25.10.11

Ribeira: o Ateneo Valle-Inclán programa unha charla de Axena sobre o roubo de ovos de aves rapaces no Barbanza

Ateneo_alimaeros

Non sabe de que falamos? No blog de Axena explícanllo polo miudiño:

I Roubo de ovos de falcón peregrino

II Roubo de ovos de azor

III Roubo de ovos de gavilán

Será o venres 4 de novembro no Ateneo (enriba do bar Plaza), ás nove da noite. Falarán Xurxo Gago (Palmeira) e Javier Iglesias, ambos de Axena, aos que introducirá Toño Maño, o maior experto en tiburóns de Barbanza.

Se poden, e lles interesa o asunto, non se perdan esta charla. Contaranlles con pelos e sinais como operan estes depredadores bípedos aos que chaman "alimañeros".

Posted via email from Certo.gl, o xornal dixital de Barbanza e Noia

Boiro: este venres 28, tres grupos boirenses en concerto no local de Aturuxo!

Boiro_aturuxo_concerto


Boiro, 25 de outubro de 2011. Este venres, 28 de outubro, a partires das 22 horas celebrarase en ATURUXO un concerto en acústico de tres bandas de Boiro. A idea de realizar este concerto partiu das propias bandas, para apoiar o compromiso que se ten desde ATURUXO coa música galega e co traballo que desenvolve en xeral esta asociación cultural. "Xesto que agradecemos enormemente, polo que o venres agardamos contar cun gran ambiente e asi poder seguir afianzando o noso proxecto, autoxestionando a nosa cultura e o noso lecer, desde unha perspectiva galega e critica", explican os organizadores.

As bandas que se escoitarán o venres son as seguintes:

AGORAPHOBIA
THE FEELING BAND 
THE LITTLE JUMP BAND

E o 5 de novembro:

Posted via email from Certo.gl, o xornal dixital de Barbanza e Noia

Ribeira: o conselleiro de Infraestruturas fai unha visita de precampaña electoral para anunciar investimentos

  • Agustín Hernández aproveitou para presentar o Plan de Saneamento Local de Ribeira, no que se investirán mais de 25 millóns de euros
  • A Xunta non licitará ata 2012 as obras da EDAR de Ribeira, que se instalará no polígono de Couso e que cubrirá, disque, as previsións de crecemento da vila para os vindeiros 25 anos
  • Augas de Galicia porá en servizo ao longo do mes próximo o bombeo industrial de Ribeira, que actualmente está en probas e tamén en novembro (o 20N son as eleccións) comezan as obras da estrada Oleiros-Corrubedo

Ribeira, 25 de outubro de 2011.- O conselleiro de Medio Ambiente, Territorio e Infraestruturas, Agustín Hernández fixo unha visita evidentemente preelectoral esta mañá na que anunciou auténticas chuvias de millóns, non só para Ribeira, senón para toda a bisbarra de Barbanza. Casualmente, varias obras comezan ou póñense a punto no mesmo mes das eleccións xerais do 20 de novembro.

Anunciou esta mañá o conselleiro visitante que Augas de Galicia licitará o vindeiro ano as obras da Estación depuradora de augas residuais (Edar) de Ribeira, que se ubicará no Polígono de Couso. Explicoullo ao alcalde de Ribeira, Manuel Ruíz Rivas, co que mantivo unha reunión na que lle trasladou que a calidade das augas constitúe unha fonda preocupación e unha prioridade para a Xunta de Galicia, tal e como se revlicte nos orzamentos de 2012, e sobre todo -e xa se pon a nota da Xunta en plan poético- "é primordial en lugares como Ribeira, nos que ademais de ser unha fonte de vida e de beleza, é unha fonte de riqueza e de emprego". Un verso solto, un brinde ao sol da Xunta de Galicia, ao que lles gustaría replicar dende a Sociedade Galega de Historia Natural, como publicamos hoxe mesmo aquí.

