Política: os socialistas únense ás reivindicacións dos opositores sen praza que protestaron hoxe fronte á Xunta de Galicia

O PSdeG recolle as reivindicacións de opositores que levan agardando meses para tomar posesión como funcionarios
Tuñas interpelaran ao goberno sobre os retrasos “inxustificados” na toma de posesión como funcionarios

Santiago de Compostela, 11 de novembro de 2010. O portavoz da Área Institucional do Grupo Parlamentario Socialista, José Manuel Lage Tuñas, recolleu hoxe as reivindicacións dos opositores que levan meses agardando para tomar posesión como funcionarios. O deputado socialista estivo hoxe presente na protesta dos opositores, ás portas de San Caetano, onde os opositores denunciaron a falta de veracidade nos prazos anunciados por Función Pública.

Lage Tuñas anuncioulles que dende o grupo socialista interpelarán ao goberno de Núñez Feijoo no pleno do Parlamento sobre os retrasos “inxustificados” na toma de posesión como funcionarios dos opositores que hoxe se manifestaban en Santiago de Compostela. Ademais presentou hoxe unha nova iniciativa recollendo as demandas dos opositores.

“José María Barreiro (Director Xeral da Función Pública) mentiu e creou confusión, xa que non é certo que a semana que vén os opositores vaian a tomar posesión das súas prazas. Algúns levan dende o mes de decembro do ano 2009 agardando para tomar posesión, o que constitúe unha auténtica vergonza para a administración pública galega” espetou Lage Tuñas.

“Existe un desprezo absoluto por máis de 780 opositores que levan agardando moitos meses para a súa toma de posesión como funcionarios e polo que se ve van seguir agardando ata o ano 2011” explicou José Manuel Lage despois de manter un encontro cun numeroso grupo de opositores.

O deputado socialista defenderá no Parlamento “a necesidade de que o goberno tome decisións e free a sangría de anomalías e malas prácticas que rodean ás oposicións para traballar na Xunta de Galicia”.  Asegura que “dende a chegada de Alberto Núñez Feijóo á presidencia da Xunta os procesos selectivos están convertidos nun “via crucis” para centos de opositores”.

Subliña tamen que o PSdeG-PSOE comparte a denuncia dos opositores na que aseguran como agora, e co goberno de Núñez Feijóo, os procesos selectivos duran o dobre que co anterior goberno socialista. Replica que “dende o PdeG-PSOE solicitamos que antes de que finalice o ano 2010 se lle asigne a súa praza a máis de 700 opositores que están agardando. Pedimos que s. tramite a toma de posesión como funcionarios dos opositores que gañaron a súa praza fai meses”. E acusou á Xunta de “estar paralizando e ralentizando os procesos selectivos sen xustificación de ningún tipo”.

Lage considera que “hai un desprezo absoluto polos opositores que levan máis de dous anos traballando duro para gañar unha praza”.

“O tertuliano Feijóo segue máis preocupado de opinar de todo o que non lle compete que de resolver a mala xestión que se está producindo na área de función pública da Xunta de Galicia. É preciso levar adiante unha reforma dos sistemas de acceso á función pública para garantizar a axilidade na súa xestión, a imparcialidade e a limpeza nos citados procesos selectivos, e rematar con once meses cheos de conflictos, anomalías, sospeitas de irregularidades e malas prácticas por parte do goberno galego”, rematou o outiense.

Posted via email from Certo.gl, o xornal dixital de Barbanza e Noia

A Pobra do Caramiñal: clausurado o curso de monitor sociocultural

A Pobra do Caramiñal, polo San Martiño de 2010. O curso de formación en animación sociocultural , subvencionado pola Dirección Xeral de Formación e Colocación da Conselleria de Traballo e Benestar da Xunta de Galicia, foi clausurado hoxe. Tivo un total de 15 participantes e durou tres meses, co que acumulou un total de 325 horas.

Unha das actividades realizadas que merece destacar foi a visita teatralizada ao Museo Valle-Inclán. Nela, participantes no curso disfrazáronse de escritores relacionados con Valle-Inclán (Manuel Murguía, o marido de Rosalía de Castro, que prologou o primeiro libro do arousano ou Rubén Darío, así como do propio Valle) e guiaron aos demais nun interesante roteiro polo museo adicado ao escritor.   

