Ribeira: a procesión marítima do Carme reponse este ano nas festas de agosto

• Será o sábado 6 de agosto e a comisión habilitará catamaráns para os que queiran participar 
• Contan con habilitar ata cincocentas prazas en cinco embarcacións
• Cobrarán dous euros "simbólicos" que destinarán a Cáritas
  

Ribeira, 22 de xullo de 2011.- O alcalde, o presidente da Comisión de Festas e o párroco de Santa Uxía déronse cita hoxe na Casa Consistorial para a anunciar que con motivo das Festas de Verán, a cidade recuperará a procesión marítima na honra da Virxe do Carme despois da prohibición de facelas con determinadas medidas de seguridade dende 2004 como consecuencia do accidente do Saleta.  

O alcalde Manuel Ruiz Rivas expresou a súa "gran satisfacción" por terse recuperado esta procesión, que se celebrará o sábado 6 de agosto, e informou de que tras efectuar as oportunas xestións a iniciativa conta co respaldo de distintos colectivos do mar, como a confraría de pescadores ou a Cooperativa do Mar Santa Uxía. Así mesmo, amosou a súa confianza de que a procesión irá medrando ano a ano "ata recuperar o esplendor que merece unha cidade cun porto tan importante como é o de Ribeira". 

Pola súa parte, Luciano Fernández garantiu no nome da comisión que a procesión contará con todas as medidas de seguridade oportunas, incluíndo un seguro colectivo para embarcacións habilitadas e chalecos homologados. 

Segundo indicou, as previsións apuntan a alcanzar as 1.000 persoas participantes, e co fin de permitir aos veciños e visitantes que poidan unirse ao acto vanse por a disposición dos mesmos tres catamaráns que suman entre eles un total de 410 prazas. No caso de que a demanda así o esixise, poderíase habilitar un cuarto catamarán de 100 prazas. 

Recadación solidaria

Esta acción pretende ter tamén un fin social, e con tal motivo cobrarase aos pasaxeiros un prezo simbólico de 2 euros e o recadado irá destinado integramente a Cáritas. Os interesados poden mercar as entradas na parroquia a través de Cáritas ou no Auditorio Municipal. 

Cesárea Canabal lembrou durante a súa intervención as orixes desta procesión marítima e da celebración da eucaristía na Lonxa nos tempos en que era alcalde do municipio Lisardo Valeiras. Así mesmo, quixo lanzar un chamamento especial aos propietarios de embarcacións deportivas para que tamén se suman a este evento. 

Como consecuencia da posta en marcha da procesión e por motivos loxísticos, o horario da misa na Lonxa variará con respecto a anos anteriores, de tal xeito que a eucaristía terá lugar ás 19 horas e a procesión sairá en torno ás 19.45.

Pode que tamén lle interese:

FESTA DA DORNA: POJRAMA DE 2011

Bus turístico: déronlle estrea

 

See the full gallery on Posterous

Posted via email from Certo.gl, o xornal dixital de Barbanza e Noia

Ribeira: déronlle estrea ao novo autobús turístico

• Hoxe foi só para asociacións e políticos. O día 27 entrará en funcionamento para os usuarios interesados
  
• O alcalde veuse arriba e dixo que "Ribeira ostenta despois de Santiago de Compostela a cabeceira da potencialidade turística de Galicia ao contar cun parque nacional e un parque natural"
  

Ribeira, 22 de xullo de 2011.- O Autobús Turístico comezou a súa andaina esta mañá cunha ruta inaugural na que participaron membros de distintas asociacións e clubs de xubilados do municipio, así como membros da Corporación Local.  

O alcalde Manuel Ruiz Rivas foi o encargado de abrir este servizo e explicarlles aos pasaxeiros o obxectivo perseguido polo Executivo local con esta iniciativa, pioneira no contorno. “Queremos facer de Ribeira un lugar máis visitado, no que a xente se sinta cómoda non só para vivir senón tamén para poder disfrutar da súa potencialidade turística”, declarou. Abundando nesta liña, Ruiz Rivas tamén indicou que na súa opinión Ribeira "ostenta despois de Santiago de Compostela a cabeceira da potencialidade turística de Galicia ao contar cun parque nacional e un parque natural". 

