7.5.12

A Pobra: o equipo de goberno promete unha gardería logo de 8 anos sen facer a prometida

  • Segundo denuncia o Psoe, o equipo do popular Isaac Maceiras adícase a facer estes anuncios en comidas-mitin no canto de facelo no pleno, diante dos representantes lexítimos dos veciños
  • Sospeitan que, de facerse no lugar que indica o goberno popular, unha asociación veciñal veríase desaloxada do local concedido

A gardería que leva Maceiras prometendo dende 2004 podería ubicarse no Camiño Ancho

A Pobra, 7 de maio de 2012. O Psoe da Pobra denuncia hoxe en nota de prensa "as promesas incumpridas de Isaac Maceiras, que emprega un acto pagado cos cartos de todos os pobrenses para facer propaganda unha vez máis", en referencia á comida da terceira idade do pasado venres 4 de maio.

"Logo de 8 anos sen facer a gardería, e de prometela no Nadal de 2004 "como se fora un agasallo de Papá Noel, volve agora á carga, cando non dá xestionado un Concello que ten na creba e que ten que ir a plan de axuste e pasa o tempo e gasta os cartos en actos, como a comida do venres, totalmente superflua e só para saír na foto", explican os socialistas pobrenses.


"O concello da Pobra tivo necesariamente que acudir ao Plan da axuste, (endebedamento para pagar ós provedores) por un importe de 1.554.091,49 euros. Entre estes figuran as empresas de catering e demais establecementos de hostalería onde o equipo de goberno acude para organizar os convites, tales como celebracións da bandeira azul, ágapes desta mesma bandeira, inauguracións varias ou o mesmo xantar da terceira idade", proseguen dende o Psoe da Pobra.


Onde está a gardería prometida en 2004?


"O señor Maceiras debíase adicar a buscar os cartos para pagar as débedas destas cuchipandas e dos seus fastuosos actos de inauguración e deixar de prometer o que non vai facer... Pode que pense o señor alcalde que os pobrenses temos pouca memoria, pero a hemeroteca é terca e o día 25 de Nadal de 2004 saíu con que ía facer unha gardería para cen nenos: onde está, oito anos despois? É este o gran xestor da Pobra? Ben se ve: estamos afogados pola súa mala xestión", critican os socialistas.


"Ademais, segundo conta a prensa, o mandatario xa mostrou os planos de situación desa hipotética gardería ao invitado que trouxo á festa  dos vellos do pasado venres. Por qué non llos ensina aos lexítimos representantes dos veciños na Corporación? Será porque unha vez máis ten pensado desaloxar a unha asociación de veciños do local que ten concedido. Isto é: un colectivo máis silenciado", rematan dende o Psoe da Pobra do Caramiñal.






Posted via email from Certo.gl, o xornal dixital de Barbanza e Noia

escribiu Unknown ás 20:15:00 0 falaron

Compártelo
Agregar a Meneame Agregar a Technorati Agregar a Del.icio.us Agregar a DiggIt! Agregar a Google Agregar a Reddit Agregar a Blinklist Agregar a Blogmarks

A Pobra: o equipo de Goberno sométese á Xunta e faille pagar os gastos do centro de saúde aos veciños

07.05.12.-PREGUNTAS BNG SOBRE GTOS. MANTEMENTO CENTRO SAÚDE.doc Download this file

A Pobra, 7 de maio de 2012. O grupo municipal do BNG  da Pobra do Caramiñal rexistrou hoxe no Concello unha iniciativa para debate e resposta no vindeiro pleno ordinario deste mes no que critica ao goberno popular  de Isaac Maceiras pola súa mala xestión dos gastos do centro de saúde.

 
"Trátase de saber a razón pola cal o Concello, dende marzo do 2010 que se aprobou, aínda segue a asumir os gastos de mantemento do centro de saúde. Estes están a ser soportados por todos os veciños e veciñas da Pobra grazas á ineficiencia e submisión do Goberno Municipal ao da Xunta", sinalan os nacionalistas que comanda Rosana Pérez.
 