Teñen previsto facer as prácticas, que terán unha duración dunha semana, durante catro horas ao día ,  nas Unitarias do Concello e na Gardería Monte Carmelo; coas que xa se puxeron en contacto, para o seu comenzo inmediato.

See and download the full gallery on posterous

Posted via email from Certo.gl, o xornal dixital de Barbanza e Noia

Ribeira: premio Altofalante 2010 á Coordinadora Galega de Equipos de Dinamización e Normalización Lingüística

Download now or preview on posterous

Acta Altofalante do Ano 2010.doc (46 KB)

O Altofalante 2009 fora para a Cofradía da Dorna de Ribeira

Ribeira, polo San Martiño de 2010. O presidente da asociación cultural ribeirense Altofalante, Xosé Antonio Vázquez Cobas, informa da decisión tomada este ano para conceder o premio Altofalante 2010. Como é costume en Certo, reproducimos íntegra a acta do xurado:

A Xunta Directiva da Asociación Cultural Altofalante, celebrada o  sábado 2 de outubro de 2010, entre outros asuntos,  por unanimidade acordou:  
 

Conceder o premio Altofalante do Ano 2010, á Coordinadora Galega de Equipos de Dinamización e Normalización Lingüística (CGEDNL)

     Esta entidade agrupa a profesorado e Equipos de Normalización Lingüística que desenvolven a súa actividade no seo dos centros de ensino do país, de cara a que o alumnado saia da escolarización obrigatoria sendo competente na nosa lingua.     

A Xunta directiva destacou como méritos á hora de conceder o premio, os seguintes: 

• Ser quen de xuntar a unha parte moi importante das comunidades educativas de Galicia de cara a coordinarse e actuar conxuntamente no ámbito da normalización lingüística nos centros.
• Participar activamente -dando argumentos pedagóxicos e lingüísticos- da necesidade de que o noso idioma teña maior presenza no sistema educativo.
• A capacidade para integrar no seo da organización a profesionais do ensino público, privado e privado-concertado e de todos os niveis educativos.
• Organizar campañas de sensibilización e dinamización da nosa lingua como poden ser “Orgullosos no noso. Orgullosos do Galego” que foron un grande éxito de proxección pública.

Así mesmo por acordo da Asemblea Xeral  da Asociación Cultural Altofalante,  a Coordinadora Galega de Equipos de Dinamización e Normalización Lingüística será nomeada “socio de honra” de dita asociación.

   A Xunta Directiva de Altofalante fará público o fallo do premio uns días antes do 13 de Novembro, “Día da Dignidade de Galicia”. 

   O premio entregarase o vindeiro sábado 20 de Novembro ás 20:00 horas no Conservatorio Municipal de Ribeira. 
 

En Ribeira a 2 de Outubro de 2010

Webs de referencia:
http://www.coordinadoraendl.org
http://altofalante.org

Posted via email from Certo.gl, o xornal dixital de Barbanza e Noia

Ribeira: encontro do curso da Aula Galega de Saxofón esta fin de semana no conservatorio

En xullo deste ano houbo varios concertos de saxo en Ribeira

Ribeira, 11 de novembro de 2010. Esta próxima fin de semana (o sábado 13 e o domingo 14) terá lugar no Conservatorio Profesional de Música de Ribeira o segundo encontro do curso 2010/2011 da Aula Galega de Saxofón.

Os estudantes de saxofón chegados  de conservatorios como o Profesional de Vigo, Profesional de Pontevedra, Profesional de Santiago, Profesional de A Estrada, Profesional de Ponferrada, Escola de Música de Valga, Escola de Música de Vila de Cruces, Escola de Música de Ribadumia, así como alumnos do Conservatorio Profesional local, terán unha nova oportunidade para ampliar e perfeccionar os seus coñecementos co mestre Rodrigo Vila (profesor do Conservatorio Superior das Illas Baleares).

Este seminario é unha iniciativa pioneira do  Conservatorio Profesional de Música de Ribeira e ten como responsable de organización ao seu profesor de saxofón, José Fungueiriño Ramos.

