Barbanza, por Certo

15.1.13

Ribeira: o domingo 27 de xaneiro, andaina por Muros

Ribeira, 15 de xaneiro de 2013. O vindeiro domingo 27 de xaneiro organízase unha andaina con saída en Muros e chegada a Monte Louro, pasando por varios dos sitios máis emblemáticos da zona de Louro, como son os Petróglifos da Laxe de Rodas, o Convento de San Francisco, o Vía Crucis de San Francisco e remate cunha volta a Monte Louro, pasando polo seu faro.

A saída será ás 9 da mañá da Estación de Autobuses de Ribeira, para chegar a Muros ás 10.00 h. e facer a andaina duns 12 quilómetros aproximadamente a un ritmo medio de 5 quilómetros por hora. Haberá paradas nos puntos emblemáticos citados para disfrutar plenamente deles.

Logo de rematar a andaina o autobús achegará aos participantes a Muros para completar o resto da xornada nas rúas deste enxebre pobo mariñeiro e poder degustar a súa gastronomía. A volta, xa case coa caída do sol, será ás 17.30 h. e contan con estar en Ribeira unha hora despois.

O prezo do autobús é de 9 € (NOVE EUROS) e pódese reservar praza en www.arousa.com

Posted via email from Certo.gl, o xornal dixital de Barbanza e Noia

Noia: o goberno local no Concello apoia as demandas d@s afectad@s polas preferentes e subordinadas

https://pbs.twimg.com/media/BAKko5ZCMAAW6PN.jpg:large
Os das preferentes en Boiro colleron o touro polos cornos e pecháronse no Concello para reclamar os seus cartos

Noia, 15 de xaneiro de 2013. O Goberno Local de Noia levará ao pleno ordinario deste mes de xaneiro (o último venres de mes, o 25) a moción na defensa dos afectados polas participacións preferentes e da débeda subordinada. Na mesma defenderase a necesidade de que a Xunta de Galicia apoie de xeito decidido as reivindicacións dos afectados, no sentido de esixir a devolución íntegra dos aforros depositados nos citados productos financieiros, opóndose á “quita” anunciada, de tal xeito que os aforradores non vexan minguados os seus depósitos.

Tamén se esixirá da Xunta de Galicia, que inste ao Goberno do Estado para que o Banco de España e a Comisión do Mercado de Valores, inicien unha campaña de inspección sobre a comercialización por parte das entidades financieiras deste tipo de productos opacos e complexos entre as persoas aforradoras e invertidoras minoristas, a fin de depurar as responsabilidades a que houbera lugar.

A mariores, darase a coñecer o traballo desenvolvido, nestes últimos meses, pola Oficina Municipal de Información ao Consumidor, no tocante ás reclamacións presentadas polo colectivo de afectados e afectadas.

Denuncian "vexacións" a afectados polas preferentes no Parlamento dlvr.it/2nw4Kv
— Galicia Confidencial (@Gconfidencial) January 15, 2013

JORQUERA e ANA no Concello de Boiro apoiando -unha vez mais- aos/as afectad@s-estafad@s polas preferentes. twitter.com/bngboiro/statu…
— bngboiro (@bngboiro) January 10, 2013

...15 día de encerro d@s AFECTAD@S pola ESTAFA das PREFERENTES. twitter.com/bngboiro/statu…
— bngboiro (@bngboiro) January 9, 2013

Posted via email from Certo.gl, o xornal dixital de Barbanza e Noia

Porto do Son: a información pública este trimestre a variante de Portosín

A directora da Axencia Galega de Infraestruturas adiantoulle hoxe este prazo ao alcalde de Porto do Son nunha reunión de traballo
A Xunta está a redactar un estudo informativo e de impacto ambiental no que se analizan as distintas posibilidades de trazado co fin de definir a mellor alternativa para optimizar a accesibilidade da zona
A nova variante comezaría en Taramancos, no punto onde finaliza a variante de Noia que actualmente se atopa en construción, finalizando na AC-550, en Cans ou nas proximidades de Quintáns, tras pasar Portosín

