Literatura: a editora noiesa Acha Escrava lanza o novo poemario "Diáspora", da estradense María N. Soutelo

• A presentación en Noia será o vindeiro venres 9 de marzo
  

Noia, 22 de febreiro, enterro da sardiña, de 2012. A editorial rexentada polo poeta de Noia e membro do Colectivo Literario Sacou,  Manuel L. Rodrigues, vén de dar a coñecer a saída a librarías do número 2 da súa colección de poesía. Acha Escrava porá á venda o poemario "Diáspora". Trátase da última obra da poeta estradense e residente en Vigo María N. Soutelo, a cal foi gañadora, na edición de 2007, con "Código poético", do XX Premio de Poesía Eusebio Lorenzo Baleirón, convocado polo Concello de Dodro. 

A prologuista do libro é a tamén poeta Rosa Enríquez. 

As primeiras presentacións do libro serán as seguintes: 

- 27 de Febreiro ás 19:00:  Santiago de Compostela, na Biblioteca Anxel Casal

- 5 de Marzo ás 20:00:  A Estrada, no edificio MOME (Museo do Moble e a Madeira da Estrada)

- 9 de Marzo ás 20:00: Noia, na Casa da Cultura Antón Avilés de Taramancos 

(estamos pendentes de máis datas) 

Quen é María N. Soutelo? 

María N. Soutelo, nada en Pontevedra en 1982, é licenciada en Historia pola USC. Participou no proxecto literario "AugasVerso", folla voandeira de poesía do Concello de A Estrada, e na coletánea Poesía Contemporánea Tabeirós-Terra (Edicións Fervenza, 2005). No ano 2008, veu a luz o seu primeiro poemario Código Poético (XX Premio de Poesía "Eusebio Lorenzo Baleirón", Concello de Dodro ), da man da editorial Sotelo Blanco 

Información sobre "Acha Escrava": 

http://achaescrava.blogspot.com/

Posted via email from Certo.gl, o xornal dixital de Barbanza e Noia

Ribeira: o Concello saca a concurso o servizo de limpeza en edificios públicos, deportivos e escolares dependentes da administración local

• A data de presentación de ofertas finaliza o 28 de marzo

Ribeira, 22 de febreiro de 2012.- O Concello está dando os pasos oportunos en orde a sacar a contratación o servizo de limpeza en edificios públicos, deportivos e centros escolares dependentes desta Administración Local. 

Así, no BOE con data de 21 de febreiro (páxinas 7691 a 7692) anúnciase a contratación do servizo, que terá lugar por medio dun procedemento ordinario aberto con pluralidade de criterios de valoración. 

O prazo de duración do contrato será de dous anos prorrogables e o importe do mesmo de 320.000 euros. 

Para seguir coa tramitación da licitación, nos próximos días será  colgado na páxina web do Concello (no apartado Perfil do Contratante) o prego coas condicións do contrato.  

A data límite para a presentación de ofertas rematará o 28 de marzo.

Posted via email from Certo.gl, o xornal dixital de Barbanza e Noia

Boiro: o goberno de Feijóo segue primando a concellos da súa cor política para construír escolas infantís

• A conselleira de Traballo e Benestar, Beatriz Mato, reuniuse hoxe co alcalde para anunciarlle unha nova escola infantil con tres unidades e 41 prazas para rapaces de 0 a 3 anos

• Custará medio millón de euros e 180.000 anuais de mantemento. 
• Namentres, en Noia, concello non gobernado polo PP, seguen á agarda da proxectada hai xa máis de tres anos
  

Boiro, 22 de febreiro -mércores de cinza- de 2012.- A Consellería de Traballo e Benestar construirá unha nova escola infantil en Boiro con tres unidades e 41 prazas para nenos e nenas de 0 a 3 anos. Esta infraestrutura suporá un investimento duns 500.000 euros e un mantemento anual de preto de 180.000 euros. Deste xeito, o goberno da Xunta, que preside o "popular" Alberto Núñez Feijóo, segue a primar aos concellos da súa cor política en materia de infraestruturas básicas. En Noia, concello non gobernado polo Partido Popular, paralizouse a construción dunha nova escola infantil proxectada xa polo anterior bipartito e, a día de hoxe, segue no aire. En Ribeira, do PP, tamén se prometeu non hai moito a construción doutra escola infantil.