Posted via email from Certo.gl, o xornal dixital de Barbanza e Noia

Ribeira: simulacro de incendio este venres 12 de novembro no instituto de Coroso

Imaxe de arquivo doutro simulacro desenvolto en Ribeira

Ribeira, 11 de novembro de 2010. Protección Civil vai coordinar mañá venres, día 12 de novembro, un simulacro de incendio no IES Coroso. Esta acción, que terá lugar a partir das 11.15 horas, ten como principais obxectivos poñer en práctica o plan de autoprotección do centro educativo, adestrar ao persoal do centro e do persoal exterior con implicación neste tipo de sinistros (Protección Civil, Grumir, Policía Nacional, Policía Local e Bombeiros), comprobar a capacidade de resposta dos medios que interveñen e observar os erros que se cometan para posteriormente emendalos e incluílos no plan de autoprotección.

No desenvolvemento do simulacro partirase dunha suposta alarma de incendio nunha aula baldeira sita na primeira planta do centro. O exercicio constará da evacuación total e correcta do centro educativo, o control de alumnos e persoal desaloxado no exterior, e a valoración dos tempos de evacuación e de resposta de medios externos. 

Esta acción está codirixida por Protección Civil de Ribeira e a dirección do centro educativo IES Coroso e contará cos seguintes medios participantes: persoal interno do colexio, persoal de Protección Civil e do Grumir, bombeiros comarcais e persoal da Policía Local e da Policía Nacional.

Desenvolvemento do exercicio

O desenvolvemento do exercicio terá lugar do seguinte xeito: ás 11.15 horas un responsable do centro educativo informará por teléfono ao 112 de que se está a producir un incendio nunha aula da primeira planta do edificio e de que proceden á súa evacuación. O 112 da aviso aos bombeiros comarcais, policías nacional e local, Protección civil e Grumir para que se preparen para atender a suposta emerxencia. A Policía Local enviará unha patrulla ao lugar de aviso, onde acudirán tamén unha dotación de bombeiros, efectivos da policía nacional e un equipo de Protección Civil e Grumir cun camión motobomba e un vehículo dotado con medios de intervención e extinción en incendios urbanos. 

Mentres tanto, no centro estarase a realizar o desaloxo polos cauces establecidos no plan de autoprotección, e levarase a cabo unha estrita vixilancia tanto da evacuación como da orixe da emerxencia. 

Unha vez rematado o desaloxo procederase ao reconto de alumnos no punto de reunión, e o responsable máximo da evacuación esperará a chegada dos medios de intervención externos para informar ao responsable destes da situación. No caso de que á chegada do equipo de intervención externa aínda non se rematase coa evacuación ou co reconto dos alumnos, este equipo colaborará na finalización destas tarefas. 

A continuación, o equipo de intervención externa entrará no centro acompañado polo responsable do mesmo e revisarán o peche de portas e fiestras, así como o correcto desaloxo do edificio. Unha vez rematada o exercicio, valorarase o seu desenvolvemento con especial fincapé nos erros cometidos. 

De todo o desenvolvemento do exercicio, así como da súa finalización, informarase puntualmente á Central de Emerxencias 112 a través de Protección Civil, telefonicamente ou por terminal remoto.

Posted via email from Certo.gl, o xornal dixital de Barbanza e Noia

Rianxo: o Bng cualifica como "aldraxe" que o PP non queira declarar 2011 como "Ano Castelao"

Rianxo, 10 de novembro de 2010.-  O Partido Popular no Parlamento de Galicia negouse a declarar o Ano 2011 como Ano Castelao e votou en contra dunha iniciativa do BNG que tiña por obxecto conmemorar o 125 aniversario do seu nacemento e o recoñecemento da súa figura, para que "non fose víctima da política de ocultación e esquecemento que practica o goberno da Xunta contra as figuras senlleiras da cultura e as letras galegas", segundo explica a formación nacionalista.

Ana Pontón, durante o debate en pleno desta proposta nacionalista, que foi votada no transcurso desta mañá, advertiu que se introducían na mesma unha serie de aspectos para que de ter sido aprobada non puidera ficar como algo “ritual” senón para dotala de contido e que se fixera efectiva. Salientou a necesidade de organizar unha grande exposición da obra gráfica máis relevante de Castelao na Cidade da Cultura e actividades de divulgación nos centros educativos. Asemade, avogou pola organización de estudos e congresos e, sobre todo, porque se incluira na lei de orzamentos unha partida con suficiente dotación para o desenvolvemento de todas as actividades.

As leas sobre Castelao son continuas. Este ano ata o seu sartego no Panteón de Galegos Ilustres estivo pechado.

