Mar: Medio Rural ponse a venda antes da ferida e agora anuncia máis diálogo polos recurtes ás confrarías para faenar nas Illas Atlánticas

• Mariñeiros afectados, dende Aguiño ata Baiona, manifestáronse hoxe en Vigo, daí a réplica do departamento de Juárez
• Nas vindeiras semanas seguirán a manter xuntanzas coas confrarías, a próxima está pechada para xoves, día 20

• O borrador do PRUX, di a Xunta, "é un documento dinámico e integrador para avanzar no achegamento de posturas e lograr acordos sobre a base do respecto á actividade económica e o mantemento do ecosistema"
  

Santiago, 15 de outubro do 2011.- A Consellería do Medio Rural acaba de anunciar nun comunicado que "reitera o diálogo, que mantén e seguirá sostendo, como fórmula para concordar os intereses das confrarías en harmonía coa conservación do medio no Parque Nacional das Illas Atlánticas".

A propia lei de declaración do Parque Nacional (Lei 15/2002) fixa como obxectivos, entre outros, os de protexer a integridade de ecosistemas ligados a zonas costeiras e á plataforma continental, así como promover e apoiar no interior do Parque as actividades compatibles coa protección do medio natural. Esta norma tamén determina que o Plan Reitor de Uso e Xestión (Prux) das Illas Atlánticas é un instrumento que é necesario dispoñer por normativa legal. Neste punto, hai que lembrar que a súa elaboración leva moitos anos de retraso.

Sobre este piar, ao longo deste último ano e medio, a Consellería do Medio Rural formulou, o borrador do Prux, que non é unha norma pesqueira, senón un instrumento de planificación que compatibiliza os usos pesqueiros e marisqueiros tradicionais coa preservación do medio natural e a biodiversidade, tal e como obriga a lei neste espazo protexido.

Non se prohíbe nada?

Cómpre sinalar que non se prohibe ningunha das artes de pesca reguladas no Decreto de Artes de Galicia, nin se prohibe a extracción de ningunha especie pesqueira de interese comercial. En canto ao marisqueo, non se restrinxe en absoluto, unicamente debe cumprirse coa lexislación pesqueira. Non se restrinxe o marisqueo a flote con vara, nin o marisqueo de recursos específicos (nin a extracción de percebe, nin a de navalla, nin a de ourizo).

Obxectivo integrador
Con esta perspectiva, desde o departamento que dirixe Samuel Juárez sublíñase que o borrador non pretende perturbar a actividade pesqueira e marisqueira tradicional, senón harmonizalas coa conservación do Parque. Neste liña, esbózase o Prux, un documento dinámico e aberto, en fase de participación pública, cun obxectivo claramente integrador, para avanzar no achegamento de posturas e lograr acordos sobre a base do respecto á actividade económica da pesca e o mantemento do ecosistema.

Baixo este enfoque, a Consellería do Medio Rural segue a considerar como fundamental o diálogo, como mecanismo para abondar nos obxectivos que persegue o proxecto e poder entender as propostas dos interesados, coa finalidade de atopar puntos de encontro e solucións. Nesta liña de traballo conxunto, o departamento de Samuel Juárez lembra que nas vindeiras semanas seguirá mantendo xuntanzas coas confrarías para seguir estudando o proxecto. O próximo encontro está pechado para o día 20, na Consellería.

Antes, en Certo, anunciamos:

Mobilizacións para faenar en Sálvora: este sábado 15, de Aguiño a Vigo

Pesca: nada que facer en Sálvora e arredores

Posted via email from Certo.gl, o xornal dixital de Barbanza e Noia

Boiro: intentan impulsar a recuperación do oficio tradicional de carpinteiro de Ribeira cunha xornada

Mar madeira programa.pdf Download this file

• A directora xeral de Comercio e a xerente da Fundación Centro Galego da Artesanía e do Deseño participaron hoxe nas IV Xornadas de Construción Naval en Madeira “Un mar de madeira”

• A Asociación Galega de Carpintería de Ribeira, organizadora deste encontro, é unha das entidades beneficiarias da orde de axudas convocada pola Dirección Xeral de Comercio para o fomento do asociacionismo e do desenvolvemento do sector artesán galego, cun importe total de preto de 100.000 euros

Boiro, 15 de outubro de 2011.- A Consellería de Economía e Industria asegura que continúa "a aposta pola artesanía galega, neste caso por un dos oficios tradicionais que conta cunhas excelentes posibilidades de desenvolvemento como é a carpintería de ribeira", tal e como sinalou esta mañá a directora xeral de Comercio, Nava Castro Domínguez, durante o acto de inauguración da cuarta edición das xornadas “Un mar de madeira”.