Sobre a posta en marcha do novo servizo, o alcalde comentou que ante a premura con que se organizou a acción, o de este verán é un preludio dun proxecto máis ambicioso que se implantará o ano que ben, e que pretende incluír tamén unha ruta marítima en catamarán. 

Durante o percorrido (máis curto que o das dúas rutas regulares que se porán en servizo en días alternos) os viaxeiros puideron visitar distintos puntos de interese turístico, como o miradoiro da Pedra da Rá e o parque periurbano de San Roque do municipio, e visionar unha nova curtametraxe sobre os recursos turísticos da comarca, ademais doutro sobre a nova lonxa.

Viaxes a tres euros

O vehículo comezará a funcionar para os pasaxeiros o vindeiro 27 de xullo. Xa hai un grupo de membros da Asociación Ámbar que reservaron para este día. O servizo terá un custo de 3 euros salvo para os rapaces menores de 10 anos, que viaxarán gratuitamente. As entradas estarán á venta na oficina de turismo do Malecón, que conta cun horario ininterrompido de 9 da mañá a 9 da noite e que está pechada os luns. 

De mércores a domingo

O servizo funcionará de mércores a domingo, en horario de 10 a 14 horas, tendo como punto de partida e de regreso a estación de autobuses de Santa Uxía. Haberá dúas rutas. Un primeiro itinerario visitará o miradoiro da Pedra da Rá, o parque periurbano de San Roque e o seu Centro de Interpretación Arqueolóxica, o Museo Etnográfico de Artes, o Dolmen de Axeitos, o miradoiro da Curota e o porto de Palmeira. 

A segunda ruta pasará polo Carreiro de Aguiño, a Casa da Costa / CIELGA (centro de interpretación do parque dunar), a Gran Duna, o Faro de Corrubedo, o porto de Corrubedo e a ermida e miradoiro de San Alberte. 

Para que os usuarios teñan unha información o máis ampla posible, un guía explicará as peculiaridades de cada lugar.

See the full gallery on Posterous

Posted via email from Certo.gl, o xornal dixital de Barbanza e Noia

Porto do Son: o Psoe denuncia o desleixo nas praias das Furnas, Cabeiro, A Aguieira e A Ornanda en plena tempada turística

Porto do Son, 22 de xullo de 2011. Ante o avanzado do mes de xullo, os membros do PSdeG-PSOE de Porto do Son, queren denunciar o mal estado das PRAIAS DO MUNICIPIO de Porto do Son, e mais concretamente aquelas que recibiron a Bandeira Azul neste 2011, "galardón concedido grazas ao esforzo do PSdeG-PSOE de Porto do Son", aclaran. Estas praias son As Furnas (Xuño), Cabeiro (Noal), A Aguieira (Nebra) e A Ornanda (Miñortos).

Segundo os socialistas, "estamos preocupados pola posible perda destas Bandeiras no noso Concello porque non se están a crumprir os requisitos que manda ADEAC (Asociación de Educación Ambiental y del Consumidor) e a FEE (Fundación Educación Ambiental) que son organismos internacioanis que outorgan este galardón. As Bandeiras Azuis costou conseguilas moito esforzo xa que que cada ano as esixencias son maiores, proba disto é que hai concellos que contaban con 6 ou máis bandeiras e perderon moitas delas, como foi o caso do municipio de Ribeira (2010: 6 – 2011: 5) ou outros municipios de Galicia que baixaron de 7 a 5", argumentan dende o Psoe sonense, o cal se arroga que foi o partido que máis apostou por conseguir este galardón, xa dende anteriores lexislaturas: 

2007:  3 Bandeiras Azuis

2010:  2 Bandeiras Azuis

2011:  4 Bandeiras Azuis 

Durante os anos 2008 e 2009, co goberno do PP: 0 Bandeiras Azuis, aseguran dendo o Psoe, mentres lle esixen ao goberno bipartito do Concello de Porto do Son (PP-AVS) "que subsanen todos os incumprimentos que están a facer no referente ás infraestruturas e obrigatoriedades que se deben cumprir coas Bandeiras Azuis do Concello. Non só se pode presumir de recoller as bandeiras conseguidas polo anterior goberno e despois deixar perder de novo estes galardóns, como ocorreu co anterior mandato do PP no Son".  