Destacou Hernández que a Edar de Ribeira é froito "do esforzo do Goberno galego e máis na actual situación de conxuntura orzamentaria". Esta infraestrutura está dimensionada para depurar as augas de 36.000 habitantes, o que cubrirá as previsións de crecemento da vila para os próximos 25 anos. Explicou que, "debido á sensibilidade e á importancia das augas desta zona, esta infraestrutura prevé que, no case imposible caso de fallo da estación, os alivios se produzan de xeito que se preserven tanto os bancos como a área de Corrubedo. Outra das garantías deste proxecto é que se prevé unha técnica específica para a execución do emisario que protexa aos bancos de percebes". Unhas declaracións que se contradín abondo co expresado a semana pasada por Asociacións Protectoras do Medio Ambiente sobre este parque natural.

O conselleiro explicou que tanto a Edar, como os colectores e os tanques de tormenta, licitaranse nun só contrato por un importe global de 22 millóns de euros. Argumentou que no que queda de ano se vai iniciar a tramitación ambiental do proxecto, e a administrativa coa información pública do estudo de viabilidade. Explicou que esta actuación forma parte das accións dos plans de saneamento local que está a elaborar a Administración autonómica, que xustamente comezou na Ría de Arousa. Sobre todo tendo en conta que as augas desta zona nas que só o cultivo do mexillón dá traballo a máis de 5.000 persoas.

Plan de saneamento local
A nova EDAR enmárcase no Plan de Saneamento Local da Ría de Arousa para o concello de Ribeira, que supuxo un investimento de case 600.000 euros. No estudo realizado pola Consellería de Medio Ambiente, ao longo de 2010 e 2011, analizáronse 72 quilómetros de canalizacións, máis de 2.000 pozos e 13 estacións de bombeo, así como os comportamentos da rede en distintas épocas do ano.
“Sen dúbida, un grande esforzo económico e técnico, que pagou a pena, posto que este estudo permite ofrecer a Ribeira solucións robustas, que servirán para mellorar a calidade destas augas e nas que as Administracións traballan en paralelo”, sinalou Hernández. Neste senso, recordou que as decisións da Consellería sobre a nova depuradora respectan o acordo plenario do Concello de Ribeira.

Entre os problemas detectados na rede de saneamento de Ribeira destaca a existencia dun gran número de puntos de vertido, infiltracións de augas limpas e inundacións da rede por auga de mar e mala xestión da auga de choiva e depuración deficiente, ademais de que o emisario de Touro, punto de vertido principal da rede, está moi deteriorado. A actuación mais urxente é necesidade de dotar ao concello dun sistema de depuración eficaz para tratar as augas residuais da zona.

Relacionadas:




Posted via email from Certo.gl, o xornal dixital de Barbanza e Noia

Rianxo: o primeiro concerto do Ciclo de Outono é este domingo 30 de outubro

Ciclo_de_outono_teo

Rianxo, 25 de outubro de 2011. Dende a Escola de Música de Rianxo comprácense en convidar a todo o mundo que desexe asistir ao primeiro concerto do Ciclo de Outono que, dentro das actividades do X Aniversario da Escola de Música de Rianxo, ofrecerá a Banda de Música Cultural de Teo
  • CONCERTO DA BANDA DE MÚSICA CULTURAL DE TEO
  • DÍA: domingo 30 de outubro
  • HORA: 20h30
  • LUGAR: Auditorio de Rianxo
Pode que tamén lle interese:



Rianxo: actividades culturais para estes días revoltos


Expo: Castelao no seu Ceip ata o 6 de novembro

Posted via email from Certo.gl, o xornal dixital de Barbanza e Noia

A Pobra do Caramiñal: María Monsonís e Teo Cardalda interpretan no Teatro Elma este venres 28 "Claves Líricas" en homenaxe a Valle

Media_httpfarm6static_gfbmt

Teo Cardalda, ao móbil, vive agora na Mariña luguesa, logo de exiliarse de Vigo

A Pobra do Caramiñal, 25 de outubro de 2011.- O Salón Teatro de Santiago acolle mañá mércores 26 ás 21.00 horas o primeiro dos tres concertos que compoñen o ciclo Claves Líricas, no que Teo Cardalda e María Monsonís poñen música a 10 poemas de Valle-Inclán, en conmemoración do 75 aniversario do seu pasamento. A entrada para asistir ao espectáculo é gratuíta previa recollida de localidades no despacho de billetes.

