Deportes: Ester Navarrete e Alejandro Fernández gañan a XV Carreira Popular de Santa Uxía

• Rubén Caamaño e Isabel Sáez, vencedores do V Circuíto de Carreiras Populares "Concello de Riveira"
• Ramón Ignacio Folgar, Fernando Castro e David Sanisidro, mellores corredores locais
  

Ester Navarrete é do Club Atletismo Feminino Celta

Alex Fernández Rivera é do Ourense Atlético Academia Postal

Ribeira, 16 de setembro de 2012.- Alejandro Fernández Rivera, do Ourense Atl. Academia Postal, e Ester Navarrete Santana, do Club Atletismo Femenino Celta, erixíronse nos gañadores nas categorías masculina e feminina absolutas da décimo quinta edición da Carreira Popular de Santa Uxía, desputada esta mañá nas rúas da cidade de Riveira. Cuns tempos respectivos de 30:06 e 36:10, estes atletas alzáronse igualmente co Campionato Galego de 10.000 Metros en Ruta promovido pola Federación Galega de Atletismo.

En categoría masculina, acadaron o segundo e o terceiro lugar (tanto na carreira pedestre como no campionato autonómico) Manuel Hurtado Sanjurjo (31:21) e Rubén Caamaño Nieto (31:46), mentres que entre as mulleres obtiveron estes postos María Soledad Castro Soliño (38:02) e Isabel Sáez Batallán (39:53).

Polo que respecta á quinta edición do Circuíto de Carreiras Populares Concello de Riveira, Rubén Caamaño Nieto alzouse coa victoria ao obter un rexistro de 1:44:57 entre as catro probas de que constou a acción (ademais da de Santa Uxía, as probas do Corgo, A Guía e San Xián de Artes). Seguírono Ramón Ignacio Folgar (1:49:08) e Ernesto Buceta-Pouso (1:51:18).

Na modalidade feminina, a gañadora do circuíto foi Isabel Sáez Batallán (2:13:11), seguida de María José Chouza Santamaría (2:24:31) e Eva María Martínez Adega (2:38:53).

Tamén cómpre ser destacados os mellores corredores locais, que resultaron ser Ramón Ignacio Folgar, Fernando Castro e David Sanisidro.

Outras categorías

En canto ao resto de categorías, na modalidade junior masculina gañou a carreira popular Marcos Matabuena (40:18); na junior feminina, Sandra Sobreira (51:53); en promesa masculina, Carlos Esquilas (42:23); en senior masculina, Iván Docampo (32:22); en senior feminina, Marinela Mayo (47:27); en veteranos A masculina, José Manuel Fernández (32:48); en veteranas A feminina, Teresa Castro (40:50); en veteranas B masculina, Miguel Fernández (33:19), en veteranas B feminina, Teresa Corral (41:48) e en veteranos C mascuina, José Ramón Mato (38:44).

Todos estes corredores percorreron unha ruta de 10.000 metros, pero tamén houbo outras categorías nas que os participantes máis novos realizaron distancias máis apropiadas ás súas idades. Tal é o caso das modalidades benxamín (onde foron gañadores Pepe García e Clara Casais), alevín (Manuel Bello e Marta Fontao), infantil (Pablo Monteagudo e Lara Domínguez), cadete (Tariku Novales e Laura Rodríguez) e xuvenil (Enrique Martínez e Andrea González).

En total, foron uns 600 os corredores que se deron cita nesta décimo quinta edición da carreira, que estivo organizada polo Concello coa colaboración de Náutica A Poutada, New Balance, Buff, GU Energy Gel, Coca-Cola, Club Atletismo Santa Uxía, Cofradía da Dorna e os organizadores das probas do Corgo, A Guía e San Xián de Artes.

 

Posted via email from Certo.gl, o xornal dixital de Barbanza e Noia

Muros: o finado ex-alcalde nacionalista Domingos Dosil foi homenaxeado

• O portavoz nacional do BNG, Guillerme Vázquez, cualificouno como "bo e xeneroso, con determinación, compromiso e coraxe"

Muros, 16 de setembro de 2012. A Antiga Fábrica de Sal foi o escenario, onte en Muros, dunha cálida e moi concorrida homenaxe á memoria de Domingos Dosil, activista polos dereitos dos minusválidos, alcalde da vila e sobre todo, en verbas dos seus compañeiros de partido, "grande patriota e grande nacionalista galego", tristemente falecido.