A parlamentaria tamén reivindicaba a través desta iniciativa que se cumpra outro acordo unánime do pasado mes de febreiro relativo á protección e difusión da obra de Castelao e á súa declaración como Ben de Interese Cultural, pois ningún dos puntos que incluia se está a desenvolver.

Para a deputada nacionalista, a pertinencia desta proposta vén dos antecedentes que se puideron comprobar con nitidez durante o 2010, ano no que se produciron efemérides doutros personaxes claves para a cultura galega, como o 125 aniversario da morte de Rosalía ou o centenario do nacemento de Carballo Calero, “semella que non teñen a talla suficiente para que a Consellería lles prestara a súa atención”.

Ana Pontón denunciou que mentres non hai recursos para conmemorar estas datas si apareceron publicados no DOG convenios para dotar con case 500.000 euros á Fundación Cela, “aquí non hai austeridade –dixo- pero a Fundación Rosalía recibiu só 20.000 e a Fundación Castelao nin aparece. Non só se premian as figuras que non son representativas do sistema literario e cultural galego senón que isto se fai en detrimento das que si precisarían do apoio deste goberno”.

Minipiso da Fundación Castelao

A parlamentar advertiu durante o debate que xa non tiña moitas esperanzas en que esta proposta fora saír adiante e asegurou que esta actitude, a de votar en contra "porque o pensamento de Castelao é nacionalista" , ou aprobar cousas que logo fican nun caixón  é expresiva de como entende o PP o galeguismo, como un “galeguismo de galería” que logo contradí todo coa súa práctica.

Busto de Castelao con flores en Rianxo

“Con esta votación vostedes aldraxan a Castelao, tentan censurar e manipular a súa figura  e quen como vostedes atacan á lingua e cultura galegas, servíndose das institucións nesa batalla, non poden dicir que seguen o credo de Castelao”, concluiu.

Relacionadas:

Castelao: piden que a súa obra se declare BIC

Valle e Calero: homenaxe institucional ao primeiro, esquecemento do segundo

Moito antes, en xaneiro deste ano, publicamos isto.

Posted via email from Certo.gl, o xornal dixital de Barbanza e Noia

Lousame: o Bng di que a Xunta segue "escapando do problema da planta de reciclaxe"

A parlamentaria Ana Pontón propuxo a creación  dunha empresa pública que xestione a planta coa que se garantan os postos de traballo

Lousame, 10 novembro de 2010.- . A deputada do BNG, Ana Pontón, formulou hoxe en sesión plenaria, unha pregunta sobre as accións que levará adiante a Xunta ante a situación da Planta de Tratamento de Residuos da Mancomunidade do Barbanza, destinadas a  garantir a súa viabilidade e os postos de traballo.

Ana Pontón lembrou que esta planta atende a 9 concellos e máis de 85.000 persoas representando un modelo de xestión de residuos “excelente” que ten demostrado ser máis barato que outras opcións, nomeadamente Sogama, e que funciona con total normalidade.

Neste sentido, a deputada nacionalista cualifica de case “temerario” o desleixo que está a amosar até o de agora o goberno da Xunta, toda vez que a situación de Sogama, no que atinxe á súa capacidade, fai supoñer que non podería asumir os residuos desta zona en caso de pechar a Planta do Barbanza.

Ecoembes debe manter as condicións de recollida de residuos

Para Ana Pontón, a intervención da Xunta pasa por garantir, a través do convenio que está negociando con Ecoembes, que esta empresa manteña as condicións de recollida dos materiais que ten na actualidade coa planta de Lousame e tamén por realizar as xestións oportunas para facilitar a amortización da débeda que varios concellos da comarca manteñen coa mancomunidade, pois foron os impagos destes concellos os que provocaron que a empresa que xestiona a planta solicitara a rescisión do contrato por incumprimento.

Xestión pública 

A parlamentar propuxo igualmente que se inicien conversacións coa Mancomunidade a fin de constituír unha empresa pública que xestione a Planta de Lousame por seren un referente na reciclaxe, non só para Galiza senón tamén para o resto do estado.

En resposta á parlamentaria nacionalista, o conselleiro de Medio Ambiente asegurou que a Xunta está negociando un novo marco con Ecoembes pero o obstáculo segue sendo a falta de pagamento pola cota de tratamento dos residuos sólidos de varios concellos integrantes da mancomunidade e a Xunta está a apoiar á mancomunidade para resolver os problemas da planta de Lousame para que no futuro poida acollerse ao plan de xestión de residuos 2010-2011.

