Barbanza, por Certo: laudas gremiais

Mostrando entradas con la etiqueta laudas gremiais. Mostrar todas las entradas

13.9.12

Noia: van restaurar cinco laudas e protexelas na sacristía de Santa María a Nova

O Concello quere mercar a Casa da Cultura para habilitar un espazo como museo e centro de interpretación das laudas gremiais noiesas

Sacristía de Santa María a Nova con laudas ben conservadas

Noia, 13 de setembro de 2012. Segundo anunciou hoxe, en declaracións á Radio Galega, o concelleiro de Urbanismo e Casco Histórico, o nacionalista Bieito González, o Concello está a solicitar os permisos correspondentes para a restauración de cinco laudas gremiais do medievo para, unha vez recuperadas e limpas, gardalas na sacristía de Santa María a Nova, onde xa se conservan ducias delas nunha enorme estrutura metálica móbil.

Unha das laudas a restaurar ten a típica cuncha do peregrino

Escollidas por diversos motivos

Bieito González explicou que se escolleron estas cinco laudas entre as case cincocentas de que se dispón nas inmediacións desta igrexa noiesa, por diversos motivos, como os seus debuxos, que unha delas foi recentemente desenterrada e conserva unha inscrición case intacta ou que outra representa claramente a un mariñeiro.

Noia conta cunha das coleccións máis grandes de Europa de laudas medievais

Futuro Museo das Laudas na Casa da Cultura

Tamén anunciou o concelleiro de Urbanismo noiés que está entre os obxectivos do Concello, inda nestes tempos de crise económica, negociar cos donos da actual Casa da Cultura de Noia, que o Concello ten en réxime de arrendamento, unha posible compra, e habilitar alí un espazo acondicionado para un Museo e posible centro de interpretación das laudas gremiais de Noia. Debido ao inxente número de laudas e ao volume que éstas ocupan, a nave de Santa María a Nova é evidentemente moi pequena e precísase, polo menos para as laudas máis significativas e chamativas, un espazo moito máis grande.

As laudas ateigan a nave central de Santa María a Nova

Cesión ata decembro da Lauda dos Canteiros á Cidade da Cultura

Lauda do Canteiro na Cidade da Cultura

Como xa publicamos no seu día, o Concello de Noia chegou a un acordo coa Consellería de Cultura para ceder a Lauda dos Canteiros para a exposición "Gallaecia Petrea", na Cidade da Cultura de Santiago. Estará alí ata decembro e, a cambio, a Xunta comprometeuse a restaurar outras laudas.

Posted via email from Certo.gl, o xornal dixital de Barbanza e Noia

17.7.12

Noia: a igrexa de Santa María a Nova acollerá "Comer, rezar, namorar..." en setembro

Trátase de músicas dos cancioneiros ibéricos do renacemento arredor de tres temas universais
Vai interpretar este concerto o grupo de música antiga 1500 e o artista convidado Marco Ambrosini, dentro da iniciativa da Xunta "Espazos sonoros"

O secretario xeral de Cultura presentou a programación de Espazos Sonoros, unha experiencia única de descuberta da música en diálogo con diversos espazos arquitectónicos de especial interese do patrimonio cultural galego

Noia, 17 de xullo de 2012.- A Consellería de Cultura, Educación e Ordenación Universitaria pon en valor o patrimonio cultural a través dun ciclo de música de estilos diversos que percorrerá diferentes espazos arquitectónicos de toda Galicia, entre o 8 de setembro e o 18 de outubro de 2012. Trátase da iniciativa Espazos Sonoros, que foi presentada onte polo secretario xeral de Cultura, Anxo Lorenzo, e pola responsable do ciclo, Belén Bermejo, no Centro Galego de Arte Contemporánea (CGAC), un dos escenarios deste proxecto que pon en diálogo a música co patrimonio.

“Con esta programación, desde a Consellería de Cultura e Educación pretendemos alentar unha oferta diferente para o lecer musical das galegas e dos galegos, que contribúa a difundir o interese polo noso patrimonio arquitectónico”, afirmou Anxo Lorenzo. “Este diálogo que propoñemos –dixo– permítenos ofrecer unha vivencia diferente do patrimonio, vinculada ao interese pola música e con formatos de proximidade cos artistas que favorecen tamén un maior coñecemento e unha vivencia musical singular”.