"Mentres que a Xunta, supoñemos que pola situación económica, segue sen asumir os gastos de mantemento do ambulatorio, arredor de 23.000 euros ao ano, o alcalde está anunciando “a bombo e platillo” a construción dun novo centro de saúde na nosa localidade. Mentres a Xunta segue incumprindo os seus compromisos cos concellos e coa cidadanía, o alcalde aproba un plan de axuste por 1.500.000 euros para pagar o que debe, que suporá un importante incremento dos impostos aos veciños e veciñas da Pobra nos vindeiros anos", argumentan dende o Bng, onde conclúen que "éstas son algunhas das consecuencias da xa tristemente famosa austeridade do PP".

Antes, en Certo:


A Pobra: futbolín por Paula, de Boiro






Posted via email from Certo.gl, o xornal dixital de Barbanza e Noia

escribiu Unknown ás 18:34:00 0 falaron

Compártelo
Agregar a Meneame Agregar a Technorati Agregar a Del.icio.us Agregar a DiggIt! Agregar a Google Agregar a Reddit Agregar a Blinklist Agregar a Blogmarks

Ribeira: o Concello gabéase á moda da compostaxe doméstica da man de Sogama

  • Só no entorno rural "como medida de aforro económico e beneficio ambiental", disque
  • Tan só medio cento de vivendas recibirán composteiros domésticos e repartirán cen lotes de bolsas para separar lixo

Ribeira, 7 de maio de 2012.- O Concello, da man de Sogama, decidiu implantar un programa de compostaxe doméstica en medio cento de vivendas rurais, co que se busca transformar a materia orgánica xerada nun abono con excelentes propiedades para o solo, un costume que sempre houbo nas casas da aldea, onde nada se desbotaba, pero que se foi perdendo cos usos urbanitas.

Así o anunciaron esta mesma mañá o alcalde da localidade, Manuel Ruíz, e o presidente de Sogama, Luís Lamas, nun acto público que tivo lugar na propia Casa Consistorial e no que tamén compareceron os concelleiros de Benestar Comunitario e Medio Ambiente, Jesús Freire e Elvira Pereira.  O obxectivo desta iniciativa "non é outro que o de alcanzar os beneficios ambientais, económicos e sociais que este sistema trae consigo", sinala en nota de prensa o Concello. Disque ademais de contribuír a reducir a produción de refugallos en orixe, pechando o ciclo de reciclaxe da materia orgánica nos propios fogares, posibilita o menor depósito de desperdicios nos contedores convencionais, permitindo diminuír a súa frecuencia de recollida, así como o importe da factura que mensualmente o ente local debe pagar a Sogama pola xestión e tratamento do lixo convencional, un sistema que cada día ten máis detractores pola súa baixa eficiencia e polos problemas que xera coa incineración de residuos.

Dado que a separación de orgánicos no medio rural, ben para alimento do gando, ben para fabricación de abono, é unha práctica tradicional en Galicia, "non supón maior trastorno para as familias participantes, coa particularidade de que, seguindo a técnica recomendada, o compost resultante adoita reunir as máximas condicións de calidade, podendo ser empregado, en sustitución dos fertilizantes químicos, nas propias hortas, xardíns e terras de cultivo particulares", aseguran.

Primeira fase, 50 composteiros para os solicitantes

Nunha primeira fase deste programa, Sogama subministrou ao concello 50 composteiros de 360 litros de capacidade, fabricados a partir de material reciclado e reciclable, que serán distribuídos entre os fogares que voluntariamente decidan adscribirse a este proxecto. Así mesmo, dotaráselles cunha serie de manuais de apoio nos que se explican os pormenores a seguir no proceso caseiro de elaboración de compost, dando resposta ás preguntas máis frecuentes e erros máis comúns.

Mestres composteiros: o xoves en Carreira

A fin de garantir o éxito do programa, contarase coa figura dos denominados “mestres composteiros”, é dicir, persoas ao servizo do concello, entre estes os membros de Protección Civil, que se encargarán tanto de impartir charlas informativas nas distintas parroquias (a primeira será este xoves en Carreira) como de visitar periodicamente “casa por casa” para comprobar o funcionamento do sistema, resolver dúbidas e facer un seguimento de todos os pormenores que afecten ao seu bo discorrer.

Para isto, os mestres composteiros recibiron un curso específico de formación a fin de que conten cos coñecementos necesarios que lles permitan levar a cabo unha tarefa de asesoramento ás familias incorporadas a esta iniciativa e se encarguen de vixiar a evolución da experiencia de cara a garantir os seus bos resultados.

