Outes: Clara Caamaño, de sexto de Primaria, gañou o certame de deseño do logotipo do Ano de Añón

• Francisco Añón Paz naceu hai 200 anos en Boel, Outes, un 9 de outubro
• A alumna gañadora é escolar do colexio da Serra de Outes. Houbo un accésit, que recaeu en Nerea Cambeiro
  

Outes, 9 de xaneiro de 2012. O pasado sábado, 7 de xaneiro, no transcurso do festival musical que, organizado polo Concello de Outes, se celebrou na Casa da cultura da Serra, tivo lugar a entrega do premios á gañadora do certame convocado polo propio Concello para o deseño dun logotipo destinado a ser a imaxe representativa do Ano de Añón, con motivo da conmemoración neste ano 2012 do 200 aniversario do nacemento do poeta outense Francisco Añón.

O concurso, que estaba dirixido á poboación escolar de Outes, foi gañado por Clara Caamaño, alumna de 6º de Primaria do Colexio da Serra de Outes, a cal recibiu da man do Concelleiro de Cultura, Manuel García, o vale de 200 € canxeables por material escolar ou deportivo, con que estaba galardoado o premio.

No mesmo acto, tamén foi agasallada cun premio de 50 € a alumna do Colexio do Cruceiro de Roo Nerea Cambeiro, gañadora do único accesit concedido polo xurado, formado éste por representantes de todas as asociacións culturais, veciñais e musicais que van participar na celebración de charlas, recitais, concertos e outras actividades que van ter lugar ao longo do presente ano e culminarán no mes de outubro nun acto solemne coa presencia de autoridades municipais, da Xunta de Galicia e da Real Academia Galega.

 

Informou desta actividade Xoán X. Mariño, presidente da asociación cultural "Terra de Outes" e comisario designado polo Concello de Outes para a organización do Ano Añón.

Quen era e que fixo? Francisco Añón Paz?

Consulte na Galipedia, aquí

Antes, en Certo:

• Outes: piden que a Cidade da Cultura se chame "Isaac Díaz Pardo"

Certo
O Xornal Dixital de Barbanza e Noia
OLLO!! PÁXINA DE SEAREIROS EN FACEBOOK: http://www.facebook.com/xornalcerto
ÚNETE!!

Posted via email from Certo.gl, o xornal dixital de Barbanza e Noia

Política: o Psoe propón á Xunta un plan de emprego para reactivar a economía da Barbanza

• Os socialistas desta bisbarra valoran como "moi grave" a situación de desemprego nesta zona ao superarse os dez mil desempregados
• Piden dinamizar os polígonos industriais da comarca (Rianxo, Pobra, Ribeira, Noia e Muros) con naves modulares en aluguer para emprendedores e bonificacións e estímulos económicos aos pequenos e medianos empresarios
• Denuncian que o macropolígono comarcal do Barbanza está paralizado dende a chegada de Feijóo

Boiro, 9 de xaneiro de 2012.-O Portavoz da Área Institucional do Grupo Socialista, José Manuel Lage, reuniuse o pasado sábado cos portavoces municipais e secretarios locais do PSdeG-PSOE da comarca barbanzana para abordar a “grave situación de desemprego que están sufrindo os concellos do Barbanza, ao superar a cifra de 10.000 desempregados”.

Os socialistas do Barbanza ven a cifra de 10.000 desempregados no conxunto do Barbanza "como unha proba da magnitude da crise económica”.

Lage Tuñas apunta “son datos moi negativos. Precísanse respostas e o goberno galego terá tamén que explicar que fixo nestos tres anos de lexislatura, dado que teñen competencias en materia de emprego, con dúas consellerías,na que unha ten fondos para adicar ás políticas activas de emprego e outra, a de industria, conta con instrumentos poderosos como o IGAPE que é preciso saber que fixeron neste tempo”.

”Os socialistas do Barbanza propoñemos que a Xunta de Galicia aprobe un plan de emprego para a reactivación económica da comarca do Barbanza para os anos 2012 e 2013”, explicou Lage Tuñas.

Os dirixentes socialistas advirten que “ata o de agora Feijóo fuxía das súas responsabilidades pero debe respostar das súas competencias para dinamizar a economía”.  Os socialistas do Barbanza ven que ”o IGAPE está paralizado e non atende as demandas dos emprendedores da comarca do Barbanza. Imos pedirlle contas ao goberno galego, teñen competencias en materia de emprego e non sabemos que fixeron nestos tres anos que levan gobernando”.