A titular de Benestar indicou en Boiro que esta escola incrementará as prazas de rede A Galiña Azul nun 40% en Boiro, ata as 143 prazas,o que elevará ata o 74% o peso das prazas sostidas con fondos públicos sobre o total de prazas no concello. A conselleira e o alcalde abordaron ademais  a corrección das deficiencias de climatización da escola A Galiña Azul da localidade, que a Xunta se comprometeu a subsanar.

Mato lembrou que este equipamento forma parte da planificación deste Goberno para o conxunto de concellos de Galicia, que desde o inicio da lexislatura incrementou en 2.100 as prazas existentes na rede de escolas infantís A Galiña Azul, o que supón un incremento do 39% da oferta pública en menos de 3 anos.

A conselleira engadiu que o departamento continuará con ese labor ofertando 1.000 novas prazas máis antes de que remate o 2012. Como exemplo, no mes de marzo inauguráranse cinco novas escolas con 319 novas prazas en diferentes concellos galegos, catro delas na provincia da Coruña.

Así mesmo, a Consellería de Traballo e Benestar tamén apoia ao Concello de Boiro no eido laboral, cunha inversión de preto de 300.000 euros no 2011, para o desenvolvemento de iniciativas como a contratación dun axente de emprego; a inversión de preto de 260.000 euros para a contratación de 24 traballadores a través dos plans de cooperación, o que constitúe un incremento do 13,44% con respecto a 2010; ou o desenvolvemento de actividades de información, orientación e busca de emprego.

Relacionada:

• Boiro: participará nun plan piloto de aforro enerxético moi "popular"

Posted via email from Certo.gl, o xornal dixital de Barbanza e Noia

Ribeira: aberta a preinscrición para a escola de breakdance

• As clases serán impartidas por "Vella Escola", os especialistas de break de Noia
• Comeza en marzo a andaina desta nova actividade, pero só se hai un mínimo de 10 e un máximo de 16 inscritos
  

Ribeira, 22 de febreiro de 2012. O Concello informa de que as persoas interesadas xa se poden anotar na Escola Municipal de Breakdance que se desenvolverá a partir de marzo na Casa da Xuventude. 

O obxectivo principal que se persegue coa presentación da actividade de breakdance é achegar esta disciplina ao colectivo xuvenil e promover os beneficios que conleva a súa práctica habitual. O breakdance entendido como deporte ou baile é unha actividade física recreativa moi interesante e conveniente para a poboación escolar e a mocidade en xeral, posto que a súa práctica habitual proporciona múltiples beneficios relacionados coa saúde e o desenvolvemento das capacidades físicas e psíquicas da persoa. 

A acción está  dirixida a rapazas e rapaces maiores de 12 anos e celebrarase durante os meses de marzo, abril e maio, todos os xoves de 19 a 20 horas. Para que se desenvolva a acción deberá haber un mínimo de 10 e un máximo de 16 inscritos. O prezo dependerá do número de inscritos, oscilando entre un máximo de 14 € ao mes e un mínimo de 8,75 €. 

Imparte a iniciativa a Asociación Cultural e Deportiva Vella Escola, con sede en Noia. 

Ábrese inicialmente un prazo de preinscrición. Os interesados deben dirixirse á Casa da Xuventude situada en Abesadas (teléfono 981 835 289 / e-mail: xuventude@riveira.com). 

