26.3.12

Boiro: o Día da República, 14 de abril, haberá un curso sobre Historia do Indepentismo Galego en Aturuxo!

Boiro_cartaz_curso_historia


Boiro, 26 de marzo de 2012. Coa colaboración da 
Escola Popular Galega, a asociación xuvenil boirense Aturuxo! adicará a tarde do sábado 14 de abril -día en que foi proclamada a II República en 1931- a estudar a historia do independentismo galego. A área de historia da EPG prepara un pequeno seminario que repasará os feitos e procesos mais relevantes da historia do independentismo galego, destacando datos e feitos que por circunstancias diversas estiveron ocultas para o propio movemento, nalgúns casos, e para a opinión pública en xeral.

O curso comezará ás 17:30 da tarde no local social, e será ministrada por un membro da Escola, que disponibilizará os materiais elaborados sobre este tema. Para anotarse enviar correo electrónico a localsocialbarbanza@gmail.com ou no local social Aturuxo (r/principal nº118).




Posted via email from Certo.gl, o xornal dixital de Barbanza e Noia

Muros: o Psoe comeza a tomarse en serio a posible moción de censura

  • O secretario de Organización do Psoe galego, Pablo García, declarou hoxe que farán "todos os esforzos que sexan necesarios para manter un goberno de progreso en Muros”

  • Nin chisca de autocrítica da alcaldesa Caridade González nin do Psoe na súa nota de prensa



Pablo García, en imaxe do Psoe na súa páxina web

Muros, 26 de marzo de 2012. Parece que os socialistas, xa a nivel galego, están a verlle as orellas ao lobo dunha posible moción de censura á actual alcaldesa socialista, Caridade González. O responsable de Organización do Psoe a nivel Galicia, Pablo García, declarou hoxe que “é necesario garantir a gobernabilidade de Muros e por iso os socialistas comprometémonos a, dunha vez por todas, poñerlle fin aos problemas que xurdiron co BNG e esperamos obter da formación nacionalista o mesmo grao de compromiso”.

García lembrou que “é imprescindible que as dúas formacións políticas nos poñamos de acordo para manter un goberno elixido lexitimamente na urnas” e lembrou que “nas pasadas eleccións municipais, celebradas en maio de 2011 o Partido Socialista foi o partido máis votado en Muros con 2282 e seis concelleiros”. Neste senso, o responsable de Organización do PSdeG reiterou que “os veciños de Muros nas últimas eleccións municipais apostaron claramente por un goberno socialista” .

Por isto, o secretario de Organización reiterou “a necesidade de solucionar as diferenzas que existen entre ambas formacións políticas para garantir que Muros e os seus veciños teñan un goberno estable e resolutivo”. En ningún momento fixo autocrítica polas últimas afrentas feitas ao Bng, como querer nomear fillo predilecto de Muros ao recentemente falecido Domingos Dosil xunto con tres alcaldes franquistas, así como outras diferenzas, debidas sobre todo ao xeito unipersoal de gobernar da alcaldesa socialista actual.

Antes, en Certo:


Política: o Bng rexeita que se faga fillos predilectos a tres alcaldes franquistas

Posted via email from Certo.gl, o xornal dixital de Barbanza e Noia

Boiro: o recital Leñaverde é este xoves 29 de marzo, o día da Folga Xeral

Ribeira: renovarán servizos e axeitarán un espazo público na rúa Romero Ortiz

Zona_actuacin_romero_ortiz

  •  Unha rampa mellorará a accesibilidade na zona
  • 40.000 euros para saneamento, liña de pluviais e acometidas domiciliarias de auga, así como pavimentación

 


 

Ribeira, 26 de marzo de 2012.- O Concello informa da adxudicación dunha actuación dirixida á renovación os servizos e á adecuación dun espazo público situado na rúa Romero Ortiz, moi preto da céntrica praza de Compostela, en Santa Uxía.

 

Cun investimento de 39.008 euros, as obras van ser acometidas pola empresa Andrés Paz Dios.