Lage Tuñas entende que “a Xunta debe explicar a política de incentivos e estímulos económicos” dirixida a fomentar o dinamismo económico e interesarase novamente “polas axudas concedidas a emprendedores e pequenas e medianas empresas do Barbanza para a xeración de riqueza e emprego na bisbarra”.

”Non podemos quedar de brazos cruzados, nin resignarnos a ver como a actividade económica se sigue ralentizando e cada vez hai máis desempregados. A Xunta ten competencias en materia de emprego e cabe pedir un esforzo, máis imaxinación e menos resignación”, argumentou.

Macropolígono paralizado

O deputado socialista destacou que “os socialistas barbanzanos estamos fondamente preocupados porque o Macropolígono Empresarial do Barbanza está paralizado, dende o ano 2009 a Xunta non fixo ningunha xestión, na práctica o proxecto está conxelado”.

“O Partido Popular ten que explicar a razón pola cal o goberno galego non fixo nada nestes 3 anos. Existe demanda de solo industrial en Ribeira e Pobra e a Xunta non dá respostas, non acelera a tramitación e execución do macropolígono empresarial do Barbanza”.

Naves modulares en aluguer nos polígonos

Os socialistas do Barbanza “piden dinamizar os polígonos industriais de Rianxo, Pobra, Ribeira, Noia e Muros, con naves modulares en aluguer para emprendedores e bonificacións e estímulos económicos aos pequenos e medianos empresarios”.

“Non só se trata de ter solo industrial senón tamén que precisamos unha liña clara de axudas aos emprendedores para que poidan instalarse nos polígonos e iso é o que propoñemos e esperamos que se acolla ben a nosa proposta”, explicou Lage Tuñas.

Posición constructiva no Parlamento

"Non é unha crítica demagóxica, é un exercicio de responsabilidade dende a oposición parlamentaria, de querer saber, de preguntarlle a quen ten competencias que foi o que fixo ata o de agora, e de saber como se gastaron os recursos públicos en materia de industria, emprego, incentivos económicos, etc. A situación do desemprego do Barbanza é grave e precisamos respostas”, sinala Lage, quen vai interesarse novamente no Parlamento polas políticas que leva aplicado o goberno Feijóo para dinamizar a economía na comarca do Barbanza.

Os socialistas barbanzanos demandan do goberno galego “unha clara politica de incentivos e estímulos económicos” dirixida a fomentar o dinamismo económico e emprego na bisbarra”.

Posted via email from Certo.gl, o xornal dixital de Barbanza e Noia

Dodro: o municipio viviu a súa primeira cabalgata de Reis este ano

• Tamén tivo lugar o I Concurso de Pasteis
  

Dodro, 9 de xaneiro de 2012. O Concello de Dodro celebrou o pasado xoves 5 de xaneiro por primeira vez o desfile da Cabalgata de Reis.

As súas maxestades, antes de iniciaren o percorrido, visitaron aos maiores do Centro de Día de Dodro acompañados pola concelleira de Servizos Sociais e Igualdade. Os maiores recibiron con aplausos e algúns con bágoas moi emocionados aos Reis Magos, que lles regalaron chocolatinas, caramelos e moitos bicos.

Ás 5 da tarde a comitiva partiu do polideportivo municipal recorrendo distintas aldeas do concello para finalizar na Praza do Concello onde os Reis Magos foron recibidos con aplausos e moita ilusión dos nenos e maiores que agardaban a súa chegada.

Foron recibidos polo alcalde e realizaron a ofrenda ó Neno Xesús para continuar coa recepción de todos os rapaces que agardaban impacientes ós que lles deron agasallos e escoitaron as súas peticións. Mentres, nenos e maiores disfrutaron dun chocolate quente e churros.   

Concurso de pasteis e doces

Ao mesmo tempo, durante a recepción dos nenos celebrouse o I concurso de pasteis do concello con gran expectación dos asistentes. Despois da deliberación o xurado xunto coa  concelleira de Servizos Sociais e Igualdade, Marisol Boga, entregaron os tres primeiros premios. Ao finalizar todos os asistentes puideron degustar os doces e pasteis presentados ao concurso. 

O equipo de goberno asegurou sentirse "satisfeito da acollida que o acto tivo entre os veciños e de que por fin os nenos e nenas do concello non teñan que desprazarse a outros lugares para disfrutar e emocionarse cos Reis Magos".

Certo
O Xornal Dixital de Barbanza e Noia
OLLO!! PÁXINA DE SEAREIROS EN FACEBOOK: http://www.facebook.com/xornalcerto
ÚNETE!!

See the full gallery on Posterous

Posted via email from Certo.gl, o xornal dixital de Barbanza e Noia

Ribeira: esta semana inician as obras na rúa Cervantes, en Bandourrío

A semana pasada estreouse a nova iluminación no barrio do Monumento

Ribeira, 9 de xaneiro de 2012. O Concello informa de que esta semana comeza a actuación dirixida á pavimentación e renovación de servizos de abastecemento de auga potable, saneamento e pluviais na rúa Cervantes e o seu entorno, no antigo barrio de Bandourrío. Está previsto que os primeiros traballos preparativos dean inicio esta mesma tarde de luns. 

A empresa Construcciones Jenaro Cadaval, S.L,. será a encargada de realizar a obra, que ten un orzamento de 168.120,16 euros e un prazo de execución de 3 meses. 

En canto aos detalles da actuación, no que se refire ao abastecemento de auga, se suplantarán as tubaxes existentes por outras de polietileno de alta densidade tanto na rúa Cervantes como nunha vía adxacente. 

Polo que respecta ao saneamento de residuos fecais, se colocará un colector de PVC de 315 milímetros de diámetro nas rúas adxacentes á Cervantes e nesta última  instalarase un tubaxe tamén de PVC pero de 400 milímetros. 

En canto ao saneamento de pluviais, se disporá un colector de PVC de 400 milímetros de diámetro que conducirá o auga ata a rede existente na rúa Manzanares. Nas rúas adxacentes instalarase un colector de 315 milímetros. 

Pavimentación

Ademais, a zona de actuación será obxecto dunha nova pavimentación combinando adoquín de granito con lousas de granito abuxardado cunhas dimensións de 60 x 40 x 8 centímetros, proporcionando un acabado de pedra acorde cunha vía que está situada nun dos barrios orixinais de Ribeira.

Pode que tamén lle interese:

• Ribeira: novas luminarias no barrio do Monumento

• Ribeira: os Magos chegaron en helicóptero. Que crise?

 

Posted via email from Certo.gl, o xornal dixital de Barbanza e Noia

Ribeira: abren prazo de inscrición para cursos de galego Celga 2012

Ribeira, 9 de xaneiro de 2012. A participación de Ribeira na Rede de Dinamización Lingüística desde o ano 2011, implica a mellora e intercambio de experiencias dinamizadoras e de formación en lingua galega. Neste marco iníciase o período de inscrición nos cursos gratuítos de formación para a obtención da titulación CELGA dos niveis 1, 2, 3 e 4 que se impartirán no concello de Ribeira neste ano 2012. 

O Servizo de Normalización Lingüística do Concello de Ribeira informa de que o prazo de inscrición para asistir aos cursos gratuítos preparatorios dos exames CELGA dos niveis 1, 2, 3 e 4, convocados pola Secretaría Xeral de Política Lingüística da Xunta de Galicia, permanecerá aberto ata o día 30 de xaneiro de 2012, tal e como reflicte a publicación do DOG do 09/01/12 a Orde do 4 de xaneiro de 2012, da Consellería de Educación e Ordenación Universitaria, pola que se anuncian cursos de lingua galega preparatorios para as probas dos niveis CELGA 1, 2, 3, 4. 

A reserva de prazas realizarase por estrita orde de inscrición, ata completar o límite de 30 persoas inscritas por curso. A formación é gratuíta e está  dirixida a persoas de máis de 16 anos.

Posted via email from Certo.gl, o xornal dixital de Barbanza e Noia

Noia: o Liceo programa un concerto de Leilía para o sábado 14 de xaneiro

LEILÍA.pdf Download this file

• Trátase da presentación do último traballo deste grupo, titulado "ConSentimento".
• Comeza ás 21:30 no salón de actos do Liceo
  

Posted via email from Certo.gl, o xornal dixital de Barbanza e Noia

Rianxo: o IES "Félix Muriel", de novo na vangarda da dinamización lingüística en galego

• Percibirá 2.500 euros en metálico polo traballo Rianxo 2112: construíndo un pasado para o noso futuro

• Premiados por Política Lingüística cinco traballos doutros tantos centros entre os 75 presentados
  

Rianxo, 8 de xaneiro de 2012.- A Secretaría Xeral de Política Lingüística premia cinco centros educativos de Galicia polo seu labor innovador en dinamización lingüística. Trátase do CPI Dr. López Suárez do Saviñao, do IES Félix Muriel de Rianxo, do IES Rodeira de Cangas, do IES Perdouro de Burela e do IES As Bizocas do Grove. Todos eles foron os gañadores dos premios aos proxectos de innovación en dinamización lingüística en centros de titularidade da Consellería de Cultura, Educación e Ordenación Universitaria para desenvolver no curso académico 2011-2012.

O Diario Oficial de Galicia (DOG) publicaba esta semana a resolución dos premios, que teñen como obxectivo prioritario fomentar o desenvolvemento de proxectos educativos innovadores que impliquen o uso da lingua galega e o coñecemento da cultura de Galicia.

As iniciativas galardoadas, que recibirán 2.500 euros cada unha, foron seleccionadas entre un total de 75 proxectos, unha cifra que duplicou os presentados na pasada edición dos premios. Ademais, o profesorado implicado nas iniciativas gañadoras recibirá unha xornada de asesoramento e orientación. Para dar a coñecer os proxectos, a secretaría xeral difundiraos a través do seu portal web, http://www.xunta.es/linguagalega, xunto cos materiais educativos que se realicen para a súa posta en marcha.

Amplo abano de experiencias
Os proxectos premiados abranguen un amplo abano de ámbitos e de temas. O CPI Dr. López Suárez do Saviñao aposta por poñer en valor o galego a través do estudo da actividade que lle imprime máis personalidade á zona xeográfica de influencia do centro educativo e presentan o proxecto A elaboración do viño na Ribeira Sacra. No marco desta experiencia, realizarán actividades de investigación sobre o proceso de elaboración do viño na Ribeira Sacra, recompilarán vocabulario relacionado coa viticultura e empregarán o galego dialectal como vehículo para a aprendizaxe da lingua inglesa, poñendo en valor os usos lingüísticos da contorna do alumnado.

Entre os proxectos gañadores tamén se encontran algúns de centros educativos que xa viron recoñecido noutras ocasións o seu labor de dinamización lingüística e que agora propoñen novas accións para avanzar no seu traballo. É o caso do IES Félix Muriel de Rianxo (A Coruña), do IES Perdouro de Burela (Lugo), do IES As Bizocas do Grove (Pontevedra) e do IES Rodeira de Cangas (Pontevedra).

O primeiro destes centros resultou seleccionado pola iniciativa Rianxo 2112: construíndo un pasado para o noso futuro. No marco deste novo proxecto, o centro procurará a realización de actividades baseadas na lingua oral, o achegamento ao galego por parte do alumnado estranxeiro e a colaborará con diversas entidades da contorna do centro, como empresas, asociacións e o Concello de Rianxo. As novas tecnoloxías protagonizarán outras das principais accións do proxecto, entre as que se encontran a realización dun mapa interactivo de Rianxo e unha presentación multimedia sobre o seu patrimonio.

O fomento do galego no ensino
Ademais da convocatoria destes premios, a secretaría xeral promove outras iniciativas no ámbito educativo que reforzan o asentamento da lingua na actividade cotiá dos centros, entre as que destacan as axudas para os proxectos de fomento do galego. Tamén promove a realización de concursos, de seminarios de dinamización para os docentes ou de programas en colaboración con outras institucións, como é o caso do Festival OUFF Escola, das Xornadas de Normalización Lingüística de Ferega, do programa Papá Pío da Fundación Carlos Casares ou da Convivencia de Educación Infantil Cholo e Nela.

Con motivo da celebración do vixésimo aniversario dos equipos de dinamización da lingua galega nos centros, a secretaría xeral tamén organizou unha exposición que repasa a súa traxectoria a partir das revistas escolares que foron elaborando nos últimos vinte anos. A exposición, que pode verse ata o 15 de marzo no Museo Pedagóxico de Galicia, complétase cunha mostra virtual no web da secretaría xeral que inclúe experiencias dinamizadoras desenvolvidas polos equipos na actualidade.

Posted via email from Certo.gl, o xornal dixital de Barbanza e Noia

Ribeira: Jacob Moraña colle a testemuña da presidencia da Cofradía da Dorna

Jacob Moraña, de pé na votación onde saíu escollido

Ribeira, 8 de xaneiro de 2012. Na última asemblea que celebraron na Cofradía da Dorna estaba entre os puntos da orde do día a escolla do novo presidente. Saíu escollido Jacob Moraña Cabo, que estará á fronte da cofradía máis festeira do Barbanza este ano e o vindeiro 2013. Foi escollido cun total de 22 votos a favor, dúas abstencións e un voto en contra.

O presidente saínte é Arturo González Mariño, que continuará como vicepresidente, namentres que Jacob Moraña pasa de secretario a presidir a entidade.

Arturo González Mariño é o que axexa detrás do monitor

Posted via email from Certo.gl, o xornal dixital de Barbanza e Noia

Outes: "Terra de Outes" avoga por darlle á Cidade da Cultura o nome de Isaac Díaz Pardo

Outes, 7 de xaneiro de 2012. A Asociación Cívico-Cultural Terra de Outes quere expresar "o seu pesar polo recente pasamento do  eminente polígrafo, pintor, editor e impulsor de Sargadelos D. Isaac Díaz Pardo e unirnos á petición diversas personalidades, institucións e agrupacións da vida política e cultural de Galicia para solicitar ao goberno galego o nome do xenial compostelán para a Cidade da Cultura, non só como a mellor homenaxe que se lle pode facer, senón como sinal de gratitude polo seu inmenso legado para o pobo galego."

Asina Xoán Mariño, Presidente da ACC Terra de Outes

Posted via email from Certo.gl, o xornal dixital de Barbanza e Noia

Rianxo: o Concello amosa a súa "máis fonda condolencia" polo pasamento de Isaac Díaz Pardo, fillo adoptivo da vila dende 2008

• As bandeiras institucionais están dende onte e ata mañá (tres xornadas) a media hasta

Homenaxe ás xentes do mar, conxunto escultórico que preside o parque do auditorio de Rianxo e feita polo escultor Francisco Escudero sobre unha idea de Isaac Díaz Pardo

Declaración Institucional no pasamento de D. ISAAC DÍAZ PARDO Fillo adoptivo de Rianxo

6 xaneiro 2012

no pasamento de D. ISAAC DÍAZ PARDO Fillo adoptivo de Rianxo (nomeado en sesión plenaria do 8/11/2008).

ISAAC DÍAZ PARDO amosouse durante toda a súa vida, e tamén no seu polifacético labor e amplo quefacer, como pequeno motor de grandes cousas e causas, en palabras de Rafael Dieste. Sempre unha adicación intensa e entregada, tamén animosa e xovial, sempre marcada polo seu compromiso con Galicia.
Non será fácil refacernos de tan lamentable perda pois tanto a simpatía e compromiso que lle eran propios, como as abondosas mostras de amizade con que nos agasallaba, serán difícilmente reemplazábeis.
Permaneza, pois, ainda que sexa cativo consolo, a lembranza da entrega reseñada e o exemplo do bo facer e compromiso cos seus, con Galicia e con Rianxo. Que o seu modo de traballar, a súa fortaleza física e de espíritu, e o conxunto do seu legado, sexan permanente luz inspiradora do noso traballo de agora en diante.
Esta Corporación Municipal, quere manifestar, no seu nome e no de todos os rianxeiros e rianxeiras, a máis fonda condolencia á familia, así como aos seus moitos e queridos amigos  e, en definitiva, a todas aquelas persoas que, coñecéndoo en vida, garden sentida memoria polo seu pasamento.
Asímesmo e, como pública manifestación de dor, esta Corporación Municipal dispuxo as bandeiras do Concello a media hasta durante tres xornadas e publica esta declaración institucional.

Antes, en Certo:

• Cultura galega: morre  Isaac Díaz Pardo

Posted via email from Certo.gl, o xornal dixital de Barbanza e Noia