Claves Líricas é unha serie de tres concertos que terán lugar nas tres localidades galegas máis vinculadas á vida de Valle-Inclán como son, ademais de Santiago de Compostela, Vilanova de Arousa (xoves 27 no Salón de Actos da Confraría de Pescadores) e A Pobra do Caramiñal (venres 28 no Teatro Elma). O contido dos recitais é un adianto musical da obra teatral que, sobre a figura de Valle Inclán como poeta, prepara Teo Cardalda xunto á directora de escena británica Tamzin Towsend, o dramaturgo Ignacio García May e o actor galego Luis Zahera. O espectáculo, que se chamará Los Siete Pecados de Valle-Inclán, estrearase en Galicia en febreiro de 2012.

Banda de catro músicos
Durante os vindeiros tres días, e como parte do programa de actividades deseñado pola Consellería de Cultura e Turismo para recordar ao autor de Luces de Bohemia con motivo do 75 cabodano da súa morte, preséntanse en concerto parte dos textos musicados coa interpretación a cargo dunha pequena banda de catro músicos, da que forman parte Teo Cardalda (voz, piano e guitarra, percusión e programacións), María Monsonís (voz e percusión), Salva López (baixo e piano) e Yago Moncar (batería, teclados e percusión).

O programa dos concertos presenta un total de dez poemas musicados, en concreto, os titulados Rosa hiperbólica, Los pobres de Dios, Rosa gnóstica, Cantiga de vellas, Rosa vespertina, No digas de dolor, La rosa del reloj, Georgica, Rosa del caminante e Son de muiñeira, nunha escolma realizada por María Monsonís e publicada no libro tamén denominado Claves Líricas.

Esta iniciativa poético-musical de María Monsonís e Teo Cardalda (integrantes do dúo Cómplices) supón un punto e á parte na carreira dun dos grupos máis exitosos da música pop española dos 90. O texto entrelazado entre os poemas, tamén escrito por Cardalda, constitúe unha pequena pero intensa viaxe a través da personalidade rica, ambigua e fascinante do poeta como actor de se mesmo, bohemio, modernista e representante dunha das mellores épocas da poesía española dos séculos XIX e XX.

Posted via email from Certo.gl, o xornal dixital de Barbanza e Noia

Noia: a banda de música de Lousame dá un concerto este domingo 30 de outubro

  • Suporá a presentación do Certame Galego de Bandas de Música, que homenaxea ao noiés Prudencio Romo
  • Terá lugar ás cinco da tarde na Praza do Tapal

O local de ensaio de Noia leva o nome de Prudencio Romo

Noia, 25 de outubro de 2011. Segundo informou hoxe César García, presidente da Banda de Música de Lousame, o vindeiro domingo, 30 de outubro, haberá un concerto na praza do Tapal ás cinco da tarde como presentación do Certame Galego de Bandas de Música, que este ano homenaxea ao fundador dos míticos Los Tamara, o noiés Prudencio Romo.

Primeira vez de Lousame na Sección Terceira (o venres 25 de novembro)

O Certame Galego de Bandas de Música celebra este ano a súa V edición e está  organizado pola Federación Galega de Bandas de música populares e a Consellería de Cultura da Xunta de Galicia. Terá lugar no Auditorio de Galicia de Santiago de Compostela os días 25, 26 e 27 de novembro e a Banda de Lousame participa este ano por vez primeira na sección terceira, que inclúe as bandas con ata 50 músicos federados e que se celebrará o venres 25 de novembro a partir das 8 da tarde.  

No concerto interpretaranse as obras “Monte Medulio” (obra obligada) de Andrés Álvarez e “O demo de Carboeiro” (obra libre) de Manuel Blanco Dosil, que se estrea neste concerto. Tamén participarán a Coral Polifónica de Noia e as voces solistas de Esperanza Filgueira e Fernando Docampo para interpretar varios arranxos de temas de Los Tamara, e así homenaxear a figura de Prudencio Romo.


