta suposta ilegalidade) reuníronse para organizar futuras mobilizacións, pero ese mesmo día un burofax ordena o peche inmediato baixo ameaza de multa. O 23 a farmacia de Ceilán pecha as súas portas. Xusto o día no que se entregan na Consellería de Sanidade, quizais xa tarde, as 3.000 sinaturas.

Posted via email from Certo.gl, o xornal dixital de Barbanza e Noia

Ribeira: piden no Congreso asistencia diplomática urxente ao armador do "Eros", retido en Liberia dende febreiro

• A deputada pobrense do BNG, Rosana Pérez, quer saber se o Executivo realizou algunha xestión para axudar a Manuel Alberto Suárez e á tripulación de 19 persoas que non poden sair do país africano

O "Eros" ten bandeira portuguesa pero é propiedade do armador de Ribeira M.A. Suárez

Ribeira, 20 de novembro de 2012. A deputada do BNG no Congreso, Rosana Pérez, rexistrou unha iniciativa parlamentar na Cámara Baixa na que pide ao Goberno que axude e dea asistencia diplomática urxente ao armador de Ribeira, Manuel Alberto Suárez, propietario do “Eros” retido desde o mes de febreiro en Liberia.

Rosana Pérez pregunta ao Executivo se está  atento á preocupante situación do barco pesqueiro “Eros” de bandeira portuguesa pero propiedade do armador ribeirense. “Que xestións realizou para axudar a este cidadán español que alega ter sido vítima dun engano na cuestión do prazo de duración da licenza de pesca”.

“Vai o Goberno a interesarse pola difícil situación deste armador e os 19 membros da súa tripulación que xa están nun estado preocupante desde o punto de vista humano, económico e xurídico? Considera o Goberno que goza das garantías xurídicas pertinentes cando lle cambiaron varias veces a contía da sanción?”, son algunhas das cuestións que dirixe ao Executivo.

O Goberno debe preocuparse pola situación de Manuel Alberto Suárez

Rosana Pérez demanda ao Executivo que fale co armador galego e coa súa familia a fin de lle facilitar toda a axuda necesaria. A deputada do BNG descrebe na súa iniciativa este caso: “desde o pasado mes de febreiro permanece retido en Liberia o pesqueiro “Eros” do armador galego, Manuel Alberto Suárez e cunha tripulación de 19 membros. Foron acusados de sabotaxe económico con intención de pesca ilegal.

A parlamentar nacionalista pón de manifesto que o armador ribeirense alega que cando decidiu faenar en Liberia mercou por 400.000 dólares unha licenza privada a unha das axencias marítimas autorizadas polo Goberno liberiano, que exixe facer os trámites con empresas de alí. Sinala o propietario que foi enganado en canto aos prazos da licenza, de feito que en febreiro estaba caducada.

O armador nega que a licenza fose falsificada, e que actualmente a axencia que fixo os trámites está desaparecida. Rosana Pérez traslada ao Goberno a “lóxica preocupación por un barco que leva meses retido en Monrovia, á cuestión humanitaria únese o tema económico posto que se lles piden grandes sumas de cartos por diversas sancións. Viven no barco e as condicións son difíceis. Por riba se aproximan as datas de Nadal e non se poden mover porque lles retiraron os pasaportes.

Ademáis, Rosana Pérez subliña que o propietario do barco pediu asistencia diplomática pero sen moito éxito. “A tripulación do Eros e o armador síntense desprotexidos e abandonados á súa sorte nun páis lonxano e envolto nun auténtico lío xudicial".