Nava Castro lembrou que a Asociación Galega de Carpintería de Ribeira (Agalcari), organizadora deste encontro, é unha das entidades beneficiarias da orde de axudas convocadas pola Dirección Xeral de Comercio para o fomento do asociacionismo, da modernización e do desenvolvemento do sector artesán galego neste ano 2011, que contan cunha achega total de preto de 100.00 euros. Agalcari ten previsto destinar a súa axuda á divulgación e promoción da artesanía, así como á incorporación do deseño ás novas liñas de produto e outras actuacións específicas, como é o caso destas xornadas.

A Asociación Galega de Carpintería de Ribeira representa a todos os obradoiros e estaleiros que se dedican en Galicia á elaboración de embarcacións de madeira e, desde a súa creación no ano 2007, traballa co obxectivo de recuperar e de impulsar este oficio, así como de demostrar que a construción naval en madeira ofrece excelentes posibilidades que poden competir actualmente coa introdución de novos materiais e coas necesidades do mercado.

Neste sentido, Nava Castro salientou o apoio que se lle está a brindar desde o goberno galego a este tipo de iniciativas de recuperación e divulgación dos oficios artesanais galegos e destacou a relevancia das xornadas “Un mar de madeira” como foro de debate, reflexión e coñecemento sobre a cultura mariñeira e o patrimonio marítimo, así como unha plataforma de divulgación do oficio artesanal da carpintería de ribeira.

Entre o programa de actividades da cuarta edición destas xornadas destaca a presentación dun plan de actuación para a construción naval en madeira, denominado Proxecto Dorna e impulsado pola Consellería do Mar, e diferentes conferencias relacionadas co deseño das embarcacións, as vantaxes de empregar a madeira como material de construción, cuestións sobre a regulamentación da construción naval en madeira ou perspectivas de futuro do sector. Ao remate das xornadas, Agalcari fará entrega do II Premio “Fasquía”, en recoñecemento da traxectoria dos carpinteiros de ribeira.

Proxectos fallidos

A Xunta leva nesta lexislatura varios proxectos para impulsar este sector, e todos fan auga. O máis escandaloso foi o da goleta que querían construír en San Cibrao (Mariña de Lugo) por case dous millóns de euros. En Galicia Confidencial pódese ler algo sobre o caso.

Namentres, embarcacións históricas como o Hidria Segundo, non acadan unha cadela para manterse a flote, ou cústalles deus e axuda a asociacións particulares procurar financiación para restaurar balandros como o noiés Joaquín Vieta.

Máis información:

http://www.agalcari.es

Posted via email from Certo.gl, o xornal dixital de Barbanza e Noia

Ribeira: o alcalde, Manuel Ruiz Rivas, e o senador e ex-alcalde, José Luís Torres Colomer, en New York este sábado 15 de outubro

Coméntanos un veciño que se enterou desta viaxe pola web da Casa de Galicia de New York, que "coa que está caendo, o noso alcalde e ex alcalde van de visita á Gran Mazá a gastos pagos. Que utilidade ten esto? Aí os tedes, "se cubrirá gastos", á parte de que está mal escrito, aí si se gastan a plata".

E en Certo, como xornal dorneiro por excelencia, dásenos por preguntar:

.- Por que non se informou desta viaxe e os seus obxectivos na web municipal ou aos medios de comunicación, como se fai co resto da actividade dos gobernantes de Ribeira?

.- Miraron ben Ruiz Rivas e Torres Colomer o día que escolleron para ir a New York? Quen os asesora? O community manager do PP, o que empurrou a "adeptos" a ceder contas de twitter e facebook ou o lumbreras ao que se lle ocorreu o de "pregúntale a Mariano"?

.- E todo isto, quen o paga? E se o paga alguén, pódese saber canto custa?

.- Non terá que ver coas vindeiras eleccións e irán facer apostolado a prol do PP, verdade? Darán un mitin nun lugar como o escollido por Feijóo e que denuncia Galicia Confidencial?

.-Esa frase "de todos conocidos en Casa Galicia", que significa? Que van moito por alí? Que veñen os emigrantes de Ribeira moito por aquí? Que hai unha relación significativa entre os dirixentes desa Casa Galicia e Rivas e Colomer?

A bo seguro que aos lectores de Certo se lle ocorren outras cuestións máis sagaces...