Críticas ao concelleiro de Turismo

Pero agora o responsable da área de Turismo é o señor José Manuel Deán Pouso, que como concelleiro de AVS, sempre pedía a Bandeira Azul para a praia de Coira "e que agora nin lle coloca as papeleiras á metade da praia dos seus veciños", afirman os socialistas. "Este concelleiro débese dignar a mirar pola praia de Portosín facer as xestións necesarias para que o vindeiro ano Coira teña a Bandeira Azul tan demandada por el e por AVS e se ten tempo, debe subsanar todas as deficiencias atopadas nas outras praias do municipio.  Entendemos que o Alcalde, o Sr. Luís Oujo é consciente do equipo que está a traballar con el e agardamos que ordene subsanar todos os incumprimentos aquí postos de manifesto ou entenderemos que de novo mentía cando dicía que ía mirar polo turismo de Porto do Son, como mentiu cando falou da participación cidadá e agora pon os plenos municipais polas mañás", finalizan. 

O Psoe do Son aporta todos estes datos para basear as súas críticas á xestión do bipartito PP-AVS:
 

RELACIÓN DE DEFICIENCIAS A DÍA 21-07-2011 
 

AS FURNAS (Xuño): BANDEIRA AZUL 2007 e 2011 

• Socorristas: 2
• Sen boias de sinalización zona de baño (obrigatorio).
• Sen paneis informativos de sinalización (obrigatorio).
• Sen sinalización código de conduta (obrigatorio).
• Sen embarcación de rescate a motor.
• Sen caseta de socorristas.
• 1 só WC (H-M-Minusválidos)
• Papeleiras lixo: 5
• Salvavidas: 2
• Duchas sen presión de auga
• Sinais de Prohibido cans fóra da praia: 2 (1 colgada nun panel destrozado).

CABEIRO (Noal): BANDEIRA AZUL 2007, 2010 e 2011 

• Socorristas: 3
• Sen boias de sinalización zona de baño (obrigatorio).
• Sen embarcación de rescate a motor.
• Caseta de Primeiros Auxilios sen ventana e WCs sen cristais.
• Papeleiras lixo: 4
• Salvavidas: 2

A AGUIEIRA (Nebra): BANDEIRA AZUL 2007, 2010 e 2011 
 

ZONA SUR 

• Socorristas: 4
• Balaustrada de acceso á praia destrozada en varios tramos.
• Restos de redes na zona da praia, xusto ao rematar a pasarela.
• Botella de cristal rota debaixo do panel informativo pegado aos WC.
• Sen boias de sinalización zona de baño (obrigatorio).
• Sen sinalización código de conduta e cualificación das augas (obrigatorio).
• Sen embarcación de rescate a motor.
• Caseta de WCs sen corriente eléctrica.
• Acceso aos WCs obstaculizado por motocicletas.
• Lixo nas inmediacións da praia e restos de fogueiras.
• WC de minusválidos utilizado como almacén dos socorristas con material polo chan dificultando a entrada para os minusválidos e sen ningún tipo de vixilancia.
• Papeleiras lixo: 1
• Salvavidas: 2

ZONA NORTE: 

• Socorristas: 1
• Sen boias de sinalización zona de baño (obrigatorio).
• Sen sinalización de zona de paso deportes aquáticos (kitesurf) (obrigatorio).
• Sen embarcación de rescate a motor.
• WC de minusválidos utilizado como almacén de limpeza: Lixivia, deterxente...
• Papeleiras lixo: 4
• Salvavidas: 1

ORNANDA (Miñortos):  BANDEIRA AZUL 2011 

• Socorristas: 2
• Balaustrada de acceso á praia sen accesibilidade e perigosa.
• Sen boias de sinalización zona de baño (obrigatorio).
• Sen paneis informativos de sinalización (obrigatorio).
• Sen sinalización código de conduta e cualificación das augas (obrigatorio).
• Sen embarcación de rescate a motor.
• Sen caseta de socorristas.
• 1 só WC (H-M-Minusválidos)
• Acceso aos WCs obstaculizado por motocicletas.
• WC de minusválidos utilizado como almacén dos socorristas con material polo chan dificultando a entrada para os minusválidos e sen ningún tipo de vixilancia.
• Duchas sen presión de auga: 2 (1 en mal estado).
• Papeleiras lixo: 4
• Salvavidas: 2