19-11-12-situación_armador_tripulación_EROS_retenidos_Liberia.pdf Download this file

https://twitter.com/Certo/status/270964448288714752

Ribeira: programación polo Día Internacional para a Eliminación da Violencia de Xénero post.ly/9omIA

— Certo (@Certo) November 20, 2012

Ribeira: o alcalde pide á embaixada de Estados Unidos que non peche a axencia consular na Coruña post.ly/9olZe

— Certo (@Certo) November 20, 2012

Posted via email from Certo.gl, o xornal dixital de Barbanza e Noia

Noia: o Concello resolve o contrato da piscina e, logo do pleno deste mes, pasará a dirixir a piscina

• Xa se traballa co día 12 de decembro como data de reapertura, tras arranxar as deficiencias detectadas
• O Concello faise cargo dos traballadores da concesionaria polo momento

Entre as deficiencias denunciadas, a incorrecta temperatura da auga

Noia, 16 de novembro de 2012. Segundo informa hoxe o Concello de Noia en nota de prensa, "unha vez finalizado o prazo dado desde o Concello de Noia á empresa que ten a concesión da piscina municipal, os técnicos municipais comprobaron o incumprimento das órdenes dadas de realizar as obras de mantemento precisas e de reapertura da instalación.  Ante esta situación (previsible dada a pasividade da empresa), desde o Concello tomáronse distintas medidas:

1. Desestimáronse os recursos presentados, ademais iniciouse a desestimación da solicitude de desequilibrio económico 
2. O máis importante: iniciouse o expediente de secuestro da concesión para o restablecemento inmediato do servizo, e ao mesmo tempo iniciouse o proceso de resolución contractual".

Os trámites a seguir agora son a notificación á empresa da incoación do inicio destes expedientes e audiencia antes de levalo ao pleno extraordinario que se celebrará na última semana do mes.  Unha vez se celebre o pleno, o concello pasará a dirixir a piscina, facendo as obras precisas para reabrir a piscina a primeiros de decembro, "previsiblemente o mércores 12 de decembro".

Segundo fontes municipais, "o secuestro da concesión é unha medida moi excepcional, onde o concello se fará cargo da concesión, facéndose cargo temporalmente de todas instalacións, materiais e incluso traballadores. Mentres dure o secuestro (que ten un máximo de dous anos, pero que a previsión é que dure ata a resolución do contrato), os traballadores seguirán mantendo a relación contractual coa empresa, pero baixo a dirección do concello a través do interventor técnico que se designe en representación da administración municipal".

En Boiro, por causas semellantes, a piscina leva pechada dende xullo

Tamén aclara o Concello que "as irregularidades detectadas son moitas, de feito no 2011 xa se lle abriron expedientes sancionadores á empresa en varias ocasións. Os principais erros son os incumprimentos en mantemento das instalacións, que culminou coa desatención á orde de realizar as obras precisas en 15 días e reabrir o servizo, pero xúntanse outros incumprimentos como non ter o persoal axeitado segundo contrato, mala atención aos usuarios, eliminación do servizo de raios UVA, supresión de actividades que debería realizar, temperatura incorrecta na auga e un longa lista de irregularidades".

E o vídeo que o peta no Youtube é da Costa da Morte: GHAÑAN STYLE (Galician Parody Gangnam Style): youtu.be/8Gqfir1-MlA vía @quepasanacosta

— Certo (@Certo) November 16, 2012

.@matrujil fuiste ministra de Vivienda, pero dónde has dejado tu alma socialista?

— Elena Valenciano (@ElenaValenciano) November 16, 2012

Colaboración: "Nada que ver con nós", por Javier Ferreirós post.ly/9nIvd

— Certo (@Certo) November 16, 2012

 

 

Posted via email from Certo.gl, o xornal dixital de Barbanza e Noia

Noia: a piscina reabrirá en decembro se a rescata o Concello

• É "previsible" que haxa que rescatar a concesión e o Concello mesmo tilda de "ridículos" os argumentos e alegacións dados dende a empresa que a leva ata agora, con informes técnicos "chapuceiros"

Noia, 6 de novembro de 2012. Segundo informa hoxe o Concello de Noia en nota de prensa, "ante o previsible incumprimento da orde dada á concesionaria da piscina para que arranxe as intalacións e abra antes do 16 de novembro, o Concello está traballando na adopción de medidas administrativas para garantir a reapertura en condicións da instalación municipal a primeiros de decembro".

Calcando a situación de Boiro, que o Concello noiés non vai permitir

Polo visto, dende o Concello están a estudar varias opcións para garantir a continuidade do servizo, e inclúen "previsiblemente" a resolución do contrato. Segundo fontes municipais, "os argumentos e alegacións dados desde a concesionaria son ridículos, presentando informes técnicos chapuceiros. E están seguindo un procedemento calcado ao que pasou coa piscina de Boiro, coa diferencia que o Concello de Noia non vai permitir a interrupción do servizo".