Posted via email from Certo.gl, o xornal dixital de Barbanza e Noia

Porto do Son: presentado "El legado celta", documental de José Manuel Novoa sobre a cultura castrexa en varios países

• Este sábado 15 de outubro ten lugar a "premiere", ás 22:00 na casa de cultura da Atalaia
  
• Cun custe de arredor de medio millón de euros, o documental xa foi vendido a varios países e vai ter unha enorme repercusión internacional
• Aínda que se dubida cada vez máis do calificativo "celta", o documental leva este título para ter unha mellor venda en Europa
• Ao equipo de produción impedíronlle gravar o torques de Burela no Museo de Lugo e tomar uns planos xerais no parque natural das Fragas do Eume

• A maior parte dos actores do documental e figurantes son de Porto do Son e arredores, ata un total de máis de 350. Ata o actual alcalde, Luis Oujo, fai de canteiro, e o director do documental, entusiasmado ata as cachas, é a primeira vez que aparece nun dos seus documentais como figurante, para o cal tivo que afeitarse o bigote
• A concelleira de Cultura, Asunción Torres, agradeceu ao director do documental a proxección que está a facer de Porto do Son con este documental e comprometeuse a conservar e difundir o importante patrimonio que acubilla este concello.

[[posterous-content:azGvbjqGIzgFzpsEzDGB]]
Na presentación estiveron o alcalde de Porto do Son e a concelleira de Cultura, así como o director do filme, o documentalista e o artellador do castro en Punta Couso, o peculiar Daniel Gerbaud Mazier, que fixo de druida

Luis Oujo, antes de chegar a alcalde, participou como actor no documental "El legado celta". José Manuel Novoa louvou tamén a axuda de Ramón Quintáns no que se refire sobre todo a localizacións para este ambicioso traballo

José Manuel Novoa agradeceu tamén o traballo exhaustivo e rigoroso do asesor científico principal do documental, o arqueólogo do CSIC Xurxo Ayán, que foi tamén director durante un lustro das escavacións de Neixón e levou ao equipo de "El legado celta" á Lanzada, ao xacemento que alí se está a descubrir

Novoa asegura que "El legado celta" é un documental "atemporal", que se pode manter no mercado televisivo e circuito comercial entre 10 e 15 anos e que supón unha proxección enorme porque é similar a unha hora de spot publicitario. Ten moita maior penetración que a publicidade institucional, como xa comprobou co seu documental "El señor de Sipán", que levou a moitos a visitar Perú

Antes, en Certo:

• Porto do Son:  "El legado celta" preséntase o 14 e 15 de outubro

Xurxo Ayán participou como asesor neste documental, sobre o que escribiu  Un castro de película

Posted via email from Certo.gl, o xornal dixital de Barbanza e Noia

Ribeira: abren prazo de matrícula para o grupo municipal infantil de teatro

En Ribeira hai moita tradición teatral. Xa van pola XIV Mostra de Teatro Infantil

Ribeira, 14 de outubro de 2011. A Concellería de Cultura do Concello  informa de que con motivo do inicio dos cursos de teatro para o vindeiro exercicio 2011-2012, queda aberto o prazo de matrícula para todos os nenos e nenas con idades comprendidas entre os 7 e os 12 anos (ambos inclusive) que estean interesados en formar parte do Grupo Municipal Infantil de Teatro. 

O curso dará comezo o próximo mércores, 19 de outubro, de 18.30 horas a 20.00 horas, manténdose este horario para todos os mércores do ano.  

Para a súa inscrición, os interesados poden pasar polas dependencias do Auditorio Municipal de Riveira de 09.00 a 14.00 horas de luns a venres.  

Pode que tamén lle interese:

• Ribeira: horarios da UxíaNet 1.1, do 14 ao 16 de outubro

Teatro: comezou o obradoiro de teatro para sen teito

Libro: este sábado 15, "50 lugares mágicos de Galicia"

Posted via email from Certo.gl, o xornal dixital de Barbanza e Noia

Ribeira: comezou o obradoiro de teatro para persoas sen teito ou con condutas adictivas

Ribeira, 13 de outubro de 2011. Logo dunha pequena presentación celebrada o pasado martes, hoxe tivo lugar no Auditorio a primeira das sesións pertencentes ao obradoiro de teatro que, no marco do Plan Comunitario Municipal 2011-2012 do Concello de Ribeira, foi concibido co propósito de incidir na socialización de veciños sen fogar ou con problemas de adiccións. Un total de nove persoas (dúas das cales non puideron asistir á sesión de hoxe por causas xustificadas) prestáronse voluntarias a participar nesta novidosa iniciativa, que segue aberta a outros cidadáns con este tipo de problemas que queiran sumarse á experiencia, ata contabilizar un máximo de vinte. 

