Barbanza, por Certo: 09/05/12

9.5.12

Cultura galega: o ribeirense Carlos Callón recibirá o Premio de Artigos Normalizadores o 16 de maio nun novo festival de "Vitaminas para o galego"

Carlos Callón recollerá o seu premio (e van...) en Carballo

Barbanza-Noia, 9 de maio de 2012. A iniciativa "Vitaminas 17" presentouse esta mañá en Lugo e rematará o dia 16 co festival “Vitaminas para o galego”, organizado polo Concello de Carballo e que presentará a actriz e escritora Paula Carballeira contando coa actuación de María Xosé Silvar “Ses”. Neste acto de afirmación do galego tamén se realizará a entrega do Premio de Artigos Normalizadores, que este ano recaeu no ribeirense Carlos Callón, investigador, escritor e presidente da Mesa pola Normalización Lingüística. Un representante de Vitaminas para o galego e máis o alcalde de Carballo Evencio Ferrero, darán leitura no acto ao Manifesto.

Lapis para escribir en galego

Alumnos e alumnas dos colexios e Institutos de Lugo recibirán nos vindeiros días “Lapis para escribir en galego”, dentro da campaña “Vitaminas 17” que este mediodia se presentou na Casa do Concello de Lugo. O tenente de alcalde e concelleiro de Cultura Antón Bao subliñou a importancia de promover o idioma galego como “elemento de cultura, comunicación, tolerancia e respeito”. Segundo Henrique Sanfiz (Radiofusión), “os lapis pretenden ser unha chiscadela de humor e ironía para propiciar a reflexión arredor da utilización da nosa lingua”. Alfonso Ribeiro (do único xornal diario impreso en galego, De luns a venres) indicou que segundo os dados do EXM, o 40% dos seus leitores teñen como primeira lingua o castelán, o que demostra “que a utilización do idioma galego non é en absoluto un obstáculo para chegar a todo tipo de públicos”.

Segundo indicaron os organizadores, cos que colabora este xornal de Barbanza e Noia, “nestes momentos xa se sumaron á Vitaminas para o galego 29 medios de comunicación, o que é unha proba da receptividade da sociedade diante desta iniciativa”.

Vitaminas 17

Para conmemorar o Dia das Letras, o 17 de maio, os medios de comunicación de Vitaminas, organizan unha actividade expansiva “facendo fincapé na necesidade de medios en galego para prestixiar o idioma e garantir a súa transmisión interxeneracional”. Teñen elaborado un manifesto nese sentido que se pode consultar na web vitaminasparaogalego.gl e pretenden que o dia 16 de maio se dea leitura ao manifesto en, ao menos, 17 escolas e institutos de Galicia, diante de 17 Casas dos Concellos, en 17 cidades de todo o mundo e que se traduza o manifesto ás 17 linguas máis faladas. Queren que todas esas leituras se graven en video e se envien ao enderezo manifesto@vitaminasparaogalego.gl.

Tamén haberá moita actividade nas redes sociais. En twitter, por exemplo, a etiqueta escollida para todas estas iniciativas é #vitaminas17

Antes, en Certo:

Cultura: música e poesía para darlle "Vitaminas ao galego"

Posted via email from Certo.gl, o xornal dixital de Barbanza e Noia

Boiro: a asociación de pais e nais Loureda programa obradoiros e outras actividades durante maio e xuño

Boiro, 9 de maio de 2012. Tódolos sábados do mes de maio a asociación de nais e pais Loureda, do colexio de Santa María do Castro de Cabo de Cruz, está a impartir de xeito gratuíto un obradoiro de manualidades baixo o epígrafe: “Reciclaxe: confección de xogos e instrumentos musicais con material reciclado”.

Os cativos comezaron a actividade o sábado 5 e dado que o día 6 era ao Día da Nai. Decidiron facer unhas fermosas flores con cartóns de ovos e uns paos para agasallalas. A partir dos seguintes sábados está programado que confeccionen, monecos, huchas, ratiños, coches, prismáticos, maracas, instrumentos de choiva, tambores etc.