Medidas contundentes

Para o equipo de goberno tripartito noiés, "a prioridade é a continuidade do servizo en condicións, polo que unha vez rematado o prazo han se tomar medidas contundentes contra as infraccións cometidas pola concesionaria, especialmente polo incumprimento da orde de arranxar e reabrir en quince días. Unha vez se acabe o prazo concedido á empresa para solucionar as deficiencias sen que o fagan, o Concello comunicará aos usuarios e aos traballadores as medidas adoptadas. Asemade, desde o Concello de Noia estanse analizando os danos e prexuízos causados para iniciar as oportunas reclamacións á empresa: que non pensen que poden prexudicar á nosa vila, aos traballadores, e aos usuarios e saír indemnes".

Noia: os arquivos fotográficos do Esteirán, do 9 de novembro ao 5 de decembro na casa da cultura post.ly/9jB8g

— Certo (@Certo) November 6, 2012

este venres temos concerto na Sala Aquarium (Xuño, Porto do Son) xunto La Yegua 2.0 a eso das 22:00! alí nosvemos xente!

— RUXE-RUXE (@ruxeruxe) November 5, 2012

CUANDO PASA ALGO CHUNGO, LO MEJOR ES IRSE LEJOS. ESO LO SABE HASTA ANA BOTELLA.

— masaenfurecida (@masaenfurecida) November 6, 2012

A Consellería de Economía e Industria destinou a dedo 450.000€ a La Voz de Galicia, El Correo Gallego e El Progreso para facer propaganda.

— Verbas Núas (@VerbasNuas) November 6, 2012

Posted via email from Certo.gl, o xornal dixital de Barbanza e Noia

Noia: a piscina reabrirá en decembro se a rescata o Concello

• É "previsible" que haxa que rescatar a concesión e o Concello mesmo tilda de "ridículos" os argumentos e alegacións dados dende a empresa que a leva ata agora, con informes técnicos "chapuceiros"

Noia, 6 de novembro de 2012. Segundo informa hoxe o Concello de Noia en nota de prensa, "ante o previsible incumprimento da orde dada á concesionaria da piscina para que arranxe as intalacións e abra antes do 16 de novembro, o Concello está traballando na adopción de medidas administrativas para garantir a reapertura en condicións da instalación municipal a primeiros de decembro".

Calcando a situación de Boiro, que o Concello noiés non vai permitir

Polo visto, dende o Concello están a estudar varias opcións para garantir a continuidade do servizo, e inclúen "previsiblemente" a resolución do contrato. Segundo fontes municipais, "os argumentos e alegacións dados desde a concesionaria son ridículos, presentando informes técnicos chapuceiros. E están seguindo un procedemento calcado ao que pasou coa piscina de Boiro, coa diferencia que o Concello de Noia non vai permitir a interrupción do servizo".

Medidas contundentes

Para o equipo de goberno tripartito noiés, "a prioridade é a continuidade do servizo en condicións, polo que unha vez rematado o prazo han se tomar medidas contundentes contra as infraccións cometidas pola concesionaria, especialmente polo incumprimento da orde de arranxar e reabrir en quince días. Unha vez se acabe o prazo concedido á empresa para solucionar as deficiencias sen que o fagan, o Concello comunicará aos usuarios e aos traballadores as medidas adoptadas. Asemade, desde o Concello de Noia estanse analizando os danos e prexuízos causados para iniciar as oportunas reclamacións á empresa: que non pensen que poden prexudicar á nosa vila, aos traballadores, e aos usuarios e saír indemnes".

Noia: os arquivos fotográficos do Esteirán, do 9 de novembro ao 5 de decembro na casa da cultura post.ly/9jB8g

— Certo (@Certo) November 6, 2012

este venres temos concerto na Sala Aquarium (Xuño, Porto do Son) xunto La Yegua 2.0 a eso das 22:00! alí nosvemos xente!