Pode que tamén lle interese:

• Ribeira: imaxes do Entroido 2012

• Ribeira: Ámbar celebrou o seu entroido

Posted via email from Certo.gl, o xornal dixital de Barbanza e Noia

Literatura: prazo ata o 9 de abril para presentarse ao certame poético "Francisco Añón" de Outes

BASES_CERTAME_POESIA_2012.pdf Download this file

Posted via email from Certo.gl, o xornal dixital de Barbanza e Noia

Outes: o Entroido ten o seu día central este mércores 22, con desfile e posterior enterro da sardiña

ENTROIDO_2012.pdf Download this file

Posted via email from Certo.gl, o xornal dixital de Barbanza e Noia

Ribeira: Ámbar celebrou o entroido cos seus integrantes vestidos de choqueiros

Ribeira, 20 de febreiro de 2012. Hoxe celebraron no Centro Ocupacional e Centro de Día da Asociación AMBAR das Persoas con Diversidade Funcional unha gran festa de antroido na que non faltou a música, o baile e os doces típicos.

 

Á primiera hora da mañá os fogóns da cociña do Centro de Recursos comezaron a funcionar para preparar as saborosas rosquiñas de entroido, mentras nos talleres, cada grupo se vestía e maquillaba para a ocasión.

 

Arredor das 12, amigos e familiares achegáronse ó Centro de Recursos da Barbanza para asistir ó festival no que desfilaron unha gran variedade de tribus do mundo, dende os Tuareg do deserto do Sáhara, ós Masais de Kenia, pasando polo antigo Exipto e México, tamén tiveron a visita dos nosos antepasados os Castrexos de Neixón e un grupo de Españois que os deleitaron cos bailes máis comúns do noso país.

 

Tralo desfile, o xurado coa axuda da votación do público proclamou os seguintes premios:

Mellor maquillaxe: Os Egipcios e os Masais.

Mellor decorado: Os Castrexos.

Mellor posta en escea: Os Tuareg.

Rei do antroido: Carlos Fernández (do grupo Os Mexicanos).

Raíña do antroido: Sonia Alonso (do grupo Os Españois).

 

A festa rematou cun baile no que participaron os usuarios do centro, o persoal e os invitados (familiares e amigos), mostrando estes últimos as súas felicitacións polo traballo realizado.

See the full gallery on Posterous

Posted via email from Certo.gl, o xornal dixital de Barbanza e Noia

Mar: esixen a Feijóo que cumpra coas confrarías ante a alarmante situación económica destas

• A portavoz de Pesca do Grupo Parlamentario dos Socialistas de Galicia, Marisol Soneira asegura que a practica totalidade das confrarías de Galicia están nunha situación económica moi delicada, xa que non poden facer fronte aos seus gastos
• Soneira pregunta á Conselleira do Mar “se é consciente da situación económica na que se atopan as confrarías" e que “medidas pensa poñer en marcha para solucionar este problema” 
  

Confraría de Rianxo

Santiago de Compostela, 18 de febreiro de 2012. A portavoz de Pesca do Grupo Parlamentario dos Socialistas de Galicia, Marisol Soneira anunciou hoxe que rexistrou unha batería de iniciativas parlamentarias nas que esixe ao Goberno de Feijoo que cumpra os convenios coas cofrarias de Galicia.

Soneira asegura que a practica totalidade das confrarías de Galicia están nunha situación económica moi delicada, xa que non poden facer fronte aos seus gastos.

Advirte que moitas confrarías están facendo fronte ás nóminas asistencias técnicas dos vixiantes, cos seus recursos propios. E denuncia que esta situación “aboca aos positos a unha carencia absoluta de liquidez, ou a recorrer a polizas de crédito, ou incluso a recorrer a recursos dos propios cofrades.

Advirte que “por mor da crise ou pola irresponsabilidade dun numero importante de compradores as lonxas atópanse con atrasos e impagos moi importantes, tanto polo volume dos recursos como polos períodos, cada vez mais longos do atraso no abandono da mercadoría”.

Explica que este fenómeno ten “consecuencias moi graves para a economía das confrarías que actúan, na practica, como un Fondo de Garantía para que os mariñeiros e os armadores cobren por unha captura que algunha veces, non se abona ata pasadas semanas ou meses ou nunca”. 