 

Segundo o proxecto elaborado por técnicos municipais do Concello, o que se pretende coa actuación e renovar a antiga rede de saneamento existente (colocándose unha tubaxe de 35 metros de PVC compacto), instalar unha liña de pluviais (40 metros de tubaxe de PVC corrugado) e renovar as acometidas domiciliarias de auga potable.

 

Pavimentación

Ademais, pavimentarase a zona de actuación empregando lousas de granito sobre soleira de formigón. A tal efecto, eliminaranse a maior parte das escaleiras existentes, deixando unicamente un tramo de dous metros de ancho nun dos extremos e construíndo unha rampa que mellora á accesibilidade dos edificios do entorno.

 

Esta actuación corre a cargo do canon de saneamento derivado da adxudicación do servizo de augas.



Posted via email from Certo.gl, o xornal dixital de Barbanza e Noia

Natureza: a Xunta ignora á escribenta das canaveiras que aniña en Dodro como especie en perigo

  • Deberían estar na ampliación da Rede Natura, como especie en perigo de extinción, denuncia Adega
  • Os ecoloxistas galegos cren que ten que ver co megaproxecto de paseo, párking e praia fluvial alí previsto, xa aprobado en tempos do Bipartito


26 de marzo de 2012. Cinco anos despois de ter aprobado o CGEA (Catálogo Galego de Especies Ameazadas) a práctica totalidade da nosa flora e fauna máis fráxil segue sen protección efectiva, denuncia Adega hoxe. Os primeiros 3 planos de recuperación/conservación destas especies (das 200 ameazadas) acaban de ser presentados pola Xunta, logo de que en 2007 licitaranse e elaboráranse varias ducias. "Por iso non deixa de resultar patético que agora que a administración pretende aprobar medidas para recuperar unha especie en perigo de extinción, a escribenta das canaveiras, grande parte do hábitat onde aniña o 3% da poboación mundial desta especie (as brañas de Laíño, en Dodro), quede fóra da ampliación da Rede Natura 2000 do PP. Terá algo que ver o megaproxecto de paseo fluvial, praia e urbanización da contorna presentado por Costas en 2010?", pregúntanse os ecoloxistas galegos.

As agresións perpetradas pola Xunta contra as especies ameazadas e en perigo de extinción non rematan aquí. Tamén a respeito da escribenta das canaveiras (Emberiza schoeniclus subsp. lusitanica), a administración autorizou rozas sistemáticas dos carrizais e matogueiras na contorna da lagoa da Frouxeira, en Valdoviño, outro dos hábitats nos que aniña esta especie en perigo de extinción. Deste xeito, e á marxe das chafalladas e despropósitos perpetrados pola Xunta neste espazo, denunciadas por ADEGA perante a Fiscalía, o organismo Ramsar e a Comisión Europea e obxecto de investigación por parte do Xulgado de Ferrol, a Xunta cometeu un delicto ecolóxico ao permitir estas rozas que alteraron gravemente o hábitat dunha especie protexida (art. 10.1.b do CGEA).

A Xunta evitou tamén respostar a denuncia de ADEGA sobre a aplicación ilegal de "instrucións técnicas" para o manexo de determinados hábitats especies protexidas. Estes protocolos que están a ser aplicados por parte dos servizos de conservación da Coruña, autorizan actividades que comprometen a conservación de valiosos elementos da nosa biodiversidade e non foron publicados en ningún boletín oficial, carecendo porén de validez legal, segundo explican na súa web os de Adega.

"Esta é a realidade da política de conservación da Xunta: especies ameazadas e en perigo de extinción ao chou; permisividade e despropósitos continuos con actuacións que mesmo conculcan a legalidade; opacidade na xestión e como colofón, ridículo ao presentar un plano de recuperación que pon en evidencia a miserábel ampliación da RN 2000 que propón o PP", rematan, con mordacidade, os ecoloxistas.