I Mostra de Aprendizaxe, o 2 de xuño

O sábado 2 de xuño ás 20:00h. terá lugar no Centro Social de Cabo de Cruz, grazas á colaboración do concello de Boiro, a I Mostra de Aprendizaxe APA Loureda: Actividades extraescolares. Consiste nun “minifestival” onde os rapaces das clases de baile, teatro, pandeireta e informática amosarán o aprendido o longo do curso. A entrada é gratuíta e está aberta a tódolos públicos.

Última reunión, o sábado 12 de maio

Asemade, a directiva ten convocada a última reunión para o sábado 12 onde se ultimarán os detalles para o peche do curso e se redactarán os temas e fixarase a data da 2ª Asemblea Xeral de Socios deste curso 2011-212 e, tamén, onde se acabará de planificar a V Romaría de socios que terá lugar o sábado 16 de xuño.

Posted via email from Certo.gl, o xornal dixital de Barbanza e Noia

Ribeira: o instituto Leliadoura acolleu o concerto didáctico "Música e circunstancias"

Ribeira, 9 de maio de 2012. Dentro das actividades da Semana Cultural no IES Leliadoura, onte celebrouse un Concerto didáctico baixo o título de "Música e circunstancias" a cargo do grupo formado por Serafín Marcos á guitarra, Lucía Bustabad ao piano e Dalibor Sebestik ao violoncelo. Ao concerto asistiron tódolos alumnos de 2º, 3º e 4º de ESO, un total de 190. Durante esa hora os alumnos e alumnas do centro escoitaron obras relacionadas coas distintas circunstancias da vida.Empezaron coa morte: marcha fúnebre de Chopin. Logo volveron aos inicios da vida escoitando unha nana de Brahms e seguiron coa marcha nupcial de Wagner.O seguinte paso foi escoitar pezas relacionadas coa danza (un vals, unha tarantella, unha murciana...) ou coa descrición (o cucú, o círculo, o reloxio, o silencio do bosque...). O remate púxoo a música de cine, dende Cinema Paradiso de Morricone, á Pantera Rosa de Mancini ou a Schubert e a banda sonora de Barry Lindon.

iesleliadoura.com

Ribeira: o sábado 12, "Kontos de akí e akolá", con Marisa Irimia na biblioteca post.ly/7CmBP
— Certo (@Certo) May 9, 2012

Música: presentouse un ensemble galego de saxofón con raigames en Ribeira e Rianxo post.ly/7ClW5
— Certo (@Certo) May 9, 2012

Posted via email from Certo.gl, o xornal dixital de Barbanza e Noia

Ribeira: o sábado 12, "Kontos de akí e akolá", con Marisa Irimia na biblioteca

O Concello informa de que este venres 11 abre o prazo para que as asociacións pidan actividades da "Rede Cultural 2012" da Deputación coruñesa

Ribeira, 9 de maio de 2012.- Este sábado terá lugar a segunda das actividades incluídas nos ‘Sábados de Libro na Biblioteca’: acción que se inclúe dentro da programación do Maio Cultural que promove o Concello a través das áreas de Educación e Cultura.

A actividade que se vai celebrar consistirá nunha sesión de contacontos infantil a cargo dunha vella coñecida do municipio: Marisa Irimia (Foz, 1969), quen ten acudido xa a Ribeira para tomar parte noutras accións. Nesta ocasión, Marisa Irimia deleitará aos nenos e nenas asistentes co seu espectáculo “Kontos de akí e akolá”, no que a artista buscará a implicación dos propios rapaces no proceso creativo, de xeito que eles tamén se erixan en contadores de historias. A actividade está pensada para nenos e nenas de entre 3 e 12 anos. Desenvolverase de 11.30 a 12.30 horas e será de balde ata encher o aforo

Prazo aberto este venres 11 e ata o 31 de maio

A Concellería de Cultura vén de enviar un comunicado aos presidentes das distintas asociacións e entidades do municipio no que se lles informada da apertura do prazo para solicitar actuacións no marco da Rede Cultural 2012 da Deputación da Coruña: prazo que, de acordo co Boletín Oficial da Provincia con data 8 de maio, dará inicio o vindeiro venres día 11.