A metodoloxía empregada durante o desenvolvemento do taller é a do “rol playing”, no que o teatro xoga un papel de escusa para escenificar situacións reais que lles sirvan aos asistentes para desenrolar as súas habilidades sociais, a súa empatía, capacidade para resolver conflitos, adopción de hábitos saudables e autoestima. 

Representación pública

Cada unha das clases, duns 90 minutos de duración, consta dunha introdución teórica e unha parte práctica. Terán lugar tres días por semana ata sumar 100 horas. Se fose factible, e aínda que non sexa o obxectivo do taller, unha vez completado o mesmo os participantes actuarían nunha pequena representación teatral aberta ao público. Así o afirmou o concelleiro de Servizos Sociais e Promoción Social, Vicente Mariño de Bricio, que hoxe se achegou ao Auditorio para dar a benvida aos asistentes. 

O obradoiro de teatro só e unha das diversas accións enmarcadas dentro do Plan Comunitario Municipal dirixidas á deshabituación de condutas adictivas. Outras actividades inciden na promoción de hábitos de alimentación, vestimenta ou perruquería, etc...

Pode que tamén lle interese:

Libro: este sábado 15, "50 lugares mágicos de Galicia"

Mobilizacións para faenar en Sálvora: este sábado 15, de Aguiño a Vigo

Lan Party UxíaNet 1.1: do 14 ao 16 de outubro. Programación

 

See the full gallery on Posterous

Posted via email from Certo.gl, o xornal dixital de Barbanza e Noia

Fútbol: o Sálvora, campión do I Torneo Prebenxamín F8 "RIA DE AROUSA"

Ribeira, 13 de outubro de 2011. O equipo Prebenxamín do Sálvora CF, adestrado por Anxo Orellán, proclamouse brillantemente Campeón no I TORNEO PRE-BENXAMIN F8 "RIA DE AROUSA", que se levou a cabo no Campo de Berdón, en Vilagarcía de Arousa e organizado pola Escola Deportiva Arousa, onte mércores 12 de Outubro.

Na fase de grupos tiveron estes resultados:

Sálvora 6 - Cabo de Cruz 0

Sálvora 5 - CD Boiro 0

Sálvora 4 - X. Cambados 1

 

En Cuartos de final: Sálvora 2 - Pontearnelas 0

En Semifinais: Sálvora 2 - San Martín 0

FINAL: Sálvora 7 - E.F. Vilanova 0

www.salvoracf.blogspot.com

See the full gallery on Posterous

Posted via email from Certo.gl, o xornal dixital de Barbanza e Noia

Outes: "Aquelar" organiza un roteiro de sendeirismo para promocionar o municipio este sábado 15

Outes, 13 de outubro de 2011. A asociación cultural “Aquelar” de Outes esta a organizar unha ruta de sendeirismo que terá lugar o vindeiro sábado día 15. O roteiro escollido será a que vai dende Albán (Rates) ata o merendoiro do Monte Tremuzo e que durará aproximadamente unhas 4 horas. A saída está programada para ás 10:00. 

O obxectivo desta andaina é promocionar as rutas de sendeirismo que ten o Concello e que "están sen explotar pola corporación municipal", aseguran dende esta novísima asociación. 

Tamén na reunión que tiveron a pasada semana acordouse un achegamento "a todas as asociacións do Concello coa fin de realizar actividades comúns para así garantir o éxito". Unha delas será o magosto, que aínda está pendente de programar. 

Animan a todo o mundo a que acuda a esta cita, a pasar un día de lecer polo Concello de Outes.

Dende Certo animámolos ese día a cambiar o mundo. Tamén aos de Outes.

Posted via email from Certo.gl, o xornal dixital de Barbanza e Noia

Política: Jorquera presentou en Rianxo a candidatura comarcal para o 20N

• Proclama a utilidade do Bng por ser "o único partido que leva os problemas de Barbanza ao Congreso dos Deputados
• Na presentación da candidatura comarcal, o cabeza de lista por A Coruña chamou a “incrementar a representación do BNG para que esta comarca teña representación directa através de Rosana Pérez”
  

Jorquera reivindicou o investimento no Pazo de Goiáns como un dos logros do Bng

Rianxo, 13 de outubro de 2011. O cabeza de lista do BNG ao Congreso por A Coruña, Francisco Jorquera, participou esta tarde no acto de presentación da candidatura comarcal do Barbanza onde tamén estiveron Rosana Pérez (A Pobra do Caramiñal) e Adolfo Muiños, actual alcalde de Rianxo. Neste encontro, Jorquera fixo un chamamento a incrementar o respaldo do BNG nas eleccións do 20-N porque “somos garantía de que Rianxo e esta comarca teñan voz no Congreso dos Deputados”. O candidato nacionalista puxo en valor a utilidade do BNG porque “nesta pasada lexislatura levamos os problemas da comarca ás Cortes”.