A Xunta segue sen responsabilizarse

Para a deputada do BNG, a Xunta segue “escapando deste problema” porque é responsable de garantir os obxectivos do plan de residuos de Galiza” e considerou que o Goberno galego non  responde a quen lle dará a razón na negociación, se a  Ecoembes ou a Mancomunidade porque iso  afirmou ,”condicionará o futuro da planta”.

Pontón concluíu a súa intervención aludindo a un terceiro problema que na súa opinión “non é menor”, xa que a Xunta de Galiza conta cun plan de residuos que, na súa opinión, é “errático” e criticou que non sexa destinado, “ni un só euro público” para a ampliación da planta de Lousame. A parlamentaria nacionalista reiterou a necesidade de ir cara unha xestión pública porque por parte da Mancomunidade tamén existe esta disposición.

Posted via email from Certo.gl, o xornal dixital de Barbanza e Noia

Lousame: o conselleiro de Medio Ambiente di que a planta de reciclaxe "é unha peza importante do Plan de Xestión de Residuos de Galicia"

Lousame, 10 de novembro de 2010.- O conselleiro de Medio Ambiente, Territorio e Infraestruturas, Agustín Hernández, asegurou hoxe no Parlamento que a Planta de tratamento de residuos de Lousame, xestionada pola Mancomunidade da Serra do Barbanza, constitúe "unha importante peza para a consecución dos obxectivos de incremento da valorización e redución da eliminación en vertedoiro sinalados polo novo Plan de Residuos de Galicia".

A este respecto, destacou que a Xunta de Galicia inclúe no Plan de Xestión de Residuos Urbanos de Galicia 2010-2010 a necesidade de xestionar 'in situ' determinados residuos a través do tratamento en plantas locais ou comarcais. Neste contexto, sinalou que a Xunta asumiu unha posición de colaboración activa coa Mancomunidade da Serra do Barbanza e está a desenvolver diversas iniciativas destinadas ao mantemento e potenciación da planta de Lousame, considerando que a mesma está a funcionar con bos resultados e que as dificultades que a instalación vén experimentando derivan de causas alleas ao modelo de xestión asumido pola entidade supramunicipal.

Mediación con Ecoembes

Polo que respecta á controversia xurdida entre a concesionaria da planta e a entidade Ecoembes, sinalou que a Xunta está a realizar unha labor de mediación co fin de fomentar o logro dunha solución consensuada que poña fin á diferenza de criterio que ambas partes manteñen en relación coa pretensión do devandito sistema integrado de xestión de reducir os pagamento dos custes de tratamento de determinados residuos plásticos xestionados na planta de Lousame.

Ese labor de mediación que está a levar o Goberno galego ten conseguido que Ecoembes desistise de aplicar unilateralmente o seu criterio de forma inmediata, evitando así unha importante perda de ingresos para a instalación. Asegurou que a problemática xurdida en torno a este asunto está moi presente na formulación do novo convenio marco que a Xunta está a negociar con Ecoembes.

Lembrou que o principal obstáculo para a viabilidade da planta de Lousame vén constituído pola falta de pagamento das cotas correspondentes ao tratamento de residuos por parte de varios concellos integrantes da Mancomunidade. Esta falta de pagamento ocasionou que o ente supramunicipal incorrese nunha importante débeda coa empresa concesionaria da planta de residuos, motivo polo que a dita empresa instou a resolución do contrato de xestión do servizo en xullo do presente ano.

Retencións da Xunta aos concellos morosos

Por solicitude da propia Mancomunidade, a Xunta de Galicia xa viña retendo fondos correspondentes aos concellos debedores desde mediados deste ano 2010, de conformidade co previsto pola Lei galega de Administración local, transferíndoos directamente á entidade supramunicipal a fin de que esta puidese ir afrontando os pagamentos pendentes.

En definitiva, insistiu en que a Xunta de Galicia está a prestarlle un apoio decidido e eficaz á Mancomunidade para a resolución dos problemas concretos que afectan á planta de Lousame.

Almacén de explosivos

O conselleiro tamén fixo referencia, para ilustrar o apoio da Xunta á planta, a achega de 100.000 euros instrumentalizada a través dun convenio subscrito coa Mancomunidade, co fin de financiar a adquisición dos terreos ocupados polo almacén de explosivos lindeiro coa instalación, como paso necesario para o traslado dese polvorín a un novo emprazamento.