Posted via email from Certo.gl, o xornal dixital de Barbanza e Noia

Ribeira: peóns quéixanse dos pivotes perigosos nas rúas peoniles do centro

Media_httpfarm3static_ryiwf

Os bolardos da rúa de Galicia xa levan dado máis dun desgusto

Ribeira, 25 de outubro de 2011. Moitos veciños de Ribeira xa levan tropezado neles e sufrido pequenas lesións corporais a consecuencia dos golpes con estes pivotes de metal ou pedra que pretenden impedir o acceso de vehículos ás rúas peoniles ou o aparcamento sobre as beirarrúas. As principais rúas onde adoitan producirse estes accidentes son a de Galicia e a de Santa Uxía. Varios veciños xa reclamaron ao Concello por danos ocasionados en obxectos particulares, unha vez deron co corpo no chan.


Por outra banda, un grupo de persoas invidentes de Ribeira, algúns deles traballadores da Organización Nacional de Cegos Españois, continúan instando á colocación de semáforos sonoros nas estradas locais para facilitar a súa accesibilidade e evitar accidentes.

Pode que tamén lle interese:


Obras: comezaron as de Novoneyra. Romero Ortiz abre por Defuntos


Sanidade: o 27 de outubro, mobilización


Renacer: cea benéfica o 28 de outubro



    

Posted via email from Certo.gl, o xornal dixital de Barbanza e Noia

Ribeira: dous alpinistas locais diríxense á base do Everest en novembro por unha ruta alternativa

  • A expedición terá unha dobre misión, por un lado a aventura, e por outra, a axuda humanitaria
  • Colabora o Concello e varias firmas locais privadas


Ribeira, 25 de outubro de 2011.- Dous membros da Asociación Cultural e Deportiva Sálvora, José Antonio Sobrado Silva e Roi Fontaíña Martínez, afrontarán no mes de novembro unha expedición á cordilleira do Himalaia que ademais da súa vertente aventureira terá tamén un compoñente humanitario, ao doar diverso material escolar a orfanatos da zona. 

Os dous montañeiros déronse cita onte na Casa Consistorial para explicar os detalles da súa expedición, nun acto que contou tamén coa intervención dos concelleiros de Deportes e Turismo, Juan Luis Martínez e Anxo Orellán. A este respecto, cabe dicir que a iniciativa conta coa colaboración do Concello a través das dúas Áreas Municipais referidas e tamén a de Seguridade e Mobilidade Cidadá (esta última encabezada por Víctor Reiriz), que se prestaron a sufragar os gastos de equipamento en roupa e calzado para alta montaña. Tamén colaboran distintas entidades privadas. 

Aventura na base do Everest

A expedición consistirá nunha travesía de alta montaña na que os dous montañeiros, partindo da localidade de Lukla, percorrerán unha ruta “alternativa” que os levará ata a base do “Everest”, dende a que descenderán de regreso a Lukla pola vía tradicional de aproximación ao punto máis elevado do planeta. 

A ruta ascenderá  polo val do “Bothe Koshi” aproveitando as antigas vías que utilizaban as caravanas tibetanas de “Jaks” para atravesar o Himalaia, e que máis recentemente usaron os refuxados tibetanos para escapar da represión china. Ademais, dende a remota rexión fronteiriza co Tibet terán que atravesar dous dos pasos de montaña máis elevados da terra e o glaciar “Drongzba” para chegar ata a base do Everest. Dende alí, descenderán o val do “Dudhi Koshi” para regresar de novo a Lukla. Durante a travesía ascenderán dous picos de máis de 5500 metros. 

Cabe salientar que para chegar de Katmandú a Lukla terán que viaxar en avioneta ata o aeródromo “Tenzing-Hillary” de Lukla, que está considerado coma o máis perigoso do planeta e representa a única conexión posible dun medio de transporte coa rexión do Everest. 

Na travesía percorrerán en torno a 300 kilómetros que realizarán nun tempo de entre 15 e 20 días (dependendo do clima, o terreo, e a adaptación á altitude). A cota mínima ao principio do percorrido é de 2800 metros, e a máxima altitude será de 5700 metros. 

Esta aventura dará  comezo o día 1 de Novembro, que será cando partan de Vigo rumbo a Katmandú, e rematará, se todo sae ben, o vindeiro 29 de Novembro co seu regreso a Galicia dende Nova Delhi. 

