Teatro: "A ópera dos tres reás", dirixida polo ribeirense Quico Cadaval, opta a oito premios no certame "María Casares 2012"

• A produción do Centro Dramático Galego foi nominada para estes galardóns en sete categorías: mellores actor e actriz secundarios, escenografía, adaptación/tradución, iluminación, vestiario e maquillaxe.

Ames, 1 de marzo de 2012. O espectáculo A ópera dos tres reás do Centro Dramático Galego (CDG) acadou un total de oito candidaturas aos Premios de Teatro María Casares 2012 que convoca e outorga cada ano a Asociación de Actores e Actrices de Galicia (AAAG). A produción da compañía pública, que foi vista entre xuño e outubro de 2011 por 20.000 de espectadores, resultou finalista en sete das categorías a concurso destes galardóns: mellores actor e actriz secundarios, escenografía, adaptación ou tradución, iluminación, vestiario e maquillaxe.

Os apartados nos que resultou nomeada A ópera dos tres reás confirmáronse hoxe no decurso dun acto festivo celebrado no Pazo da Peregrina de Bertamiráns (Ames), canda a comunicación do resto de profesionais, compañías e espectáculos galegos preseleccionados para optar a algunha das 13 categorías previstas –ademais do Premio de Honor Marisa Soto­– na que será a edición décimo sexta duns premios aos que concorren este ano 30 montaxes.

No caso do CDG, os traballos de Víctor Mosqueira, César Goldi e Marta Pazos, tres dos intérpretes do elenco da obra musical de Bertolt Brecht e Kurt Weill que dirixira Quico Cadaval e protagonizara Luis Tosar, conseguiron ser nomeados nas categorías de Mellor Actor Secundario e Mellor Actriz Secundaria, ao igual que o de Pepe Sendón como Mellor Adaptación-Tradución, o de Carlos Alonso como Mellor Vestiario e o de Trini Fernández Silva como Mellor Maquillaxe. Baltasar Patiño, autor da escenografía e a iluminación do espectáculo, tamén é finalista en cada unha desas categorías.

Os XVI Premios María Casares, que recoñecen o labor dos profesionais do teatro nos distintos ámbitos de creación e produción en espectáculos en lingua galega estreados entre o 1 de xaneiro e o 31 de decembro de 2011, decidiranse por votación directa dos membros da AAAG e desvelaranse na gala de entrega que terá lugar o próximo 3 abril no teatro Rosalía Castro da Coruña.   

Posted via email from Certo.gl, o xornal dixital de Barbanza e Noia

Ribeira: entregados os premios da terceira edición do "Atlante" de gravado en Artes

• Foi presidida a entrega por Núñez Feijóo, que chega a contradicirse, logo de deixar sen consellería propia a área de Cultura, con esta perla: "coa arte, Galicia rebélase tamén contra un destino que parecía condenala a ser un país pequeno e periférico. Da man da cultura Galicia faise grande e ofrécese como encrucillada fundamental das correntes de creación”

• O presidente da Xunta dixo, nunha das súas numerosas hipérboles, que “Galicia, Ribeira, Artes, transfórmanse en lugares de encontro para a arte de todos os tempos. Algo semellante ás Nacións Unidas da creación”

Imaxe de arquivo do día en que fallou o xurado. Poden ver aquela información aquí

Ribeira, 1 de marzo de 2012.- O presidente da Xunta afirmou esta tarde, no acto de entrega dos premios Atlante do Museo do Gravado á Estampa Dixital de Artes, que as 200 obras concursantes e os 16 países presentes proban a afirmación de Vicente Risco de que ‘Galicia é un mundo’. “Risco –dixo- ensinounos a apreciar a grandeza da nosa terra e a afirmación do intelectual ourensán faise de novo realidade en Ribeira, en San Xián de Artes”.

Feijóo destacou que coa arte, Galicia rebélase tamén contra un destino que parecía condenala a ser un país pequeno e periférico. “Da man da cultura, Galicia faise grande e ofrécese como encrucillada fundamental das correntes de creación” afirmou ao que engadiu que Ribeira e Artes son unha desas encrucilladas.

Ao longo da súa intervención, o responsable do Goberno autonómico felicitou a Manuel Moreno Morales, Yuko Yamada, Ramiro de Undabeytia e Justo Antonio Heras Fernández, premiados na categoría de <Gravado>. Expresou os seus parabéns a Sandra González Caamaño, gañadora do premio destinado a <Gravado do Barbanza>. E aplaudiu tamén aos finalistas Hugo Besard, Micaela Trocello, Rutmi Sassaki, Ana Cambeiro, Encarna Méndez e Manuel Castro. “Vexo en cada un deles –aseverou- a un Atlante”.