See the full gallery on Posterous

GUÍA BANDEIRA AZUL.doc Download this file

Posted via email from Certo.gl, o xornal dixital de Barbanza e Noia

Noia: dúas obras de teatro este sábado 23 de xullo no Liceo a cargo de Cruz Vermella

• O grupo de teatro de maiores -con actores entre os 70 e os 85 anos de idade- representará "A consulta do doutor" e o grupo de persoas con discapacidade, "A carballeira animada"
• Entre obra e obra, interpretarán a canción "Yo no tengo la culpa de haberte querido"
  

 

Noia, 22 de xullo de 2011. Este sábado 23 de xullo haberá dúas representacións teatrais na Sociedade Liceo de Noia, ao que se pode acceden dende a alameda. Será a partires das oito da tarde no salón de actos e serán, pola banda do grupo de personas maiores, "A consulta do doutor" e pola banda do grupo de discapacitados, "A carballeira animada". Entrada gratuita pero, ollo, aforo limitado. 

Na asemblea comarcal de Cruz Vermella de Noia, dentro do proxecto de Axuda a domicilio complementaria lévase a cabo de xeito anual unha actividade de teatro, na que se conta con estes dous grupos de ensaio. O de discapacitados lévase en colaboración coa asociación de pais do Stand. Esta actividade hai sete anos que se vén facendo, e ten unha grande acollida por parte dos usuarios, pois ensaian durante todo o ano as pezas teatrais en sesións de hora e media, dous días á semana.

O grupo de teatro de Cruz Vermella de Noia está formado por 25 usuarios e usuarias e 3 directoras de teatro voluntarias que se encargan tanto de  deseñar e dirixir as diferentes obras e grupos como da organización dos ensaios. O grupo de persoas maiores está composto de 15 persoas de idades comprendidas entre os 70 e os 85 anos e o de persoas con discapacidade está formado por 15 actores e actrices pertencentes á Asociación de Pais do STAND.

E se están na Sociedade Liceo tamén poden:

• Ver a exposición de Chere, no Liceo ata finais de xullo

Posted via email from Certo.gl, o xornal dixital de Barbanza e Noia

A Pobra: este sábado 23, demostración do grupo de baile "Batudance"

A Pobra, 22 de xullo de 2011. Este sábado 23 de xullo, ás 21:30 horas, na Praza Alcalde Segundo Durán, terá lugar o Festival de Baile Batudance. Está organizado pola Asociación BATUDANCE, formada pola súa presidenta Patricia Parada Vidal e a entrenadora Mónica Sanlés Rodríguez. Na presentación, esta semana na Pobra, estiveron presentes dous dos rapaces que forman parte do grupo de baile: Nagay Lijó Sanlés e Paula Castro Ares.

Haberá exhibición de bailes de salsa, batuka, bailes de salón e baile moderno. E tamén un espectáculo con voz en directo. Para máis información a asociación ten este perfil de facebook (de onde procede a foto da información) e o correo batudancepobra@hotmail.com

Posted via email from Certo.gl, o xornal dixital de Barbanza e Noia

Boiro: a concentración moteira comezou cun show de "drift", ou derrapes espectaculares

Boiro, 22 de xullo de 2011. A concentración moteira que organiza BoiroMotos, o club moteiro de Boiro, ata o vindeiro domingo 24 de xullo, deu comezo cunha espectacular serie de "derrapadas porcas", máis coñecidas como "drifting", verba anglosaxona coa que se deu a coñecer esta variante de deporte de motor.

Tamén aproveitamos para darlle a benvida ao novo fotógrafo colaborador de Certo, Alén Pérez, que fixo esta serie en exclusiva para nós.