O BNG defendeu nesta lexislatura ao sector pesqueiro, á conserva e máis investimentos para O Barbanza

Neste sentido, aludiu ás iniciativas realizadas en defensa do sector pesqueiro, en concreto, denunciando os recurtes das cotas en especies como a xarda e o lirio. Tamén salientou as numerosas iniciativas en defensa dos intereses do sector conserveiro, sobre todo demandando ao Goberno central unha postura de firmeza ante a UE para que se eliminen os privilexios arancelarios ás conservas procedentes de Asia que tanto prexudican ao sector galego con forte presenza na comarca.

Asemade, fixo alusión  ás negociacións do BNG durante as tramitacións dos distintos Orzamentos Xerais do Estado nos que “conseguimos melloras como investimentos para o Pazo de Goiáns”.

O cabeza de lista do BNG asegurou que “concorremos a estas elecións coa conciencia de que somos a equipa da casa. Sabedores de que é fundamental apostar por nós nesta carreira porque somos a alternativa útil para Galiza e para O Barbanza. Somos a garantía de que a comarca teña voz na política estatal”. Así, pediu o respaldo social para poder incrementar a representación do BNG e que “esta comarca teña representación directa a través de Rosana Pérez”.

Antes, en Certo:

• Política: intensa precampaña do Bloque nestas bisbarras

Tamén lle pode interesar:

• Noia: o Bng leva ao Parlamento a desfeita de Taramancos

Posted via email from Certo.gl, o xornal dixital de Barbanza e Noia

Dodro: case un milleiro de corredores na Pedestre de Lestrobe, dos que máis da metade cruzou a liña de meta

• Na absoluta feminina Esther Pedrosa gañou por cuarto ano consecutivo
• Alejandro Begega foi o gañador absoluto en homes e en clasificación por equipos, levouse o primeiro posto Atletismo Sar-A Poutada

Dodro, 13 de outubro de 2011. Onte, mércores 12 de outubro, celebrouse no Concello de Dodro carreira pedestre de Lestrobe, que cheou á súa decimoterceira edición. Nun día soleado e con temperaturas estivais, celebrouse esta cita que pouco a pouco se está convertendendo nunha referencia a nivel galego, dentro do circuito "Correr en Galicia", cunha distancia de 10.000 metros.

A inscrición foi todo un éxito superando os 900 corredores, unha cifra máis que aceptable, que acerca á proba cada vez máis ás grandes carreiras de Galicia. Chegaron a meta máis de 500 atletas. Ás 17:30 comezaron os "pitufos", seguidos pola categoría benxamín-alevín e infantil-cadete. A proba absoluta comezou ás 18:30, hora na que o sol aínda se facía notar con forza e que esixiu un maior esforzó ós atletas.

Na xeral absoluta masculina o gañador foi Alejandro Begega Ordiz, que completou o recorrido en 33 minutos e 46 segundos. Foi seguido por José Manuel Vieito Vilacoba, como segundo, e Abel Barros González, de terceiro.  Na xeral absoluta feminina venceu por cuarto ano consecutivo Esther Pedrosa Carrete cun tempo de 40 minutos e 10 segundos. Acompañárona no podio Raquel Suárez Pedrosa e Esther Navarrete Santana.

O primeiro clasificado por equipos foi o Atletismo Sar-A Poutada, seguido no caixón por Atletismo Milladoiro e Atletismo Noitebra.

A entrega de premios foi seguida por un numeroso grupo de afeccionados. Asistiu o deputado provincial Albino Vázquez Aldrey e a corporación municipal de Dodro encabezada polo alcalde Valentín Alfonsín Somoza. En total repartíronse 70 trofeos.

O Concelleiro de Deportes de Dodro, José Núnez, valorou esta nova edición porque "serve como imaxe da aposta do Concello de Dodro polo deporte e polo compromiso coas persoas vinculadas ó mesmo". Agradeceu publicamente ás casas comerciais o apoio prestado para que esta actividade deportiva saia adiante.

Posted via email from Certo.gl, o xornal dixital de Barbanza e Noia