Castro de Taramancos, arrasado polo viaduto da variante de Noia. De perto partiría a nova variante de Portosín

Porto do Son, 15 de xaneiro de 2013.- A Consellería de Medio Ambiente, Territorio e Infraestruturas iniciará no primeiro trimestre deste ano o proceso de información pública da variante da estrada AC-550, no núcleo de Portosín. Así llo manifestou hoxe a directora da Axencia Galega de Infraestruturas (AXI), Ethel Vázquez, ao alcalde de Porto do Son, José Luís Oujo, nunha reunión de traballo.

O departamento que dirixe Agustín Hernández está a redactar o estudo informativo e de impacto ambiental da citada variante. O contrato para a redacción do estudo foi asinado en xullo de 2012 co obxecto de definir un novo vial de circunvalación de Portosín, que servirá de alternativa á actual estrada AC-550.

A nova variante comezaría en Taramancos, no punto onde finaliza a Variante de Noia que actualmente se atopa en construción, finalizando na AC-550, en Cans ou nas proximidades de Quintáns, tras pasar Portosín.

Neste estudo informativo estanse a analizar as distintas posibilidades de trazado co fin de definir a mellor alternativa para optimizar a accesibilidade da zona, tendo en conta os distintos condicionantes orográficos, sociais e económicos existentes.

A Axencia Galega de Infraestruturas xa ten elixida a alternativa proposta das tres opcións estudadas, con lonxitudes comprendidas entre 7,3 os e 8,3 os Km, e un orzamento cuxo importe ascende a preto de 25 millóns de euros.

O estudo foi sometido en outubro de 2012 á fase de consultas ambientais previas ás Administracións Públicas afectadas, estando previsto que sexa sometido a información pública neste ano 2013, tal e como xa se indicou anteriormente.

Tamén, en Porto do Son:

Porto do Son: XIV homenaxe a Ramón Sampedro, o maior activista galego da eutanasia

Mar: o Bng solicita axudas para o sector marisqueiro ante a mortandade do marisco

Posted via email from Certo.gl, o xornal dixital de Barbanza e Noia

Ribeira: bases do Festival de Murgas e Comparsas do Entroido, a celebrar o martes 12 de febreiro

Máis de dous mil euros en premios e 200 euros de gratificación por participar, segundo os casos

BASES

1.- Establécense dúas categorías de participación:

- Infantil: ata 15 anos (incluídos).

- Adulto: dende os 16 anos (incluídos).

2.- As murgas e comparsas deberán estar formadas por un mínimo de 14 participantes, sen límite máximo. Na categoría infantil ademais deberá contar con 1 adulto (como máximo) por cada 2 nenos/as.

3.- Deberán representar a unha asociación, entidade ou agrupación, establecendo o máximo permitido de unha murga ou comparsa por categoría, modalidade e asociación.

3.1.- Establécense as seguintes categorías e modalidades:

a) Murgas (persoas adultas): Máx. 15 agrupacións, das que doce serán do termo municipal e tres do resto de Galicia. De non cubrirse os máximos admitiranse todas as solicitudes presentadas que reúnan os requisitos destas bases.

b) Murgas (infantil): Máx. 5 agrupacións.

c) Comparsas: Máx. 5 agrupacións.

Serán seleccionadas pola organización tendo en conta en primeiro lugar a antigüidade de participación neste evento e en segundo lugar a data e número de rexistro da súa inscrición no festival.

4.- Para ambas as dúas categorías (infantil e adulta), as letras das MURGAS deberán ter unha extensión máxima de 1 canción, non superiores no seu conxunto a 60 versos, nin cunha duración total superior a 8 minutos (incluíndo música, posta en escena e coreografía).

5.- O vestiario debe estar en consonancia con algún dos temas principais das letras das murgas ou un tema de actualidade ou interese xeral.