Antes, en Certo:




Posted via email from Certo.gl, o xornal dixital de Barbanza e Noia

Ribeira: pasa a información pública o estudo de impacto ambiental da depuradora

  • Augas de Galicia incide na necesidade de realizar un mellor mantemento da rede e investir nunha nova depuradora así como a reparación do actual emisario de Touro e a separación do caudal industrial do polígono de Xarás
  • Na actualidade o bombeo industrial está rematado, a reparación do emisario de Touro está próxima a ser adxudicada e o estudo de alternativas da EDAR está pasando a tramitación ambiental e prevese licitar neste ano
  • A nova depuradora dará servizo a unha poboación aproximada de 36.000 habitantes, tratando as residuais de Ribeira, Aguiño, Ameixida, Revolta e Castiñeiras, utilizando unha avanzada e eficaz tecnoloxía
  • A Xunta está a executar colectores Xerais e EDAR de Corrubedo cun investimento de máis de 5 millóns de euros

Ribeira, 26 de marzo de 2012.- A Consellería de Medio Ambiente, Territorio e Infraestruturas publica hoxe no Diario Oficial de Galicia (DOG) a resolución pola que se somete a información pública o estudo de impacto ambiental do anteproxecto de construción da estación depuradora de Ribeira. Como reiteramos noutras noticias semellantes, é ben pouco ético que a mesma consellería que fai unha obra -Infraestruturas- informe sobre o seu impacto ambiental -Medio Ambiente-, por moito que lle pida os estudos a consultoras, en teoría, "independentes".

Augas de Galicia considerou necesario definir unha actuación integral que tivese en conta o funcionamento actual e futuro das redes existentes e os procesos de depuración, así como a súa influencia na ría de Arousa. Para esta tarefa priorizouse, dentro do “Plan Sectorial de Saneamento Local da Ría de Arousa”, a redacción da planificación correspondente ao concello de Ribeira que se presentou en setembro do ano pasado. Con este proxecto preténdese resolver a situación de saneamento da costa interior do concello, onde viven cerca de 30.000 persoas, e que presenta grandes deficiencias. Actualmente, as augas residuais dos núcleos de Ribeira, Aguiño, Castiñeira, Ameixida e Revolta, verten na punta de Touro cunha escasa depuración a través dun emisario submarino en mal estado.

As conclusións desta planificación resúmense na necesidade de realizar un mellor mantemento da rede e investir nunha nova estación depuradora así como a reparación do actual emisario de Touro e a separación do caudal industrial do polígono de Xarás.

A execución desta planificación é prioritaria para a Xunta de Galicia polo impacto positivo que terá para a ría e o avance que supón no cumprimento da directiva europea. E por isto que o bombeo industrial, que separa as augas do polígono industrias de Xarás, foi rematado pola Xunta de Galicia xa a finais do ano pasado, a reparación do emisario de Touro está próxima a ser adxudicada (foi licitada en xaneiro de 2012) e o estudo de alternativas da EDAR está pasando a tramitación ambiental e prevese licitar no verán deste ano. En total estas actuacións sumadas aos custos de redacción dos plans e proxectos previos necesarios supoñen un investimento de máis de 23 millóns de euros.

Características técnicas da nova EDAR de Ribeira

A nova estación depuradora de augas residuais de Ribeira dará servizo a unha poboación aproximada de 36.000 habitantes. Deseñarase para tratar un caudal medio de 93 l/s que supón 8.035,20 m3/día e poderá depurar puntas de ata 279 l/s.

A EDAR depurará as augas residuais do núcleo urbano de Ribeira, a poboación de Aguiño e as localidades de Ameixida, Revolta e Castiñeiras, utilizando unha avanzada e eficaz tecnoloxía.

