14.2.12

Boiro: o Concello participa nun plan piloto que lle acordou agora a Economía e Industria para aforrar en iluminación pública só en concellos gobernados polo PP

  • O Instituto Enerxético de Galicia comprobará as vantaxes do uso de tecnoloxía eficiente cun programa experimental que se ensaiará en nove municipios galegos
  • Substituiranse luminarias e equipos por outros máis eficientes, o que permitirá acadar aforros enerxéticos de ata o 60%, repercutindo tamén na factura eléctrica
  • O custo total das actuacións ascende aos 500.000 euros, dos cales o Inega achegará o 40%
  • Todos os concellos beneficiados (será por casualidade) son do PP
Media_httpfarm6static_wyduf

Boiro, 14 de febreiro de 2012.- Logo de sementar Galicia enteira con alumeados máis que cuestionables, para os que ninguén pedía proxecto nin utilidade e en boa parte dos casos tan só se buscaba o voto doado da veciñanza, acórdalle agora á Consellería de Economía e Industria, a través do Instituto Enerxético de Galicia (Inega), un proxecto piloto de tecnoloxía eficiente en iluminación pública que permitirá aos concellos galegos reducir custos enerxéticos e económicos. A través deste programa experimental, que se ensaiará en nove concellos galegos, desenvolveranse diferentes programas de actuación co obxecto de probar o comportamento da tecnoloxía eficiente de aforro enerxético en iluminación pública, permitindo dotar aos municipios dos sistemas más avanzados. Na Coruña foron escollidos Boiro e Boqueixón, ambos con maioría absoluta do PP; en Lugo, Foz -PP en minoría pero gobernando- e Taboada -maioría do PP-; en Pontevedra serán tres concellos, a saber: Nigrán, onde tamén goberna o PP; Moraña, tamén con alcaldesa do PP, e Ribadumia, oh casualidade, tamén con alcaldesa do PP. En Ourense, nin que dicir ten que os concellos beneficiados deste plan aforrista son do PP: Arnoia -cun alcalde do PP que leva 30 anos e tamén é delegado da Xunta en Ourense, Rogelio Martínez, o que foi ver o partido do Madrid mentres a provincia ardía por todos lados en outubro- e Pontedeva.

Aforros de ata o 60% no consumo eléctrico

Este proxecto piloto contempla tres opcións distintas en función dos municipios: a instalación de reactancias electrónicas regulables, a substitución de puntos de luz por outros electrónicos de menor consumo, e a instalación de tecnoloxía LED. O desenvolvemento de cada un deles permitirá acadar aforros enerxéticos que oscilan entre o 30% e o 60%, coa súa correspondente repercusión na factura eléctrica.

O departamento que dirixe Javier Guerra continúa así prestando "unha especial atención ao fomento do aforro e a eficiencia enerxética nos concellos", disque.

Posted via email from Certo.gl, o xornal dixital de Barbanza e Noia

Boiro: ata o 28 de febreiro, "Sen mirar atrás", expo de cómic do V Premio de BD "Castelao"

Sen_mirar_atrs

Boiro, 14 de febreiro de 2012. Dende hoxe e ata o 28 de febreiro, martes (lembremos que 2012 é bisesto e leva febreiro un día máis, 29) pódese ver na casa da cultura boirense a exposición do V Premio de banda deseñada "Castelao". Titúlase "Sen mirar atrás" e é da autoría de Dani Montero.

Media_httpfarm8static_fbjbz

A mostra acaba de estar na casa da cultura noiesa

"Sen mirar atrás" é a primeira obra completa publicada de Dani Montero, natural de Catoira, e con ela conseguiu o premio "Castelao" de Banda Deseñada da Deputación de A Coruña en 2009.


Posted via email from Certo.gl, o xornal dixital de Barbanza e Noia

Muros: o Bng non está disposto a participar nunha "homenaxe ao franquismo"

  • A alcaldesa socialista quere nomear fillos predilectos da vila ao recentemente finado Domingos Dosil, nacionalista, xunto con outros tres alcaldes da época da ditadura
  • A proposta ten que ser aprobada polos dous tercios da corporación para saír adiante, polo que dependerá do PSOE e PP.

