Ribeira: a mostra "Narrativas Dixitais" pode verse no auditorio ata o 24 de febreiro

Ribeira, 9 de febreiro de 2011. Baixo o título de “Narrativas Dixitais”, un equipo multidisciplinar de artistas e científicos da Universidade Federal de Bahía (en Salvador, Brasil) e da Universidade da Coruña desenvolveron no transcurso do 2010 dous obradoiros con xóvenes das localidades de Garapúa (Bahía) e Aguiño co propósito de, por medio das novas tecnoloxías, permitir a estas comunidades costeiras narrar aspectos da súa vida e o uso dos seus ecosistemas.

Agora o Auditorio Municipal albergar unha exposición artística na que se mostran os principais resultados obtidos nos devanditos talleres, celebrados nos meses de abril e xullo. Os materiais que se amosan foron producidos colaborativamente por un equipo dunhas 50 persoas. Mediante vídeos, audios, fotografías e mapas, os xóvenes elaboraron as súas narracións acerca dos aspectos ecolóxicos, culturais e socioeconómicos das súas comunidades e o seu territorio.

Esta exposición, que xa estivo no IES Leliadoura e na Confraría de Pescadores de Aguiño, pretende amosar na capital municipal o traballo realizado por estes rapaces e provocar unha reflexión sobre a identidade das comunidades e dos seus habitantes, así como os seus problemas e retos de futuro.

A mostra estará  aberta ata o 24 de febreiro, en horario de luns a venres, de 10 a 14 horas, e martes, mércores e sábados, de 19 a 21 horas.

See and download the full gallery on posterous

Posted via email from Certo.gl, o xornal dixital de Barbanza e Noia