Na homenaxe tomou parte o portavoz nacional do BNG, Guillerme Vázquez. Na súa alocución, o líder nacionalista gabou a “determinación, a coraxe e a convicción patrióticas” das que Domingos fixo gala durante toda a súa vida.

“Domingos”, dixo Guillerme, “tiña todo o que ten que ter un nacionalista galego: determinación, compromiso, coraxe”. “Era un home bon, claro que si; era un home xeneroso, por suposto que si”.

Entrega e traballo

O portavoz nacional destacou que a traxectoria vital de Domingos mostra que “a política é unha das actividades máis nobres que pode desenvolver un ser humano”. “Porque a política é iso, entrega e traballo na defensa dos intereses colectivos, traballo para construír unha sociedade e un mundo mellor para todos”, engadiu.

Concluíu Guillerme dicendo que “a mellor homenaxe que lle podemos render a Domingos é traballarmos duro con determinación, entusiasmo e ilusión para que o 21-O o pobo galego diga alto e claro que estamos fartos das políticas de recortes e que queremos outro estatus político para Galiza”.

Posted via email from Certo.gl, o xornal dixital de Barbanza e Noia

Noia: este luns 17 comezan obras de saneamento e subministro de auga en Bergondo

•  A obra ten un orzamento de 304.033,60 € e un prazo de execución de 6 meses
• A obra será realizada directamente polo Concello, o que permitiu a contratación de sete persoas ( un oficial e seis peóns) durante os seis meses do periodo da obra
• Ao remate, asfaltarase a zona e instalaranse pasos de peóns elevados para mellorar a seguridade viaria
  

As obras foran anunciadas o 18 de novembro de 2011

Noia, 16 de setembro de 2012. Estas obras consistirán na renovación de toda a canalización do subministro municipal de auga, eliminando o vello entubado en fibrocemento que está a sufrir continuas crebas, e substituíndoo por 1.944 metros liñais de tubería de auga de PVC. Ademais substituriranse 990 metros liñais de saneamento facendo separativo de fecais e pluviais para unir coa obra que está realizando a Xunta de Galicia pois o actual saneamento presenta numerosas deficiencias, o que está provocando filtracións e danos. Unha vez realizadas as conexións destes servizos básicos procederase ao asfaltado de 6.770 metros cadrados. Tamén está prevista a instalación de pasos de peóns elevados para a mellora da seguridade vial.

 

Tamén se poñerán pasos de peóns elevados, como se fixo na Barquiña

 

Desde o Concello estase coordinando coas empresas de servizo de gas, telefonía e electricidade para na medida do posible repoñer liñas, soterrando onde sexa posible, e aproveitar para que, onde se queiran instalar novas canlizacións destes servizos privados, poder facelo de xeito conxunto.

 

"Para o Concello é urxente a mellora de servizos básicos nesta zona, para corrixir as deficiencias en servizos municipais a unha poboación que medrou moito nos últimos anos, contando na actualidade con máis de 800 habitantes", explican dende fontes municipais.

 

Carencias

 

As principais carencias no barrio de Bergondo son no subministro de auga, xa que é a zona da vila máis afectada (xunto co barrio de Labarta) polos cortes no subministro dun servizo básico como é este vital e líquido elemento. Co cambio de canalización a PVC tamén mellorará a calidade de auga.

 

Asemade, está prevista nesta actuación a conexión da tubería de auga principal desde a Ponte de Noia ata Catro Camiños, onde conectará coa obra de substitución da canalización de auga desde Catro Camiños ao Pereiro e que se rematou hai un par de meses. Deste xeito quedará conectado en tubería de PVC de 16 atm desde a Ponte de Noia ata o depósito que alimenta Boa e Taramancos.

 

A obra está incluída no POS e está financiada polo Concello de Noia e pola Deputación Provincial de A Coruña.

Posted via email from Certo.gl, o xornal dixital de Barbanza e Noia