En cada unha das dúas liñas de auga previstas existirán 5 procesos. Nunha primeira estación realizarase o desbaste de grosos mediante tamices autolimpadores de 3 mm de paso. Posteriormente, nun tanque rectangular de 72 m3 de capacidade, con ponte areeiro e barreira de graxas, efectuarase o desareado e desengraxado. Rematado este pretratamento, as augas residuais recibirán o tratamento biolóxico, baseado na tecnoloxía de fangos activos de aireación prolongada para utilizará un tanque de 4.500 m3 de capacidade. Unha posterior decantación secundaria que se realizara nun decantador circular de 25 m de diámetro e 1.644 m3 de capacidade permitirá eliminar os fangos xerados polo proceso biolóxico.

A existencia de dúas liñas de auga garante a depuración en caso de fallo ou parada de mantemento de algunha de elas, xa que serán independentes e funcionarán en paralelo. No caso pouco probable dunha avaría nas dúas liñas de auga ao mesmo tempo, o sistema estará preparado para deter os bombeos que achegan a auga á planta, derivando as residuais cara ao emisario submarino de Touro, que é o utilizado na actualidade.

A planta depuradora incorporará tamén una liña de fangos na que se levarán a cabo os proceso de espesado, nun tanque estático con emparrillado xiratorio e 273 m3 de capacidade, e de deshidratación, en dúas unidades centrífugas cunha capacidade de 10 m3/h cada unha. Finalmente para evitar olores levarase a cabo unha desodorización por medio dun filtro con soporte vexetal que terá unha capacidade de tratamento de 7.500 m3/h.

Actuacións complementarias
A Xunta está levando a cabo, paralelamente as anteriores obras contempladas no “Plan Sectorial de Saneamento Local da Ría de Arousa”, o saneamento e depuración dos núcleos que verten ao mar aberto na zona de Corrubedo. A Consellería de Medio Ambiente, Territorio e Infraestruturas executa alí o proxecto de colectores xerais e EDAR de Corrubedo cun investimento de máis de 5 millóns de euros.

Antes, en Certo:


Saneamento: Sagres, contra a depuradora en Couso

Posted via email from Certo.gl, o xornal dixital de Barbanza e Noia

Dodro: persoas con dependencia e coidadores realizaron unha viaxe á Coruña

Grupo

Dodro, 26 de marzo de 2012. Dentro do programa "Amodiño.Dodro/2012" a Concellería de Servizos Sociais e Igualdade organizou o pasado sábado día 24 unha excursión para as persoas con dependencia de Dodro.

Visitaron o Aquarium Finisterrae na Coruña cun guía do mesmo, aos que hai que agradecerlles a cesión de cadeiras de rodas o que lles fixo máis doada a visita. Disfrutaron da comida nun céntrico restaurante da cidade para posteriormente visitar a Torre de Hércules, o Castelo de San Antón e unha visita no autobús por toda a cidade. Antes de rematar a viaxe visitaron a emblemática Praza de María Pita, onde está a casa do concello coruñés, e descansaron nas terrazas tomando un refresco. Estiveron acompañados por 6 persoas do departamento de Servizos Sociais que en todo momento estiveron prestándolles axuda para facerlles máis fácil a viaxe e os accesos.

O tempo acompañou e aínda que remataron cansados xa preguntaron pola próxima saída. A Concellería de Servizos Sociais de Dodro aposta por este novo programa para que os dependentes "poidan disfrutar de saídas lúdicas ao longo do ano. A próxima prepárase para o mes de xuño cunha saída en barco", explicou Marisol Boga, tenente de alcalde e responsable de Servizos Sociais de Dodro.

