16.5.10

Boiro: a segunda edición de Pedra Boleira, a única liga de bolos tradicionais da provincia, remata o domingo 27 de xuño

Boiro, 16 de maio de 2010.  “Pedra Boleira”, a liga de bolos tradicionais que organiza o Departamento de Deportes do Concello de Boiro botou hoxe a andar, xa na súa segunda edición, en Pomar do río, na parroquia de Cures. A partires de agora, levará o nome de Antonio García Hermo, un dos seus promotores, que finou en 2009.

Esta é a segunda edición deste torneo, que foi disputado por primeira vez no ano 2008. En 2009, a piques de comenzar a liga, un dos grandes promotores deste xogo en Boiro e colaborador do Departamento de Deportes, Antonio García Hermo, falecía
repentinamente, polo cal se cancelou a que ía ser a segunda edición. Este ano, 2010, recuperouse para seguir coa tradición, satisfacer a demanda popular e tamén para facer um homenaxe a Antonio García, que dará o seu nome a este torneo que se celebrará cada ano en Boiro "e esperamos que por moito tempo", comentan dende o departamento de Deportes do Concello. 

"Non hai que esquecerse da importancia de organizar unha liga destas caracteristicas, na que tendo como destinatario un deporte tradicional, tivo un grandísimo arraigo en Boiro e que, hoxe en día, aínda se segue xogando ao máis estilo tradicional, sendo dos poucos lugares da comunidade galega, e único da provincia da Coruña, que segue activo", argumentan os organizadores.



Vinte parellas que xogan cada fin de semana dous partidos

Na segunda edición de Pedra Boleira participan vinte parellas, que cada fin de semana xogan dous partidos, un o sábado e outro o domingo, a partires das catro da tarde no campo de bolos de Pomar do Río, ao pé de Cures. Será a parella campiona a que gañe máis partidos, recurrindo ao enfrontamento directo ou suma de puntos das partidas no caso de empate final. Os enfrontamentos serán ao mellor de tres partidas e a 200 puntos.

Posted via email from Certo.es, o xornal virtual de Barbanza e Noia

Porto do Son: asfaltado de catro mil metros cadrados en dúas zonas da explanada no peirao


Porto do Son, 16 de maio de 2010.- A Consellería do Mar, a través do ente público Portos de Galicia, anunciou hoxe que pavimentará a primeira zona da explanada portuaria de Portosín, duns 120 metros cadrados, onde existen unha serie de puntos en mal estado que dificultan a normal circulación dos vehículos que transitan por esa zona creando dificultades de operatividade e manobras dos camións e vehículos lixeiros que utilizan estas instalacións.

Tamén será asfaltada unha segunda zona da explanada portuaria, duns 3.700 metros cadrados cos mesmos problemas, emprazada antes da nova lonxa do porto. Estas actuacións foron solicitadas con cargo aos fondos do Plan de Investimentos en obras Menores (PIM) e suporá un investimento de mais de 36.000 euros.

Porto de Escarabote, Boiro

Plan de investimentos en obras Menores

O Ente Público Portos de Galicia está a executar obras de infraestrutura e inversións menores nos portos da provincia de A Coruña de acordo coas necesidades dos seus distintos usuarios como son as confrarías, clubs náuticos, asociacións e concesionarios e operadores portuarios, entre outros.

Entre as actuacións realizadas por este programa figuran a reordenación de fondeos, limpezas de fondos mariños, defensas para os peiraos, casetas, remodelación de locais, galpóns e almacéns, pavimentacións e asfaltados de viais portuarios, mantemento e reparación en xeral de portalóns e reparación de superficies en lonxas, vestiarios, entre outros.

Tamén figuran nestas partidas as correspondentes á colocación de alumeados nos portos e edificios de comercialización e venda de peixe, colocación e acondicionamento de escaleiras, tanto nos edificios como nos peiraos. Segundo as peticións recibidas, a maior parte corresponde ás efectuadas polas confrarías de pescadores.

Posted via email from Certo.es, o xornal virtual de Barbanza e Noia

14.5.10

Ribeira: xa se pode ver a mostra itinerante de arte contemporánea "Iacobus Gallaecia" no auditorio

Ribeira, 14 de maio de 2010. Pilar Ron en representación da Sociedade do Xacobeo e Luciano Fernández como edil de Cultura ribeirense foron os encargados de inaugurar este serán a exposición “Iacobus Gallaecia”, mostra que se pode admirar no Auditorio Municipal ata o vindeiro 13 de xuño.  

Esta exposición itinerante recolle unha selección de obras creadas por autores galegos, moitas das cales nutriron no seu día a colección do Xacobeo na Expo’92 de Sevilla: nomes como Álvarez Basso, Berta Cáccamo, Freixanes, Lamazares, entre outros, que representaron no Pavillón de Galicia o panorama artístico desta terra. 

Así mesmo, exhíbense tamén traballos doutros artistas sempre na pretensión de poñer en valor a creatividade galega. Tal é o caso de Sucasas, Antón García Patiño ou Paco Pestana.

Pilar Ron manifestou durante o acto inaugural que con esta mostra se quere dar a coñecer parte da colección de arte contemporánea que o Xacobeo reuniu durante estes anos, ofrecendo ao público un achegamento á obra de autores galegos actuais e de recoñecido prestixio.  

Terceiro destino

Ribeira é o terceiro destino no que recala a exposición, tras ser exhibida en Santiago de Compostela e Noia. Fernández convidou aos ribeirenses e aos barbanzanos en xeral a que non deixen de acudir ao Auditorio para contemplar esta magnífica mostra, que forma parte da programación do Maio Cultural desenvolvido polo Concello. A Sala de Exposicións do Auditorio estará aberta de luns a venres en horario de 11 a 14 horas; e martes, mércores e sábados de 19 a 21 horas.

Posted via email from Certo.es, o xornal virtual de Barbanza e Noia

Rianxo: en xuño, catro obradoiros para mulleres

Rianxo, 14 de maio de 2010. Seguindo coas actividades dirixidas ás mulleres rianxeiras que se están realizando durante este ano, o vindeiro mes de xuño vanse desenvolver diferentes obradoiros. Todos eles terán unha duración de 10 horas, en horario de 10:00 a 12:30h e realizaranse no Centro Sociocultural-Auditorio de luns a xoves. As datas son as seguintes:

* Educación Afectivo Sexual dende o luns 31 de maio ata o xoves 3 de xuño.
* Mellora Persoal e Expresión dende o luns 7 ata o xoves 10 de xuño.
* Saúde en Rede dende o luns 14 ata o xoves 17 de xuño.
* Habilidades Prelaborais dende o luns 21 ata o xoves 24 de xuño.

Para máis información e inscrición:
Servizos Sociais (crta. de Tanxil, 12)
Tlfn: 981860061
Correo-e: educacionfamiliar@concelloderianxo.es

Participantes: Mulleres maiores de 18 anos.
Prazo de inscrición ata o 28 de maio.
Prazas limitadas segundo orde de inscrición.

Posted via email from Certo.es, o xornal virtual de Barbanza e Noia

Barbanza e Noia: en xuño, xornadas de busca activa de emprego, organizadas pola UPD


Barbanza-Noia, 14 de maio de 2010
. No mes de xuño dará comezo o ciclo de “Xornadas de Busca Activa de Emprego” organizadas pola UPD da Asociación Impulsora do Pacto Territorial de Emprego de Barbanza-Noia en colaboración cos concellos do Pacto e cofinanciadas polo Fondo Social Europeo e a Consellería de Traballo e Benestar.

     A inauguración terá lugar o día 4 de xuño na Aula Multimedia do Concello de Ribeira, coincidindo coa celebración da primeira das xornadas: “Como elaborar o teu curriculum vitae”. Asistirá o presidente do Pacto Territorial de Emprego do Barbanza-Noia e da Asociación Impulsora do Pacto: D. José Luis Torres Colomer, alcalde ribeirense.

     Nesta primeira acción formativa, que terá lugar en horario de mañá, ensinarase ás persoas participantes os aspectos básicos para a elaboración do curriculum vitae, á vez que se lles guiará no proceso de cumprimentación dunha plantilla que lles poida servir como exemplo.

     Aínda que o ciclo se vai abrir en Ribeira, esta mesma xornada realizarase tamén nos outros sete concellos que forman o Pacto, nas datas seguintes:

    * Boiro: 7 de xuño.
    * Lousame: 9 de xuño.
    * A Pobra do Caramiñal: 11 de xuño.
    * Outes: 14 e 15 de xuño.
    * Rianxo: 17 de xuño.
    * Porto do Son: 18 de xuño.
    * Noia: setembro.

O ciclo completarase con outras xornadas, a impartir nos próximos meses (datas por determinar):

  1. “Como afrontar unha entrevista de traballo”
  2. “Pasos para a creación dunha empresa”
  3. “Como darlle forma á túa idea empresarial (Plan de empresa)”
  4. “Xornadas informativas sobre subvencións”.
     Todas as xornadas teñen carácter gratuíto. A xente interesada en anotarse á primeira delas pode facelo no seguinte teléfono: 981 84 18 26, ou a través do correo electrónico: info@updbarbanza-noia.org

Posted via email from Certo.es, o xornal virtual de Barbanza e Noia

Dodro: Deportes organiza unha viaxe á IV Xira Galega de Karting en Santiago o 21 de maio

IV Xira Galega de Karting

O Departamento de Deportes organiza unha viaxe á IV Xira Galega de Karting o videiro 21 de maio. A actividade está dirixida a maiores de 8 anos.

Acudirase á cita de Santiago de Compostela, donde se seguirá o seguinte programa:

-Recepción e presentación do programa en Paddock.

-Entrega de cadernos didácticos de Educación Vial.

-Organización de equipos e mangas.

-Quecemento.

-Carreriras por equipos.

O custo da actividade é de 5 € e o prazo para inscribirse remata o día 20 de maio.

Máis información en http://www.xiragalegakarting.com

Posted via web from Certo.es, o xornal virtual de Barbanza e Noia

Twitter

Related Posts with Thumbnails Banner: Regale selva tropical