Ribeira: campus de fútbol base para nenos de 6 a 11 anos do 1 ao 4 de agosto

• O prazo de inscrición abre este venres 22 de xullo e pecha o xoves 28
  

Santa Uxía de Riveira, 20 de xullo de 2011.- Durante os catro primeiros días do mes de agosto, as Concellerías de Deportes e de Turismo do Concello e o equipo de fútbol local Sálvora C.F. van organizar o Campus de Fútbol Base Cidade de Riveira. Trátase dunha iniciativa dirixida a rapaces e rapazas nados entre o 2000 e o 2004 (6 a 11 anos de idade), ambos inclusive.  

Esta é a terceira edición en que se implanta a iniciativa (e a segunda na que colabora o Sálvora) e para ofrecer detalles da mesma déronse cita hoxe na Casa do Concello os concelleiros de Deportes e Atención Cidadá, Juan Luis Martínez Queiruga, e de Fomento do Emprego, Comercio, Turismo e Pemes, Anxo Orellán Fernández, así como o coordinador de fútbol base do Sálvora C.F, Siño Campaña. 

O campus desenvolverase no campo de herba sintética, que acollerá actividades específicas vinculadas co fútbol alterándoas con outras de ocio e tempo libre. Tamén se utilizarán instalacións anexas. 

Os obxectivos desta iniciativa son ofrecer unha alternativa de ocio a través da actividade física e a recreación, ocupar o tempo de lecer dos nenos en época de vacacións, promover hábitos saudables, fomentar as relacións sociais entre os rapaces e aprender e executar elementos básicos do fútbol. 

O prazo de inscrición comeza o venres 22 de xullo e prolongarase ata o 28 de xullo. Os interesados poden anotarse na Oficina Municipal de Deportes situada no Auditorio Municipal (teléfono 981 835 650). O horario de atención é de 9 a 13.30 horas. Hai 60 prazas ofertadas. 

Tanto Juan Luis Martínez como Anxo Orellán e Siño Campaña quixeron animar aos rapaces do entorno a apuntarse no campus, que conxuga fundamentos deportivos con obxectivos sociais e culturais.

Tamén lle pode interesar:

Narcotráfico: charla o martes 26 de xullo no Liceo Marítimo

Recepción: María Vilas, Ana Peleteiro e Adrián Jiménez, campións

Policía infantil: nova promoción

Programación "Fiestra da Cultura": Amancio Prada e moito máis

See the full gallery on Posterous

Posted via email from Certo.gl, o xornal dixital de Barbanza e Noia

A Pobra: posta a primeira pedra do centro de día, que terá 40 prazas e debería estar listo en xullo de 2012, e funcionando no último trimestre dese ano

A conselleira de Traballo e Benestar, Beatriz Mato, anunciou hoxe o inicio das obras deste centro, que duplicará coa súa posta en marcha a oferta de prazas públicas en centros de día no Barbanza (ou sexa, só hai 40, en Boiro)

A Pobra do Caramiñal, 20 de xullo de 2011.- A Xunta de Galicia destinará un total de 707.989 euros á obra de construción dun centro de día no Concello de A Pobra do Caramiñal, que foi adxudicada este mesmo mes. O futuro centro ofertará 40 prazas para persoas maiores. A conselleira de Traballo e Benestar, Beatriz Mato, colocou hoxe a primeira pedra deste servizo social específico para as persoas que sofren algún grao de dependencia non só para prestarlles a atención que precisan, senón tamén para axudalas a preservar a súa autonomía persoal durante o máximo tempo posible.

Unha vez que rematen as obras, que contan cun prazo de execución de 12 meses, a Xunta licitará o seu equipamento para poñelo en marcha no último trimestre do próximo ano. O centro de día, que estará situado ao carón do pavillón polideportivo municipal, terá na planta baixa a zona de servizos cun acceso independente dende o exterior coa cociña, o comedor, unha sala polivalente e de terapia ocupacional, así como un patio semicuberto, segundo recolle o proxecto. Na planta primeira situaranse os despachos para o persoal do centro e outras salas, como a de curas, de rehabilitación ou de espera.

Dóbranse as insuficientes 40 prazas actuais

Mato apuntou que con este centro de día, A Pobra terá unha oferta completa en materia de atención social, xa que lembrou que a Consellería de Traballo e Benestar tamén xestiona nesta localidade unha residencia para maiores de 48 prazas e o centro sociocomunitario, que hoxe tamén visitou a titular do departamento autonómico.

Neste senso, resaltou que esta infraestrutura tamén contribuirá a mellorar a dotación social para persoas maiores na comarca do Barbanza, xa que as prazas públicas do centro da Pobra duplicará a oferta pública en centros de día que ata a data existía. Así, as 40 prazas do futuro centro de día sumaranse ás 40 que xa están a disposición dos veciños e veciñas no centro de día de Boiro. Ademais, o departamento autonómico tamén conta cun centro de día de 45 prazas na localidade de Dodro.