Soneira pregunta á Conselleira do Mar “se é consciente da situación económica na que se atopan as confrarías" e que “medidas pensa poñer en marcha para solucionar este problema”.

6 INT impagos confrarias 170212 MARISOL 78267-asinado.pdf Download this file

9 POP impagos confrarias 170212 MARISOL 78250-asinado.pdf Download this file

13 POC impagos confrarias 140212 MARISOL 78266-asinado.pdf Download this file

Posted via email from Certo.gl, o xornal dixital de Barbanza e Noia

Política: Converxencia XXI, tamén decepcionada ante a recente reforma laboral

Barbanza, 18 de febreiro de 2012. Converxencia XXI posicionouse en nota de prensa sobre a recente reforma laboral aprobada polo goberno do PP con axuda dos conservadores cataláns de CIU. Velaquí a nota íntegra:

"A situación do mercado laboral español é crítica. O alarmante aumento do desemprego e a elevada precariedade laboral -que se ceba especialmente entre os mais desfavorecidos e que está a levar xa a moitos á dolorosa decisión da emigración- son os seus penosos síntomas. Desde Converxencia XXI sempre temos solicitado unha actuación decidida por parte do goberno que permita poñer couto a esta sangría.

O goberno do Partido Popular obtivo recentemente nas urnas o respaldo dos electores para levar adiante unha acción de goberno que sente as bases da recuperación económica e que permita que todos os segmentos sociais se beneficien dunha prosperidade recobrada. Lamentabelmente, as decisións que ata o momento está a tomar o goberno dos Sr. Rajoy están defraudando a confianza que o electorado puxo no Partido Popular nas pasadas eleccións xerais. Primeiro foi unha traizoeira suba de impostos que castiga sobre todo as clases medias e agora chega unha insatisfactoria reforma laboral.

Desde Converxencia XXI consideramos a reforma laboral decepcionante por varios motivos:

1.      A reforma laboral non serve para reducir significativamente a dualidade do noso mercado de traballo, no que un terzo dos empregados está sometido á presión de pésimos contratos temporais e que, o que aínda é peor, carece de expectativas de estabilidade no emprego. Neste sentido a reforma non fai nada para reducir a panoplia contractual que padece o mercado laboral español. A reforma non só non reduce o actual abano de contratos, mais aínda introduce algún mais. Desde Converxencia XXI avogamos pola simplificación do menú de contratos e, en particular, pola introdución dun contrato indefinido único con custos de despido crecentes coa antigüidade como xeito de fomentar a contratación indefinida.

2.      Na actual reforma laboral obviase completamente a introdución do chamado sistema austríaco consistente na creación dun fondo de capitalización individual que acompaña ao traballador ao longo da súa vida. A introdución deste fondo estaba xa prevista na reforma laboral do 2010. Desde Converxencia XXI avogamos pola paulatina introdución deste fondo de capitalización como xeito de favorecer a mobilidade dos traballadores -e consecuentemente a afectación eficiente do factor traballo- e de evitar problemas de liquidez ás empresas que confronten necesidades de despedimento.

3.      A reforma laboral insiste na política, manifestamente fracasada, de subvencións á contratación introducindo unha serie de bonificacións fiscais para a contratación de certos grupos de traballadores. Ademais, segue a permitir o uso do FOGASA para subsidiar despedimentos. A política das subvencións conduce a ineficiencias, corrupción e agravios comparativos, ademais de supor un lastre para unhas finanzas públicas xa de por si deterioradas.

4.      A reforma laboral non inclúe un elemento chave que é un críbel plan de choque para fomentar a formación e reincorporación dos desempregados ao mercado laboral, mais aínda, a errada política de subvencións retrae recursos desta tarefa.  Debemos ter en conta que mais da metade dos desempregados españois apenas teñen estudos básicos e que só nunha mínima parte das colocacións intermedian os servizos públicos de emprego. Debemos ligar a protección por desemprego á reinserción laboral e á procura efectiva de traballo. Temos que mellorar a eficacia das políticas activas de emprego reorientándoas aos desempregados de longa duración e á xente nova con baixo nivel de estudos. Debemos fomentar a participación das axencias privadas na intermediación e formación laboral avaliando rigorosamente os seus resultados e  facendo depender a súa remuneración do seu suceso.