— RUXE-RUXE (@ruxeruxe) November 5, 2012

CUANDO PASA ALGO CHUNGO, LO MEJOR ES IRSE LEJOS. ESO LO SABE HASTA ANA BOTELLA.

— masaenfurecida (@masaenfurecida) November 6, 2012

A Consellería de Economía e Industria destinou a dedo 450.000€ a La Voz de Galicia, El Correo Gallego e El Progreso para facer propaganda.

— Verbas Núas (@VerbasNuas) November 6, 2012

Posted via email from Certo.gl, o xornal dixital de Barbanza e Noia

Rianxo: primeiro concello da bisbarra en posicionarse contra as fumigacións do gorgullo do eucalipto

• Estaba previsto fumigar máis de 3.000 hectáreas en Rianxo cunha sustancia que deixará de ser legal este ano, ao prohibila expresamente a Unión Europea

A Plataforma contra as Fumigacións presentou o 21 de maio de 2012 86.426 sinaturas contra os tratamentos aéreos con Flufenoxuron en Galicia. A campaña fíxose a través de change.org (http://www.change.org/petitions/salvemos-las-abejas-de-galicia-queremosabellas)

Rianxo, 22 de maio de 2012. O Concello de Rianxo solicitou mediante un escrito dirixido á Secretaría Xeral de Montes da Xunta de Galicia que se prohíban as fumigacións que teñan previstas no municipio nas extensións de eucaliptais. Quérese evitar así calquer produto químico que conteña a sustancia activa flufenoxurón, non aprobada e prohibida a día de hoxe pola Unión Europea e a piques de erradicarse definitivamente, tal como se instou no Reglamento de execución da UE 942/2011.

Tal e como consta na Comisión da Unión Europea esta sustancia “demostra efectos inadmisíbeis para o comportamento acuático… persistente, bioacumulábel e tóxico…” e insta a que deixen de comercializarse os biocidas que a conteñan. A piques de desaparecer do mercado os produtos que leven este compoñente e rematar a finais de ano a moratoria última que deu a comisión europea para eliminalo "sorprende o empeño da Xunta en seguilo a aplicar en Galicia e particularmente en 3.362 hectáreas de Rianxo cando todos os estados da Unión son avisados de que esta sustancia non se aproba e se fai un chamamento tallante a erradicalo antes de finais de ano", sinalan dende o Concello.

Información áos comuneiros de montes

O Concello de Rianxo dirixirase ás comunidades de montes do concello para informarlles desta situación e que sexan coñecedores dos efectos sinalados no produto, tendo en conta ademais que moitos dos acuíferos que dan servizo ás traídas veciñais poden ser afectados e con efectos non comprobados sobre a saúde das persoas. O que si está comprobado é que acaba coas abellas, tan importantes para a agricultura e para o proceso da vida na terra tal e como a coñecemos agora.

Tamén, en Rianxo:

• Andaina por Forcarei: o sábado 26 de maio

• Serán: este sábado 26, serán "Mar de Rianxo"

• Memoria histórica: un  guerrilleiro antifranquista, nun seminario sobre campos de concentración de Barbanza do 1 ao 3 de xuño

• Escola de Música: do 1 ao 3 de xuño, curso de frauta

Posted via email from Certo.gl, o xornal dixital de Barbanza e Noia

A Pobra do Caramiñal: o Concello, gobernado polo PP, posiciónase a prol do castelán con Galicia Bilingüe, denuncia o Psoe

Páxina onde sae a publicidade dos concellos. Na outra páxina "Puebla" repetidas veces

A Pobra do Caramiñal, 19 de maio de 2012. A asociación sen ánimo de lucro “Galicia Bilingüe”, que se autodefine como “apartidista e independiente” vén de presentar recentemente en Vigo unha revista de vintecinco páxinas á que denominan “Vosotros” (dispoñible en dúas versións, unha en castelán e outra en castelán e galego na páxina www.galiciabilingue.es) na cal o Concello da Pobra comparte co de Ribeira –ambos gobernados polo PP- unha páxina completa a toda cor anunciando a súa marca turística… en castelán, vén de denunciar a portavoz do Psoe da Pobra, Teresa García Guillán.

