Noia: o Concello pide colaboración cidadá na web municipal, que comezou a funcionar en probas

Noia, 20 de maio de 2011. Xa funciona a web municipal do Concello de Noia case a pleno rendemento. Antes só estaba activo o "Perfil do contratante" pero agora está toda a interfaz en marcha. O alcalde de Noia, Rafael García Guerrero, pediu a través de Facebook colaboración cidadá para corrixila, mellorala e completala. Unha petición que tamén realiza dende a propia web, no apartado "Saúda do alcalde":

"Agradeceremos todas as suxerencias que se fagan para completala, pois unha web, igual que a realidade, é sempre algo en permanente mellora e construción. Buscaremos dende o Concello ser o máis interactivos posibles e dar resposta ás necesidades informativas da veciñanza e de todos aqueles que nos escollan como destino da súa viaxe. Temos ante nós un novo e apaixoante reto: modernizar a administración municipal e conseguir unha democracia máis participativa e directa. Iso só será posible coa túa colaboración, a cal agradezo dende agora", explica.

E a colaboración, coa instantaneidade que ofrece Facebook, non se fixo agardar. Aos poucos segundos chegou a primeira crítica -constructiva iso si- sobre a web: "Muy buen diseño. Cero en usabilidad". Dende A Subela xa pediron que se complete o listado de asociacións: "Non está mal, quizáis poderiades engadir en cultura asociacións que hai en Noia, coma o Liceo, Mar de Noia, Amas de casa". Un usuario de Iphone advirte: "Miraa nun ipod/iphone/ipad. Vaise todo ó c***llo", ao que o alcalde resposta: "Ben, ben diso se trata de rebentala, e detectar todos os erros. Nunha semana a versión definitiva".
Á lista de recomendacións para mellorala súmanse todas estas: mellorar os menús, engadir unha sección de anuncios onde se dea conta de actos, actividades, cursos e demais; corrixir a ligazón dos trámites para descargalos; facer unha sección con noieses destacados; incluír algunha farmacia que falta e poñer as de garda e colgar todas as ordenanzas para non ter que ir ao Concello a pedilas. Para ser o primeiro día en funcionamento, non está nada mal. Outra cousa non sabemos, pero apatía aos internautas noieses non se lles pode achacar.

Web de referencia
http://www.noia.es

Posted via email from Certo.gl, o xornal dixital de Barbanza e Noia

Boiro: a campaña xudicialízase, igual que en Noia

En Noia foi Marisol Villar (na imaxe), do N.O.I.A. quen denunciou ao alcaldable do PP

Boiro, 20 de maio de 2011. Estes días en Noia, hoxe en Boiro. E o protagonista denunciado, o mesmo partido: o PP. En ambos casos polo mesmo: difamación ou calumnias. Mentres en Noia o partido secesionado do PP, N.O.I.A, presentou unha denuncia contra Antonio Ínsua, o candidato á alcaldía polos Populares, por dicir que xa pactara o Psoe con eles para gobernar se acadaban apoios abondo, agora en Boiro a denuncia parte do Psoe polos pasquíns que estes días repartiron achegados do PP para poñelos, como vulgarmente se di, "podres". No ollo do furacán, como promotor dos pasquíns, o empresario mecenas da web da Catedral de Santiago, conserveiro e ex-alcalde conservador el.

A denuncia presentada polo Psoe de Boiro pódena ler adxunta a esta información. O que solicitan no apartado B é tontería: os pasquíns xa circulan por Internet á velocidade de adsl e máis aló, mesmo no noso muro de Facebook colgaron algún. Os autores destas conductas fannas a sabendas de que a Lei Electoral actual (a reformada e a antiga) dá a risa en canto a sancións, como xa dixemos en precampaña. Será porque a fixeron os mesmos partidos que se están a denunciar entre eles?

Posted via email from Certo.gl, o xornal dixital de Barbanza e Noia

Porto do Son: o muro da desfeita urbanística na Arnela, de novo enlixado por todos os partidos

O muro na actualidade, por Paco do Martelo

Porto do Son, 20 de maio de 2011. "Pouco dura a alegría na casa do pobre", laiábase onte Paco do Martelo no seu Facebook ao tempo que colgaba a imaxe que ven enriba. Este muro de Porto do Son, un dos máis "visibles" para calquera que circula pola estrada en dirección a Noia, xa fora obxecto de polémica entre todos os partidos no pasado. Foi empregado para colgar todo tipo de mensaxes, pero a súa estética cada vez desentoaba máis.

Tanto foi así que no blog Fonforrón, un día que viron que retiraban o cartel da desfeita urbanística, pensaron que se ía adecentar ao dereito e, nós, que somos botados para adiante cando nos peta, propuxémoslle a Paco do Martelo que fixera unha enquisa para propoñer ideas para ese muro, proposta que poden ver aínda aquí.

Imaxe do blog http://fonforron.blogspot.com

Imaxe de Paco do Martelo

A enquisa foi respostada por algúns internautas e quedou así. Pero nin se fixo mural (opción que gañou a enquisa), nin se pintou de todo -a pintura plástica blanca costa moito!-, nin se encintou. Tanto Paco do Martelo como o autor do blog Fonforrón como os de Certo nos precipitamos: nin voltou o sentido común, nin sacaron o muro da vergoña nin nada. Aos políticos de Porto do Son impórtalles ben pouco a imaxe que da o seu pobo.

Pode que dentro dun tempo haxa novos políticos neste concello e vexan os anos luz que nos levan, por exemplo, os veciños de Loulé, no Algarve portugués:

Posted via email from Certo.gl, o xornal dixital de Barbanza e Noia