Por outra banda, e co obxectivo de intensificar a concienciación cidadá en torno á axeitada separación de residuos e posterior depósito nos diferentes contedores habilitados na vía pública, o goberno municipal procederá ao reparto de 100 lotes de bolsas de cores, de 20 litros de capacidade cada unha, coa finalidade de facer máis cómoda a segregación de refugallos en orixe. Cada lote está conformado por unha de cor amarela, na que depositar os envases de plástico, latas e briks, outra azul, para o papel e cartón, e unha terceira, de cor verde, para o vidro.

Así, coa práctica da autocompostaxe e a correcta recollida selectiva, o concello non só entregará menor cantidade de lixo a Sogama, o que suporá un importante aforro de custos, senón que incrementará en gran medida a porcentaxe de reciclado de cada material, recibindo máis ingresos por parte dos Sistemas Integrados de Xestión.

"Pero para beneficiarse desta medida precisa da activa implicación do conxunto da veciñanza, que pretende conseguir a través da información e a formación, a transparencia e o contacto permanente cos distintos colectivos, incentivando a súa colaboración e corrixindo as malas prácticas", sinalan dende o Concello.

Punto limpo

O alcalde tamén lembra que dende o Concello se está a promover unha campaña informativa sobre o punto limpo situado no polígono de Xarás, con cumprida información á que se pode acceder dende a páxina web do Concello: www.riveira.com





Sogama Sogama_2
See the full gallery on Posterous

Posted via email from Certo.gl, o xornal dixital de Barbanza e Noia

escribiu Unknown ás 18:28:00 0 falaron

Compártelo
Agregar a Meneame Agregar a Technorati Agregar a Del.icio.us Agregar a DiggIt! Agregar a Google Agregar a Reddit Agregar a Blinklist Agregar a Blogmarks

Dodro: o Bng critica ao alcalde por ser éste "o único concello da zona suspendido polo Ministerio"

Dodro, 7 de maio de 2012. O grupo nacionalista no concello de Dodro considera "un escándalo a mala xestión do actual goberno presidido por Valentín Alfonsín, e o feito máis grave é o SUSPENSO do propio Ministerio de Administracións Públicas.

Sinalan dende o Bng de Dodro que "ata o de agora pensabamos que a súa definición máis acaída era mintireiros pero agora vemos que por enriba de todo son uns malos xestores. O Plan de Saneamento presentado por tódolos concellos ao Ministerio para poder solicitar o crédito de pagamento a proveedores foi aprobado na maioría dos casos con contadísimas excepcións, e unha delas foi o noso concello, coa peculiaridade de que o alcalde contratou unha asesora económica
como persoal de confianza, que previamente estivera como secretaria sustituta no concello, cobrando 40.000 €, argumentando a súa especialización (mentras a seis traballadores/as do concello lles reducía a xornada e o salario). Deste xeito foi o único concello que con 3.000 habitantes fixo o Plan contando cunha asesora económica, e polo que vemos agora non mostra gran competencia a pesar do salario que lle puxo o alcalde. Curiosamente dannos a coñecer a non aprobación do Plan de Axuste ao mesmo tempo que a marcha da “asesora”, co cal non podemos deixar de relacionar os dous acontecementos. Certamente o axuste proposto era incoherente cando se contrataba a unha persoa nova por 40.000 €. Hoxe mesmo solicitamos ao alcalde por rexistro copia da comunicación do Ministerio para saber cales son as causas de este suspenso, pois unha vez máis non nos fiamos das súas palabras á prensa. O que está claro é que a este goberno non lle interesa o concello de Dodro nin a súa xente máis que para utilizalo como plataforma para outros intereses".

Ademais, os nacionalistas dodrenses aseguran que nesta ocasión "non van poder mirar atrás para culpar ao bipartito unha vez máis, porque:

  1. Na relación de facturas certificadas para pedir o crédito 175 son de catro anos de xestión do bipartito e 287 de medio ano de goberno do PP.
  2. O Plan elaborárono na súa integridade eles seguindo as directrices do PP no gobernocentral e contando con persoal da súa confianza.
  3. Agora a persoa que o elaborou baixo a responsabilidade do alcalde márchase".
E conclúen sinalando que o PP de Dodro "non ten ningún proxecto para o presente e o futuro do concello de Dodro, non fan máis que tomar medidas improvisadas en moitos casos tan só para desfacer o que fixo o anterior goberno, e facerlle favores as súas amistades e teñen ao concello sumido no caos".