"En ambas versións, castelán e “bilingüe”, o Concello da Pobra anúnciase institucionalmente en castelán, posicionándose dentro desa suposta liberdade de elección do idioma que di defender “Galicia Bilingüe” a favor do castelán, utilizando o medio de expresión desa asociación como plataforma para a definición da preferencia política do Sr. Maceiras", sinala a concelleira socialista pobrense.

A revista, que debe ser o vehículo de expresión do que o colectivo que a edita entende por "pluralismo lingüístico", repite na súa curta estensión o topónimo castelanizado “PUEBLA DEL CARAMIÑAL” -ou abreviado como “PUEBLA” ou “LA PUEBLA”- en máis dunha ducia de ocasións, "sen que ao Sr. Maceiras lle trema o pulso á hora de asociar a imaxe da vila co perfil editorial da publicación, a pesar da utilización impropia e reiterada do nome do concello, sen amosar respecto algún polos graves sucesos producidos nos anos oitenta e noventa en torno ao emprego ilegal do topónimo histórico castelanizado", apunta Guillán en nota de prensa.

Unha parodia da revista "Nós"

"Os Socialistas da Pobra consideramos desafortunado que o Concello da Pobra vincule a súa imaxe turística cunha revista de marcado corte ideolóxico -cuxo nome é unha parodia do da revista "Nós", referente do galeguismo-, no que constitúe unha clara vontade política do PP de sufragar correntes de opinión afíns con miras pre-electorais, asumindo gastos de difícil xustificación nun contexto de desmantelamento sistemático dos servizos públicos, e lamentamos o uso partidista do idioma como manobra de distracción sobre os duros recortes nos niveis máis esenciais dos dereitos básicos, abrindo sen pudor vellas feridas tocante ao topónimo do Concello con manifesto desprezo da paz social conseguida arredor do topónimo oficial, que como Alcalde debera defender", remata a nota dos socialistas pobrenses.

Pode que tamén lle interese:

• A Pobra: este sábado 19, acto polas Letras Galegas ás 21:00

• Presentación de libro: o venres 25 de maio, Dark Butterfly

Os Concellos da Pobra e de Ribeira financian a nova revista ("Vosotros") de Galicia Bilingüe ir.gl/a8cb9 Haberá que "felicitalos"?

— Certo (@Certo) May 17, 2012

As amizades perigosas de partidos e dos Concellos da Pobra e de Ribeira do Caramiñal (vala a boutade), por Filipe Díez: enredando.blogaliza.org/2012/05/17/les…

— Certo (@Certo) May 18, 2012

Vosotros: Les liaisons dangereuses [Filipe diez] ir.gl/600e12 #chuza!

— chuza (@chuza) May 18, 2012

 

 

Posted via email from Certo.gl, o xornal dixital de Barbanza e Noia

Lousame: o comité da planta de Servia anuncia a presentación dunha denuncia polo penal contra o alcalde de Ames por vulnerar o dereito á folga

O Comité de Empresa da planta de reciclaxe de Servia, en Lousame, vén de anunciar a presentación, pola vía penal, dunha denuncia contra o alcalde de Ames, o socialista Carlos Fernández, por vulnerar o dereito á folga. Fernández contratou os servizos de Tragsa para recoller o lixo que se comezaba a acumular nas rúas da vila, argüíndo que a folga convocada polos traballadores/as da planta era ilegal. Afirmación que desmentiu a propia Dirección Xeral de Relacións Laborais, quen aseguraba nun escrito remitido á Mancomunidade, con data de 16 de novembro, que cumpría “con todos os requisitos estabelecidos polo Real decreto-lei 17/1977”.

O Comité de Empresa convocaba folga indefinida de recollida de lixo nos concellos de Ames e Carnota, desde o pasado día 8 de novembro, logo de que no primeiro o propio alcalde provocara o aprazamento do pleno no que se votaría unha moción que supuña a asunción do pagamento das débedas acumuladas coa planta e, no segundo, se votase en contra da moción proposta polo Comité.