“Esta é aposta do Goberno galego, seguir a esforzarnos pese a crise económica para dotar a Galicia da oferta de servizos sociais que requiren os cidadáns”, salientou a conselleira. Mato afirmou que a Xunta está aumentando en toda a Comunidade autónoma as prazas en residencias, centros de día e de alzhéimer en máis de 2.000 desde o principio da lexislatura. Nos próximos meses, esta oferta crecerá, xa que a Consellería de Traballo e Benestar porá en marcha 22 novos centros de día, infraestruturas nas que se investirán 10 millóns de euros e que atenderán a 1.000 persoas máis.

“Isto significa que ao remate deste ano as prazas en centros de día incrementaranse nun 160 por cento en dous anos”, explicou, ademais de agradecer a colaboración institucional amosada polo Concello da Pobra para a materialización deste proxecto, lembrando que a Administración local cedeu os terreos necesarios para a súa construción.

“A colaboración institucional é o mellor dos camiños posibles para dar respostas ás necesidades dos nosos veciños e veciñas e, especialmente, ás necesidades sociais, das que os concellos son coñecedores de primeira man”, indicou.

Visita ao centro sociocomunitario
Tras a colocación da primeira pedra do centro de día da Pobra, Mato desprazouse ata o centro sociocomunitario da localidade para presidir a entrega de diplomas aos participantes que ao longo do ano tomaron parte nos diferentes cursos impartidos nestas instalacións. A conselleira de Traballo e Benestar indicou que este centro é un emblema en Galicia, xa que comezou a súa andaina hai 26 anos.

“Trátase dun espazo que os propios usuarios e usuarias converten nun sitio para o intercambio interxeracional e as relacións sociais, valores que estamos a impulsar desde o Goberno galego a través do Plan de Actuación Social 2010-2013”.

Pode que tamén lle interese:

• A Pobra: viaxe ás Cíes o venres 29 de xullo

See the full gallery on Posterous

Posted via email from Certo.gl, o xornal dixital de Barbanza e Noia

Noia: este xoves 21 de xullo, rastro de antigüidades no paseo de Felipe de Castro e alameda

Posted via email from Certo.gl, o xornal dixital de Barbanza e Noia

Dodro: o Bng reclama que non se peche a escola unitaria de Bexo

Ana Pontón amosa o seu respaldo ás  máis de 400 sinaturas que demandan o mantemento da escola e pide que a Xunta rectifique

Dodro, 20 de xullo, 2011- A deputada do BNG, Ana Pontón rexistrou onte no Parlamento galego varias iniciativas sobre a supresión de  Educación primaria na Escola Unitaria de Bexo, no concello de Dodro. Pontón cre este peche "errado” e  asegura que esta é unha nova decisión do Goberno galego na liña de desmantelar servizos públicos no rural.

Para a nacionalista, a decisión da Consellaría de Educación non conta co apoio da comunidade educativa que durante todo este curso ven demandando a continuidade da educación primaria en Bexo, “petición avalada por máis de 400 sinaturas”.

A deputada reclama que a Xunta “rectifique” e teña en conta o alto grao de satisfacción co modelo educativo deste centro que provoca que moitos pais, tendo outros centros de referencia con dereito a transporte gratuíto, opten por acudir a esta escola.

Pontón cuestiona a “teórica preocupación” da Xunta de Galicia co despoboamento e as tendencias demográficas e a adopción de certas medidas como a anunciada recentemente pola Consellaría de Educación  e pregunta se a Xunta considera que pechando servizos se equiparan as condicións de vida entre quen reside no ámbito rural e  urbano.

A deputada do BNG tamén preguntará ao Goberno como xustifica non atender a demanda de pais e nais, avalada por máis de 400 sinaturas para que esta escola sega mantendo a súa oferta educativa.

O Alcalde de Dodro non se pronuncia

Pola súa parte, a portavoz do BNG no Concello de Dodro, Vitoria Rei Mariño salienta que o BNG presentou unha pregunta ao alcalde sen conseguir ningunha resposta o que –ao seu xuízo- evidencia a “falta de diálogo” e sobre todo a “nula preocupación do rexedor pola educación en Dodro”. Rei Mariño reitera que a decisión  do peche desta escola “vai contra a vontade das nais e  pais” e mostra o “desleixo” do goberno municipal para negociar unha solución ante o “goberno amigo” da Xunta.

A portavoz nacionalista en Dodro avanza que dende o BNG seguirán presentando iniciativas ao fin de acadar a continuidade da Escola Unitaria de Bexo.