No XXIX Programa de Música e Teatro para grupos non profesionais poderanse incluír agrupacións artísticas de toda a provincia, dende bandas de música, masas corais, música e baile tradicional, grupos de gaitas, orquestras, conxuntos de música folk, rock e pop, e títeres e maxia, entre outras variedades. Os peticionarios deste programa -entidades sen ánimo de lucro da provincia que estean xuridicamente constituídas e teñan entre as súas finalidades a promoción da cultura-, poderán solicitar unha actuación (fóra do municipio) facéndose cargo do 50% do caché e financiando o 50% restante a Deputación Provincial.

Como norma xeral, a actuación adxudicada será pública e gratuíta, e non poderá ser utilizada en actos privados. O prazo citado rematará o xoves 31 de maio, podéndose formalizar a petición a través de modelo impreso que se pode obter da páxina web www.dicoruna.es ou ben nas oficinas do Auditorio Municipal.

Música: presentouse un ensemble galego de saxofón con raigames en Ribeira e Rianxo post.ly/7ClW5
— Certo (@Certo) May 9, 2012

Posted via email from Certo.gl, o xornal dixital de Barbanza e Noia

Música: presentouse un ensemble galego de saxofón con raigames en Ribeira e Rianxo

O elenco musical fixo a súa presentación na igrexa da USC, ao pé da facultade de Historia de Santiago
Detrás da iniciativa está a Aula Galega de Saxofón, que se desenvolve no conservatorio ribeirense

Ribeira, 9 de maio de 2012.- O pasado domingo 6 de maio tivo lugar na igrexa da Universidade en Santiago de Compostela a presentación do Ensemble Galego de Saxofóns: unha idea xurdida a iniciativa do responsable de organización da Aula Galega de Saxofón e profesor no conservatorio Profesional de Música de Ribeira, Jose Fungueiriño, así como do profesor invitado á citada Aula, Rodrigo Vila (e profesor no Conservatorio Superior de Música das Illas Baleares).

Unha iniciativa única en Galicia e escasa en España

Unha ensemble desta natureza é algo único na Comunidade e case inexistente no resto de España. Está conformado por 10 profesionais galegos do mundo do saxofón e tres alumnos da Aula Galega de Saxofón que, como é sabido, é unha actividade formativa organizada dende o Conservatorio de Música Profesional de Ribeira.

Entre o numeroso público asistente ao acto de presentación encontrábanse, entre outros, a concelleira de Educación do Concello de Ribeira, Dña Mª Carmen Vizcaya Sampedro, así como Juan Durán, compositor galego do cal o ensemble interpretou un arranxo feito polo propio compositor para esta actuación da súa obra "Divertimento".

Nesa presentación estivo o noso colaborador Ramón Torrado, que a conta no seu artigo deste mes, pero dende a parte rianxeira:

Talentos musicais rianxeiros, por Ramón Torrado

Impresionantes as pinturas galegas que non podemos ver aquí ou están desaparecidas (ese Cristo dá arrepío): culturagalega.org/noticia.php?id… #desleixo
— Certo (@Certo) May 9, 2012

Natureza: a Sociedade Galega de Historia Natural pídelle outra vez á Xunta análises dos supostos lubicáns cazados post.ly/7CjkC
— Certo (@Certo) May 9, 2012

See the full gallery on Posterous

Posted via email from Certo.gl, o xornal dixital de Barbanza e Noia

Natureza: a Sociedade Galega de Historia Natural pídelle outra vez á Xunta análises dos supostos lubicáns cazados

Pregunta_batidas_lobo_2011-11-29.pdf Download this file

Barbanza, 9 de maio de 2012. A Sociedade Galega de Historia Natural (SGHN) vén de solicitar de novo á Xunta de Galicia copia dos resultados das análises xenéticas realizadas a todos os lobos supostamente híbridos abatidos no Barbanza; información que xa solicitara con data 30-11-2011 e non incluida na resposta da DXCN de data 21-12-2011. Ademais, SGHN solicitou tamén:

Información detallada de:

Cantos permisos, autorizacións e/ou licencias provisionais para capturar ou abater lobos ibéricos (Canis lupus signatus) se expediron en 2012 no Barbanza e no resto de Galicia, así como localización, extensión e condicións esixidas e capturas realizadas.
As medidas adoitadas para garantir o control e seguemento das batidas.
Cantos lobos, cans de orixe doméstica ou “híbridos” se cazaron legalmente dende setembro de 2011, así como localización, sexo, idade e copia das análises xenéticas de cada un deles para detectar hibridación.
Ídem para os espécimes atopados mortos sen que existira autorización para abatelos e causa da morte (veleno, lazo, iñorado, etc)
Coñecer se a Consellería de Medio Ambiente preveu ou planificou, e de que xeito, a xestión e manexo dos exemplares abatidos ou capturados nos controis autorizados.
Coñecer se foron realizadas investigacións ou pescudas para determinar a veracidade das afirmacións sobre a presencia de “híbridos” de lobo en Castro de Rei ou calquera outra localidade de Galicia.

Solicitude de cese das batidas ao lobo para a eliminación de supostos híbridos

No artigo científico de Godinho, R., Llaneza, L., Blanco, J.C., Lopes, S., Alvares, F., Garcia, E.J., Palacios, V., Cortes, Y., Talego, J. e Ferrand, N. (2011). Genetic evidence for multiple events of hybridization between wolves and domestic dogs in the Iberian Peninsula. Molecular Ecology 24, 5154-5166 (ver resume):

    Nunca se menciona a Serra do Barbanza entre as localidades nas que se atoparon lobos híbridos nese estudio.
    A única localidade galega para a que se cita a existencia dun lobo probable híbrido é Mondoñedo (un macho coa referencia L379), pero deixando ben claro que era un exemplar cativo, supostamente capturado dun grupo de lobos salvaxes e do que non se está seguro da súa orixe ("supposedly caught from a wild pack... we could not be sure about its previous history and accurate origin"). Os outros individuos que son probablemente híbridos proceden de Asturias (5), Salamanca (1) e Minho (Portugal).
    As áreas nas que se detectaron probables híbridos están restrinxidas a zonas marxinais de distribución da especie ou recentemente colonizadas pola especie, o cal non é o caso da Serra do Barbanza, con presencia histórica do lobo.
    Como explicación para a orixe dos probables híbridos (case todos entre loba e can) os autores manexan dúas posibilidades:
        Lobas dispersas no bordo dunha poboación marxinal ou en expansión.
        Individuos solitarios como consecuencia da ruptura dunha manda por desaparición do macho alfa (ou dominante), CAZA SEVERA, ou o impacto de alteracións humanas do hábitat (incendios forestais, grandes infraestruturas).

Á vista dos resultados destes especialistas, o lóxico para evitar a aparición de híbridos de lobo en Galicia sería evitar a fragmentación das súas poboacións, prohibir a súa caza e reducir as alteracións do hábitat, por todo o cal SGHN solicita ao Conselleiro de Medio Ambiente, Territorio e Infraestruturas:

Que, con carácter inmediato, se suspendan todas as autorizacións vixentes para matar lobos (Canis lupus signatus) en Galicia
Que nas zonas onde se sospeite a presencia de supostos híbridos de can e lobo se proceda a CAPTURALOS VIVOS por parte de persoal especializado da Consellería que vostede preside e se proceda a súa análise xenética para comprobar se o son ou non híbridos e que no caso de ser:

Lobos puros se proceda de inmediato a súa liberación na zona onde se capturou.
Exemplares híbridos de lobo e can, NUNCA se liberen de novo no medio e se actúe con eles conforme á Lei 1/1993, do 13 de abril, de protección dos animais domésticos e salvaxes en catividade, e a restante normativa legal aplicable.

Máis info: