Ribeira: charla sobre a prevención de lesións deportivas o sábado 15 de xaneiro no conservatorio

Ribeira, 7 de xaneiro de 2011. O vindeiro sábado día 15 de Xaneiro as 18:30h no salón de actos do Conservatorio Municipal de Ribeira celebrarase a charla coloquio titulada "Prevención de Lesións Deportivas". Vai ser impartida polo médico deportivo José Antelo Paredes, licenciado en Mediciña e Ciruxía pola USC,Máster en Traumatoloxía Deportiva pola UCAM  e médico colaborador dos equipos ATH.Bilbao, R.C Celta de Vigo, Pontevedra C.F.

A entrada será gratuíta para tódolos asistentes e non é necesaria a reserva de praza. O proceso horario é o seguinte:

• 18:30: Presentación a cargo de Francisco Manuel Sampedro (Coordinador do fútbol base do Sálvora C.F).
  
• 18:40- 19:30- Ponencia  a cargo de  José Antelo Paredes.
  
• 19:30-20:00- Coloquio entre os asistentes ao evento.
  

Prevención de Lesións Deportivas abre un programa de charlas-coloquio  que o Sálvora C.F  pon en marcha este xaneiro e que se suman así as diferentes actividades extradeportivas  que o clube leva programando dende o ano 2007 coa Copa Sálvora, o Campus Cidade de Riveira e a Escola de Fútbol creada no 2009.

 A esta charla-coloquio  lle seguirán outras dúas con tan importantes para o deporte como son: a Hidratación Deportiva e a Nutrición do Deportista. No seu día, cando estean fixadas as datas, anunciaranse. 

Weblog de referencia

www.salvoracf.blogspot.com

Posted via email from Certo.gl, o xornal dixital de Barbanza e Noia

A Pobra: os socialistas presentan unha moción para que se poñan puntos de luz e sinais na zona de Sanquelexo

A Pobra do Caramiñal, 7 de xaneiro de 2011. Os socialistas da Pobra van presentar no vindeiro pleno unha moción para varios arranxos na zona de Sanquelexo. A moción íntegra:

GRUPO MUNICIPAL PSdeG-PSOE 

Mª Teresa García Guillán, concelleira do Grupo Municipal Socialista do Concello da Pobra do Caramiñal, o abeiro do disposto no art. 97/3 do R.O.F., para o seu debate na vindeira sesión plenaria, presenta ó Pleno unha moción relativa a dotar de alumeado e corrixir a sinalización da ponte sobre a autovía, no lugar de Sanquelexo .

      EXPOSICIÓN DE MOTIVOS:

Numerosos veciños quéixanse sobre a pouca luminosidade que existe no lugar de Sanquelexo, sobre a ponte da autovía do Barbanza. Hai un tramo onde é necesario instalar novos puntos de luz, porque as persoas que pasan por este punto a primeira hora da mañá e a última hora do día se encontran con un camiño a escuras.

A falta de alumeado converte esta zona nun punto perigoso para calquera cidadán, pero sobre todo para as mulleres, por elo entendemos que se debe actuar con rapidez e mellorar a iluminación deste lugar.

A falta de luminosidade incrementa a inseguridade que xera a escasa sinalización da antiga ponte que cruzaba a vía rápida. Esta conta unicamente con unha valla arrimada ao terraplén, carecendo de sinalización vertical, o que fai que as persoas que non son do lugar e descoñecen esa situación, corran riscos para a súa integridade física, podendo incluso chegar a caer dunha altura considerable sobre a autovía.

A situación actual é un perigo pola inseguridade que xera ós viandantes e corren un grave risco de accidentes os vehículos, cuestión pola cal se debe actuar con dilixencia.

Por todo iso, este grupo que represento solicita a adopción do seguinte

ACORDO:

1º.- Que se corrixa a falta de iluminación  instalando novos puntos de luz, na ponte sobre a autovía, no lugar de Sanquelexo.

2º.- Que se sinalice adecuadamente o camiño da antiga ponte, con sinais verticais e trasladando cara adiante a valla quitamedos.

      Pobra do Caramiñal, a 07 de xaneiro de 2011. 
 

      Asdo..- Mª Teresa García Guillán 

SR. ALCALDE-PRESIDENTE DO CONCELLO DA POBRA DO CARAMIÑAL

See and download the full gallery on posterous

Posted via email from Certo.gl, o xornal dixital de Barbanza e Noia

A Pobra do Caramiñal: levan meses a limpar as concas de varios ríos

A Pobra do Caramiñal, 7 de xaneiro de 2011. O Concello informa sobre que o pasado mes de novembro comezaron as labores de limpeza das concas dos ríos Morto, Xunderama, Lérez e Pedras. "Brigadas especiais estiveron limpando todos os cauces deste ríos e moi especialmente os do Morto e Xunderama, xa que eran os máis afectados e que máis problemas soen dar coas grandes choivas", asegura o equipo de goberno.