Antes, en Certo:

Motos: concentración dende o 22 ao 24 de xullo

See the full gallery on Posterous

Posted via email from Certo.gl, o xornal dixital de Barbanza e Noia

Porto do Son: 120.000 euros para consolidar e divulgar o Castro de Baroña

• O Diario Oficial de Galicia publica hoxe a resolución pola que se anuncia a licitación das obras de acondicionamento e a consolidación arqueolóxica dun castro que moito tarda en ser declarado BIC
  

Porto do Son, 22 de xullo de 2011.- O Diario Oficial de Galicia publica hoxe a resolución pola que se anuncia a licitación das obras de acondicionamento e a consolidación arqueolóxica do Castro de Baroña. A Consellería de Cultura e Turismo destinará 120. 000 euros para divulgalo -poñer en valor é unha expresión que non ten sentido-, 60.000 euros neste ano 2011 e 60.000 euros en 2012. Esta actuación está cofinanciada polo Fondo Europeo de Desenvolvemento Rexional, no marco do Programa operativo Feder Galicia 2007-2013. O prazo máximo de execución comprende desde o día seguinte á sinatura do contrato ata o 15 de novembro de 2012.

As actuacións obxecto do contrato atenden á realización dunha intervención arqueolóxica que ten por fin adoptar as medidas necesarias para garantir a conservación das estruturas e permitir a súa visita e aproveitamento sociocultural. Cómpre lembrar que o espazo es un dos referentes do turismo cultural de Galicia polo que é necesario que a visita ao mesmo poida realizarse coas máximas garantías e cunha oferta de calidade, polo que a actuación é especialmente relevante para afondar no coñecemento e investigación do mesmo como paso previo á continua mellora da súa oferta sociocultural e do seu goze, sobre todo tendo en conta a súa elección como un dos elementos importantes dentro da Rede Galega de Patrimonio Arqueolóxico (RGPA). Ademais, é imprescindible para xerar espazos transitables para os visitantes sen causar danos nos restos arqueolóxicos.

Co fouciño na man, apañando o batume

Deberán levarse a cabo traballos de roza manual da vexetación -o que aquí no rural se lle chama apañarlle o batume co fouciño do monte- e retirada das pedras soltas sen contexto arqueolóxico de todo o recinto intramuros do xacemento con dous obxectivos básicos. Dun lado, para impedir que o biodeterioro afecte ás estruturas arqueolóxicas e, por outro, para facilitar a súa contemplación. Este traballo deberá executarse nunha primeira quenda no ano 2011e noutra ao remate da actuación no 2012. Tamén deberá actuarse de xeito específico sobre varias das estruturas que están máis deterioradas como consecuencia de factores antrópicos e ambientais.

Os traballos, que están deseñados para dúas anualidades, consistirán, en primeiro lugar, no acondicionamento da zona mediante a roza da vexetación, a consolidación puntual de pedras e elementos soltos e o tapado preventivo de zonas especialmente degradadas ou de reserva arqueolóxica.

Nun segundo momento, acometerase a escavación con metodoloxía arqueolóxica naquelas áreas na que sexa preciso para a consolidación e intervención sobre algunhas zonas do xacemento. Ademais, farase un rexistro da intervención e tomaranse mostras analíticas que complementen a investigación de seren necesario.

Na terceira etapa, os traballos consistirán na consolidación de varias zonas e no seu rexistro mediante debuxo arqueolóxico dos elementos orixinais e outros procedementos estandarizados no protocolo de consolidacións arqueolóxicas. Seguidamente, levarase a cabo a colocación de sinalización mediante elementos informativos e sinaléctica direccional do percorrido. Por último, realizaranse as tarefas de divulgación.