Relacionada:






Posted via email from Certo.gl, o xornal dixital de Barbanza e Noia

escribiu Unknown ás 18:18:00 0 falaron

Compártelo
Agregar a Meneame Agregar a Technorati Agregar a Del.icio.us Agregar a DiggIt! Agregar a Google Agregar a Reddit Agregar a Blinklist Agregar a Blogmarks

Ribeira: medio cento de asociacións poderían sumarse ao "Xuño da Cultura e as Artes"

Ribeira, 7 de maio de 2012.- Representantes de 54 asociacións sociais e culturais de Ribeira participaron esta mañá no salón de plenos do Consistorio nunha reunión de traballo convocada polo Executivo co fin de recabar a implicación das mesmas na elaboración do programa do que se vai denominar “Xuño da Cultura e as Artes” (non confundir o mes coa parroquia de Porto do Son, que xa non é a primeira vez). Trátase dunha ambiciosa proposta que ten intención de executar o Concello este ano e neste mes, no que non adoita haber nada especial -ata xullo en que a Festa da Dorna enche de ocio as rúas- co propósito de inzar o municipio de actividades e fomentar a cultura entre a poboación no máis amplo sentido do termo.

Cada día algunha actividade cultural

O encontro estivo presidido polo alcalde, Manuel Ruiz, e contou tamén coa participación da concelleira de Cultura, Elvira Pisos, e dos técnicos do seu departamento Unai González e Segundo Chiqui Durán.  A pretensión do Concello é que, buscando a colaboración activa das asociacións, se consiga que todos os días do mes de xuño haxa algún tipo actividade, non só en instalacións municipais senón na medida do posible nas prazas e rúas (“temos que ser capaces de sacar a cultura á rúa”, aseverou o rexedor). Este propósito de xerar contidos non só se cingue á cidade senón que é extensivo a todas as parroquias do municipio.

A tal efecto, a Área de Cultura xa elaborou unha proposta de programa que sirva de base ao calendario de eventos que integran este “Xuño da Cultura e as Artes”: proposta na que se conteñen tanto actividades organizadas directamente polo Concello como outras iniciativas promovidas a instancia de asociacións que -dende que a portavoz municipal Herminia Pouso anunciara a mediados de marzo a intención de levar á práctica esta idea-, xa amosaron a súa disposición a ser partícipes no desenvolvemento da mesma.

Durante a reunión de hoxe acordouse que as asociación interesadas en participar no deseño do programa formulen as súas suxestións ao longo da presente semana.

Ribeira, Cultura Mariñeira

O alcalde tamén avanzou que para o mes de agosto está prevista a celebración doutra nova iniciativa titulada “Ribeira, Cultura Mariñeira” coa que poñer en valor o patrimonio do municipio vinculado ao mundo do mar.

Da actuación formarían parte propostas xa  asentadas como a Feira Artesanal e Mariñeira (aínda que rexistrando certos cambios no seu plantexamento) e outras novas, entre as cales se inclúen por exemplo dous cursos de verán das Universidades de Santiago de Compostela e Menéndez Pelayo, e unha gran festa para potenciar a promoción de produtos pesqueiros que a día de hoxe non gozan dunha gran saída comercial, como o lirio ou o congro.

A este respecto, Manuel Ruiz convidou ás asociacións a que aporten a súa colaboración neste proxecto. Así mesmo, o alcalde manifestou a idoneidade de promover periodicamente este tipo de reunións coas asociacións a fin de poder escoitar as súas suxestións, problemas e aportacións.
 
Audición aberta o martes 8 de maio

Mañá martes 8 de maio terá lugar ás 19.30 horas no salón de actos do Conservatorio Profesional de Música de Riveira unha audición a cargo de catro alumnos do Centro que van representar ao Concello na III Mostra Musical do Eixo Atlantico: evento que se vai desenvolver esta fin de semana en Vilagarcía de Arousa.

 

A audición é libre e gratuíta para os que queiran asistir.

Os catro alumnos participantes son:

1. Manuel Jesus Montero González (Piano - 4º de Grao Profesional)

2. Amaro Sampedro López (Saxofón -5º curso de Grao Profesional)

3. Lois Pimentel Iglesias (Trompeta - 1º curso de Grao Profesional)

4. Michelle Pena González (Piano - 3º curso de Grao Profesional)

Pode que tamén lle interese:

Libros no Ateneo: o 18 de maio, "Vigo a 80" e o 24, "Herdeiros pola forza"


Xornada: o Día Solar Europeo, o 19 de maio, no Liceo



Semáforos do Malecón: os máis modernos, a partir de xuño




Reunin_asociacins_1 Reunin_asociacins_2
See the full gallery on Posterous

Posted via email from Certo.gl, o xornal dixital de Barbanza e Noia

escribiu Unknown ás 17:57:00 0 falaron

Compártelo
Agregar a Meneame Agregar a Technorati Agregar a Del.icio.us Agregar a DiggIt! Agregar a Google Agregar a Reddit Agregar a Blinklist Agregar a Blogmarks

Rianxo: Carapaus, novo grupo de música tradicional, xa ten vídeoclip

Rianxo, 7 de maio de 2012. En Rianxo a tradición musical, en calquera eido que se poida imaxinar, non ten parada. Agora están lanzando un novo grupo ao mercado: CARAPAUS (en breves sairá o cd), e estes días queren promocionar o videoclip que teñen gravado en Rianxo e que abre esta información. Como un dos obxectivos fundacionais de Certo é promocionar a cultura de Barbanza, só podemos darlle espazo neste xornal e desexarlle o mellor nesta aventura musical. Inda que non sexan vostedes, queridas lectoras, estimados lectores, de Rianxo, bótenlle un ollo ao ben que soa este grupo, con zanfoneiro e todo.


412583_3815724521296_152307842 418516_380891848595571_3723004 460406_3815722561247_152307842 470774_3815721361217_152307842 474056_372300692788020_3723004 475161_3013805182796_119255600
See the full gallery on Posterous

Posted via email from Certo.gl, o xornal dixital de Barbanza e Noia

escribiu Unknown ás 17:42:00 0 falaron

Compártelo
Agregar a Meneame Agregar a Technorati Agregar a Del.icio.us Agregar a DiggIt! Agregar a Google Agregar a Reddit Agregar a Blinklist Agregar a Blogmarks

Dodro: programación cultural de maio, co gallo das Letras Galegas


Imaxe da homenaxe na tumba de Baleirón, o poeta que pon a Dodro no mapa galego da poesía


Dodro, 7 de maio de 2012. Con motivo da celebración das Letras Galegas, a Concellería de Cultura do Concello de Dodro que dirixe Cristina Codesido, organiza varias actividades dentro do propio concello.

A primeira actividade, Polafía, terá lugar o vindeiro 16 de maio ás once da mañá no CPI Eusebio Lorenzo Baleirón. Trátase dunha xornada interxeracional, entre vellos e rapaces. O obxectivo principal é fomentar as relacións entre as persoas de distintos grupos de idade co ánimo de enriquecer os vínculos e o coñecemento mutuo. No acto en cuestión participarán alumnos da E.S.O, un total de cincuenta e cinco rapaces e rapazas, e os vellos pertencen aos talleres de memoria que se están a realizar no Concello de Dodro.

Xa que dita actividade se basea en contidos literarios e musicais co fin de amosar o patrimonio oral, literario e musical galego, os alumnos e alumnas de 4º da E.S.O citarán poemas e cantigas e os maiores, pola súabanda , recitarán coplas.

A reunión entre os mozos e os maiores, finalizará cunha rolda de preguntas por parte do alumnado ós maiores de Dodro.


Presentación do libro gañador do "Eusebio Lorenzo" de poesía, o 16 de maio


Outro acto, enmarcado dentro da celebración das Letras Galegas, será a presentación do libro gañador da edición número XXIV do Premio de Poesía Eusebio Lorenzo Baleirón. A obra é "Con Gume de folla húmida”, de Isaac Xubín. Dito premio honra a memoria do ilustre poeta Eusebio Lorenzo Baleirón e ademais contribúe á promoción da poesía galega.

A presentación terá lugar o día 16 de maio ás doce do mediodía, cun prólogo a xeito de percorrido pola vida de Eusebio Lorenzo Baleirón. Posteriormente, será a presentación do libro gañador ao alumnado da E.S.O do CPI. Á presentación acudirán membros da familia de Eusebio ademais do alcalde de Dodro xunto con membros da corporación municipal.