Implicación na preservación do patrimonio
O secretario xeral considerou o aprecio polo patrimonio como “un aspecto fundamental para a implicación de todos na súa preservación”. “Ten, polo tanto, este ciclo unha intención de lecer, de gozo musical, pero tamén unha vertente didáctica, de sensibilización e de posta en valor do moito que temos e tantas veces descoñecido”, concluíu.

Espazos Sonoros foi consolidando ao longo destes anos a posta en valor do patrimonio histórico e do potencial artístico, musical e creador do noso país, mediante a programación de concertos en diferentes espazos de interese cultural, e foi engadindo obxectivos como a captación de novos públicos para a música clásica, a descentralización das programacións polos espazos da xeografía galega, a dinamización de públicos e o fomento da súa mobilidade a través do territorio e entre diferentes estilos musicais, a contribución á recuperación dos instrumentos musicais históricos e a promoción dun turismo e dun lecer de calidade en Galicia.

Propostas musicais variadas e de calidade
Nesta nova edición, mantén a súa aposta pola variedade de propostas musicais de calidade, ofrecendo música para órgano, música antiga, de cámara e outras músicas. Conta para isto con algunhas das máis salientables formacións que traballan no país, como Germán Díaz, Fernando Abreu ou o Grupo 1500, que comparten cartel con artistas convidados do nivel do arpista Andrew Lawrence-King, o polifacético músico especialista no instrumento nórdico da nyckelharpa, Marco Ambrosini, ou o quinteto de frautas holandés Seldom Sene.

Os espazos
Espazos Sonoros propón diversas citas coa música e o patrimonio no tempo de lecer para para ver, escoitar, aprender e deixarse sorprender. A selección de espazos procura casar as características do lugar coa música que se vai interpretar nel. En 2012, o programa chegará ata a reitoral de Gundivós en Sober, á igrexa de Santa María a Nova de Noia, á antiga conserveira de Bueu rehabilitada en Museo Massó, á igrexa de Santa María de Cambre, á Casa Grande de Vilancosta, na Estrada –da familia do estudoso das letras e da tradición oral de Galicia Marcial Valladares–, á Igrexa de San Pedro de Lugo, ao Liceo de Ourense, a San Martiño Pinario, á igrexa de Santa María do Campo de Ribadeo, ao CGAC e ao Parque Arqueolóxico de Arte Rupestre de Campo Lameiro.

Escea da adoración dos Magos, en Santa María a Nova, igrexa que xa é célebre en medio mundo grazas ao libro de Javier Sierra "El ángel perdido", do que falamos aquí

Revitalización do patrimonio organístico
A música para órgano é unha das especificidades do festival. Por iso, Espazos Sonoros ofrece nesta edición unha vivencia musical completa arredor deste instrumento. A organista Marisol Mendive e o zanfonista Iván Abal ofrecerán un singular concerto para órgano e zanfona na igrexa de Santa María do Campo, en Ribadeo, unindo así o mundo tradicional e o relixioso e académico. Será a estación final dunha xornada de roteiro pola paisaxe organística da Mariña.

Actividades paralelas
A captación e formación de públicos segue a ser un dos obxectivos básicos do proxecto e, arredor deste, constrúense os contidos musicais pero tamén o conxunto de actividades que axudan a ampliar o interese do festival. Neste sentido, a programación conta con actividades que teñen por finalidade achegar o público á música desde perspectivas diferentes ás que ofrecen os concertos ao uso, como obradoiros, charlas-concerto, roteiros musicais e roldas pola paisaxe organística galega.

Diálogo entre a música e os espazos arquitectónicos
A través desta iniciativa, a Secretaría Xeral de Cultura desenvolve unha diversa programación musical en espazos de especial interese do patrimonio cultural, aberta a múltiples manifestacións artísticas e estilos. Deste xeito, propíciase un frutífero diálogo entre xéneros e estéticas musicais diferentes, ao tempo que se favorece o interese e un maior coñecemento dos espazos arquitectónicos de Galicia.