Esta medida, ademais de ofrecer a posibilidade de ampliar as instalacións de tratamento de residuos, permite evitar a execución da sentenza que ordenaba o seu peche a causa da proximidade dunha actividade de especial perigosidade, como é un polvorín, o que ata datas recentes constituía o risco máis inminente que pendía sobre a viabilidade da planta.

Rematou asegurando que ante a situación actual da planta "non imos regatear esforzos para tratar de manter e potenciar estas instalacións ambientais, porque entendemos que representan un dos modelos a promover na estratéxica ambiental do actual Goberno, tal e como se recolle no Plan de Xestión de Residuos Urbanos de Galicia para a vindeira década".

Posted via email from Certo.gl, o xornal dixital de Barbanza e Noia

Comercio: a Xunta integra novidades como a escolla do "mellor praceiro" e cheques desconto para impulsar as prazas de abastos

Praza de abastos de A Pobra do Caramiñal

Barbanza-Noia, 10 de novembro de 2010. A Consellería de Economía e Industria acaba de poñer en marcha unha nova iniciativa de dinamización do pequeno comercio a través da campaña “Escolle o teu praceiro”, que se desenvolverá entre os meses de novembro e decembro en 92 prazas de abastos de toda Galicia, e para o que a Consellería realizará un investimento total de 110.000 euros.

O obxectivo desta iniciativa é impulsar e visualizar o noso consumo nos mercados municipais galegos, así como potenciar a figura profesional dos praceiros, tal e como sinalou a directora xeral de Comercio, Nava Castro Domínguez, durante o acto de presentación desenvolvido esta mañá. “Estes mercados supoñen a mellor oferta de produtos frescos de alimentación, especialmente galegos, dunha calidade altísima, e que garanten ademais un servizo profesional e personalizado”, explicou Nava Castro. “Querémoslle transmitir a todos os galegos que mercar nas prazas de abastos é unha garantía de calidade tanto no tocante aos produtos como no que se refire ao trato por parte dos profesionais encargados dos postos. E a isto engadímoslle que as compras que se fagan durante estes meses tamén poden ter premio”, indicou a directora xeral de Comercio.

Cheques desconto e profesional mellor valorado

Praza de abastos de Noia

Nesta campaña, ademais de sortear cheques de desconto de ata 75 euros entre os consumidores, a Consellería pretende recoñecer a figura dos praceiros, a través da posta en marcha dunha votación do profesional mellor valorado, para o que será necesario a colaboración dos clientes.

En cada un dos mercados municipais participantes o procedemento será o mesmo: cada praceiro entregaralle un cupón por compra aos seus clientes para que poidan participar na campaña e no que, ademais dos seus datos, deberá quedar reflectido o seu voto ao mellor praceiro. Cada 15 días realizarase un sorteo en cada un dos mercados onde resultarán premiadas tres participacións con bonos de desconto de 25, 50 e 75 euros, que se poderán utilizar no propio mercado. Nestes sorteos determinarase tamén o praceiro preferido polos consumidores de cada mercado.

 

Posted via email from Certo.gl, o xornal dixital de Barbanza e Noia

Medio Ambiente: Barbanza e Noia non existen para os que miden a contaminación do aire en Galicia

Parafraseando aquel anuncio de salvaslips: a que cheiran as nubes de Barbanza e Noia?

Barbanza-Noia, 10 de novembro de 2010. Ecologistas en Acción, co apoio de VerdeGaia en Galicia, vén de presentar o informe da calidade do aire en España. No que se refire aos datos de Galicia, varias zonas, entre elas Barbanza e Noia, non existen no informe, ben porque non teñan estacións, ben porque, aínda con estacións, a Xunta de Galicia non subministrou os datos.

¿Pedirá algún grupo político destas bisbarras que se arranxe esta eiva? ¿Ou non nos preocupa aos barbanceses e noieses saber o que respiramos? ¿Acaso non hai polígonos industriais nestas comarcas? ¿Temos todo en estado de revista? Xa nos gustaría que así fose, pero o único que temos, no que atinxe á calidade do aire é falta de información.

See and download the full gallery on posterous

Download now or preview on posterous

pdf_Aire2009.pdf (884 KB)

Posted via email from Certo.gl, o xornal dixital de Barbanza e Noia