Museo do Gravado de Artes en Ribeira

Lembranza para Leopoldo Nóvoa

Así mesmo, subliñou que Ribeira resume no seu Museo boa parte da historia mundial do gravado. “E faino –dixo- cun estilo que tamén nos fai lembrar a concepción cosmopolita que Vicente Risco tiña da nosa cultura. No fogar artístico de Artes, Laxeiro dialoga con Van Dick, Rembrandt faino con Sucasas, e Lamazares intercambia cores e figuras con Chagall. Nese recinto máxico, o noso chorado Leopoldo Nóvoa é recibido no ceo dos artistas por Durero, Goya e Picasso”.

Feijóo concluíu lembrando que Artes é, con eses fondos que acadan os 26.000 gravados e abranguen un extenso ámbito xeográfico e un longo período histórico, un dos grandes centros internacionais da actividade artística. “Galicia, Ribeira, Artes, transfórmanse en lugares de encontro para a arte de todos os tempos. Algo semellante –aseverou- ás Nacións Unidas da creación”.

Parodia de Vicente Risco no twitter:

A enfermidade infantil do nazonalismo maniféstase con dúas variantes antagónicas: admirazón exacerbada por Beiras ou pola UPG. Dempois pasa.

— Vicente Risco (@VicenteRisco) March 1, 2012

Pode que tamén lle interese:

• Colaboración: "Leopoldo Nóvoa, un patrimonio descoñecido en Ribeira", por Gonzalo Sarasquete

Posted via email from Certo.gl, o xornal dixital de Barbanza e Noia

Ribeira: Mariano Barbacid, gañador do I Premio de Investigación Oncolóxica Ramiro Carregal – Fundación La Rosaleda

• O Xurado amerita a súa longa traxectoria e o seu importante labor no campo da oncoloxía molecular

• O premio está dotado con 12.000 euros e é un dos mellor dotadas na súa categoría
  

 
Compostela, 1 de marzo de 2012.- O Xurado do I Premio Internacional de Investigación Oncolóxica Científica e Técnica Ramiro Carregal – Fundación La Rosaleda, acordou outorgar o galardón desta primera edición ao Dr. Mariano Barbacid, un dos investigadores “máis relevantes do mundo” nesta especialidade médica. Así o destacou o presidente executivo deste xurado, o tamén médico Rafael López, tras coñecerse o nome do premiado, de quen destacou “o seu gran labor no campo da oncoloxía molecular e a investigación traslacional do cancro”.

Falaba de xenes do cancro cando ninguén o plantexara

“O doutor Barbacid comezou a falar de xenes cando ninguén se plantexara esa vía”, explicaron os membros do xurado, composto por Juan Gestal Otero, decano da Facultade de Medicina e Odontoloxía da Universidade de Santiago; Manuel Freire-Garabal, catedrático en Farmacoloxía; Francisco González García, catedrático de Medicina e vicerrector de Investigación e Innovación da USC, ademais dos presidentes de Frinsa e La Rosaleda, Ramiro Carregal e Gerardo Fernández Albor, e o propio Rafael López, xefe de Oncoloxía Médica do Complexo Hospitalario Universitario de Santiago, en quen delegou o seu voto Juan Jesús Cruz, presidente da Sociedad Española de Oncología Médica (SEOM), que non puido asistir á deliberación.

Obxectivos do premio
Preténdese recoñecer o traballo destinado a afrontar o enorme desafío que supón atopar solucións a un dos máis grandes males de Humanidade e premiar o esforzo e a traxectoria científica na área da investigación oncolóxica, obxectivos que o premiado cumpre abondo.  Mariano Barbacid leva máis de 30 anos adicado á investigación oncolóxica, primeiro en Estados Unidos –onde traballou no Instituto Nacional do Cacncro (Maryland) e no Instituto de Investigacións Farmacéuticas de Bristol-Myers Squibb en Princeton–, e logo en España, a onde volvtou en 1998 para crear o Centro Nacional de Investigaciones Oncológicas (CNIO) que dirixiu ata o pasado ano e onde actualmente dirixe o grupo de Oncología Experimental.

O premio será entregado nos vindeiros días

O I Premio de Investigación Oncolóxica Científica e Técnica Ramiro Carregal – Fundación La Rosaleda, está dotado con doce mil euros (coas súas correspondentes retencións fiscais) e vaise entregar en Santiago nos próximos días nun acto solemne ao que asistirá o propio gañador así como personalidades do ámbito político, social, académico e científico de todo o país.

Xunto co premio en metálico, Barbacid recibirá un galardón acreditativo consistente nunha peza de Artesanía de Galicia creada en exclusiva para a edición deste premio en peedra emperador con incrustacións en metal e prata e con emblemas esculpidos na propia pedra.

See the full gallery on Posterous

breve biografia Barbacid.doc Download this file

Posted via email from Certo.gl, o xornal dixital de Barbanza e Noia