Media_httpfarm6static_lqnqh

Caridad González non é a primeira vez que as ten tesas cos do Bng pola memoria histórica. Véxase esta información

Muros, 14 de febreiro de 2012. O proceso só está iniciado, agora hai que constituir unha comisión que emitirá ditame e se este é favorable a proposta irá a pleno onde terá que recibir os votos favorables dos dous tercios da corporación como mínimo.

"Os nacionalistas non imos consentir tratar conxuntamente aos catro alcaldes, pois consideramos que a proposta feita pola alcaldesa socialista Caridad González para declarar fillos predilectos da vila de Muros aos alcaldes da vila durante a etapa franquista está totalmente fóra de lugar e ten como único propósito diluir e empañar a figura de Domigos Dosil", explican hoxe en nota de prensa dende a formación recentemente escindida. O Bng de Muros votará en contra da proposta da alcaldía tanto no seo da comisión como no pleno posterior se ha lugar.

Que se pronuncie a "familia socialista"

Os nacionalistas de Muros cuestiónanse: "Se a intención da alcaldesa é proclamar fillos predilectos da vila a todos os alcaldes de Muros, por que se limita aos tres da época franquista se anteriormente houbo outros alcaldes? Está claro que isto non é máis que unha homenaxe ao réxime franquista feito por unha alcaldesa socialista, algo que probablemente vulnera a lei da memoria histórica e sobre o que a “familia socialista” debería pronunciarse".

Posted via email from Certo.gl, o xornal dixital de Barbanza e Noia

Ribeira: actualizarán o inventario municipal en Monte Couso para clarexar titularidades en dúbida

  • O equipo de goberno tamén acordou facer unha normativa para matrimonios civís: casarán de balde de luns a venres e cunha taxa de 100 euros os sábados

Media_httpfarm8static_larbs

Ribeira, 14 de febreiro de 2012.- O Concello ten previsto activar as medidas oportunas con vistas a clarexar a situación xurídico-patrimonial da área de Couso -monte situado ao extremo sur do Parque Natural Complexo Dunar de Corrubedo e Lagoas de Carregal e Vixán-, ao obxecto de continuar cos traballos de actualización do Inventario Municipal de Bens. Así o decidiu o Equipo de Goberno Municipal na súa reunión semanal dos martes. 

A este respecto, cómpre salientar que nos últimos tempos vense observando unha proliferación de incidentes de titularidade na área de Couso, no sentido de que se está a detectar unha incipiente división do monte con estacas e fíos e, incluso, con pequenas construcións aparentemente encravadas dentro dos seus límites. 

Hai que recordar que o monte, de 71 hectáreas de superficie, está declarado en case a toda a súa totalidade de utilidade pública (existe a excepción de dous encravados no seu interior que suman entre eles unha hectárea de extensión), o que o fai inalienable, inembargable e imprescriptible.  

Sen embargo, a situación reviste maior complexidade, xa que nos anos 40 do século pasado, parte destes terreos foran cedidos temporalmente a familias do entorno para que puideran facer uso dos mesmos para a produción de bens de alimentación e sustento. 

A intención do Executivo Local é clarificar a situación para impedir que algúns veciño se vexa sorprendido por considerar de titularidade privada un terreo que é municipal, polo que o Goberno considera indispensable proceder ao deslinde e catalogación catastral correcta do monte Couso. A este respecto, acordouse solicitar ao Servizo Provincial de Montes un informe sobre a situación, documentación obrante, planos e ocupación desta zona. 

Matrimonios civís

Outros dos asuntos considerados na reunión de hoxe foi a da elaboración dunha ordenanza que regule a celebración de matrimonios civís: norma que está previsto someter á aprobación inicial no pleno ordinario de febreiro. 

Os interesados deberán acudir á Secretaría de Alcaldía para reservar data e hora do enlace, o que fará por rigoroso orde de solicitude. 