6.- Poderase introducir elementos complementarios en relación coa interpretación dos temas e letras, sempre que non constitúan un risco nin perigo para a cidadanía ou motivo de ofensa á honra e dignidade das persoas, asumindo o representante de cada murga ou comparsa a responsabilidade ante reclamacións de terceiros que puideran xurdir en canto ás letras, músicas, vestiarios e outros.

7.- Establécese como data límite de inscrición e de presentación das letras o MARTES 5 de febreiro do presente ano, antes das 13:30 h, no Rexistro Xeral do Concello ou no Auditorio Municipal. Entenderase que a non presentación dará lugar á non participación no Festival de Murgas.

7.1- Xunto coa solicitude de participación, achegarase letra/s da murga debendo ademais presentalas en soporte dixital xunto ao logo identificativo da agrupación (cd, pendrive, email...), relación dos integrantes do grupo (murga ou comparsa), co nome e apelidos de cada participante, así como o nome da Murga ou Comparsa. No caso de non tratarse dunha entidade deberán presentar fotocopia de DNI de todos os integrantes da Murga ou Comparsa e aplicaráselle o IRPF correspondente á gratificación e/ou premio que corresponda. Tamén haberá que nomear un representante de cada grupo ante o Concello, que deberá entregar fotocopia do DNI e datos fiscais (CIF da entidade) para o pago da gratificación/premio correspondente.

8.- As murgas participantes comprométense a tomar parte no desfile previo á celebración do festival no lugar e hora que a organización estableza, así como a animar o pasarrúas.

9.- O Festival celebrarase da seguinte maneira: subirán ao escenario as comparsas participantes para lucir a súa vestimenta –a súa actuación non excederá de 3 minutos-, actuarán a continuación as Murgas da categoría Infantil, e ao rematar estas, As da categoría de persoas Adultas. Todas elas por orde alfabética.

10.- Establécese a contía total de 3.800 € para as gratificacións e 2.200 € para os premios, segundo o seguinte sistema de reparto para as distintas categorías e/ou modalidades:

10.1.- Gratificacións por participación:

a) POR CATEGORÍA/MODALIDADE: Máx. 200 € para cada Murga (infantil ou adulta)

Máx. 200 € para cada Comparsa

b) POR AMBAS DÚAS CATEGORÍAS:

No caso de que algunha asociación estea representada nas dúas categorías/modalidades a gratificación será en conxunto por importe máximo de 300 € (os membros de cada unha das murgas (infantil/adulta) ou comparsas deberán ser diferentes entre si e acadar os mínimos requiridos).

Nota: No caso de que as gratificacións aos grupos participantes excedan a contía total destinada aos mesmos o reparto será proporcional entre todas elas ata o límite establecido. Ás gratificacións aplicaráselle a retención fiscal que corresponda segundo a lei.

10.2.- As murgas, na categoría de Adultos, optarán os seguintes Premios:

- Primeiro Premio: 1.000,00 €

- Segundo Premio: 500,00 €

- Terceiro Premio: 350,00 €

- Especial Premio Local: 350,00 €.

(No caso de que ningunha murga adulta do municipio de Riveira acadase un dos tres premios establecidos, este galardón entregaráselle á agrupación local que obtivese a maior puntuación).

10.3.- As murgas premiadas quedarán excluídas das gratificacións e as murgas infantís e

comparsas, non optarán a ningún premio.

11.- Para establecer os premios, existirá un Xurado que estar á composto por seis membros: cinco profesionais (un por cada categoría a valorar: Letra, Música, Vestiario, Maquillaxe, e Posta en escena) e pola Concelleira de Cultura e Festexos –ou quen designe- que ostentará a presidencia do mesmo.