Esta moción supoñía comprometerse co modelo de xestión de residuos sólidos urbanos de Servia; o apoio ás iniciativas e plans aprobados no seo da Mancomunidade encamiñadas a garantir o pago da débeda contraída con FCC; que os orzamentos de cada Concello para o ano 2011 preveran o pagamento mensual do canon do lixo (co obxecto de non xerar unha nova débeda) e que se demandara da Xunta de Galiza a súa implicación para resolver favorablemente o conflito existente coa recicladora ECOEMBES.

Para os traballadores era imprescindíbel que se asumiran estes puntos para garantir a viabilidade da planta -nomeadamente o pagamento dunha débeda que se achegaba a 2.700.000 € e da que eran responsábeis, na súa maioría, os concellos de Ames, Carnota e Noia- e con iso, o mantemento dos postos de traballo.

Folga ilegal

Tras do inicio efectivo da folga, a partir do día 12 de novembro, o alcalde de Ames afirmou, en diversos medios de comunicación, que a folga convocada era “ilegal” e “política”. O propio Valedor do Pobo abriu unha investigación, de oficio, por non garantirse un servizo público e polos supostos problemas de salubridade derivados.

Respecto das afirmacións do alcalde de Ames, a propia Dirección Xeral de Relacións Laborais desmentía nun escrito remitido á Mancomunidade o día 16 de novembro as acusacións de “ilegalidade”, e afirmaba que a comunicación de folga “cumpre cos requisitos estabelecidos” no referente ao prazo de preaviso, que para os casos que afecten aos servizos públicos débese facer “con alomenos 10 días naturais” de antelación, xa que fora comunicada o 27 de outubro; aos motivos nos que se fundamentaba; data de inicio e composición do comité de folga.

Para o alcalde de Ames esa infundada acusación de ilegalidade viña de que na convocatoria de folga prevíase o inicio o día 8 e, porén, non se fixo efectiva até cinco días despois. A isto Relacións Laborais respostaba que “a convocatoria remitida nos termos nos que se substancia, reúne os requisitos legais polo que non debe considerarse como unha nova folga a falta de servizo levada a cabo o día 13, xa que se trata dunha folga indefinida”.

Respecto da actuación do Valedor do Pobo, lembran que casualmente o alcalde de Ames, Carlos Fernández, gabouse no pleno celebrado o xoves día 18, da súa amizade persoal con el, e que amparándose nas súas actuacións, contratou a Tragsa para recoller o lixo vulnerando o dereito fundamental á folga.

Neste sentido, Paulo Rubido, secretario nacional de CIG-Servizos, asegura que curiosamente non se ten constancia da intervención do Valedor do Pobo en ningún outro conflito laboral e que nin sequera actuou na folga de recollida de lixo de Compostela, que durou moito máis tempo.

Rubido asegura, ademais, que caso de existir algún problema de salubridade sería a consellaría de Sanidade quen tería que adoptar medidas e non o Valedor e que, en todo caso, ese problema non existía porque estaban pactados uns servizos mínimos que prevían a recollida do lixo cada tres días. De feito, o luns 15 fíxose unha primeira recollida e estaba prevista outra para o propio xoves día 18.

Recollida “ilegal”

Porén, e malia estar convocado o pleno no que finalmente o concello de Ames, co seu alcalde incluído, aprobaron a moción proposta polo Comité e un pago extraordinario de medio millón de euros para afrontar a débeda acumulada polo municipio, e de estar previsto que esa noite os servizos mínimos recollerían novamente o lixo, o alcalde, facendo alarde dunha actitude que o secretario nacional de CIG-Servizos cualifica de “prepotente” e “chulesca”, ordenou a recollida “ilegal” contratando a outra empresa.

O propio alcalde, estivo á fronte do operativo de recollida de Tragsa, que provocou importantes problemas de tráfico nas rúas máis céntricas dos núcleos de Ames e controlou o proceso para asegurarse, antes do pleno, de que todo o lixo estaba recollido. Unha actuación que Rubido cualifica de “populismo barato” e que provocou que os camións cheos de lixo pasaran a noite na rotonda de Rois, sen poder acceder á planta de Lousame, porque non fixeran recollida selectiva, malia Fernández afirmar o contrario. “Finalmente tiveron que derivar o lixo a Sogama”.