Posted via email from Certo.gl, o xornal dixital de Barbanza e Noia

A Pobra do Caramiñal: inaugurado o campo de fútbol de Cadreche

• A obra foi realizada conxuntamente pola Secretaría Xeral para o Deporte da Xunta de Galicia, o Concello da Pobra do Caramiñal e a Deputación da Coruña
• O secretario xeral de Deporte da Xunta, Lete Lasa, definiu a vida do concello como “rica, variada e exitosa” polos seus importantes logros deportivos
  

 

A Pobra do Caramiñal, 22 de xullo de 2011-. O secretario xeral para o Deporte da Xunta de Galicia, José Ramón Lete Lasa, inaugurou hoxe o campo de fútbol de Cadreche no concello da Pobra do Caramiñal. Lete asegurou que a obra se realizou “cos esforzos compartidos do Concello, a Deputación e a Secretaría Xeral para o Deporte da Xunta de Galicia”; ademais destacou que as instalacións “son froito dun esforzo das tres institucións públicas de case 800.000€, dos que a Secretaria Xeral achegou máis de 300.000”

O secretario xeral para o Deporte definiu esta obra como “un esforzo importante desde o punto de vista económico pero igualmente merecido e de obrigado cumprimento para os que temos a responsabilidade de ofrecer aos cidadáns servizos públicos”.

Así mesmo José Ramón Lete Lasa, fixo referencia á “vida rica, variada e exitosa” do concello coruñés. “Rica e variada polas amplas modalidades deportivas practicadas polos pobrenses” e exitosa “porque entre os seus veciños atopamos medallistas campións do Mundo e de España”.

O secretario xeral para o Deporte asegurou que os éxitos pobrenses terán “un futuro prometedor”, xa que se rexistraron importantes cifras de participación no programa deportivo Xogade da Secretaría Xeral para o Deporte, así mesmo tamén destacou os 91 equipos que teñen representado á Pobra do Caramiñal en 7 modalidades deportivas.

Lete Lasa rematou asegurando que “o deporte da Pobra do Caramiñal goza de boa saúde e recoñeceu “o labor do alcalde da Pobra, do seu responsable de Deportes e, en definitiva, do conxunto da Corporación Municipal”.

Características do campo
O campo de fútbol Cadreche conta cun terreo de xogo de 95 x 600m. Entre as obras realizadas levouse a cabo una ampliación do espazo de aparcamento existente, o pechamento do recinto, a construción de vestiarios (catro de deportistas e un de árbitros) e a construción de aseos públicos. Ademais tamén se construíron almacéns, cuartos de instalacións e tiveron lugar acometidas das distintas redes de abastecemento, depuración e vertido.

Posted via email from Certo.gl, o xornal dixital de Barbanza e Noia

Dodro: a Festa dos Maiores será o vindeiro domingo 31 de xullo

Dodro, 22 de xullo de 2011. O Concello de Dodro organiza, un ano máis, a Festa dos Maiores. O programa deste ano é o que segue:

11.30 h Recepción

12.00 h Actuación da charanga rianxeira "Vai de Roda"

13.00 h Misa solemne

14.00 h Benvida a cargo do alcalde e do Equipo de Goberno

14.30 h Xantar

16.00 h Baile coa actuación de "Grupo Glamour"

17.30 Actuación do humorista Paco-Mi-Vida

18.30 h Continuación do baile con "Grupo Glamour"

Haberá servizo de autobuses polas paradas habituais. Os horarios anunciaranse nas marquesiñas uns días antes da festa.

É necesario recoller a invitación da festa para asistir.

Posted via email from Certo.gl, o xornal dixital de Barbanza e Noia

A Pobra: o Psoe denuncia nepotismo nas contratacións do equipo de goberno popular

• Afirman, entre a retranca e o sarcasmo, que "Dos 500 postos de traballo ofrecidos por Isaac Maceiras en campaña electoral, xa quedan menos por cubrir"
• Entre os "afortunados traballadores" hai fillos de concelleiros e boa parte de afiliados a Novas Xeracións do PP

O Psoe denuncia que non se sabe que persoas contratadas teñen a titulación para manexar embarcacións

A Pobra, 21 de xullo de 2011. O Psoe, na súa labor de oposición que lle corresponde no Concello da Pobra, denuncia hoxe nepotismo -en Ourense chamaríanlle baltarización do concello- nas contratacións do equipo de goberno. "Desde o Partido Socialista cremos que un concello debe ser transparente na xestión das contratacións, co fin de acreditar ante os nosos veciños que estas se fan limpamente. Non é o caso do Alcalde Isaac Maceiras e o seu equipo de goberno que para os postos de socorristas e limpeza de praias contrata as persoas afíns o seu partido, neste caso fillos de concelleiros, da secretaria personal e integrantes de novas xeracións do Partido Popular. Garantir os principios constitucionais de igualdade, mérito e capacidade requiridos para traballar en calquera administración pública non é un principio básico para este Goberno. A xenerosidade empeza por eles mesmos", explican os socialistas pobrenses en verbas da súa concelleira portavoz, Teresa García Guillán.