Cada membro contará con voto -1, 3 e 5-. A secretaría do xurado recaerá nun representante da Área de Cultura, con voz pero sen voto. A votación será inmediata ao remate de cada unha das actuacións. A decisión do Xurado será inapelable. En caso de empate priorizarase o criterio do xurado xa que os premios

son individuais e indivisibles.

12.- Ao remate do festival farase entrega a cada murga e/ou comparsa dun diploma acreditativo da gratificación, así como do premio obtido aos galardoados, que serán canxeables polo importe sinalado nos mesmos e recollido nestas bases, e faranse efectivos mediante transferencia bancaria nos Servizos Económicos do Concello nos días posteriores ao festival. A non presenza do representante designado por cada murga ou comparsa, no momento da entrega dos diplomas e galardóns e durante todo o Festival, considerarase motivo de renuncia á gratificación e/ou premio correspondentes, que inmediatamente pasarán a disposición da organización.

13.- Todas as murgas e comparsas participantes deberán aceptar estes criterios no momento da súa inscrición no festival; a organización será competente para resolver calquera dúbida xurdida das presentes bases.

Máis información:

AUDITORIO MUNICIPAL

Praza dos Mariñeiros -RIVEIRA

Teléfono 981.83.56.50 – Fax 981 873209

Correo electrónico: culturaefestexos@riveira.com

www.riveira.com

Posted via email from Certo.gl, o xornal dixital de Barbanza e Noia

Outes: o vicepresidente da Xunta, Alfonso Rueda, insiste coas fusións "voluntarias"

http://multimedia.xunta.es//portal-web/Videos/2012/Xaneiro/20130115_Presidenc...

Rueda visitou esta mañá os investimentos feitos no concello de Outes co fondo de compensación ambiental
Os fondos procedentes do canon contribuíron á ampliación de redes de abastecemento e saneamento de auga no concello

Outes, 15 de xaneiro de 2013.- Logo do parto dos montes feito con Oza e Cesuras, a Xunta segue a insistir co das fusións voluntarias. Así se pronunciou hoxe o vicepresidente do ente autonómico, Alfonso Rueda, como se observa no vídeo desta información, no das fusións como futuro, parece que tirándolle indirectas a Outes, un pequeno concello que vai perdendo poboación cada ano (o seu índice de envellecemento é dun brutal 267%: namentres a taxa bruta de natalidade só chega ao 5'6% a taxa de mortandade é do triplo, cun 15'3).

Rueda realizou hoxe unha visita institucional ao Concello de Outes, onde comprobou in situ as obras levadas a cabo neste municipio grazas ao Fondo de Compensación Ambiental. Estivo acompañado da delegada territorial da Xunta na Coruña, Belén do Campo, e do alcalde da localidade, Carlos López Crespo; e aproveitou a visita para anunciar que, por cuarto ano consecutivo, o Executivo galego volverá a poñer a disposición dos concellos galegos este fondo, que estará dotado con 11,5 millóns de euros.

O Fondo de Compensación Ambiental foi posto en marcha polo Goberno galego no ano 2010, procedente do canon eólico, e permitiu -segundo a nota da Xunta- que por primeira vez os concellos galegos se beneficien directamente da explotación de enerxía eólica en Galicia. "A medida, ademais dun forte compromiso coas facendas locais e o medio ambiente, é unha clara mostra da aposta da Xunta polo reequilibrio territorial, xa que beneficia sobre todo a municipios pequenos e do interior de Galicia", segundo a Xunta.

Así, o FCA está permitindo que os cidadáns sexan beneficiarios directos da explotacións do vento, a través das actuacións que están poñendo en marcha os seus concellos. Este é o caso de Outes, no que se levou a cabo a ampliación da rede de abastecemento e saneamento de auga cun orzamento de preto de 67.000 euros, dos cales 19.000 euros son para gastos de funcionamento. Precisamente, Rueda destacou que o ano pasado a Xunta autorizou aos concellos beneficiarios do fondo para que puidesen dispoñer del para facer fronte ao gasto corrente, algo que afecta moito aos concellos. Ademais, como novidade para este ano o FCA poderá tamén empregarse en gastos de contratación ou mantemento de persoal.