Posted via email from Certo.gl, o xornal dixital de Barbanza e Noia

Ribeira: medio cento de maiores saíron ás Illas Cíes. Próxima saída cultural á Mariña luguesa

Ribeira, 20 de xullo de 2011. Medio cento de maiores do municipio participaron o pasado venres na saída cultural que con destino ás Illas Cíes  promoveu a Concellería de Promoción Social, Servizos Sociais, Mercados e Consumo do Concello de Ribeira.

A viaxe incluíu unha visita previa á cidade de Vigo (con percorrido por monte de O Castro e polo mercado da Pedra), excursión en barco ata as illas Cíes e, tralo xantar, regreso á cidade olívica e posterior visita ao mosteiro de Poio. 

Próximo destino: A Mariña

A iniciativa estivo organizada polo Departamento de Servizos Sociais, que xa a está a traballar na próxima saída: unha ruta pola Mariña Lucense que se desenvolverá do 8 ao 12 de agosto.

See the full gallery on Posterous

Posted via email from Certo.gl, o xornal dixital de Barbanza e Noia

Ribeira: as deportistas María Vilas, Ana Peleteiro e Adrián Jiménez, recibidos no Concello tralos seus últimos éxitos internacionais

Ribeira, 19 de xullo de 2011.- Arroupados por compañeiros de club, adestradores, directivos, amigos e familiares, os deportistas ribeirenses María Vilas, Ana Peleteiro e Adrián Jiménez foron obxecto dunha recepción oficial no salón plenario da Casa Consistorial a cargo do alcalde Manuel Ruiz Rivas, despois dos extraordinarios éxitos deportivos acadados por aqueles hai dúas fins de semana en distintos campionatos internacionais.  

No transcurso da fin de semana do 8 ao 10 de xullo, a nadadora do Club Natación Riveira María Vilas proclamouse campiona de Europa na distancia de 1.500 metros en categoría junior; Ana Peleteiro, da Asociación Deportiva AD Barbanza de A Pobra, acadou un terceiro posto en triple salto no Campionato Mundial de Atletismo, tamén en categoría junior; mentres que o loitador Adrián Jiménez, do club Natural Sport, logrou o terceiro posto na categoría cadete do Campionato de Europa de Taekwondo. 

Tanto o primeiro edil riveirense como o concelleiro de Deportes, Juan Luis Martínez Queiruga, tamén presente na recepción, cualificaron de “histórico” ese fin de semana ante os excepcionais resultados en campionatos mundiais e europeos. 

Ruiz Rivas fixo fincapé na súa intervención en que os responsables destes éxitos son en primeiro lugar os propios deportistas coa súa capacidade e adestramento e, en segundo lugar, moita xente que está arredor: os adestradores e directivos, dos que destacou o seu altruismo, e sobre todo os seus familiares, “que sempre están aí nos momentos difíciles”. 

O rexedor destacou a extraordinaria evolución que está a rexistrar o mundo do deporte no municipio nas últimas décadas e comprometeu a axuda do Concello aos clubs que representan a Riveira para que incluso nestes tempos de crise poidan seguir medrando no ámbito deportivo. Especialmente salientou a traxectoria desenvolvida polo Club Natación Riveira e o Natural Sport, namentres que no deporte do atletismo recoñeceu ter unha “espiña cravada”. 

Olimpíadas

Así mesmo, manifestou que agora hai que ir polo seguinte reto, consistente  en que  algún deportista de Riveira poida participar nun campionato do mundo absoluto ou incluso unhas olimpíadas. “Isto podería parecer un sono fai moitos anos –afirmou- pero con deportistas coa calidade dos tres que hoxe homenaxeamos pode converterse nunha realidade, quizais non en Londres, pero si máis adiante”. 

Manuel Ruiz entregou a cada un dos deportistas laureados unha placa en recoñecemento dos seus éxitos e un chándal co escudo do Concello bordado. 

María Vilas, Ana Peleteiro e Adrián Jiménez quixeron salientar e agradecer a axuda recibida dos seus adestradores e familiares na súas respectivas carreiras deportivas.

Relacionadas:

Ribeira: recepción no Concello ao Sálvora polos seus trunfos

  Recepción Corea do Sur: unha potencia mundial en taekwondo

Ribeira: novas escolas deportivas de triatlón e mountain bike

 

See the full gallery on Posterous

Posted via email from Certo.gl, o xornal dixital de Barbanza e Noia

A Pobra: programada unha excursión ás Cíes o venres 29 de xullo

A Pobra, 19 de xullo de 2011. O Concello da Pobra do Caramiñal organiza unha Excursión as Illas Cies o vindeiro VENRES 29 DE XULLO DE 2011

A mesma consiste nunha viaxe en Catamarán que sairá do muelle náutico da Pobra do Caramiñal ás 9 da mañá, para pasar todo o día nas Illas.

