12.9.12

Política: presentan unha batería de propostas ecoloxistas para as eleccións do 21O


Barbanza-Noia, 12 de setembro de 2012. As organizacións ADEGA, Amigos da Terra, CEMMA, FEG e SGHN presentaron hoxe en Ourense pdfUn Programa pola Terra. Este documento recolle as propostas do ecoloxismo galego para que os diferentes partidos e coalicións políticas que concorren á vindeira convocatoria electoral, as integren na súa acción de goberno ou de oposición durante a vindeira lexislatura. A amplitude da crise ambiental global, encabezada polo incuestionábel cambio climático, o esgotamento dos recursos naturais e o incremento das desigualdades sociais, é de tal magnitude que precisa -sinalan os propoñentes- dun cambio radical nas políticas desenvolvidas polas administracións.

ProgramaPT2012PRINCIPIOS BÁSICOS:

a) O actual modelo económico e social é inxusto e insustentábel

Calquera proxecto político responsábel debe supeditar o desenvolvemento económico á capacidade dos ecosistemas para anovar os seus recursos naturais e asimilar os impactos ambientais, amais de acadar a xustiza social. A actual crise económico-financeira precisa dunha resposta ecolóxica e solidaria que inicie a transición cara a un novo modelo que non faga depender o benestar social do consumo desbocado de recursos naturais propios e alleos. Unha resposta produtivista agravará a crise ambiental e non mellorará de forma durábel as condicións de vida da cidadanía. A procura da sustentabilidade a escala galega e global debe estar no centro de toda a acción do Goberno galego, o que nunca ten acontecido até hoxe.

Faise necesaria a implantación de políticas ambientais transversais, para integrar a preocupación polo medio ambiente nas políticas das diferentes consellarías, alén do que é competencia directa da Consellaría de Medio Ambiente.

b) É necesario un compromiso de cambio de dimensións estratéxicas

A problemática ambiental é sistémica, polo que para a resolver de forma satisfactoria no seu conxunto é necesario ir alén da aplicación de simples medidas correctoras e encetar unha profunda mudanza do modelo de produción e consumo. Promover a sustentabilidade ecolóxica é moito máis que crear parques naturais, construír depuradoras ou tratar o lixo. Sen unha firme vontade política de reformular o modelo socioeconómico, calquera política ambiental quedará baleira de contido, sexa cal for o programa que a vertebre.

As políticas da Xunta de Galicia deben ter como obxectivo fundamental, mellorar a vida e o benestar das galegas e os galegos cun menor consumo de enerxía e de materiais, apostando polo decrecemento sustentábel baseado na ecoeficiencia, o aforro e a contención.Consideramos de vital importancia non só o compromiso con estes obxectivos e creación de planos e instrumentos, senón tamén o seu seguimento e control, establecendo indicadores e outros medios de supervisión así como a aplicación de procedementos sancionadores exemplares. A Xunta de Galicia ten unha enorme responsabilidade na crecente deterioración do noso territorio e na elevada pegada ecolóxica do noso país, polo que é urxente que asuma un compromiso consistente coa sustentabilidade, como garantía de futuro e dunha vida mellor para o pobo galego e para o resto dos pobos do mundo, así como para o resto dos seres vivos que comparten connosco o planeta.

c) Participación e transparencia non poden quedar só en verbas

A construción dunha democracia participativa (que non limite a participación nos asuntos públicos ás convocatorias electorais) é un requisito necesario para avanzarmos cara á sustentabilidade ecolóxica e a xustiza social. A participación é un dereito da cidadanía recoñecido na propia Constitución, mais cuxo exercicio vese moi limitado polos poderes públicos, entre eles a Xunta de Galicia. Persisten ademais vicios que degradan gravemente a calidade de vida democrática, como o clientelismo no uso dos fondos públicos, a subordinación a intereses empresariais contrarios ao interese colectivo, a manipulación dos medios de información públicos, a ocultación de información, o baleirado de contido dos limitados mecanismos de participación pública existentes, o abuso da propaganda institucional ou a confusión entre o institucional e o partidario.

En particular, é fundamental mellorar a comunicación e o diálogo entre asociacións e colectivos coa Administración. A transparencia é un deber e como tal, é esixíbel en todos os ámbitos da Administración Pública. Para garantir e facilitar o acceso da sociedade e das ONG á información xerada pola Administración Pública e os procedementos administrativos relacionados con calquera ámbito das actuacións con incidencia medioambiental, débese levar á práctica real a aplicación da transposición do Convenio de Aarhus, particularmente a Lei 27/2006 de acceso á información ambiental.