Datos_de_Outes.pdf Download this file

Posted via email from Certo.gl, o xornal dixital de Barbanza e Noia

Boiro: a asociación cultural Borobó organiza viaxe á neve do 15 ao 17 de febreiro

Á estación leonesa de San Isidro
Data límite de inscrición o 2 de febreiro

Boiro, 15 de xaneiro de 2013. Baixo o lema “Borobó vaise á neve”, a entidade cultural presenta a organización da xa cuarta viaxe á estación invernal de San Isidro, coa finalidade de facilitar que os mozos e mozas, principalmente da comarca, teñan a posibilidade de disfrutar da práctica dos deportes de inverno coma o esquí ou o snowboard.

A saída está prevista o venres día quince de febreiro, sobre as once da noite, diante da Casa da Cultura de Boiro e voltarase ao redor das dez da noite do domingo dezasete. A viaxe, que ten un prezo de cento cinco euros, inclúe o transporte de ida e volta en autobús, o aloxamento na noite do sábado no Albergue Bustiello, a cea do sábado e o almorzo do domingo e o forfait do fin de semana. Non está incluido o aluguer do equipo, xa sexa de esquí ou de snowboard, pero dende a asociación realizan a xestión do arrendamento.

Para inscribirse e facer o pago dase de prazo ata o día dous de febrero e pode
facerse a través do correo electrónico de Borobó (asociacionborobo@gmail.com) ou no teléfono 620970072.

Noutros concellos:

Ribeira: viaxe á neve en febreiro organizada por Flor de Toxo

Barbanza: teñen localizado fraga con enormes exemplares de fieito Woodwardia radicans, un tesouro de tempos pasados blogueiros.axena.org/2013/01/15/woo…
— Certo (@Certo) January 15, 2013

"@iagovarela: nova rede social galega, Vituin vituin.com máis do mesmo, querer parecerse a Tuenti e Facebook. FAIL" @cabozo_com
— Certo (@Certo) January 15, 2013

ABUCHEAR EN SEVILLA ES FASCISMO, ABUCHEAR EN BERMEO ES ETA, ABUCHEAR A ZP ERA LIBERTAD DE EXPRESIÓN.
— masaenfurecida (@masaenfurecida) January 14, 2013

Posted via email from Certo.gl, o xornal dixital de Barbanza e Noia

14.1.13

Ribeira: obras para todas as parroquias, aprobadas por unanimidade no pleno extraordinario de hoxe

Son oito actuacións en sete parroquias e a maiores das obras, hai unha partida para rematar o centro social de Carreira que vai iniciar o actual obradoiro de emprego "Vionta"

Docentes e alumnos do recén creado obradoiro "Vionta"

Ribeira, 14 de xaneiro de 2013.- A Corporación celebrou hoxe un pleno extrordinario e urxente no que se aprobou por unanimidade á realización de oito novas actuacións que están enmarcadas no Plan Provincial de Cooperación ás Obras e Servizos de Competencia Municipal da Deputación (comunmente coñecido como POS) e que servirán para seguir adecuando e humanizando as distintas parroquias que conforman o concello.

O POS 2013 ascende a un total de 449.236,85 euros financiados integramente pola Deputación. Dos mesmos, 386.237,55 euros están destinados a seis obras incluídas dentro do denominado POS principal e que benefician a outras tantas parroquias: en Aguiño, a pavimentación das rúas Lagarto, Manuel Murguía e Mestre Sans Ortega; en Artes, a pavimentación do entorno da Igrexa Parroquial; en Castiñeiras, a pavimento, auga potable e pluviais na rúa Alto da Fonte; en Corrubedo, a pavimentación, saneamento e pluviais nos accesos á praia do Prado; en Olveira, a pavimentación, saneamento e pluviais nunha praza en Sirves; e en Palmeira, a pavimentación da explanada do porto.