A chegada unha guía estará esperando ao grupo para facer un percorrido pola mesma. O regreso está estimado para as 18.00 h.

Para máis información poden dirixirse as oficinas do Concello ou a Oficina de Turismo, sita no Parque do Castelo, ou chamando ao teléfono 981843281

Posted via email from Certo.gl, o xornal dixital de Barbanza e Noia

A Pobra: continúa a pingueira de visitas do centro de España ao museo de Valle

A Pobra, 19 de xullo de 2011. Chegou hoxe un novo grupo de visitantes dende Madrid ao Museo Valle-Inclán. Logo de percorrer o minúsculo casco pobrense e ver a grandiosa Ría de Arousa dende a Curota, achegáronse ao museo adicado ao creador do esperpento. Desta volta foron 35 persoas que, de novo recibidos pola técnica do Museo, Begoña Olveira, puideron ollar as pegadas dun escritor que semella máis aprezado polos académicos casteláns que polos galegos.

Antes, en Certo:

• A Pobra: o Museo Valle Inclán recibe visitas de Castela

See the full gallery on Posterous

Posted via email from Certo.gl, o xornal dixital de Barbanza e Noia

Ribeira: cinco operativos da Brilat, con 15 soldados en total, vixían os montes de Barbanza e Noia

• O xeneral xefe de Pontevedra visitou ao alcalde ribeirense esta mañá
• Está a visitar a todos os alcaldes da zona, e xa estivo cos de Porto do Son e Noia
  

Ribeira, 19 de xullo de 2011. O xeneral xefe da Brilat de Pontevedra, José Antonio Alonso Miranda, efectuou esta mañá unha visita de cortesía ao alcalde de Ribeira, Manuel Ruiz Rivas, que garda relación co operativo contraincendios de que forma parte a Brigada de Infantería Lixeira Aerotransportable. 

O xeneral Alonso explicou que a súa presenza na zona responde a saudar aos alcaldes do contorno (xa estivo cos rexedores de Noia e Porto do Son) e ten como intención tamén observar a pé de campo como traballan as patrullas e visitar os centros de coordinación. 

O mando da Brilat informou de que están operando actualmente nos montes de Barbanza e Muros cinco patrullas formadas por tres compoñentes cada unha. Actúan cunha dobre misión: por unha parte realizan un labor de vixilancia dos montes ante posibles brotes de incendio e en segundo lugar manteñen unha presenza disuasoria que evite que algunhas persoas planten lume intencionadamente. 

O seu campamento base está situado no EVA 10 e á hora de patrullar están en permanente contacto e coordinación cos Distritos Forestais e coa Dirección Xeral de Montes da Consellería de Medio Rural. 

Alonso Miranda explicou así mesmo que se poderían incrementar as cinco patrullas dispostas na zona no caso de que así se requirise por evolucionar as condicións en negativo. 

O alcalde Manuel Ruiz Rivas agradeceu ao xeneral Alonso que tivese a deferencia de achegarse ao concello e explicou que é unha satisfacción poder expresar no nome de Ribeira a súa grande gratitude tanto polo labor que a Brilat está facendo na zona como, de xeito máis extensivo, polos labores de carácter humanitario que están a realizar en moitos puntos do planeta con risco das súas vidas.

 

See the full gallery on Posterous

Posted via email from Certo.gl, o xornal dixital de Barbanza e Noia

Ribeira: o martes 26 de xullo, charla coloquio sobre narcotráfico, con integrantes da Fundación Galega contra o Narcotráfico

Ribeira, 19 de xullo de 2011. O vindeiro martes, 26 de xullo, ás sete da tarde, terá lugar nos locais do Liceo Marítimo de Ribeira unha charla coloquio baixo o epígrafe "A loita contra  o narcotráfico e as súas consecuencias". Falarán varios integrantes da Fundación Galega contra o Narcotráfico, entre os que destacan o seu presidente actual, José Manuel Siso Bartomé, e un membro da directiva, Lorenzo Santos.

A Fundación contra o Narcotráfico ten unha ampla representación social nos seus compoñentes, pois hai dende curas ata profesores, psicólogos, xornalistas, comerciantes, peixeiros, amas de casa ou sindicalistas. O presidente de honor é o xornalista e escritor de Vilagarcía Felipe Teijeiro Suárez, autor do célebre libro "La operación Nécora", na que, ademais dos principais capos galegos, saía o xuíz estrela entón e defenestrado agora, Baltasar Garzón.

Web relacionada: www.fundacioncontraonarcotrafico.org

Posted via email from Certo.gl, o xornal dixital de Barbanza e Noia