Misión humanitaria

Ademais da expedición, os dous montañeiros levarán a cabo unha misión humanitaria en Katmandú, onde levarán material escolar a un orfanato xestionado por unha ONG española. Segundo referiu Sobrado Silva, o valor desta iniciativa non reside tanto na cantidade de material que poidan levar nesta viaxe a Nepal, como na posibilidade de abrir unha fiestra á colaboración naquel país, aproveitando a experiencia para amosar aos veciños de Ribeira a situación do país e ofrecerlles unha posibilidade de colaboración co mesmo. 

Ademais do Concello, colaboran varias empresas locais.  Quen o desexe poderá seguir esta viaxe en internet a través de facebook (riveiratrekaventura), barplaza.com, e na web do concello. Ademais, no blog www.riveiratrekaventura.blogspot.com, irase colgando ó seu regreso o diario de viaxe destes dous aventureiros con diverso material fotográfico e vídeos.


 


Posted via email from Certo.gl, o xornal dixital de Barbanza e Noia

Natureza: a Sociedade Galega de Historia Natural denuncia que xa van tres anos de caza ilegal con chumbo nas nosas lagoas

  • O "Defensor del Pueblo" dalle a razón á SGHN fronte á Dirección Xeral de Conservación da Natureza -estrano ente da Xunta se recibe este nome e promove estas actuacións-
  • A caza con munición de chumbo en humidais é ilegal, mais o departamento de Samuel Juárez, Medio Rural, faise o tolo

Non abondaba coa contaminación crecente, que agora tamén tiran con chumbo

Ribeira, 25 de outubro de 2011. Paso a paso, continúa o procedemento aberto polo "Defensor del Pueblo" pola queixa presentada o 16-10-2009 por SGHN contra a Resolución do 10-10-2008, da Dirección Xeral de Conservación da Natureza, pola que se regula o emprego de munición con chumbo en humidais. Dende o primeiro momento, SGHN tivo claro que dita Resolución incumpre a “Lei 42/2007, do 13 de decembro, do Patrimonio Natural e a Biodiversidade“, o “Instrumento de Ratificación do Acordo sobre a conservación das Aves Acuáticas Migratorias Afroeuroasiáticas, feito en La Haya o 15 de agosto de 1996“ e a Directiva Aves.

Xa o pasado mes de febreiro, SGHN recibiu unha primeira resposta do "Defensor del Pueblo" que coincidía ao 100% coa posición defendida dende hai tres anos por SGHN. Despois dos trámites legais oportunos, con data 14-10-2011 recibiu unha segunda resposta do "Defensor del Pueblo", da que deseguido transcribimos íntegramente a suxerencia final que fai á Consellería de Medio Rural.

"En consecuencia, esta Defensoría ha considerado procedente formular a la Consejería, de conformidad con lo dispuesto en los artículos 28 y 30 de la Ley Orgánica 3/ 1981, de 6 de abril, por la que nos regimos, la siguiente SUGERENCIA:

Que esa Consejería aplique la prohibición de uso y tenencia no sólo de perdigones con plomo sino también de postas y balas con plomo, es decir de cualquier munición contenedora de plomo, establecida en el artículo 62.3 j) de la Ley 42/2007, del 13 de diciembre, del Patrimonio Natural y la Biodiversidad, en todos los humedales gallegos incluidos en la Lista del Convenio relativo a Humedales de Importancia Internacional, en la Red Natura 2000 y en espacios naturales protegidos, y en consecuencia:

a) Al aprobar disposiciones generales en materia de caza u otorgar autorizaciones excepcionales de caza -al amparo de la Ley de Caza de Galicia- observe plenamente esa prohibición y no permita en ningún caso que se haga uso de munición contenedora de plomo, de ningún tipo, en ningún humedal o parte de éste.

b) Persiga y sancione a aquellos que cacen en esos humedales portando (tenencia) o usando munición de cualquier tipo que contenga plomo, en aplicación de los artículos 76.1.q) y 77 de la Ley 42/2007.

c) Anule o derogue la Resolución de la Dirección General de Conservación de la Naturaleza de 10 de octubre de 2008, por la que se hace público el listado de zonas húmedas de Galicia en que está prohibida la tenencia y el uso de munición que contenga perdigones de plomo durante el ejercicio de la caza, o bien la modifique de forma que recoja claramente esta prohibición sin excluir ningún humedal, ni parte de éstos, ni munición de ningún tipo que contenga plomo.