Os 62.999,30 euros restantes destínanse a gastos correntes, se ben o fin último desta contía é, segundo informou o alcalde, completar a construción do novo Centro Social de Carreira cuxa construción van iniciar os alumnos-traballadores do obradoiro Vionta.

Como POS complementario prevense outras dúas actuacións: en Olveira, a pavimentación de camiños no lugar de Bouza; e en Santa Uxía, a pavimentación do entorno do Cruceiro dos Remedios en Deán.

Aguiño

As rúas Lagarto, Manuel Murguía e Mestre Sans Ortega están situadas no centro da parroquia e son moi transitadas. As súas calzadas, feitas en aglomerado asfáltico, están bastante deterioradas polo uso e o paso do tempo. O obxectivo que se persegue reside en pavimentar a calzada cunha mestura bituminosa co fin de mellorar a seguridade viaria. Ademais, ampliaranse as arquetas existentes para aumentar a súa capacidade de desaugue, procederase ao enrasado das tapas á cota do novo pavimento e pintaranse as pertinentes marcas viarias. O orzamento é de 50.694,93 euros e o prazo de execución dun mes.

Artes

Igrexa de Artes

A actuación localizarase na rúa que parte dende a estrada Artes-Corrubedo, á altura de Outeiro, ata a igrexa parroquial: vía que sirve de acceso a este recinto e ao cemiterio e que é moi frecuentado ao longo de todo o ano.

A intención do Concello é substituír o pavimento existente (de aglomerado asfáltico e que está moi deteriorado nalgúns puntos) por outro de pedra acorde co entorno. Concretamente, disporase un novo pavimento a base de lousas de granito de 60x40x8 centímetros, con franxas de adoquín, tamén de pedra, de 33x16x8 centímetros, sobre 5 centímetros de mortero de cemento.

A actuación ten un importe de 79.728,41 euros e un prazo de execución de dous meses.

Castiñeiras

A acción planteada céntrase nunha das principais arterias do núcleo urbano de Castiñeiras, que hoxe en día presenta pavimentos de formigón e tramos de terra apisonada, en ocasións con maleza. Ademais de desbrozar a área de actuación, construiranse redes de pluviais e de auga potable e estenderase un pavimento de formigón en masa, combinado con franxas de adoquín de formigón recto. O orzamento da obra é de 35.915,14 euros e o prazo de execución, dous meses.

Corrubedo

As rúas obxecto da actuación serven de comunicación entre o porto e a praia do Prado, especialmente no período estival. O seu firme está formado por pavimento de formigón, bastante deteriorado nalgúns puntos. Non existe rede separativa de alcantarillado, descorrendo augas fecais e pluviais por un único colector.

A efectos de mellorar a zona, instalaranse colectores de PVC compacto para saneamento de fecais e de PVC corrugado para pluviais. Ademais, pavimentarase a zona con distintos tipos de pedras co fin de lograr un debuxo semellante ao de áreas próximas recentemente pavimentadas: lousas de granito de 60x40x8 centímetros combinadas con adoquíns de granito de 20x10x8 centímetros. O importe é de 73.212,83 euros e o prazo de execución de tres meses.

Olveira

A praza obxecto da actuación está localizada en Sirves, que alberga a Capela dos Dolores, edificación de certa importancia e que serve de centro neurálxico para os veciños do lugar. A intención do Concello é instalar redes de saneamento e pluviais e pavimentar a zona con lousas de granito tipo perpiaño, ademais de dispor diversos elementos de mobiliario urbano.

A obra ten un orzamento de 35.879,30 euros e un prazo de execución de dous meses.

Palmeira

A esplanada do porto de Palmeira é unha zona moi transitada que na actualidade está deteriorada nalgúns puntos. Plantéxase a súa pavimentación con adoquín de formigón prefabricado en tonalidades gris e verde, que se colocarán sobre unha capa de morteiro de cemento estendida enriba dunha soleira de formigón.

O orzamento da obra ascende a 110.806,94 euros e o prazo de execución é de dous meses.

POS complementario

Polo que respecta as actuacións enmarcadas no POS complementario, a pavimentación de camiños no lugar de Bouza (en Olveira) céntrase en dous vías que teñen distintas características, xa que unha delas conta con aglomerado asfáltico (que presenta algunhas irregularidades) e a outra un firme de zahorra e terra vexetal que en ocasións resulta intransitable na tempada de inverno por mor das chuvias.

Ambos camiños serán pavimentados para permitir a circulación de vehículos en condicións axeitadas. O primeiro cunha mestura bituminosa en quente e o segundo con tratamento superficial formado por un triple rego asfáltico estendido sobre unha capa de grava.

Esta actuación ten un orzamento de 35.103,83 euros e un prazo de execución dun mes.

Por último, actuarase nas zona na que se sitúa o Cruceiro dos Remedios, en Deán (Santa Uxía), que a día de hoxe rexistra uns pavimentos de aglomerado asfáltico, formigón ou lousas de baldosa hidráulica moi deteriorados polo continuado tránsito de peóns e vehículos.

Co obxecto de mellorar a zona, as rúas adxacentes ao Cruceiro serán pavimentadas con lousas de granito abuxardado de 20x10x8 centímetros e adoquíns de granito de 60x40x4 centímetros; e o entorno do propio Cruceiro, con lousas de 60x40x4 centímetros.

O importe da obra é de 61.419,31 euros e o prazo de execución, dous meses.

Posted via email from Certo.gl, o xornal dixital de Barbanza e Noia

Porto do Son: Ramón Sampedro, o maior activista galego pro-eutanasia, voltou ser homenaxeado

Vídeos e tweets de Paco do Martelo

Con unha e con outras, déixovos con #RamónSampedro de costas ao mar, co que a el lle gustaba miralo tanto!!! twitter.com/pacodomartelo/…
— Francisco Calo (@pacodomartelo) January 13, 2013

@pastorrguez foi o único edil da corporación q se deixou ver no XIV Homenaxe #RamónSampedro Leu o seu poema: Necios! twitter.com/pacodomartelo/…
— Francisco Calo (@pacodomartelo) January 13, 2013

Flores para Ramón Sampedro twitter.com/etnoga/status/…
— etnoga (@etnoga) January 13, 2013

Homenaxeando a #RamónSampedro Van aló 14 ediciónsAusencia notable de autoridades e parte dos que puxemos a semente! twitter.com/pacodomartelo/…
— Francisco Calo (@pacodomartelo) January 13, 2013

Foi o 12 de xaneiro de 1998 cando Ramón Sampedro, mariñeiro de Xuño tetrapléxico, farto da xustiza lenta e dos políticos inmisericordes deste país, decidiu deixar este mundo. Como reza o noso refraneiro, "entre xaneiro e febreiro, inverno verdadeiro", e en calquera das súas homenaxes, sempre arredor da data do seu pasamento, o frío e a chuvia están presentes. Iso non arreda aos seus amigos, familia e admiradores, que xa levan con este 14 homenaxes. Notouse que non había eleccións á vista, pois a presenza de autoridades foi case nula: só se presentou o ex alcalde socialista Pastor Rodríguez, aínda edil na corporación sonense.

Os que nunca fallan e promoven con máis forza este homenaxe son os de Dereito a Morrer Dignamente e a súa familia e amigos. O seu anceio é que o legado de Ramón Sampedro non morra e que se consiga o que pediu ata que non puido máis: a eutanasia. Os políticos deste país, gravemente acomplexados pola moral católica que considera isto un pecado mortal, inda nin sequera abriron o debate. En países máis avanzados -Holanda, Bélxica ou Suíza, entre outros- xa é algo que a sociedade asumiu, pois foi explicado e debatido nas cámaras de representación cidadá.

O XIV homenaxe a Ramón Sampedro fixo de novo protagonistas á natureza -ese mar que el tanto amaba inda que nel quedara baldado e eses caraveis vermellos que se arroxaron no seu leito- e á poesía. O mesmo Sampedro deixou en "Cartas desde el infierno" un feixe de versos nos que este activista da eutanasia pediu, séndolle negado, unha morte digna a uns tribunais, os españois, que son tan lixeiriños en darlle cadea aos pobres e inda máis en zafar aos ricos e poderosos.

Posted via email from Certo.gl, o xornal dixital de Barbanza e Noia

Boiro: homenaxearán ao intelectual Celestino García Romero o venres 25 na súa aldea natal de Comoxo

Quen era Celestino García Romero?

Celestino García Romero, nado en Comoxo, Boiro, foi xesuíta e escribía en galego cando aínda non se estilaba demasiado (1855-1929). Publicou obras de teatro e estudos etnográficos sobre diversas cuestións. Tamén se interesou pola arqueoloxía (o castro do Coto de A Moreira, por exemplo).

Tíñalle medo a unha nova desamortización (a máis famosa, a de Mendizábal, fora en 1836 e a de Madoz, en 1855, ano do nacemento de García Romero) e procurou que, no caso de que así fora, os bens da Igrexa quedasen na súa familia. Na súa casa natal hai un sombreiro de clérigo na entrada na súa memoria.

Cartel Celestino García Romero.pdf Download this file

Invitación Celestino García Romero.pdf Download this file

Posted via email from Certo.gl, o xornal dixital de Barbanza e Noia

Poesía: Silvia Penas súmase aos finalistas que recitarán na final do Slam Arousa

Silvia Penas nun instituto recitando

Vilagarcía, 14 de xaneiro de 2013. A poeta Silvia Penas, que foi gañadora tamén o pasado ano do primeiro Slam Poetry Vigo gañou este pasado sábado, 12 de xaneiro, en Vilagarcía de Arousa a cuarta convocatoria de Slam Arousa (poesía recitada dende a ría) que dende o pasado ano leva percorrendo localidades da Ría de Arousa.

Unha poeta máis que se suma á festa da poesía que se celebrará en marzo na Illa de Arousa. A súa voz atrapou aos asistentes dende o primeiro poema e saíu victoriosa tamén na final, á que chegaron tamén Mauricia Ces Quintáns e Hadriana Ordóñez (concelleira de Cultura de Rianxo). No acto, recitáronse poemas dos anteriores finalistas, Celia Parrra, Ramón Blanco e Pedro Campos, que estivo presente no acto e decidiu deleitar ao público con algúns poemas musicados en directo coa súa guitarra eléctrica tocada de xeito particular e masterizada tamén ao vivo. No acto houbo poesía, música, humor e unha ducia de participantes que quixeron recitar os seus propios versos para os que decidiron achegarse á cervexería Gael.

O vindeiro mes, o Slam Arousa vaise trasladar a Cambados.

Biografía da gañadora

Realizou estudos de Filoloxía galega na Universidade de Vigo, cidade onde mora a día de hoxe. Exerce como profesora de lingua e literatura galega, ademais de dedicarse a outras tarefas profesionais. Os seus textos foron galardoados en diferentes certames de poesía e narrativa, entre os que cómpre mencionar o Premio de poesía da Universidade de Vigo 2005, co poema en cinco partes Neste Bosque. Cun conxunto de poemas intitulado A tiranía do des foi premiada en 2007 no Certame Galego de Creadores Novos GZcrea. En 2009 publica Biografía da multitude en coautoría con Elvira Riveiro Tobío, este poemario acadou o premio de poesía Victorano Taibo en 2009. Ten participado en numerosos recitais como membro do colectivo Redes Escarlata. A imaxe desta biografía é do blog As escollas electivas.

Pode que tamén lle interese: