Ribeira: a derradeira asemblea da Cofradía da Dorna aclarou todas as dúbidas da Festa da Dorna deste ano

Ribeira, 12 de xullo de 2011.O pasado sábado 9 de xullo, na Casa do Mar de Ribeira, tivo lugar a cuarta e derradeira asamblea de peñas dorneiras de cara á celebración da LXIII Singladura da Festa da Dorna. Os temas princiapais a tratar foron pechar todas as cuestións relativas á organización de Xogos e Actividades da Festa da Dorna. Así, xogos que quedaran sin confirmar xa foron ratíficados polas mesmas peñas ou asumidos por novas peñas desexosas de colaborar.

A Rejata Cutre Shark de embarcacións Feitas a Machada e Propulsadas a Pan de Millo vai seguir sendo organizada polos Persebes coma Puños e contarán coa colaboración da peña nova Me Aplaude la Almejita, dentro dos Xogos de Terra os Xogos para nenos serán organizados polo Mexillóns + Cabróns e si o precisan contaran coa colaboración dos Cao Boys, tamén inscribiuse os novo xogo O Neimar Dorneiro (Lenjuados Envriajados), o Tiratacos voltará a ser organizado polos Persebes coma Punhos e Cajaboy Island continúa con Mecajo na dieta e Malote's Party, volta o Xogo tradiciona a Billa (Arría o Jallo e Berberechos Asasinos).

Dentro dos Xogos de Mar os Rape´s confirmaron a súa continuidade con Isa-la Candorca e Lansamento de Risón ambos xogos teñen versión masculina e feminina, Os Cao Boys continúan con Saltos dende o paredón e Cajaboy Island co Achikeitor.

En canto ao voo sen motor repartironse unhas follas coas bases do concurso para quen quede lugar a dúbidas, en canto ao Maratasón (Carallos de Rei) confimouse que será ás 21:00 do Mercores 20 de Xullo e a final ás 17:00 do 24 de Xullo durante a Romería Dorneira. As Lampreas máis Preas continúan coa organización da Macroqueimada. O Exame de Patróns será organizado por Cajaboi Island.

Rock'And'Orna

No que atinxe á música, actuarán no Rockandorna do país: 8 Ferrados, Talón de Aquiles, Generación Perdida, De Fe Caos, Entrelineas e Basura de la Buena. No rockadorna The Covers e no Rockaandorna fin de Festa Miguel Costas e Ruxe Ruxe. Teremos as charangas O Santiaguiño, Os Jalochos e Os Kilomberos de Montealto.

O Baile de Gala celebrarase no Círculo Mercantil de Ribeira o Sabado 30 de Xullo amenizando o Dúo Yesterdey, é preciso vestir de Gala. Cancelouse a actividade prevista Rock in Muxo, polo cal retrasaranse as Carrilanas.

Concursos

En canto ao tema de anotarse a concursos, xa están abertos os listados:
-Maratasón (ata as 19:00 do 20 de Xullo no Castelao) deixar unha nota na caixa correspondente donde estarán as bases para participar. (Carallos de Rei)
-Enjalanamento de Fanequeiras (en Pepe´s ou no Capri ata o 19 de Xullo) apuntarse na lista. (Ratos da Illa e Muxo Beti)
-Canción de Tasca (en Pepe´s ata o 20 de Xullo) apuntarse na lista. (Tabeiróns Caralludos)
-Facho Dorneiro (ata o 18 de Xullo) no email real-e-ilustre@cofradiadadorna.com (Os Serráns máis Marráns)
As peñas Feitos Polvo, Carallos de Rei, Sija la Raia, as Robalisas e CAo Boys unironse os Pateiros Palangreiros, Pintos Joden Quintos e A NAsa para colaborar no Juateke dorneiro feito que a Cofradía da Doran agradece moito.

Recórdaselle a tódalas peñas novas que o Xoves 21de Xullo ás 22:00 deben presentarse no Palco para tratar de superar o Necesario Exame de Patróns, condición indispensable para ser peña dorneira e poder participar en todolos Xogos e Actiuvidades Dorneiras.

Por outra bande recordóuselle aos asistentes que xa se pasaran as cuotas dos socios e que todos aqueles socios que non recibiran a súa cuota e estean interesados en continuar sendo socios da Asociación Cultural Real e Ilustre Cofradía da Dorna deben poñerse en contacto: real-e-ilustre@Cofradiadadorna.com para actualizar os seus datos. Os Novos socios que non recollestedes os vosos carnets de Dorneiro Acreditado debedes poñervos en conctaco coa Cofradía no mesmo email ou pasadevos o mércores 20 de Xullo pola mostrador do churrasco que haberá durante o Rockandorna do país.

Respeto á autoridade

A Cofradía a Dorna solicita respeto por todos os corpos de seguridade do estado (protección civil, policía local e policía nacional), polas peñas organidadoras de cada unha das actividades e por todos eses dorneiros que botan unha man, os cales colaboran para que a Festa da Dorna se leve adiante da mellor maneira posible. Así que recordase a todolos asistentes que nas carrilanas non se pode sair das beirarúas e si hai xente na calzada paranse ata que se retiren.

Cabe sinalar que dita asamblea contou con 80 asistentes en representación de 35 peñas dorneiras, apuntou Arturo González Mariño, presidente da Asociación Cultural Real e Ilustre Cofradía da Dorna.

Posted via email from Certo.gl, o xornal dixital de Barbanza e Noia

Ribeira: propoñen unha dársena portuaria especializada en deportes náuticos

• Habería alí instalacións para vela, surf, remo e piragüismo, segundo lle propuxo hoxe o presidente de Portos ao alcalde
• Sería a enclavada na zona norte, xunto á entrada ao porto pola beira do Club Náutico

Ribeira, 12 de xullo de 2011.- O alcalde, Manuel Ruiz Rivas, e o presidente de Portos de Galicia, José Manuel Álvarez-Campana Gallo, mantiveron esta tarde unha primeira toma de contacto institucional na casa consistorial do municipio barbanzano para analizar os temas de interese común existentes entre ambas institucións en relación aos portos do concello. 

Unha das cuestións máis importantes das abordadas na xuntanza foi a que fai alusión á redefinición das relacións entre o porto de Ribeira e a cidade de Santa Uxía. A este respecto, Álvarez-Campana anunciou que para comezar a dar pasos neste obxectivo, unha das dársenas existentes (concretamente, a enclavada na zona norte, xunto á entrada ao porto pola beira do Club Náutico) vai estar especializada nos deportes náuticos, e a tal efecto albergará instalacións e actividades asociadas ao remo, o piragüismo, a vela ou o surf. 

Concello e Portos colaborarán na cristalización deste proxecto para a dársena norte, que fará que o porto quede dividido en tres zonas perfectamente delimitadas en función do uso:  a deportiva, a pesqueira e a de uso comercial. 

Abundando tamén no tema do entronque marítimo e urbano  ribeirenses, Manuel Ruiz Rivas fixo fincapé tamén noutras actuacións encamiñadas nesa mesma dirección que se enmarcan dentro do plan Ribeira Atlántica 2015 e quixo convidar ao presidente de Portos a formar parte do comité de seguemento deste proxecto ante os intereses comúns existentes ao respecto, que afectan a lugares da cidade como a avenida do Malecón, o paseo das Carolinas ou o paseo que vai cara O Touro,. 

Nova lonxa

Outro dos asuntos tratados na reunión de hoxe foi o do edificio da nova lonxa. Segundo informou o presidente de Portos, actualmente se está traballando segundo as previsións na redacción do proxecto construtivo e anunciou a posta en marcha dunha comisión de seguimento liderada polo Concello e na que terán participación tamén os futuros usuarios e os técnicos de Portos. 

Cabe lembrar que proxecto e obra foron adxudicados conxuntamente o pasado marzo á empresa Acciona, cun importe de 17 millóns de euros e un prazo de execución de 36 meses contado a partir do momento da firma do contrato. 

Outros temas relacionados co porto de Santa Uxía abordados esta tarde foron o estudo de ampliación do peirao comercial (que está en fase de estudo e séguese avanzando no mesmo) ou a próxima licitación mediante concesión dun foso e un travel na zona pesqueira en resposta as demandas da confraría de Ribeira.

Con relación ao porto de Aguiño, Álvarez-Campana manifestou que se está traballando na modificación das ramplas e na optimización do espazo portuario, e que pronto se sacará a concurso unha estación de subministro de combustible para a flota que opera nesta parroquia. 

En canto ao porto de Palmeira estase a traballar con proxectos específicos como son a modificación da rampa e a preparación de casetas para os usuarios, que se enmarcan noutro máis xeral.

Posted via email from Certo.gl, o xornal dixital de Barbanza e Noia

Boiro: Sabela Rey colga "Xeometrías" do 15 de xullo ao 15 de agosto no centro social

Boiro, 11 de xullo de 2011. Este venres, 15 de xullo, ás 20:30 horas, terá lugar no centro social de Boiro a inauguración da exposición "Xeometrías", que asina a artista moza Sabela Rey. Poderase ver ata o 15 de agosto.

Posted via email from Certo.gl, o xornal dixital de Barbanza e Noia

Ribeira: o alcalde recibe a unha delegación de Corea do Sur, potencia mundial en taekwondo

• Estiveron participando no campamento "Soño olímpico"
  

Ribeira, 11 de xullo de 2011. O alcalde de Ribeira, Manuel Ruiz Rivas, recibiu esta mañá a unha delegación institucional procedente de Corea do Sur que, formada por distintas personalidades académicas e deportivas ligadas ao taekwondo, estiveron estes días no municipio con motivo da celebración do campamento de verán "Soño Olímpico". 

A comitiva coreana estivo integrada polo gran mestre Choi Jai Goo, da rexión da Kang Won; o doutor Jeon Young Han, da Universidade de Yong In; Baek Guk Hyeon, do equipo profesional de Yong In e que foi seleccionador nacional coreano no Mundial de 2009; Hwang El-Yeon, da Universidade de Chu San; Youl Yu Jae, estudante de Educación Física, e, exercendo de intérprete, Lee Dong Kyu, residente en Ourense é máximo referente en España da disciplina do Haidong Humdo. Tamén estiveron no encontro Mercé Barrientos, presidenta da Federación Galega de Taekwondo, e o edil de Deportes Juan Luis Martínez. 

O alcalde Ruiz Rivas agradeceu á expedición coreana a súa estancia no concello e lles salientou a importancia que o deporte posúe para a sociedade ribeirense, acadando magníficos triunfos en diversas disciplinas, entre as cales a do taekwondo é unha das máis destacadas. 

Ao finalizar o encontro a comitiva oriental quixo obsequiar ao rexedor ribeirense cun pin.

See the full gallery on Posterous

Posted via email from Certo.gl, o xornal dixital de Barbanza e Noia

Ribeira: a Illa de Sálvora, unha das sedes dun congreso mundial de xeoloxía no que estarán 40 expertos internacionais este mércores

• A outra sede é a cercana illa de Ons. O encontro comeza mañá martes nesta illa e o mércores irán á de Sálvora.
  
• Escolléronse estas dúas illas pola súa gran diversidade xeolóxica, ideal como punto de encontro para xeólogos
  

Pazo de Sálvora, recentemente restaurado polo Estado, logo de que a illa voltou a ser pública

Ribeira, 11 de xullo de 2011.- A illa ribeirense de Sálvora, que pertence ao Parque Nacional marítimo-terrestre das Illas Atlánticas de Galicia, acolle este martes e mércores un Congreso Mundial de Xeoloxía, que contará coa presenza de preto de 40 expertos chegados de diferentes puntos do mundo. Ons e Sálvora, dúas das illas do Parque Nacional xestionado pola Consellería do Medio Rural, contan con características senlleiras, que fan delas lugares singulares para o estudo e a análise dos solos de tipo granítico.

A actividade deste encontro académico divídese en dúas xornadas. A primeira delas, mañá martes 12 de xullo, centrarase no caso concreto da illa de Ons; mentres que o día seguinte, mércores 13, a expedición visitará Sálvora. Nestas dúas xornadas, os asistentes coñecerán en primeira persoa estas dúas formacións rochosas graníticas, representativas dos tres principais episodios de magmatismo varisco (pertencente ao período da oroxenía varisca).

Riqueza granítica en Ons
O martes 12, o Congreso Xeolóxico Mundial inicia a súa excursión na illa de Ons e Onza (pequeno illote situado a 600 metros ao sur de Ons). A expedición partirá de Cambados nunha viaxe en barco a primeira hora da mañá, dende o que se poderá observar a costa norte da ría de Pontevedra e as Illas Cíes.

Á chegada a Ons, prevista para as 9.45 horas, os expertos coñecerán a Punta Xubenco, lugar no que se rexistran varias capas paralelas de diferentes tipos de granitos. O Cabo Liñeiro é o segundo punto a visitar, onde a gran variedade de rochas indica complexos procesos de fusión que ao longo do tempo chegou a afectar tanto ao manto como á codia continental.

Durante a tarde, o grupo visitará as zonas de praia e a aldea de Ons, espazos compostos por leucogranitos e rochas miloníticas. Ao remate da xornada, os asistentes regresarán en barco a Cambados.

Diversidade xeolóxica de Sálvora

[[posterous-content:jfkuaJFfrdwlJkjIxoec]]
Praia de Sálvora, onde afloran rochas ígneas do periodo xeolóxico Devónico

A segunda e derradeira xornada do Congreso Xeolóxico ten como escenario a illa de Sálvora, un enclave de gran variedade xeolóxica. Partindo de Cambados, os 40 expertos internacionais observarán dende o barco a Illa de Arousa e a Península do Grove. En Sálvora dáse conta dunha gran variedade de formas e abundantes rochas ígneas. A primeira parada é a praia dos Bois ata chegar á abandonada vila da illa, onde se poden observar texturas pegmatíticas (rochas ígneas de grao especialmente groso).

Finalizado o xantar, a seguinte parada é a Volta de San Roque, logo de atravesar unha zona dunar con vexetación. Acto seguido visitarase a Punta do Castelo, espazo de rochas graníticas con suaves relevos; e Salgueiriño, enclave con granitos de abundantes fragmentos metamórficos.

Porto de Aguiño

Ao remate da xornada, os asistentes tomarán o barco con dirección ao porto de Ribeira, aproveitando o traxecto para observar pequenos illotes próximos a Sálvora e á costa de Ribeira, xunto co porto de Aguiño e as montañas do Barbanza.

Hai que lembrar que as condicións da illa de Sálvora fan deste enclave un lugar con características particulares e de especial protección, polo que os asistentes deberán extremar os coidados e evitar saír dos sendeiros indicados.

Posted via email from Certo.gl, o xornal dixital de Barbanza e Noia

Rianxo: vanlle dar para adiante á declaración como Ben de Interese Cultural Inmaterial da obra de Castelao

• Non foi sen tempo: dende inicios do pasado goberno bipartito estase a catalogar a obra, que está espallada por todo o mundo
  
• Pese a que a Xunta non sabe como encher a Cidade da Cultura, a Fundación Castelao segue nun minipiso en Santiago de Compostela, xa que non deron expropiado de malas maneiras a casa familiar de Rianxo

Casa familiar de Castelao en Rianxo, propiedade da familia Baltar

Rianxo, 11 de xullo de 2011.- A Consellería de Cultura e Turismo, a través da Dirección Xeral do Patrimonio Cultural, aprobou con data do 28 de xuño de 2011 a resolución pola que se incoará o procedemento para a declaración de Ben de Interese Cultural (BIC) a favor do conxunto da obra de Alfonso Daniel Rodríguez Castelao. Esta resolución será comunicada ao Rexistro Xeral de Bens de Interese Cultural para a súa anotación preventiva como ben de interese cultural inmaterial. O proceso de catalogación da súa obra rematou, e xa fora iniciada na lexislatura anterior, cando gobernaban Psoe e Bng. Nunha incoherencia máis das numerosas da nosa política cultural, pasada e presente, a Fundación Castelao, que preside o histórico nacionalista Avelino Pousa Antelo, segue a estar nun pequeno piso de Santiago de Compostela, como denunciara o xa desaparecido xornal galego A Peneira en 2007 e do que nos fixemos eco aquí. Tampouco saíu adiante o proxecto de Academia Literaria Rianxeira que quería facer o anterior goberno socialista de Rianxo, entre outras cousas porque quería mercar ou expropiar ás bravas unha casa na que residira Castelao pero que é, lexítima e legalmente, da familia Baltar. Xa na compra da casa de Rafael Dieste houbera bastantes anomalías, pero na de Castelao, a firme determinación dos donos conseguiu paralizar todo.

Nos próximos días, a decisión será publicada no Diario Oficial de Galicia (DOG) e, seguidamente, abrirase un período de información pública polo prazo dun mes co obxectivo de que cantos teñan interese poidan examinar o expediente e alegar o que estimen conveniente. O inicio dos trámites para declarar BIC a obra de Castelao prodúcese no ano no que se celebra o 125 aniversario do seu nacemento.

A resolución determina a aplicación inmediata e provisional do réxime de protección previsto para os bens xa declarados. A Dirección Xeral de Patrimonio Cultural enmarca esta actuación no seu labor de protexer, conservar e difundir o legado que constitúe o patrimonio cultural de Galicia e transmitilo ao futuro. Este patrimonio constitúeno todo os bens materiais e inmateriais que, polo seu recoñecido valor propio, son considerados como de interese relevante para a permanencia e a identidade da cultura galega a través do tempo. Deste xeito, con esta actuación recoñecese a obra de Castelao como un dos bens mais sobranceiros do noso patrimonio cultural.

Personaxe sobranceiro da cultura galega

A decisión da Dirección Xeral do Patrimonio Cultural vén motivada polo feito de que Alfonso Daniel Rodríguez Castelao (Rianxo 1886- Bos Aires 1950) é un dos expoñentes máximos da nosa cultura e figura imprescindible para comprender a historia recente de Galicia e a súa realidade actual. Ao longo da súa vida, Castelao traballou con empeño a favor dos dereitos dos galegos e do recoñecemento da realidade diferencial de Galicia e a súa autonomía política. O galeguismo abrangue a totalidade do seu pensamento, o seu traballo e a súa vida. Deste xeito, toda a súa obra, nas súas múltiples vertentes de debuxante, literato, ensaísta e político, está profundamente marcada polo amor á súa terra e o compromiso con Galicia.

Castelao -prosegue a Xunta en nota de prensa- nunca disociou arte de compromiso, ética e estética, a obra artística en canto vehículo de concienciación e afirmación da identidade dun pobo. De feito, a súa achega ás letras, ás artes e á política é determinante para a recuperación da lingua e cultura galega e a formación dunha conciencia de Galicia como nación, intimamente ligadas á defensa das liberdades democráticas. A súa decisión de non separar a súa arte do servizo a unhas ideas levouno á utilización das técnicas e estilos máis axeitados a este fin, pero sen renunciar á contemporaneidade estética vangardista.

Por todo isto, o conxunto da obra de Castelao identificase como símbolo de Galicia e, polos seus valores e calidade, a súa produción creativa posúe un significado que trascende as nosas fronteiras e o seu legado ocupa un lugar destacado na historia da arte contemporánea europea.

No anexo que acompaña a resolución que se publicará no Diario Oficial de Galicia (DOG) mencionase moi someramente os fitos principais da obra narrativa e plástica, con indicación neste caso do lugar onde se pode atopar. Esta relación sirve para dar unha idea da extensión, singularidade e pervivencia da súa pegada cultural.

Viñeta de Castelao sobre a Guerra Civil

Obra literaria e plástica
A primeira obra narrativa publicada foi Un ollo de vidro. Memorias dun esquelete (1922), na que Castelao bota man da sátira social e política. A súa segunda obra, Cousas (1926), componse de breves relatos, a través dos que busca a plena expresividade para representar a alma galega que hai en cada personaxe.

Retrincos, en boa medida extensión da fórmula de Cousas, está formada por cinco contos presentados como autobiográficos. Resultado da reelaboración de escritos ao longo de 25 anos, esta obra supón unha combinación equilibrada entre brevidade, sinxeleza e alto grado de elaboración.

Os dous de sempre (1934) é a única novela de Castelao. Nela, narra a historia de dous homes, convertidos en verdadeiros arquetipos do comportamento humano universal, deseñados por Castelao con claridade, elegancia e humor. A súa única obra de teatro é Os vellos non deben namorarse (1941). Con ela, Castelao incorpora tendencias renovadoras do teatro europeo das vangardas a unha obra que non abandona a súa raíz galega. En 1944, Castelao escribe Sempre en Galiza, un libro que está considerado como a obra por excelencia do nacionalismo galego. Outras dúas obras salientables son As cruces de pedra na Bretaña (1930) e As cruces de pedra na Galiza (1950), que son estudos históricos e descritivos deses elementos singulares.

Para rematar esta breve relación da súa obra literaria, hai que mencionar o libro Diario, que aínda que publicado en 1977 foi escrito por Castelao en 1921. Nel recolle as impresións da viaxe de estudos por Europa que fixo nese tempo e que lle deu a oportunidade de coñecer de preto as novas tendencias artísticas.

Máscara orixinal empregada en "Os vellos non deben de namorarse". Museo Del Riego en Vigo.

En canto á obra plástica, Castelao foi un artista autodidacta, cunha capacidade natural para o trazo gráfico e para a síntese dunha imaxe real. No eido artístico, plasma todo un mundo de expresividade a través de técnicas e materiais moi variados como augada, tinta, carbonciño, lapis, óleo, pastel ou témpera, Domina, ademais, as distintas técnicas do gravado utilizando como soporte o papel, cartón e cartulina, pero destaca a súa preferencia polo debuxo rápido, apunte inmediato e de pequeno formato. Na obra gráfica de Castelao apréciase unha constante evolución na concepción da imaxe: parte dun comezo naturalista e costumista decimonónico, pero incorpora paulatinamente a composición e as percepcións espaciais do deseño moderno do seu tempo, influído pola fotografía e a estampa xaponesa e polas novidades formais do cartelismo.