 

Un saúdo

Marisol Boga Grela

Concelleira de Servizos Sociais e Igualdade

Concello de Dodro

Posted via email from Certo.gl, o xornal dixital de Barbanza e Noia

Ribeira: a CIG convoca manifestación este xoves 29, día da Folga Xeral, ás 12:45 na Praza do Peixe

  • O secretario xeral da CIG, Suso Seixo, explicou os motivos que levaron á central a convocar manifestacións propias o día da folga

Ribeira, 26 de marzo de 2012. "Dende o primeiro momento en que na CIG decidimos promover a convocatoria de folga xeral en Galiza paro o día 29 de marzo, insistimos en que era importante que houbese unha resposta o máis ampla posíbel da clase traballadora galega, e mesmo das outras nacións do Estado, contra esta reforma laboral tan brutal, e nese sentido manifestamos a nosa disposición a pornos de acordo na data coas outras centrais sindicais, coas nacionalistas por suposto, pero tamén coas españolistas (CCOO-UGT), se finalmente tamén elas decidían convocar a folga. Despois de darlle moitas voltas, agardando a que o Goberno español lles abrise a porta a unha negociación da reforma, como iso non foi posíbel, estas dúas centrais sindicais decidiron convocar a folga xeral no Estado para o propio día 29 de marzo, o cal desde a CIG o valoramos como altamente positivo", explicaron dende a Confederación Intersindical Galega (CIG) esta mañá.

O sindicato ofreceu sete puntos para explicar as razóns de "facer ou non manifestacións conxuntas" o propio día da folga xeral, que son os que seguen:

1º.-  A unidade sindical non depende de ir xuntos ou non ese día na manifestación, nin o éxito da folga tampouco, de feito xa temos a experiencia da folga xeral do 29 de setembro de 2010, no que tamén fixemos manifestacións por separado o propio día e cunha participación de xente realmente importante, das maiores de todo o Estado.

2º.- A unidade sindical contra a reforma imos ter que construíla no día a día, empresa a empresa, convenio a convenio, para evitar que a mesma se aplique e aí imos ver ata onde o sindicalismo españolista, CCOO e UGT, están dispostos a enfrontarse a patronal e a facer corpo coa CIG. Isto foi o que lle propuxemos como CIG, aos secretarios xerais de CCOO e UGT en Galiza, sen que lle conseguísemos sacar compromiso algún, fora de declaracións de boas intencións.

3º.- Hoxe xa temos diferenza a hora de enfrontar esta reforma, eles levan esperando semanas para que o Goberno os chame a negociar a reforma, para dulcificala e intentar facela vendíbel socialmente, ao igual que fixeron coa reforma das pensións, pois ese é o seu modelo sindical e sen ese xogo do diálogo social aparente o seu modelo sindical perde sentido. O noso posicionamento chamando á folga xeral é o de esixir a retirada da reforma, pois é evidente que nin esta nin outra reforma van crear emprego, o único que busca este goberno, ao igual que o anterior coas reformas que fixo, é facilitar o despedimento, desregular o mercado laboral e debilitar e desorganizar á clase traballadora.

4º.- Cómpre non esquecer que estas dúas centrais sindicais veñen, e van seguir si lles deixan, facendo unha política permanente de pactos co poder político e económico, mesmo aquí en Galiza coa Xunta do PP, pactos e acordos que están contribuíndo a recortar dereitos, a rebaixar salarios, a aumentar a idade de xubilación, a abaratar o despedimento, a incrementar os beneficios das empresas vía subvencións con fondos públicos, a flexibilizar as condicións de traballo nas empresas ou a centralizar e burocratizar a negociación colectiva e a desmobilizar á clase traballadora, facilitándolle así ao capital a saída á crise económica.

5º.- Na CIG levamos anos enfrontados a este modelo sindical entreguista e de colaboración co poder, facéndolle ver a clase traballadora galega que nós representamos un modelo sindical distinto, tanto desde o punto de vista de defensa dos intereses de clase como de defensa dos nosos intereses e dereitos como parte que somos da nación galega. Isto foi entendido, e está sendo entendido, por un número cada vez maior de traballadores e traballadoras galegas, e así se pon de manifesto na participación nas nosas mobilizacións e tamén no feito de ser a primeira central sindical de Galiza en afiliación, con 75.000 afiliados/as. Pero todo isto  conseguímolo a base de moito sacrificio, de dar a cara nas empresas por parte dos nosos afiliados e dos nosos delegados e delegadas, de arriscarse mesmo a ser despedidos nos procesos electorais, sufrindo o silenciamento e a manipulación de moitos medios de comunicación, mentres outros, gozaban de todo tipo de facilidades e apoio por parte das administracións públicas e da patronal, sen ruborizarse e sen preocuparse pola CIG.

6º.- Se avaliamos mesmo o que está a ocorrer coa convocatoria de folga xeral, os representantes destas dúas centrais sindicais, de momento, só están facendo a convocatoria da folga a través dos medios de comunicación e en algunha gran empresa, quen realmente está a traballar de forma masiva a convocatoria nos centros de traballo e na rúa, ao igual que sucedeu na folga do 29 de setembro de 2010, somos nós a CIG.

7º.- Non parece pois oportuno que unha vez conseguido o importante, que todos convoquemos a folga xeral o mesmo día, vaimos máis alá aparecendo todos xuntos nunha mesma manifestación, dando imaxe dunha unidade sindical que non é real, na que a CIG imos quedar integrados na imaxe e obxectivos destas dúas centrais sindicais, que van querer quitar rédito sindical, xestionando e utilizando o resultado da folga e das manifestacións para as súas negociacións co Goberno. De feito, as direccións estatais de CCOO e UGT, en ningún momento se dirixiron as outras centrais sindicais máis representativas no Estado, caso da CIG, ELA ou LAB, para falar da contestación á reforma laboral, da convocatoria da folga, de cal ía ser a reivindicación a facer (se retira ou negociación da reforma), de que facer contra a reforma despois da folga xeral, etc. Nós, como central sindical, non podemos aceptar este tipo de actitudes, por unha cuestión de respecto e de dignidade.

8º.- Por último, a unidade sindical, a loita contra a reforma laboral e por outro modelo produtivo e económico, ten que darse nos centros de traballo, nos convenios colectivos, aí e onde imos comprobar ata que punto é posíbel pórse de acordo con estas dúas centrais sindicais a hora de pactar alternativas e enfrontarse á patronal, esa é a verdadeira unidade que lle interesa á clase traballadora e que ata agora, en xeral, non existiu, pois temos prácticas sindicais e visións de como enfrontármonos á crise económica moi diferentes. En calquera caso, o importante nestes momentos, é conseguir que a folga xeral sexa un éxito, que ese día as rúas sexan un clamor popular contra esta reforma laboral e para esixir dos gobernos outras políticas económicas e laborais favorábeis aos intereses da maioría social. Como sempre, nese traballo os da CIG imos estar á cabeza da contestación social, coas nosas propias mensaxes e alternativas, orgullosos do que somos, sen confusións nin ambigüidades.


Horarios das manifestacións que terán lugar nas diferentes cidades e vilas galegas no día da folga xeral, 29 de marzo. A mobilización central será en Vigo e nela participará o secretario xeral da CIG, Suso Seixo.

Ribeira: ás 12.45 horas na Praza do Peixe

Vigo: ás 12.00 horas dende o cruce da Doblada

Lugo: ás 12.30 horas dende o parque de FRIGSA

A Coruña: ás 12.00 horas dende a Praza de Vigo

Vilagarcía: ás 12.00 horas dende a Casa do Mar

Compostela: ás 12.30 horas dende a Praza Roxa

Cee: ás 12.00 horas diante do Concello

Pontevedra: ás 12.00 horas dende a Praza da Ferrería

Foz: ás 19.00 horas na Casa do Concello

Ferrol: ás 13.00 horas dende a Avenida de Esteiro (local da CIG)

Xinzo de Limia: ás 11.30 horas na Praza do Concello

Ourense: ás 12.00 horas desde o pavillón dos Remedios

Verín: ás 11:30 horas na Praza do Concello

Cee: ás 12.00 horas diante do Concello

Posted via email from Certo.gl, o xornal dixital de Barbanza e Noia

Twitter

Related Posts with Thumbnails Banner: Regale selva tropical