d) Derogue, si estuviera aún en vigor, la excepción a la prohibición de la caza del jabalí en la ZEPA ES0000086, ría de Ortigueira y Ladrido, previa autorización del Servicio Provincial de Conservación de la Naturaleza de A Coruña, mediante las modalidades de caza mayor recogidas en el artículo 37.1 del Decreto 284/2001, de 11 de octubre, por el que se aprobó el Reglamento de Caza de Galicia, 10 que incluye balas que contengan plomo, excepción recogida en la Orden de 17 de diciembre de 2009 por la que se modifica la Orden de 30 de julio de 2009, por la que se determinan las épocas hábiles de caza durante la temporada 2009-2010. Si volviera a regular esta excepción u otra similar, que esa Consejería especifique que las balas no podrán contener plomo.

e) Derogue, si estuviera aún en vigor, la excepción a la prohibición para batir piezas de caza menor, recogida en el artículo 11.50 de la Orden de 24 de junio de 2010, por la que se determinan las épocas hábiles de caza durante la temporada 2010-2011, y que permite disparar al zorro con bala. Si volviera a regular esta excepción u otra similar, que esa Consejería especifique que las balas no podrán contener plomo."

PÓDESE DECIR MÁIS ALTO PERO NON MÁIS CLARO: A CAZA CON MUNICIÓN DE CHUMBO EN HUMIDAIS É ILEGAL.

¿A QUÉ AGARDA A CONSELLERÍA DE MEDIO RURAL PARA CUMPLIR E FACER CUMPLIR A LEXISLACIÓN VIXENTE?

Máis información en www.sghn.org

Posted via email from Certo.gl, o xornal dixital de Barbanza e Noia

Ribeira: comezaron as obras da praza Uxío Novoneyra, que rematarán a primeiros do ano vindeiro

Ribeira, 25 de outubro de 2011. Operarios da empresa Oviga, S.L, comezaron no día de onte as obras de renovación da praza Uxío Novoneyra. O prazo de realización da actuación é de 3 meses e o prezo da adxudicación ascendeu a 198.420 euros. 

Con 1.400 metros cadrados de superficie, a praza Uxío Novoneyra está situada no centro do casco urbano e constitúe unha das de máis actividade comercial do municipio, existindo grande número de establecementos comerciais e de hostalería. A actuación ten como obxecto mellorar esta zona comercial peonil, creando un espazo continuo que poida ser disfrutado polos cidadáns e garantindo ademais a accesibilidade ás persoas con mobilidade reducida.  

A actuación prevista inclúe a demolición do pavimento, rampas e escaleiras existentes e a posterior reconstrución destes dous últimos elementos conforme ao disposto na Lei de accesibilidade e supresión de barreiras na Comunidade Autónoma de Galicia. 

Impermeabilización

Unha das accións máis importantes das englobadas na obra de renovación é a da impermeabilización da superficie da praza. Isto terá lugar mediante a aplicación de impricación asfáltica a rodillo e colocación de dúas láminas impermeabilizantes. 

O proxecto contempla tamén a instalación dunha rede de pluviais, a pavimentación con lousas rectangulares de pedra de granito silvestre de diversas tonalidades e a substitución dos puntos de luz existentes por lámpadas de 150 watios de VSAP. 

Ademais se instalarán diversos elementos de mobiliario urbano, como bancos, xardineiras ou papeleiras. 

Cabe recordar que a praza está formada por dúas zonas independentes comunicadas entre si a través dun pasadizo. Unha primeira zona ten unha forma sensiblemente rectangular e pódese acceder á mesma dende as rúas Otero Pedrayo, Mariño de Rivera e do Frade. Este espazo está distribuído en dúas áreas situadas a diferentes alturas, unidas mediante unha escaleira e dúas tampas. A segunda das zonas é trapezoidal e pódese acceder dende Mariño de Rivera.

Posted via email from Certo.gl, o xornal dixital de Barbanza e Noia

Noia: Fran Lareo amosa as súas esculturas do 4 ao 30 de novembro no Liceo

Twitter

Related Posts with Thumbnails Banner: Regale selva tropical