Galego de cine, o 24


O día 24 de maio está programada a actividade Galego de Cine do programa “FalaRedes” da Secretaría Xeral de Política Lingüística da Xunta de Galicia. A actividade terá lugar na esplanada do polideportivo municipal ás 17 horas. Instalarase unha caravana reconvertida en cine itinerante.

Trátase dunha experiencia audiovisual "no cinema máis pequeno do mundo". Poderán participar os rapaces e rapazas de 6 a 12 anos. Os participantes disfrutarán dun visionado de curtas de animación en galego. Posteriormente, intervirán nunha serie de actos converténdose en estrelas da gran pantalla a través da composición dunha historia nun video-matón que estará accesible mediante Internet. Aqueles nenos interesados en participar, deberán inscribirse na Casa da Cultura de Dodro, a partir do 9 de maio ata o 21, ambos días incluídos. A actividade é gratuita.

O horario de apertura da Casa da Cultura é de 9.00 a 14.00 horas, en horario de mañá e de 16.00 a 19.00 horas, en horario de tarde.

Posted via email from Certo.gl, o xornal dixital de Barbanza e Noia

escribiu Unknown ás 17:23:00 0 falaron

Compártelo
Agregar a Meneame Agregar a Technorati Agregar a Del.icio.us Agregar a DiggIt! Agregar a Google Agregar a Reddit Agregar a Blinklist Agregar a Blogmarks

Noia: Vaamonde, Lamas & Romero presentan "O tambor de prata" este sábado 12 de maio

Vaamonde, Lamas & Romero.pdf Download this file

O espectáculo, do que vai adxunta toda a información no documento, terá lugar na Sociedade Liceo este vindeiro sábado 12 de maio a partires das 21:00 horas. Salón de Actos.





Posted via email from Certo.gl, o xornal dixital de Barbanza e Noia

escribiu Unknown ás 16:48:00 0 falaron

Compártelo
Agregar a Meneame Agregar a Technorati Agregar a Del.icio.us Agregar a DiggIt! Agregar a Google Agregar a Reddit Agregar a Blinklist Agregar a Blogmarks

Lousame: a Banda de Música organiza este sábado 12 a súa cea anual de socios e amigos

Cartel_cea_forno

Lousame, 7 de maio de 2012. O vindeiro sábado, 12 de maio, no Restaurante O Forno de Noia celébrase a cea anual de socios e amigos da Banda de Lousame. O prezo é de 25 € e haberá sorteo de diversos regalos ó remate.
Para anotarse hai que chamar aos números 676982604 / 652808122, no correo da banda banda@concellodelousame.com. Asistir a esta cea é un xeito de colaborar economicamente coa Banda de Lousame. A velada musical corre por conta dos anfitrións.

Posted via email from Certo.gl, o xornal dixital de Barbanza e Noia

escribiu Unknown ás 16:37:00 0 falaron

Compártelo
Agregar a Meneame Agregar a Technorati Agregar a Del.icio.us Agregar a DiggIt! Agregar a Google Agregar a Reddit Agregar a Blinklist Agregar a Blogmarks

Ribeira: vinte cativos aprenderon os segredos de ser escritora

 

 

Ribeira, 7 de maio de 2012.- Unha vintena de pequenos e pequenas de ata dez anos de idade participaron o pasado sábado na actividade  “Que é iso de ser escritor?”, coa que se daba inicio á programación do Maio Cultural 2012, organizada polo Concello a través das súas áreas de Educación e Cultura.

 

A Biblioteca Municipal foi, de novo, o escenario elixido para desenvolver esta acción, que impartiu a poetisa galega Eli Ríos (Londres, 1976), e na que os nenos tiveron a oportunidade da achegarse ao mundo da literatura dende unha perspectiva lúdica e divertida.

 

Moitos dos nais e pais dos cativos participantes puideron asistir á actividade, na que tamén estivo presente a concelleira de Educación, Maricarmen Vizcaya.





Eli_ros_1 Eli_ros_2
See the full gallery on Posterous

Posted via email from Certo.gl, o xornal dixital de Barbanza e Noia

escribiu Unknown ás 16:11:00 0 falaron

Compártelo
Agregar a Meneame Agregar a Technorati Agregar a Del.icio.us Agregar a DiggIt! Agregar a Google Agregar a Reddit Agregar a Blinklist Agregar a Blogmarks
Suscribirse a: Entradas (Atom)

Twitter

Related Posts with Thumbnails Banner: Regale selva tropical