     As tarefas de limpeza correspondéronlle á empresa Tarrío e Suárez,  encomendadas pola Consellería de Medio Rural. Esta limpeza "deu o seus froitos como se pode comprobar estes días, xa que con todo o que leva chovido, e o que está aínda chovendo, non se desbordou ata o de agora ningunha zona.   De tódolos xeitos, indicamos que o traballo aínda está sen rematar, xa que como é lóxico, ditas tarefas non se poden levar a cabo con certas condicións climatolóxicas como as que estamos a padecer, polo que quedan a espera de que o tempo permita retomar ditas labores", aclaran.

     O Concello agradece á Consellería de Medio Rural esta actuación e tamén á Agrupación de Voluntarios de Protección Civil "polo labor que están a desempeñar sobre todo nestes días. Tamén queremos informar aos veciños de todo o concello que no caso de que vexan que en calquera lugar se tivera que actuar por causa das choivas non dubiden en comunicarllo á concellería de Servizos".

Convocatoria de subvencións da Deputación

     Por outra banda, desde o Concello da Pobra do Caramiñal lembran aos veciños que, o pasado 22 de decembro, a Deputación Provincial da Coruña publicou a convocatoria de axudas de cultura, deportes, servizos sociais, e promoción económica, dirixidas aos concellos da provincia, entidades culturais e deportivas, así como ONG, e organizacións agrarias e confrarías de pescadores. 

     O prazo de solicitude remata o vindeiro 31 de xaneiro. 

     No apartado de cultura e deportes para as entidades, outorgaranse axudas para a promoción de actividades e investimentos en infraestrutura e equipamento. Ditas axudas poderán acadar un máximo de 30.000 € tanto para actividades como equipamento. 

     Na área de deportes, tanto de base como federado, as subvencións serán de 18.025 € para financiar actividades; de 31.000 € para equipamentos deportivos, e de ata 65.000 € para a actividade deportiva federada de ámbito nacional.  

     Respecto das subvencións de servizos sociais a Deputación da Coruña convoca axudas de ata 30.000 € para entidades sen ánimo de lucro que promovan accións e servizos de atención sociosanitaria como centros de día, comedores, comunidades terapéuticas, residencias, pisos tutelados, ou transporte adaptado. 

     No apartado de promoción económica, as subvencións para as entidades ou asociacións o importe máximo é de 30.000 €. 

     Na mesma convocatoria contémplanse as axudas ás organizacións agrarias da provincia, orientadas á recuperación e posta en valor dos recursos endóxenos de carácter agrícola, gandeiro e forestal. As axudas terán un orzamento máximo de 30.000 € que se destinarán á actividade xeral destas entidades ou a dotación de novas infraestruturas e equipamentos. 

     E, para rematar, nos quedan as bases das subvencións para o fomento do sector pesqueiro a través das axudas ás confrarías de pescadores da provincia. Neste capítulo contémplanse axudas para actividades (cursos de formación, investigación, e vixilancia das autorizacións marisqueiras), e para investimentos (aplicación de novas tecnoloxías e modernización dos sistemas produtivos, equipamento de lonxas e confrarías). O importe máximo en ámbolos dous apartados será de 60.000 €.

     Os concellos tamén contan coa súa propia convocatoria e por iso o da Pobra do Caramiñal ten aos técnicos das correspondentes concellerías a traballar nos proxectos que se presentarán, tanto para actividades coma para investimentos, antes de que remate o prazo da devandita convocatoria, o vindeiro 31 de xaneiro.

Posted via email from Certo.gl, o xornal dixital de Barbanza e Noia

Noia: Carlos Maquieira, cun 10 en Bacharelato e 9,25 en Selectividade, I Premio da Fundación Otilia Millares ao mellor estudante noiés

Noia, 7 de xaneiro de 2011. O presidente da fundación Otilia Millares Vázquez, Severiano Loroño Viazcoechea, entregou hoxe, 7 de xaneiro de 2011, no salón de plenos do concello, o I premio Fundación Otilia Millares Vázquez ao mellor estudiante noiés a Carlos Maquieira González.
 
Despois de consultar aos directores dos centros educativos e analizar os mellores expedientes de bacharelato e selectividade dos dous IES de Noia o xurado determinou que o expediente de Carlos Maquieira González, cunha nota media en Bacharelato de 10.00 e unha nota en selectividade de 9.25, e unha nota media total de 9.70 é o mellor expediente académico deste ano. Por estes datos incontestables acordouse entregarlle o I Premio Fundación Otilia Millares Vázquez, que está dotado con diploma e un premio metálico de 3.000 euros.

Carlos Maquieira González (1992) cursou estudios no colexio Felipe de Castro en Bergondo e no IES Virxe do Mar de Noia. Na actualidade cursa estudios de Grao de enxeñeria quimica na Universidade de Santiago de Compostela.

A Fundación Otilia Millares Vázquez continuará con este premio ao mellor estudante en sucesivas edicións anuais para premiar o talento e a formación académica dos mozos noieses, segundo explicou o presidente da mesma, Severo Loroño, que aparece na imaxe xunto ao premiado.

Posted via email from Certo.gl, o xornal dixital de Barbanza e Noia

Ribeira: as mellores raquetas de tenis de Galicia participan no máster desta fin de semana

Esta fin de semana, nos pavillóns polideportivos de Sirves e Artes 

Ribeira, 7 de xaneiro de 2011- Os pavillónn polideportivos de Sirves e Artes van ser escenario mañá e pasado mañá dunha nova edición do Máster Galego de Tenis, no que competirán os 16 mellores xogadores masculinos do ránking galego máis un convidado da organización. 

Este evento foi presentado hoxe na casa consistorial de Ribeira polo concelleiro de Deportes, Miguel Ángel Vidal Tomé, e por Blas Sobrido, secretario do Club de Tenis Punta Salera, de A Pobra, entidade colaboradora no campionato.

Como convidado da organización, participará Marcos García, de Lousame, recente vencedor do Máster Provincial. Outros participantes da zona son os ribeirenses Pablo Lijó, Marcos García e Alberto García, o boirense Pepe Ageitos e Óscar Vázquez, do Club de Tenis Punta Salera.

Miguel Casal leva varios anos ganando este máster. Na imaxe, en 2006

O gran favorito para levarse o torneo será, un ano máis, o vigués Miguel Casal, que ocupa o 38º posto de España e o primeiro de Galicia e é o vixente campión galego. 

Os partidos comezarán mañá no pavillón de Sirves a partir das 10 da mañá. O duelo máis interesante da primeira rolda terá a Pablo Lijó e a Cristian González como competidores. Ambos foron os finalistas que caeron ante Miguel Casal nas dúas últimas edicións do torneo. 

As semifinais terán lugar o domingo a partir das 11 da mañá, mentres que a final está prevista para as 17.30 horas. Estes partidos disputaranse no pavillón de Sirves. 

A organización confía en reunir a grande afluencia de público da última edición, na que para contemplar a final acudiron máis de 200 persoas.

Posted via email from Certo.gl, o xornal dixital de Barbanza e Noia

Porto do Son: o concerto de Reis será este xoves 6 de xaneiro na igrexa de Noal ás doce e media da mañá

O violinista ruso Moriatov Incluirá pezas de sabor galego como A saia da Carolina ou Negra Sombra.

Quen é Mijail Moriatov?

Segundo a súa web:
 
É un dos violinistas de maior proxección e prestixo residentes actualmente en España. Naceu en Rusia e aos cinco anos empezou a súa carreira de violín, despois de estudar cos mestres máis ilustres e eminentes de San Petersburgo (Rusia). En 1986 superou as probas de acceso á Escola Superior do Conservatorio de San Petersburgo, que rematou coas máis altas calificacións en 1994. Porén, dous anos antes, en 1992 aprobou as oposicións para a Orquestra Sinfónica de Galicia con tan só 17 anos de idade, o que o convertiu no membro máis novo de dita formación. Dende esta data ata a actual reside e traballa en Galicia. Nos anos 1994-1996 foi profesor superior de violín no Conservatorio de Ferrol, así mesmo ao longo dos once anos que leva en Galicia desarrollou un importante labor docente por toda a Comunidade Autónoma Galega. É compoñente dende a súa creación (ano 1988) do Cuarteto Moriatov, un conxunto único en toda Europa, dado que está formado polos membros dunha soa familia. Con este grupo durante os 18 años da súa existencia realizou máis de 200 actuacións por toda Rusia e España.

Mijail Moriatov é ganador e finalista dos prestixiosos concursos internacionais de violín celebrados en España nos anos 1996 e 1997. En 1997 aproba as oposicións para a Orquestra Real Filarmonía de Galicia e vixentemente é un dos poucos músicos residentes en Galicia que lograron acceder por oposición ás dúas grandes orquestras galegas.

Mijail Moriatov é creador e director único da Orquestra Solistas de Galicia, así como doutros destacados conxuntos de música clásica como Lira, Cantábile, Noite na auga e Fantasía, entre outros, cos que realiza unhas 40 actuacións anuais por toda España. Así mesmo executou concertos como violín-solista por todo o país, realizou numerosas xiras e interveu en diferentes programas de televisión e radio. En 2001 saíu o seu primeiro disco compacto como violín solista que se titula Aire Fresco e consta de 16 temas populares de diferentes lugares do mundo e en 2006 sacou o seu segundo CD chamado Galicia no meu corazón con 18 temas galegos na súas propias versións, neste caso acompañado por tres músicos máis. Este CD xa foi presentado en máis de trinta localidades de toda Galicia.

Mijail Moriatov nestes momentos leva realizadas máis de 2.500 actuacións nos 17 anos que reside e traballa en Galicia.

Download now or preview on posterous

Concerto de Reis 2011.pdf (2302 KB)

Posted via email from Certo.gl, o xornal dixital de Barbanza e Noia

Deportes: as imaxes da xornada de rafting organizada polo Concello de Ribeira en decembro, xa no Facebook

Ribeira, 5 de xaneiro de 2011. O pasado 26 de decembro, en Carcacía (Padrón), tivo lugar unha xornada de rafting que organizou a Concellería de Deportes de Ribeira. Todos aqueles que teñan Facebook poden ver o álbum completo non perfil Xuventude Riveira, da concellería citada, aquí.

A xornada fora anunciada en:

Nadal cultural e deportivo: temos toda a programación

See and download the full gallery on posterous

Posted via email from Certo.gl, o xornal dixital de Barbanza e Noia

Ribeira: xa non quedan escusas para non practicar deporte nas parroquias

O Concello completou o seu proxecto para instalar parques biosaudables nas nove parroquias. Investíronse 84.000 euros en todos os aparatos colocados. Os últimos foron postos en Artes, Carreira, Castiñeiras, Oleiros e Olveira

Barbanza está a inzarse destes parques. Algúns, como este de Boiro, teñen ata xogos de mesa. Iso si, hai que levar as pezas

Ribeira, 5 de xaneiro de 2011.- O Concello acaba de completar o seu proxecto de que as súas nove parroquias conten con cadanseu parque biosaudable, na procura de propiciar hábitos máis saudables entre os adultos do municipio e moi especialmente nas persoas maiores, permitíndolles exercitarse ao aire libre a través de distintos aparatos específicos para mellorar a psicomotricidade, a flexibilidade, a forza e o sistema cardiovascular.

Isto foi posible tras a instalación estes días de novos equipos de ximnasia en Artes, Carreira, Castiñeiras, Oleiros e Olveira, que se veñen a sumar aos parques xa existentes nos núcleos de Aguiño, Corrubedo e Palmeira, así como na cidade de Santa Uxía, que conta con dúas instalacións: unha situada na praza de Pedra Pateira e outra no paseo de Coroso.

Os cinco novos parques están localizados fronte ao Centro Recreativo de Artes (ten catro aparatos), xunto á Capela da Guía en Carreira (cinco aparatos), en Fonterramil en Castiñeiras (seis aparatos), na zona dos Muíños en Oleiros (tres aparatos), e diante da Igrexa de Bretal en Olveira (tres aparatos).

Máis aparatos noutros parques ribeirenses

Ademais, a actuación incluíu a instalación de novos aparatos noutros parques biosaudables existentes. Concretamente, no parque de Corrubedo instalouse un aparato máis (e con este incluído xa conta con cinco), en Palmeira un máis (tamén ten cinco) e en Aguiño outros dous (ata sumar sete aparatos).

Esta nova actuación contou cun orzamento de 28.000 euros, que, sumados aos 56.000 euros xa desembolsados, ascenden a un total de 84.000 euros investidos polo Concello de Riveira nos dez parques biosaudables que hai no municipio.

Posted via email from Certo.gl, o xornal dixital de Barbanza e Noia

A Pobra: autoridades da vila comezan hoxe en Santiago actos de homenaxe a Valle Inclán no seu 75 cabodano

Acto floral na tumba de Valle en 2010. Imaxe de Alberto Besada García

A Pobra do Caramiñal, 5 de xaneiro de 2011.Co gallo do 75 cabodano do escritor Ramón María del Valle-Inclán ten lugar esta mañá, no cemiterio onde repousan os seus restos mortais, en Boisaca (Santiago de Compostela) un acto de homenaxe que supón o comezo dos moitos que terán lugar ao longo deste 2011.
Na homenaxe floral estarán, entre outras autoridades e en representación da alcaldía de A Pobra, a concelleira de Cultura de A Pobra do Caramiñal, Encarnación González Montemuiño, e o director do Museo Valle-Inclán, Antonio González Millán. Tamén se conta con integrantes da asociación Amigos do Museo Valle-Inclán e o escritor Xoán Xosé Fernández Abella.

