4.6.12

Noia: a agrupación nacionalista celebra que Rajoy aparcase o proxecto de retirada da escolleira


Paseo marítimo de Noia coa marea baixa

Noia, 4 de xuño de 2012. A agrupación nacionalista de Noia, composta por escindidos do Bng, integrantes do novo partido +Galiza e afíns, sinala en nota de prensa que valora positivamente "o cambio de rumbo da Administración do Estado aparcando definitivamente o proxecto de retirada da escollera da canle de acceso a Noia".

Que se remate a escolleira, retomando proxecto de mediados do século pasado

Para este sector nacionalista noiés, "a vila de Noia ten que aproveitar TODO o seu potencial portuario, iso pasa por actualizar o proxecto dos anos cincuenta do Grupo de Portos de Noia,  finalizando TODA a escolleira da canle de acceso aproveitando a mesma  para atraques e paseo, así mesmo o histórico porto fronte o Malecón de Gasset debe ser dragado e recuperado na súa totalidade".


Tamén din defender "un modelo de porto integrado na vida da Vila de Noia, non unha illa, esta Vila ten capacidade para prestar casi todos os servizos que o porto necesita, (restaurantes, hoteles, tendas, repostos, talleres,  gasolineira, etc )  polo tanto a nosa posición é UN PORTO INTEGRADO NA VIDA DA VILA,  esta posición economiza o investimento  e dinamiza a vida económica de Noia. Reconocemos que é necesario un edificio de servizo portuario ( do porto) é unha primeira recepción pero nada máis. Non renunciamos a parte algunha do potencial portuario conscientes como somos da súa viabilidade e potencialidade mesmo como porto da capital de Galicia".

Piden recuperar a praia de Labarta

"Defendemos a recuperación integral da praia de Labarta, unha praia metida na trama urbana  con unha altura de auga regulada o que axudará a potenciación turística da vila. Defendemos unha recuperación de todo o bordo literal, zonas de Rio do Porto, Barquiña, Testal, Obre, Chaiza… con actuacións ben integradas no medio que permitan o disfrute de tales espacios polos veciños, (paseos non agresivos, zonas de observación de aves, valoración do patrimonio histórico no traxecto, …)", proseguen os nacionalistas fóra do Bng, que tamén queren "unha planificación e actuacións axeitadas PARA A RETIRADA DA LAMA E RECUPERACIÓN ASÍ DE ESPAZOS CON POTENCIALIDADE PRODUCTIVA, sabemos que esta é unha actuación de moitas anualidades pero xunto coas anteriores  e unha xestión moderna dos recursos marisqueiros levarían a comarca de Noia cara un futuro moi esperanzador. Demandamos seriedade por parte de todas e cada unha das administracións, cooperación, lealdade e  traballo serio. Valoramos positivamente a nova de que se inicia un proceso de traballo cara a elaboración dun proxecto definitivo que esperamos contemple todo o sinalado,  nós estaremos aí para colaborar en canto podamos,  e esperamos dos demais igual comportamento", finalizan.

Posted via email from Certo.gl, o xornal dixital de Barbanza e Noia

A Pobra: o viño Altares de Postmarcos preséntase en Alimentaria 2012 en México

Img_1119_copia

A Pobra, 4 de xuño de 2012. Mañá comeza a celebrarse no Centro Banamex de Ciudad de México ALIMENTARIA 2012, a exposición de alimentos e bebidas máis importante que se realiza nese país, na que arredor de 350 empresas nacionais e internacionais con variedade de produtos terán contacto con máis de 12 mil visitantes profesionais. Nasección Vinos de España, este mesmo martes día 5 de xuño vaise presentar, ás 16.20, o viño Altares de Postmarcos (Adega Entre Os Ríos) da Denominación de Orixe Viños da Terra de Barbanza e Iria. Este albariño monovarietal do 2009 sobre lías elaborouse no municipio de A Pobra do Caramiñal.

 

Altares de Postmarcos: minucioso proceso de elaboración, un caldo que se acubilla 15 meses en barricas de aceiro inoxidable a temperatura controlada de 14ºC, acadando deste xeito unha fermentación máis lenta, un viño máis aromático, con máis sabor e cunha madurez froito da crianza en depósito que confirma a actual tendencia a envellecer os albariños.


Enlaces relacionados:


ALIMENTARIA: http://www.alimentaria-mexico.com/es/Actividades/Catas-de-Vino

ADEGA ENTRE OS RIOS: www.entreosrios.com

 


Posted via email from Certo.gl, o xornal dixital de Barbanza e Noia

Boiro: campus de volei do 25 ao 30 de xuño en Barraña cos mellores xogadores galegos

Boiro, 4 de xuño de 2012   Despois de constituirse como club, o Barraña Volei Praia xa prepara a que será a súa primeira tempada de verán. A carta de presentación desta nova entidade será un ambicioso programa de formación destinado a rapaces e rapazas de entre 12 e 20 anos, o I Campus de verán do Barraña Volei Praia que se celebrará do 25 ó 30 de xuño no areal boirense de Barraña.

Será, segundo os organizadores, "unha semana excelente de fabulosa convivencia e sesións de calidade impartidas por personalidades destacadas do volei praia da nosa comunidade como Luci Paz, Cristóbal Álvarez ou Germán Romero entre outros. Como convidado foráneo agardamos a Juanjo Susín, seleccionador nacional sub-15 de volei praia". Aseguran que é unha oferta "máis que atractiva e cun prezo moi razoable para os asistentes, ben sexan residentes en Boiro ou noutras partes de Galicia e España".

Para consultar máis información acerca do Campus podedes ver nesta ligazón o dossier informativo. Tamén podedes acceder á ficha de inscripción. O prazo para anotarse xa está aberto e permanecerá así até o 22 de xuño. Só hai que cumplimentar a documentación cos vosos datos persoais (en caso de ser menores de idade necesitarase autorización paterna) e facela chegar canto antes. Hai prazas limitadas.

Posted via email from Certo.gl, o xornal dixital de Barbanza e Noia

Ribeira: están a instalar os semáforos definitivos do Malecón

Ribeira, 4 de xuño de 2012.- Despois de efectuar nas últimas semanas os labores preliminares de colocación do cableado, na mañá de hoxe luns deu comezo a anunciada instalación dos anunciados semáforos na avenida do Malecón: unha actuación que se adscribe ao plan de mobilidade e accesibilidade da área portuaria incluído no proxecto Ribeira Atlántica 2015, cofinanciado nun 70% con fondos europeos Feder.

Hai que recordar que esta actuación, realizada co obxectivo de reordenar a mobilidade cidadá nunha das principais arterias da cidade, foi efectuada pola empresa Esycsa ao resultar adxudicataria da mesma por un importe de 80.000 euros.

A tal efecto, estanse a implantar elementos semafóricos na intersección do Malecón con Rosalía de Castro e nos tres pasos peonís comprendidos entre a oficina de turismo e o acceso peonil ao porto. Todo, co obxectivo de regular a mobilidade dos peóns e vehículos e aumentar a seguridade viaria sen prexudicar a fluidez do tráfico rodado.

Os semáforos son de última xeración: a iluminación de tecnoloxía LED de baixo consumo e alta visibilidade, e ademais están equipados con dispositivos acústicos para invidentes. Unha vez entren en funcionamento, todos os elementos estarán coordinados, operando de maneira sincronizada, e contarán con plans de tráfico específicos para datas estivais.





Posted via email from Certo.gl, o xornal dixital de Barbanza e Noia

Noia e Lousame: estase a cociñar a fusión destes dous concellos. A pelota, xa no tellado da Xunta


Noia-Lousame, 4 de xuño de 2012. As negociacións lévanse a modiño e con moita discreción, pero a fusión de Noia con Lousame podería ser inminente se a Xunta de Galicia dá a súa aprobación. O diálogo entre os dous alcaldes, de signo distinto, o lousamián Santiago Freire, do PP, e o noiés Rafael García Guerrero, do PSOE, é fluído e ambos están dacordo coa fusión. De producirse, ao ter maior músculo industrial e poboacional Noia -sobre 15.000 habitantes fronte a menos de 4.000-, Lousame quedaría clasificado como entidade local menor a efectos administrativos. O número de concelleiros sería de 17 que terían que xestionar os 130 quilómetros cadrados de que se comporía o novo municipio (37 de Noia e 93 de Lousame).

A Xunta, e en concreto o seu presidente, o popular Alberto Núñez Feijóo, xa coñecen as intencións dos dous alcaldes e está pendente de dar a súa resposta. Logo da sorpresa de Oza dos Ríos e Cesuras, ambos do PP, que desviou a atención no último debate de Autonomía, apenas houbo movementos de outros concellos para integrarse, por moito que Diego Calvo, presidente da Deputación da Coruña, está empeñando o seu cargo en facer posible que esta provincia sexa a primeira de España encabezando fusións municipais. Ante o arrecendo a eleccións anticipadas que aboia por todos lados, é complicado que vexamos esta fusión na presente lexislatura, polo que a integración de Lousame en Noia debería agardar ao que dispuxera o novo inquilino do Monte Pío.

Posted via email from Certo.gl, o xornal dixital de Barbanza e Noia

Educación: manifesto da recén creada Asemblea permanente para a Defensa do Ensino Público en Barbanza, tralo peche reivindicativo en Ribeira


Un instituto galego con pancarta reivindicativa

Ribeira, 4 de xuño de 2012. Ante as políticas do Partido Popular en asuntos tan sensibles como a sanidade e a educación, non deixan de agromar plataformas na defensa destes peares básicos do estado do benestar. Se antes soubemos da Plataforma pola Sanidade Pública de Barbanza e logo da recén creada plataforma "Stop Desafiuzamentos", agora tócalle a quenda á educación, á que o ministro de Educación José Wert quere deixar nos ósos e voltala a hai 30 anos. O Manifesto da Asemblea permanente para a Defensa do Ensino Público, constituida no peche do pasado 31 de maio no IES Nº 1 de Ribeira, onde se xuntaron máis de cen persoas, está a ser difundida por múltiples canles. En Certo apoiamos estas reivindicacións e pasamos tamén a reproducilo de xeito íntegro:

 No peche levado a cabo o día 31 de Maio do 2012 no IES Nº1 de Ribeira, a Comunidade Educativa (pais, nais, profesorado e alumnado) do Barbanza alí reunida decidiu constituirse como Asemblea permanente para a Defensa do Ensino Público.

Acordamos continuar coa convocatoria de novas asembleas e propostas de mobilización co obxectivo decidido de defender o dereito a un ensino público de calidade, e contra os recortes educativos producidos neste curso escolar e os que se anuncian para o futuro inmediato.
A Asemblea fará un seguimento das medidas restrictivas que a Consellería de Educación pretende aplicar para o vindeiro curso que poderían provocar, de levarse a cabo, unha grave merma da atención educativa que se presta ó alumnado e un retroceso histórico no noso Sistema Educativo Público.

A Asemblea de forma unánime oponse:

    Á masificación debida ó aumento do alumnado por aula que podería superar os 40 alumnos.
    Á diminución do profesorado que impedirá a atención á diversidade e os reforzos educativos ó alumnado máis necesitado
    Á negativa da Consellería de Educación a substituir o profesorado de baixa por enfermidade, permisos ou outros motivos. Isto, que xa se está levando a cabo, supón a perda de moitas horas lectivas.
    Ós recortes que impedirán aos centros atender actividades complementarias tan importantes para a formación do alumnado como os sevizos de biblioteca, laboratorios, funcionamento das redes informáticas, as actividades extraescolares, etc.

Animamos ó conxunto da cidadanía a asumir de forma activa a defensa dun ensino Público de calidade e anunciamos xa que antes do remate deste curso celebraremos unha nova asemblea onde concretaremos actuacións a levar a cabo.
Manifestamos a nosa decidida vontade de continuar opoñéndonos a estas inxustas e discriminatorias medidas que, realizadas ó amparo dunha crise económica que non provocamos, afectarían gravemente e de xeito irreversible ao futuro das vindeiras xeracións".

Posted via email from Certo.gl, o xornal dixital de Barbanza e Noia

Ribeira: a Xunta celebra o Día Mundial do Medio Ambiente no parque de Corrubedo cunha visita escolar

  • Achegaranse este martes, 5 de xuño, medio cento de escolares do Xuventude de Santiago

Ribeira, 4 de xuño de 2012.- A Xunta de Galicia conmemora este 5 de xuño, Día Mundial do Medio Ambiente, con distintas actividades nos parques naturais da comunidade, co obxectivo de dar a coñecer o papel dos parques naturais na preservación do medio ambiente.

Concretamente no Parque Natural do complexo dunar de Corrubedo e lagoas de Carregal e Vixán organízase unha actividade conmemorativa desta data, na que participarán medio cento de escolares de 2º e 3º de primaria do Colexio Xuventude (Santiago). Os estudantes recibirán información sobre a celebración do Día Mundial do Medio Ambiente e realizarán un itinerario guiado por monitores por este Parque Natural, que foi declarado no ano 1992 por ser un lugar privilexiado do noso costeiro desde o punto de vista ecolóxico e xeomormolóxico, polas súas formacións lacustres e o seu sistema dunar, único en toda a xeografía galega.

Desde hai 40 anos
Desde 1972 o 5 de xuño de cada ano celébrase o Día Mundial do Medio Ambiente que foi establecido pola Asamblea Xeral de Nacións Unidas. Este ano o día estará centrado no lema: Economía verde: inclúete a ti?

Relacionada:


Parque Natural de Corrubedo: desastre de xestión

Posted via email from Certo.gl, o xornal dixital de Barbanza e Noia

Twitter

Related Posts with Thumbnails Banner: Regale selva tropical