Dentro da súa faceta plástica, cabe diferenciar tres etapas. A primeira, desde 1908 ata 1916, a segunda, desde 1916 ata 1936; e a derradeira, iniciada co estalido da Guerra Civil e definida pola posterior etapa franquista. Desa última época son as súas creacións artísticas de máis interese desde o punto de vista da consideración do autor como figura internacional. Gran parte da obra plástica de Castelao atópase dispersa en coleccións de diferentes entidades, museos e fundacións. Unha parte importante está en Galicia, pero tamén hai numerosas obras en arquivos, museos e coleccións de persoas e entidades do resto de España, e en Europa e América.

Documentación e localización da obra

Avelino Pousa Antelo, preto dos cen anos, aínda preside a Fundación Castelao

Froito dun convenio de colaboración entre a Xunta de Galicia e a Fundación Castelao, asinado no ano 2008, elaborouse un catálogo de toda a obra artística de Castelao que se recolle nunha base de datos dixital con máis de tres mil rexistros.

A bibliografía de Castelao e o conxunto da súa obra nas súas diferentes facetas é moi ampla e vaise ampliando ano a ano, sendo o interese que suscita de moi distintas procedencias xeográficas e temporais. En Galicia, é doado contemplar directamente moitas das obras orixinais de Castelao, xa que se conservan en numerosas institucións e son accesibles a investigadores e ao público en xeral.

Por exemplo, o Museo de Pontevedra, que contou con Castelao en 1929 como vogal do seu padroado principal, conserva un importante conxunto de obras e materiais (máis de 1.600) entre as que se atopan todas as estampas orixinais dos seus tres albumes de guerra (Galiza Mártir, Atila en Galiza e Milicianos), así como o manuscrito de Sempre en Galiza, a serie de Debuxos de negros, todos os materiais da obra As cruces de pedra na Galiza, 100 debuxos realizados para ilustrar As cruces de pedra na Bretaña e a segunda e definitiva versión manuscrita de Os vellos non deben de namorarse.

Pola súa banda, no Museo Provincial de Lugo atópanse 27 debuxos e gravados, unha augada, una litografía e dous óleos de Castelao, en parte doados por Álvaro Gil Varela no 1965. En Vigo, no Museo Quiñones de León, hai unha colección de 110 debuxos, e en Sada, o Museo de Carlos Maside conserva 65 debuxos e augadas. O Museo de Belas Artes da Coruña posúe 3 debuxos a tinta e un gouache, mentres que o Museo do Pobo Galego de Santiago conta con 129 debuxos e gravados de Castelao.

Unha parte da obra de Castelao é conservada por institucións como Novacaixagalicia, que conta on 72 murais e 176 debuxos de Cousas da Vida. Por outra parte, a Universidade de Santiago de Compostela custodia 79 debuxos; a Fundacion Penzol, 52; a Fundación Vicente Risco, 36 debuxos e gravados; o BBVA, que ten 25 debuxos, e a Biblioteca Nacional de España, que conserva 62 debuxos. No Centro Superior Bibliográfico de Galicia (hoxe Biblioteca de Galicia) gárdanse 18 debuxos de Castelao, outros 17 no Instituto de Estudos Galegos do Padre Sarmiento, e a Real Academia Galega conserva outro 15 aos que hai que sumar 2 gravados.

Posted via email from Certo.gl, o xornal dixital de Barbanza e Noia

Ribeira: obradoiros interxeneracional e de risoterapia para animar o verán dos maiores

• Abre xa o prazo de inscrición para os dous
  

Ribeira, 11 de xullo de 2011.- Servizos Sociais oferta para este verán dous novos obradoiros dirixidos á promoción social do maiores que nunca se tiveran celebrado no municipio en época estival: trátase do xa tradicional obradoiro de Risoterapia que por primeira vez se organiza en época estival e, por outra parte e como novidade absoluta, un obradoiro de Coñecemento Interxeneracional que pretende unir a avós cos seus netos nunha experiencia de conciliación que procura ademais o xurdimento de actitudes empáticas entre ambas xeracións.

Para falar destas dúas iniciativas déronse cita na Casa Consistorial o concelleiro de Servizos Sociais, Promoción Social, Sanidade e Consumo do Concello, Vicente Mariño; e a xefa de servizo do Departamento de Servizos Sociais, Francisca Vidal.

O obradoiro de Coñecemento Interxeneracional constará dun total de oito sesións de 90 minutos de duración nas que, guiados por un monitor, nenos e maiores haberán de compartir todo tipo de experiencias e valores como medio para acadar unha mellor comprensión e relación co seu entorno social máis próximo.

A actividade está  dirixida a nenos e nenas de 5 a 9 anos, e homes e mulleres maiores de 60. Haberá un total de 20 prazas, 10 para o grupo de nenos e nenas e as outras 10 para o grupo de maiores. 

A metodoloxía das sesións farán referencia á práctica de habilidades de intelixencia emocional mediante distintas técnicas socioafectivas, como dinámicas individuais e grupais, charlas expositivas, xogos de rol, choiva de ideas, adestramento en solución de problemas e exercicios de rexistro.

Entre os contidos que se van abordar, figuran as tradicións e costumes da zona, os xogos tradicionais e actuais, os contos populares e debuxos animados, o cine de antes e de agora, e a Internet para todos.

O taller principiará  o día 15 de xullo e estenderase ata o 15 de setembro, a razón dunha sesión semanal. Hoxe mesmo comeza o prazo de inscrición. Os interesados en anotarse poden facelo no Departamento de Servizos Sociais, sito na rúa Correos.

Risoterapia

Por outra parte, o obradoiro de Risoterapia busca que os participantes adquiran unha actitude positiva mediante a recuperación da risa espontánea que as persoas traen consigo ao nacer, pero que pouco a pouco acostúmase a ir perdendo.

Está dirixido ás persoas maiores de 60 anos, que tamén poden apuntarse nos Servizos Sociais dende hoxe. A acción principiará o 15 de xullo e rematará o 15 de setembro. Tamén serán oito sesións e 20 prazas.

Entre os contidos da actividade, figuran unhas nocións básicas sobre risoterapia, a risa como actitude, habilidades sociais e achegamento interpersonal, desenvolvemento ludo-dinámico a nivel grupal, o xogo e o desenvolvemento psicolóxico e a ximnasia da risa.

See the full gallery on Posterous

Posted via email from Certo.gl, o xornal dixital de Barbanza e Noia

Ribeira: un quinteto de grupos locais de música tradicional amosaron o seu bo facer no auditorio

Ribeira, 11 de xullo de 2011. Os acordes da música máis autóctona resoaron o pasado sábado no salón de actos do auditorio, co gallo da celebración da Mostra de Música Tradicional de Ribeira, unha actividade organizada pola Concellería de Cultura co fin de promover e divulgar o extraordinario traballo que desenvolven os distintos grupos folclóricos do municipio. 

Cinco deses grupos tiveron a ben participar na actividade: o Grupo Tradicional Tahume de Olveira , O Rueiro dos Fillos de Palmeira, o Grupo de Gaitas O Pichote de Palmeira, O Grupo de Pandereteiras Tanxedoira de Palmeira e o Grupo de Canto A Gandaina de Palmeira. 

Ao longo dunha hora e media, os integrantes destes grupos deron conta do seu talento sobre o escenario do Auditorio nun evento que estivo presentado polo técnico municipal de Cultura, Unai González. 

Ao remate do mesmo, a concelleira de Cultura do Concello, Elvira Pisos, agasallou a cada grupo participante cunha figura conmemorativa da Mostra para premiar e agradecer a súa participación.

See the full gallery on Posterous

Posted via email from Certo.gl, o xornal dixital de Barbanza e Noia

A Pobra: estrean banda de música municipal logo de máis de 80 anos sen ela

• A Pobra non tiña banda municipal dende o ano da Gran Depresión, 1929

A Pobra, 10 de xullo de 2011. Onte, sábado 9 de xullo, o Teatro Elma acubillou o peche do curso 2010-2011 da Escola de Música que conta na actualidade con 76 alumnos/as, un director e seis mestres e tamén se presentou a Banda de Música, integrada por 21 nenas e nenos desta escola, na que aprenden e tocan dende os catro anos de idade instrumentos como piano, frauta, batería, clarinete, saxo, tuba, trompeta, guitarra, marimba, pandeireta, metalófono, caixón flamenco ou guitarra.

No acto estiveron presentes varios membros do equipo de goberno, ademais do alcalde, Isaac Maceiras, que dixo estar "moi orgulloso da Escola de Música, xa que en só dous anos que leva funcionando, acadou os seus obxetivos como era o reto de poñer en funcionamento a Banda de Música". Lembrouse que A Pobra non ten unha banda dende o ano 1929; e hoxe en día era un dos poucos concellos que non a tiña. Fixo referencia a que este esforzo "é posible primordialmente ao traballo dos alumnos e dos seus pais, pola dedicación e o entusiasmo que poñen nisto, así como a profesionalidade dos seus mestres. E como recompensa o mellor premio que poden recibir é o apoio e o cariño de tódolos pobrenses".

Tamén estivo no acto o Director Xeral de Xuventude e Voluntariado, Ovidio Rodeiro Tato, que dixo que "un pobo culto e o que crea cultura, e que dá gusto ver a todos estes nenos e nenas, mozos e mozas volcados nunha tarefa nada fácil como a de involucrarse na creación dunha Banda de música, pero coa súa tenacidade, empeño e ilusión conseguíronno nun tempo simbólico". Tamén fixo referencia a que dende a Dirección Xeral que el dirixe e dende a Xunta de Galicia "farase todo o que estea nas nosas mans para apoiar iniciativas como ésta, que poñen á Pobra do Caramiñal no lugar que debe ocupar no mapa cultural de Galicia".

O teatro-cine Elma estaba totalmente ateigado e ao remate da actuación da Banda de Música, o público pusoxe en pé para cos seus aplausos fecilitar aos compoñentes desta Banda recén estreada.

See the full gallery on Posterous

Posted via email from Certo.gl, o xornal dixital de Barbanza e Noia

Noia: este luns 11 de xullo, seminario sobre as supostas vantaxes das Sociedades de Fomento Forestal

• Segundo a Xunta, estes seminarios pretenden dar a coñecer as vantaxes dunha xestión sostible e rendible do monte galego, dirixido aos axentes do sector e ao persoal da Administración Autonómica
• A iniciativa enmárcase no proxecto de cooperación transfronteiriza Interreg “Xes-Silvae”, cofinanciado polo Fondo Europeo de Desenvolvemento Rexional (FEDER)

Noia, 10 xullo de 2011.- Durante esta semana terán lugar diversos seminarios coa fin de dar a coñecer as Sociedades de Fomento Forestal (SOFOR), unha nova figura impulsada pola Consellería de Medio Rural. Este luns, 11 de xullo, hai un en Noia.

Xestión sostible do monte
Un dos obxectivos fundamentais que perseguen estes seminarios baséase en difundir, tanto aos axentes do sector como ao propio persoal da Administración Autonómica, a necesidade de acadar unha xestión máis sostible e rendible do monte, tendo como principal ferramenta as pequenas parcelas de propiedade forestal particular, a partir das que se pretende acadar unha xestión baseada na viabilidade económica e a sustentatibilidade ambiental e social.

Con estas accións divulgativas e formativas o departamento que encabeza Samuel Juárez, quere difundir as vantaxes das denominadas “sociedades de fomento forestal”, nas que se leva a cabo unha agrupación dos propietarios de pequenas parcelas, susceptibles do aproveitamento forestal e que ceden os dereitos de uso á sociedade. Asemade, as SOFOR inclúen a posibilidade de inclusión doutras persoas físicas que non sexan titulares de dereitos de uso de parcelas, sempre que a súa participación non supere o 49% das participacións sociais.

Vantaxes das SOFOR
As Sociedades de Fomento Forestal teñen unha serie de vantaxes non só referidas á prevención de incendios forestais. Alén deste propósito, as SOFOR pretenden poñer en valor o monte galego e o aumento da renda agraria. Ao mesmo tempo, garántese o dereito de propiedade dos socios, xa que só se ceden os dereitos de uso, tendo ao seu favor a adscrición voluntaria dos propietarios. Ademais permítese a entrada de capital privado investidor só no capital social, xa que poden coexistir socios propietarios con outros capitalistas. Por último, cabe salientar que o feito de que estas sociedades estean suxeitas ao dereito privado, contan cunha regulación mercantil específica.

Críticas a estas sociedades

O Bloque Nacionalista Galego cre que este tipo de sociedades son a antesala da privatización dos montes en man común. Extenso artigo sobre este asunto en Terra e Tempo, aquí

Decreto que regula as Sofor, aquí

Posted via email from Certo.gl, o xornal dixital de Barbanza e Noia