A celebración da voda será gratuíta se se fai de luns a venres, mentres que os sábados, os interesados deberán abonar unha taxa de 100 euros.  

Os contraentes terán reservada praza de aparcamento no entorno da Casa Consistorial e se permitirá tanto a realización de reportaxes fotográficas e enlaces de vídeo como a colocación de adornos florais e outros obxectos habituais neste tipo de eventos. 

Unha vez realizada a cerimonia na Casa do Concello e levantada a correspondente acta, poderá  requirirse a repetición do acto nun lugar externo ao Consistorio, razón pola cal deberá abonarse unha taxa adicional de 100 euros. 

Seguridade e convivencia cidadá

Doutra banda, os membros do Executivo acordaron que, co fin de crear unha ordenanza de seguridade e convivencia cidadá, se tome como documento base a ordenanza do mesmo título aprobado pola Federación Española de Municipios e Provincias. Dito documento será sometido a estudo e revisado a fin de presentar unha proposta adaptada en xunta de portavoces da Corporación, A intención é que no prazo dun mes estea a exposición pública o documento consensuado para recibir as suxestións dos cidadáns. 

Tamén se pretende elaborar outra ordenanza sobre participación cidadá.

Posted via email from Certo.gl, o xornal dixital de Barbanza e Noia

Boiro: este xoves 16 preséntanse os últimos números da Revista Galega de Educación

Image001

Boiro, 14 de febreiro de 2012. A presentación dos números 50 e 51 da Revista Galega de Educación terá lugar o vindeiro xoves, 16 de febreiro, no salón de actos do Centro Social de Boiro, ás sete da tarde.

O 50 é un número especial, no que se celebran os 25 anos de vida desta revista e no que se tratan os diferentes cambios que houbo no eido da Educación baixo o título “25 anos de RGE”. O nº 51 leva o título de “Os xoguetes tradicionais” e, como o seu propio nome indica, achéganos un pouco máis ao noso patrimonio lúdico.


Máis info: www.nova-escola-galega.org








Posted via email from Certo.gl, o xornal dixital de Barbanza e Noia

A Pobra do Caramiñal: Novas Xeracións organizou un concurso de cartas de amor polo San Valentín

Sanvalentin1

A Pobra, 14 de febreiro de 2012. Hoxe, Día dos Namorados, dase por rematado o primeiro certame literario de Cartas de San Valentín que organizou a asociación xuvenil do PP, Novas Xeracións, coa entrega de premios ás tres misivas gañadoras.

Presentáronse 30 cartas, das cales resultaron gañadoras, como primeira, a titulada "La distancia le ganó al amor", cuxo autor recibirá unha estancia dunha noite nunha casa de turismo rural para dúas persoas. A carta co título "Hay personas en tu vida" levou o segundo premio, cunha caixa de bombóns de agasallo xunto cunha botella de cava, e o terceiro posto foi para "Los latidos de mi corazón", que recibiu como galardón un arranxo floral. Non sabemos se por timidez, vergoña ou simple discreción, ningún dos gañadores quixo facer público o seu nome nin saír nas fotos da entrega de premios.

O presidente de Novas Xeracións da Pobra, Eloy Sobrido, amosouse "feliz por la acogida que obtuvo el concurso tanto entre los jóvenes de Puebla (sic) como de otros sitios del mapa español" e agradeceu a todos os que participaron nesta actividade a súa implicación. O colectivo xuvenil conservador di que non só poden facer actividades de carácter social e de ocio ou deportivas como ata agora, senón tamén de tipo lúdico cultural.

Sobrido rematou a entrega de premios coa mensaxe de que "seguiremos trabajando para promover actividades que enriquezcan valores saludables entre la juventud, y ayudando a los que más lo necesitan". Animan, asemade, a participar nas seguintes actividades, que NN.XX. organizará antes da tempada estival.




Posted via email from Certo.gl, o xornal dixital de Barbanza e Noia

A Pobra: o último libro de Antón Riveiro preséntase o venres 24 no Liceo Pueblense

Media_httpfarm5static_jesgl

O Liceo Pueblense está na estrada principal da Pobra, fronte á alameda

A Pobra, 14 de febreiro de 2012. Barbantia, asociación cultural que da que foi fundador Antón Riveiro Coello, organiza no Liceo Pueblense xunto coa Editorial Galaxia e un xornal a presentación do último libro do escritor afincado en Barbanza, "Laura no deserto".

A actividade literaria terá lugar o vindeiro venres 24 de febreiro, ás 20:30 h, no salón de actos do Liceo d’A Pobra do Caramiñal (Rúa da Paz, 27). Participan Víctor F. Freixanes, director xeral de Galaxia; Xesús Laíño, presidente de Barbantia; Jorge Abal Caamaño, presidente do Liceo Pueblense; e o autor da novela e directivo de Barbantia, Antón Riveiro Coello.

Quere ler unha reseña desta novela?

Media_httpgaliciaconf_aluzd

Xosé Manuel Eyré fíxoa para Galicia Confidencial, aquí

Pode que tamén lle interese:


Entroido 2012: programación prevista


Viaxe: a Madrid, do 22 ao 25 de marzo. Anótate!


Asturianos pola Pobra: visitando o Museo de Valle


Política: instan a que se dean de alta no padrón

Posted via email from Certo.gl, o xornal dixital de Barbanza e Noia

Ribeira: nova aula multimedia nos baixos da escola infantil, lista para xuño

  • O secretario xeral de Medios, Alfonso Cabaleiro, visitou acompañado do alcalde, Manuel Ruíz Rivas, o local na que se ubicará

  • Investiranse 90.000 euros e dDisporá de material informático con 13 ordenadores e unha impresora láser, equipo profesional de videoconferencia, material audiovisual, pantallas de proxección e plasma, sistemas de control para modificar o escenario, panel de conexión de prensa e, como mobiliario, 12 mesas e 24 cadeiras

Media_httpfarm8static_mfrsy

Cabaleiro, co alcalde de Boiro na recente reapertura da aula Cemit daquel municipio

Ribeira, 14 de febreiro de 2012.- O secretario xeral de Medios, Alfonso Cabaleiro, visitou hoxe en Ribeira o local no que se ubicará a nova aula da Rede de Centros para a Modernización e a Inclusión tecnolóxica, CeMit, da localidade. A Xunta de Galicia investirá 90.000 euros neste centro que ocupará un espazo de 80 metros cadrados nos baixos da escola infantil da rúa Cubeliños e que estará aberto ao público no mes de xuño.

A nova instalación contará cun espazo duns 80 metros cadrados dos que a aula ocupará 75, e disporá dunha sala de telecomunicacións e un almacén. A aula estará acondicionada acusticamente e disporá de material informático con 13 ordenadores e unha impresora láser, equipo profesional de videoconferencia, material audiovisual, pantallas de proxección e plasma, sistemas de control para modificar o escenario, panel de conexión de prensa e, como mobiliario, 12 mesas e 24 cadeiras.

Esta nova aula CeMit estará conectada á Rede Corporativa da Xunta de Galicia o que lle permitirá beneficiarse de todos los eventos formativos e divulgativos que se realicen en calquera dos 98 centros que integran a Rede. A nova aula de Ribeira participará, ademais, no programa de dinamización que a Xunta ofrecerá a partir do mes de marzo.

Aula desde 2002 na Confraría de Pescadores
O Concello de Ribeira conta cunha aula da Rede CeMit desde o ano 2002. Está situada na Confraría de Pescadores, conta cun axente de dinamización TIC e está dotada de 12 ordenadores conectados a internet a través da Rede corporativa da Xunta. Esta aula é unha das máis dinámicas da Rede xa que leva realizadas máis de 154 horas de alfabetización dixital desde que foi contratado o axente TIC, o ano pasado.

Posted via email from Certo.gl, o xornal dixital de Barbanza e Noia

Twitter

Related Posts with Thumbnails Banner: Regale selva tropical