Os datos que aportan son os seguintes:

http://www.apobra.org/gl/concello/emprego-publico/232-resultado-da-contratacion-do-persoal-de-limpeza-de-praias.html

Lista de admitidos para a contratación de persoal de limpeza de praias a través dos Programas de Cooperación entre a Consellería de Traballo e Benestar e o Concello da Pobra do Caramiñal (Expte: TR351A 2011/480-1)

Entre os numerosos cargos das novas xeracións do PP da Pobra, atópase a filla da concelleira de servizos sociais e sanidade BALBINA LOJO OLVIERA

APELIDOS E NOME

DOMINGUEZ PICOS MARTA ( Na páxina web de novas xeracións do PP da Pobra aparece como responsable de comunicación e tecnoloxías)

 

DURAN CAMPOS CHRISTIAN (vogal de NNXX do PP da Pobra, colaborou na pasada campaña pegando carteis e conducindo o coche da megafonía)

 

GARCÍA LOJO ESTEFANIA (vogal das NNXX do PP da Pobra)

 

OLVEIRA MAYAN SANTIAGO JOSE (colaborou  na campaña  e conduxo a furgoneta ca megafonía)

 POUSO BRIONES MARIA JOSE

 SANTOS DOMINGUEZ SILVIA Voceira de NNXX do PP

 

http://www.apobra.org/gl/concello/emprego-publico/226-listado-de-socorristas.html

SOCORRISTAS, entre os que se encontran o fillo do concelleiro de obras JOSÉ MANUEL CASTRO e o fillo da secretaria particular do Alcalde Mº JOSÉ RIVADULLA, ademais dunha vogal  e o Presidente de NNXX do PP da Pobra.

MARCOS CASTRO SEOANE  

IVÁN OUTEIRAL RIVADULLA

LORENA PELETEIRO GONZÁLEZ  Vogal de NNXX do PP. Esta moza nin ten realizado o curso de socorrismo

ELOY SOBRIDO GARCÍA  Presidente de NNXX do PP da Pobra

No listado dos socorristas aparece un epígrafe de formación complementaria, dita formación non especifica se algunha destas persoas está capacitada e ten a titulación necesaria para manexar unha embarcación.

Para usar unha embarcación é necesario ter o título de Patrón de embarcación deportiva: "deberían facer público o listado cas persoas que teñen esta titulación, ademais do seguro de responsabilidade civil que poida asumir a responsabilidade dunha mala praxe", denuncian dende o Psoe.

Se estes mozos non cumpren cas leis de navegación marítima debería actuar de inmediato a Capitanía, advirten os socialisas pobrenses.

http://www.ppdapobra.es/nova/51-presentacion-paxina-web-ppdapobra-e-nnxx-do-pp.html (enlace da páxina de Novas xeración do PP da Pobra)

"Non estamos falando de sospeitas, estamos documentando os pagos de favores aos colaboradores e a falta de escrúpulos. Esta é a solidariedade que o Sr. Isaac ten cas familias deste pobo! Deberían pedir escusas a tódalas persoas honradas e as familias onde tódolos membros están no paro", láianse no Psoe da Pobra.

Burla aos desempregados

Este tipo de política, proseguen os socialistas, "é unha auténtica burla aos desempregados, tendo en conta a cantidade de pais e nais de familia que necesitan cartos para manter a súas familias". Ademais, afirman qe lles consta que algunha persoa que está contratada para a limpeza de praias se desviou a limpar outras instalacións municipais ou incluso a limpar o centro do pobo. "Debemos recordarlle ao Sr Isaac que si se contrata a estas persoas para un fin, non  pode desvialas para outro cometido, desta maneira estase cometendo unha ilegalidade ademais de correr o risco de perder dita subvención", rematan.

Posted via email from Certo.gl, o xornal dixital de Barbanza e Noia