5.      A reforma presumibelmente non vai reducir os custos de transacción asociados ás mudanzas no emprego, que non benefician nin a empresarios nin a traballadores e que implican moi a miúdo pesados procedementos xudiciais e administrativos. Desde Converxencia XXI avogamos por unha simplificación da lexislación e dos procesos administrativos en materia laboral co fin de reducir custos laborais innecesarios e de reducir a incerteza nas relacións laborais, aspectos ambos que lastran a contratación indefinida.

En definitiva, esta non é a reforma laboral que os precarios e os desempregados agardaban e tanto necesitaban. Certamente, non todo é negativo na reforma. Realízase unha certa homologación dos custos de despedimento nos novos contratos cos países do noso entorno, o cal a medio prazo ha ter unha certa incidencia positiva na contratación e reducirá, aínda que insuficientemente, a temporalidade. Tamén se avanza na flexibilidade interna, na descentralización da negociación colectiva e na redución da ultraactividade, aspectos tan necesarios para que as empresas podan adaptarse a condicións cambiantes e así podan manter os empregos, evitando que o mercado de traballo español reaccione agudamente vía cantidades xerando un enorme stock de desempregados tan pronto como o ritmo de crecemento económico se desacelera. Porén, precarios e desempregados teñen aínda que manter a esperanza. Mais tal vez xa se lles estea esgotando".

Posted via email from Certo.gl, o xornal dixital de Barbanza e Noia

Política: Ánxela Franco, escollida nova responsable comarcal do Bng non escindido

Barbanza-Noia, 18 de febreiro de 2012. A Asemblea Comarcal do BNG de Muros-Noia celebrada na tarde de onte, renovou a composición do seu Consello Comarcal, escollendo a Ánxela Franco Pouso -Porto do Son- como nova portavoz responsábel comarcal. 

A celebración da Asemblea enmárcase dentro do proceso aberto como consecuencia da celebración da XIII Asemblea Nacional que, logo da súa celebración os días 28 e 29 de xaneiro en Amio (Compostela), concluirá dentro de quince días coa renovación de todos os consellos locais e os seus respectivos responsábeis. 

A este proceso comarcal só se presentou unha candidatura, acadando o seguinte resultado: 52 votos a favor, 11 en branco e un voto nulo. Logo da proclamación do resultado Ánxela Franco dirixiu unhas palabras ao conxunto da militancia presente, asegurando que os seus esforzos van estar dirixidos a aplicar as políticas do BNG na procura de solucións aos diferentes problemas que atinxen á cidadanía desta comarca. Tamén asegurou que "hai que superar as feridas que se puideron abrir logo do intenso debate interno producido perante todo este proceso asembleario", en clara alusión aos que se esgazaron da fronte nacionalista, dende Encontro Irmandiño a algúns independentes. 

A candidatura completa está  composta por:

1.- Ánxela Franco Pouso

2.- Xoán Xosé  León Martínez

3.- Laura Eiras Rivadeneira

4.- Bieito González Domínguez

5.- Xaquín Abeijón Núñez

6.- Xosé Agapito Romeiro Barreiro

7.- Sofía Caamaño Lado

8.- Manuel María García Fernández

9.- Mª do Carme Insua Varela

10.- Xosé Lois Agrelo Hermo

11.- Irati García Tomé

12.- Xosé Manuel Alonso Carballo

Suplentes:

13.- Xosé Manuel Ponte Barreiro

14.- Vicente Pardo Capón

15.- Bárbara Resua Sampedro

16.- Mª do Carme Priegue Sande

17.- Xoán Manuel Lamela Lema 

Ás doce persoas escollidas na Asemblea de onte, engadiránselle os seis responsábeis locais asi como a representación de Galiza Nova.

Posted via email from Certo.gl, o xornal dixital de Barbanza e Noia