Posted via email from Certo.gl, o xornal dixital de Barbanza e Noia

Noia: o Concello informa das actividades sobre prevención de drogodependencias para este 2011

Noia, 5 de xaneiro de 2011. O Plan Comarcal de Prevención de Drogodependencias, cuxa xestión administrativa recae no Concello de Noia e que no seu ámbito de actuación engloba os Concellos de Noia, Lousame, Porto do Son, Outes e Muros, dará continuidade durante 2011 aos seguintes programas de prevención de drogodependencias, que xa comezaron a principio do curso escolar:

O SEGREDO DA BOA VIDA

Repartirase un caderno editado polo Ministerio de Sanidade con actividades sobre hábitos saudables entre o alumnado de 5º e 6º de primaria, con consellos sobre alternativas de ocio saudables e prevención de hábitos nocivos (prevención do consumo de tabaco e alcohol fundamentalmente).

CAMPAÑA DE PREVENCIÓN DO CONSUMO DE COCAÍNA

Repartirase material informativo e de sensibilización para previr o consumo de cocaína en espazos de ocio e entre a poboación xuvenil. O devandito material co lema: "COA COCA, NON TE RAIES" ten como finalidade fomentar a reflexión acerca dos riscos que o consumo de cocaína implica así como formar os mediadores para que interveñan coa poboación consumidora co fin de transmitir información sobre os recursos asistenciais para tratar a dependencia a esta substancia.

INFORMACIÓN SOBRE AS NOVAS NORMATIVAS:

LEY 42/2010, DE 30 DE DICIEMBRE, POR LA QUE SE MODIFICA LA LEY 28/2005, DE 26 DE DICIEMBRE, DE MEDIDAS SANITARIAS FRENTE AL TABAQUISMO Y REGULADORA DE LA VENTA, EL SUMINISTRO, EL CONSUMO Y LA PUBLICIDAD DE LOS PRODUCTOS DEL TABACO. (Ámbito estatal).

LEI 11/2010, do 17 DE DECEMBRO, DE PREVENCIÓN DO CONSUMO DE BEBIDAS ALCOHÓLICAS EN MENORES DE IDADE. (Ámbito autonómico).

Para o cal, todas aquelas persoas e entidades que queiran se poderán informar sobre o contido das citadas leis na oficina do Plan Comarcal de Prevención de Drogodependencias, situada na Rúa do Curro, 4. 2º andar, os xoves de 10:00 a 12:00 h., no teléfono: 609.82.31.34 ou no email: infodrogas@gmail.com.

REPARTO DE GUÍAS SOBRE DROGAS ENTRE AS FAMILIAS

Co obxectivo de informar as familias sobre os riscos do consumo das diferentes drogas, así como dar pautas de actuación a estas, enviarase a cada domicilio un exemplar da GUÍA SOBRE DROGAS, editada polo Plan Nacional sobre Drogas. 

XORNADAS DE INFORMACIÓN

Tamén se realizarán xornadas de información sobre a prevención do consumo das diferentes drogas, en especial, debaterase sobre o cánnabis e a cocaína. Así como sobre adiccións comportamentales: ludopatías e xogo on-line.

AULA DE SAÚDE

Tamén e con carácter periódico (1 ao mes) tense previsto realizar charlas sobre temas de saúde e de medicina. Sobre temas de actualidade como a modificación da lei do tabaco ou a de prevención do consumo de bebidas alcohólicas en menores de idade.

PASAPORTE FORMATIVO

Co obxectivo de recoñecer a asistencia ás actividades informativas e formativas que polo seu carácter puntual non excedan de 10 horas continuadas de formación (co formato de charlas ou conferencias) crearase un pasaporte formativo no cal se irán acumulando horas para a expedición dun certificado de asistencia co número de horas de formación.

MES DO SEXO SEGURO

Durante o mes de febreiro celebrarase o mes do sexo seguro con debates, conferencias, talleres, diferentes actividades así como realizaranse probas rápidas de detección do VIH a cargo da Asociación Antisida Lazos, repartiranse preservativos e información sobre como previr a infección polo VIH.

Posted via email from Certo.gl, o xornal dixital de Barbanza e Noia