Obviamente, tras da asunción por parte do concello de Ames dos compromisos económicos coa planta, o Comité de Empresa puxo fin á folga. O mesmo que ocorreu en Carnota, onde ese mesmo día e por requirimento da Xunta de Galiza, o concello foi obrigado a asumir os pagamentos nos prazos previstos pola Mancomunidade.

via galizacig.com

Posted via email from Certo.gl, o xornal dixital de Barbanza e Noia

Boiro: novo escándalo no CAB. Erros de todo tipo e plaxios na guía breve do complexo recén editada

A Nosa Señora da Guía: análise dun plaxio

Na páxina web do Centro Arqueolóxico acaba de poñerse a disposición do público unha Guía Breve do complexo (encántame este concepto) arqueolóxico de Neixón en PDF, financiada con fondos públicos e realizada por Víctor Barbeito Pose. http://centroarqueoloxicodobarbanza.org/docs/guia%20arqueo%20baja_spn.pdf Até aquí todo ben; o portal do CAB pon na Rede este documento para acceso de todo o mundo e ninguén criticará o feito de que se faga unha guía dunha área arqueolóxica. Agora ben. Os problemas son os seguintes:
1. A suposta guía está mal redactada e mistura ás veces galego e castelán, xa que se trata dunha burda tradución de textos alleos, escritos orixinariamente en galego polo equipo do proxecto arqueolóxico dos castros de Neixón dirixido por quen isto escribe.
2. Esta guía é totalmente indixerible polo público xeral e non é axeitada para unha correcta divulgación. É certo que isto é unha opinión, pero o que é inadmisible son os seguintes puntos.
3. A recreación dos castros de Neixón das páxinas 36 e 37 non ten absolutamente nada que ver coa realidade arqueolóxica documentada até o momento. É mentira, como xa apuntamos no seu día en Arqueoneixón.
4. O texto é un refrito de paragrafos enteiros que se atopan reproducidos en capítulos dos nosos libros publicados en Toxosoutos e en revistas especializadas. Así por exemplo, os apartados secuencia construtiva e características formais (páxs. 42 e 46) plaxian textos da miña autoría (Xurxo Ayán); o mesmo acontece co apartado de restos materiais (páxs. 46-50), que plaxia un texto redactado orixinariamente por Rafel Rodríguez. Máis escandaloso se cabe é o apartado adicado ao Castro Pequeno (páxs. 53-4)no que se plaxian paragrafos publicados no presente blog dando conta da nosa escavación de 2008.
5. Por suposto non aparece unha soa cita da autoría destes textos, nin nos créditos da publicación nin na bibliografía, inexistente. Escandaloso.
6. Incluso míntese ao asegurar que as cabanas reconstruídas no interior do Castro Grande son de época baixorromana (páx. 46), hipótese desbotada xa en 2007 coas escavacións dese ano que amosaron claramente como esas choupanas son do século I d. C. Un exemplo máis do descoñecemento absoluto do avance das investigacións, das publicacións recentes e do estado da cuestión.
7. Todo o mundo coñece a animadversión de Víctor Barbeito cara ao noso equipo de traballo, prexuízo que lle leva a obviar o noso traballo en Neixón. Esta actitude demencial lévao a non coller unha soa fotografía nin debuxo deste blog para ilustrar a guía, escaneando fotos en papel de intervencións de limpeza en Neixón de mediados dos anos 90 que non fornecen nada á comprensión da área arqueolóxica por público non especializado. Asemade, Víctor Barbeito fala de recentes intervencións como se fosen feitas por extraterrestres anónimos ou milagreiramente pola Nosa Señora da Guía.
8. O realmente gracioso é que o arqueólogo do CAB, malia non dar validez á nosa investigación, plaxia a mesma para redactar o 100 % da guía breve do complexo arqueolóxico de Neixón. Todo un paradoxo e unha evidencia máis da súa incompetencia.
A consecuencia de todo isto é a mesma de sempre: até cando se van dilapidar fondos públicos en actuacións enganosas carentes de calquer tipo de ética? até cando os cidadáns deben aturar este despropósito favorecido polo Concello de Boiro?

via neixon.blogspot.com

Posted via email from Certo.gl, o xornal dixital de Barbanza e Noia