Por último, diversos documentos relativos ás estratexias de conservación, contemplan o desafío que supón modificar as prácticas sociais para acadar a sustentabilidade e a preservación da biodiversidade. A participación pública da sociedade nos labores de sensibilización social, así como na aplicación das políticas ambientais do Goberno galego, é fundamental para que a sociedade sinta o medio ambiente como algo de seu e non como algo alleo, illado ou diferente de si mesmo. Os colectivos ambientais, como movemento social, somos quen de participar nos diferentes labores de conservación do medio ambiente, através de accións, actuacións de educación ambiental, orientación, voluntariado..., como xeito de canalización da iniciativa cidadá na implicación ambiental.

d) Cumprimento da lexislación ambiental

As administración públicas en xeral e a Xunta de Galicia en particular, deberán ser as primeiras en dar exemplo cumprindo estritamente o espiritu e a letra de toda a lexislación ambiental e garantindo que empresas e cidadáns tamén a cumpran.

Posted via email from Certo.gl, o xornal dixital de Barbanza e Noia

Noia: este sábado, 15 de setembro, proxección de documentais no Liceo

  • Foron realizados nun curso de documental organizado pola Fundación Otilia Millares que foi coordinado e dirixido polo cineasta noiés Luís Avilés Baquero

Carteles-documental-mov-201

Noia, 12 de setembro de 2012. Este sábado 15 de setembro a partires das 21:00h no salón de actos da Sociedade Liceo terá lugar a presentación e proxección dos traballos documentais feitos polos participantes no "Curso de documental" organizado pola Fundación Otilia Millares e dirixido e coordinado polo cineasta noiés Luis Avilés Baquero.

Pode que tamén lle interese:


Posted via email from Certo.gl, o xornal dixital de Barbanza e Noia

Noia: o Concello adica 39.000 euros a aforro enerxético na zona de Barro

  • Así o anunciou a concelleira de Comercio, Industria e Turismo, Mónica González Eiras
  • As obras comezarán xa este mes e rematarán antes de fin de ano

Media_httpfarm6static_ebvmn

Capela de San Antón, na parroquia de Santa Cristina de Barro, restaurada en 2010

Noia, 12 de setembro de 2012. O programa “Noia, un compromiso coa sostibilidade” ten un investimento de 39.676,32 euros dos que o 80%, 31.741,06 euros, son aportados pola Consellería de Presidencia, Administracións Públicas e Xustiza da Xunta de Galicia, a través do Fondo de Compensación Ambiental.

A actuación contempla a substitución de luminarias tradicionais por luminarias tipo LED, na estrada municipal de Barro ata Punta Abruiñeiras.

A concelleira Mónica González considera que na zona de actuación poderase reducir o consumo eléctrico ata un 60%. "Nestes momentos o gran consumo eléctrico así como o incremento das tarifas eléctricas está supoñendo un dos principais custes das administracións locais", asegurou.

Charlas informativas en centros educativos sobre consumo eléctrico sostible

As obras comezarán antes de final de mes e estarán rematadas en dous meses. A actuación compleméntase con charlas formativas sobre aforro enerxético en centros educativos, para concienciar sobre a necesidade dun consumo eléctrico sostible.

González Eiras argumentou que o concello irá "na medida das súas posibilidades económicas substituíndo luminarias para ir introducindo a tecnoloxía LED. Ademais, no novo alumeado que se instale xa se implantarán sempre luminarias de baixo consumo", finalizou.

Esta actuación vén completar outras xa feitas na zona de Labarta, Bergondo e San Lázaro.

Pode que tamén lle interese:



Posted via email from Certo.gl, o xornal dixital de Barbanza e Noia

Rianxo: en marcha a campaña "Móllate polo galego", para darlle "Vitaminas ao galego"

Cimg8488

Rianxo, 12 de setembro de 2012. Esta mañá, no salón de plenos do Concello de Rianxo, tivo lugar a presentación da campaña de sensibilización sobre o idioma galego "Móllate polo galego", patrocinada polo Concello de Rianxo e organizada pola plataforma de medios de comunicación "Vitaminas para o galego". Na presentación estivo o alcalde de Rianxo, Adolfo Muíños; o músico ribeirense Tonhito de Poi e o xornalista Pablo do Paso, do xornal Certo.

Segundo explicou o alcalde rianxeiro, "este concello sempre ten no bico o idioma galego e é un pracer para nós colaborar con esta campaña de concienciación que fan os medios en galego, precisamente aqueles que traballan sen subvencións e sen grandes convenios e seguen apostando pola lingua".

Tonhito de Poi: "somos o que falamos"

O integrante de Herdeiros da Crus, Tonhito de Poi, resaltou na súa intervención a importancia da lingua nai, que salientou cun par de anécdotas chamativas. Nunha ocasión, nunha viaxe en New York, nun curso que tomou, logo de intervir nunha clase, un norteamericano dirixiuse a el e preguntoulle "de onde era, porque a miña voz soáballe a terra e a mar. E expliqueillo e entendeuno, e non coñecía de nada Galicia", explicou este artista de Ribeira, que tamén está agora a aprender a plantar na horta e súa tía, o outro día, ao coller un anaco de terra coa man dixo algo que lle chamou a atención: "Esta terra ten nai. En lugar de dicir que era unha terra co ph axeitado, para plantar, dixo iso tan fermoso e tan claro en galego". Tonhito de Poi ten claro que "se somos galegos é polo idioma, e se somos así de fermosos, é porque o idioma nos fai así, somos o que falamos". Tamén salientou que, a nivel profesional, iso de falar en castelán ou en inglés non é necesario para trunfar: "onde eu me movo, na música, a linguaxe dos deuses, inda menos. 

Cimg8498

A seguir, o xornalista boirense Pablo do Paso, de Certo, explicou as características técnicas da campaña. Trátase dunha campaña de concienciación dirixida fundamentalmente á mocidade, pero interrumpiuno Tonhito de Poi para sinalar que "hai miniños de 99 anos", polo que só se vai pedir aos que queiran participar nela que envíen a foto máis orixinal que se lle ocorra co lema da campaña "Móllate polo galego" (e derivados: "eu móllome polo galego", por exemplo) ao correo electrónico mollate@vitaminasparaogalego.gl, o cal redireccionará esa foto a un muro de Facebook da campaña e a un blog. Alí os usuarios poderán votar pola foto máis orixinal inda que a decisión final para outorgar os premios será do xurado composto por integrantes de Vitaminas para o galego.

Premios

O primeiro premio será unha noite de aloxamento na casa rural A Pousadoira, de Callobre, en Miño (A Coruña) -www.pousadoira.com- a convir no mes de outubro cos que rexentan este establecemento que tamén se molla polo galego.

O segundo premio é dun centro de ensino e academia de informática de Rianxo, Informática Castelao, que doa un tablet para mollarse polo galego.

O terceiro premio é unha sorpresa que se dará a coñecer o sábado 22 de setembro, no reparto de camisolas na praia de Tanxil a partir das 16:30.

Tipo de fotos

Premiarase a orixinalidade da imaxe -que se pode facer con calquera tipo de cámara, só ten que ser enviada en soporte dixital ao correo citado- e o esforzo ou risco que a autora ou autor da mesma empreguen. Trátase de alcanzar a maior "viralidade" posible na Rede, polo que, entre outras ideas, lánzase a de poñerlle a camisola co lema da campaña a alguén famoso que se implique co idioma, ou facer o lema para a imaxe con materiais orixinais e que teñan que ver coa auga e as molladuras.

QUE É VITAMINAS PARA O GALEGO?
O idioma galego necesita vitaminas. A lingua galega precisa de axudas. Entre os apoios fundamentais figuran os medios de comunicación que empregan, prestixian e difunden o xeito de falar dos habitantes do Noroeste da Península Ibérica. A pluralidade de linguas é unha riqueza cultural que a humanidade debe protexer e cultivar. Para espallar esta idea xorde o proxecto "Vitaminas para o galego", impulsado por medios en galego.

QUEN IMPULSA VITAMINAS?
A plataforma Vitaminas para o Galego está artellada polos medios de comunicación: Galicia ConfidencialTempos NovosRadiofusiónPraza PúblicaNovas da GalizaVal Miñor.info e Quepasanacosta

Medios colaboradores: Certo xornal dixital de Barbanza e Noia, Osil.info de Valdeorras,  Crónica3 da Mariña Lucense, Radio Nordés (Cadena Ser Costa da Morte), Terra Chá.Xa, Crónicas da Comarca (Arzúa – Melide), a revista de surf SurfGZCadernos de Comunicación e Análise; O periódico de Lalín e Comarca; Hermes e Atenea, xornal en galego de deporte e cultura; Disquecool, o medio de tendencias made in Galicia; O xornal De Luns a VenresCabozo, a rede social galega; a rede de blogues Vencello; Cartafol, a revista multimedia para Ipad; A Nova Peneira ,o programa radiofónico Plástico Elástico Revista Kubus, Compas da Costa, Ábrete de Orellas, Televinte Chantada e Fervenzas Literarias.

 

 

Posted via email from Certo.gl, o xornal dixital de Barbanza e Noia

Twitter

Related Posts with Thumbnails Banner: Regale selva tropical