Ribeira: "Renacer" informa este venres, 30 de novembro, e sábado, 1 de decembro, sobre a Sida

• Co gallo do Día Internacional de Loita contra esta doenza
• Sinalan que o máis importante segue a ser a prevención, que só se logra con información

Ribeira, 29 de novembro de 2012. Cada 1 de decembro, Día Mundial de Loita Contra a SIDA, persoas de todo o mundo suman esforzos para xerar unha maior conciencia do que supón o VIH/SIDA e mostrar solidariedade internacional ante a pandemia.

Esta celebración brinda a todos os/as copartícipes, tanto públicos como privados, unha das máis oportunidades máis claras para dar a coñecer a situación e impulsar avances en materia de prevención, tratamento e atención aos afectados/as nos países con elevada prevalencia e tamén no resto do mundo. A Asociación Renacer levará a cabo unha serie de actos informativos  nos vindeiros días. Estes actos están dirixidos á poboación en xeral e a mocidade en particular, tentando concienciar acerca da importancia da prevención na loita contra a SIDA e a de involucrarse na súa detección precoz.

Haberá reparto de condóns e material informativo

Instaláranse diversas mesas informativas nos tres institutos de ensinanza secundaria, nas que se repartirán lazos vermellos, material informativo e preservativos o venres día 30, durante o recreo, ás 11:30 horas. Ademais no IES Nº 1 para achegar tamén a información ás persoas que acoden á ensinanza de adultos impartirase unha charla sobre sexualidade e SIDA o xoves 29 ás 18:40 horas, trala que se repartirá material informativo.

O sábado día 1 de decembro na rúa peonil do concello (ó lado da Farmacia Sanmamed) tamén se colocará unha mesa informativa para informar e sensibilizar á poboación en xeral.

Estas actividades englobánse no programa de prevención do VIH-SIDA e outras ITS da Asociacion Renacer e complementan a labor que se está a levar a cabo cos mozos e mozas nos centros de ensino secundario a través de diversos obradoiros de Educación Afectivo-Sexual e Sexo Seguro.

Posted via email from Certo.gl, o xornal dixital de Barbanza e Noia

Noia: o xoves 31 de maio haberá unha mesa informativa co gallo do Día Mundial sen Tabaco

• A mesa informativa estará instalada diante do Concello de Noia de 10:00 a 14:00 horas e poderase medir a capacidade pulmonar  
• Considérase o tabaco a segunda causa mundial de morte, trala hipertensión
  

Noia, 25 de maio de 2012. O 31 de maio de cada ano a OMS celebra o Día Mundial sen Tabaco, cuxo obxectivo consiste en sinalar os riscos que supón o consumo de tabaco para a saúde e fomentar políticas eficaces de redución do devandito consumo. O consumo de tabaco é a segunda causa mundial de morte, tras a hipertensión, e é responsable da morte dun de cada dez adultos.

Este ano a OMS fai un chamamento a nivel mundial sobre a “interferencia da industria do tabaco”. A campaña centrarase na necesidade de denunciar e contrarrestar os intentos descarados e cada vez máis agresivos da industria tabaqueira para socavar o Convenio Marco para o Control do Tabaco da
Organización Mundial da Saúde (CMCT OMS), debido aos graves perigos que supoñen para a saúde pública. O consumo de tabaco é unha das principais causas evitables de morte. A epidemia mundial de tabaquismo mata preto de 6 millóns de persoas cada ano, das cales máis de 600.000 son non fumadores expostos ao fume de tabaco alleo. A menos que actuemos, o tabaco matará ata 8
millóns de persoas en 2030, das cales máis do 80% vivirá en países de baixos e medianos ingresos.

Por iso e concidindo con esa data a Concellería de Benestar e Igualdade do Concello de Noia súmase ás actividades de sensibilización contra a epidemia do tabaquismo. Dentro do programa de información e sensibilización instalarase unha mesa informativa onde se proporcionará consello sobre como deixar de fumar, así como o dano que ocasiona o consumo de tabaco á saúde. As persoas que o desexen poderán realizarse coximetrías (medicións do CO no aire expirado) para comprobar a severidade do dano que o tabaco fai na súa saúde. Así como recibir consello por parte de persoal sanitario. Contarase coa presenza da Dra. Maria Josefa Vázquez López e a colaboración dunha marca farmacéutica. A mesa informativa estará instalada diante do Concello de Noia de 10:00 a 14:00 h. o próximo xoves día 31 de maio de 2012.

Pode que tamén lle interese:

Curso: o 1 e 2 de xuño, sobre pautas en condutas adictivas

Curso: o 2 de xuño, sobre úlceras por presión

Curso: sobre Celso Emilio Ferreiro, do 4 ao 8 de xuño

Certame de fotos: sobre o peor da globalización. Ata 15 de outubro

 

Posted via email from Certo.gl, o xornal dixital de Barbanza e Noia

Medio Ambiente: hoxe é o Día Mundial da Auga

via flickr.com

Imaxe: fonte Lardueiro, en Cures, Boiro.

Nota oficial da Xunta de Galicia:

Poucas cousas hai no noso contorno que teñan tanta importancia como a auga. Sen auga non hai vida.

A auga é un valor constante na historia das civilizacións. A súa presenza e abundancia marcou os principais asentamentos humanos e condicionou a súa creación e desenvolvemento.

Os sucesivos avances da humanidade tiveron, e seguen a ter, na auga un elemento fundamental. A súa captación, tratamento e xestión marcan hoxe unha das prioridades da sociedade, consciente da súa importancia, do seu carácter finito, vulnerable e, en definitiva, vital.

Galicia non é unha excepción na preocupación pola dispoñibilidade en cantidade e, sobre todo, en calidade deste recurso.

Malia a tradicional riqueza hídrica da nosa terra que se manifesta nos dous mares, dezanove rías e os mil ríos cunqueiráns que delimitan e sucan o noso territorio en superficie e os innumerables mananciais que flúen subterráneos aflorando en pozos, minas ou fontes para abastecer persoas ou fertilizar terras, as augas de Galicia, como as do conxunto do planeta, requiren dunha dedicación e uns coidados que preserven a súa calidade e garantan a súa continuidade no futuro.

A auga é un elemento esencial no medio natural e, como tal, ten que integrarse nun lugar preponderante nas estratexias e nas actitudes responsables para o seu coidado.

Nesa dirección, a Organización das Nacións Unidas –coa creación do Día Mundial da Auga- e outras instancias, entre elas a Unión Europea –que elaborou unha Directiva Marco específica sobre a materia-, están a promover e fomentar, no ámbito internacional entre institucións e cidadanía, a transcendencia do recurso e a importancia de preservar a súa calidade.

En Galicia, institucións e administracións públicas con competencias na materia, organizacións e entidades de diversa índole, e un número cada paso máis crecente de cidadáns, están a implicarse nese labor de fomento e participación na tarefa de protexer e preservar a calidade dos recursos hídricos.

Entre todos é preciso que intensificar a concienciación arredor da conservación da auga, implicándonos no seu coidado e nun consumo responsable. A xestión da auga debe ser unha tarefa compartida entre gobernos, institucións, comunidades e persoas, na procura de dispoñer en cantidade e calidade dun elemento capital para o nacemento e continuidade da vida na nosa terra.

Unha tarefa na que cada pinga debe ser considerada como unha pebida do precioso tesouro que a auga é, non só para a natureza, senón tamén para o conxunto dos seres vivos e das actividades que nos permiten gozar dun crecente nivel de calidade de vida, dun desenvolvemento sostible, no que a auga –en cantidade e calidade- seguirá a ser imprescindible.

Posted via web from Posterous de Certo, o xornal virtual de Barbanza e Noia