26.11.12

Ribeira: a Asociación Galega de Onomástica denuncia que o Concello segue a quebrar a lei a pesar das queixas ao Valedor sobre o topónimo

Media_httpfarm4static_gdqfs

O Concello obriga a toda institución que traballa con el a empregar a forma deturpada e equivocadamente aprobada por culpa do finado cronista da vila, García Bayón

Media_httpfarm4static_ayuxd

A Xunta emprega correctamente o topónimo na súa cartelería de estradas, pero emprégao "ao xeito do Concello" na Rede -vaia paradoxo- de Dinamización Lingüística, anunciando o programa FalaRedes

Ribeira, 26 de novembro de 2012. Está acontecendo dende hai décadas (nada menos que dende 1983, en que se aprobou o lei que fixa a Toponimia de Galicia), pero convén que se recorde de cando en vez. Desta volta foi a Asociación Galega de Onomástica, que ten entre os seus socios ao presidente da Real Academia Galega, Méndez Ferrín, ou a prestixiosos latinistas e intelectuais galegos como Xesús Ferro Ruibal, quen lle recordou ao Concello de Ribeira que está a cometer un delito, pois non cumpre coa Lei de Toponimia.

Segundo explica nunha entrada na súa web hoxe mesmo, titulado "A toponimia desvalida":

"Un cidadán acode ó Valedor para que inste a un concello a cumprir a lei: «Os topónimos de Galicia terán como única forma oficial a galega. Corresponde á Xunta de Galicia a determinación dos nomes oficiais dos municipios…»

O Valedor abre un expediente.

O Valedor escríbelle ó concello: «Lémbroche que tes que cumprir a lei».

O concello non responde.

O Valedor pregúntalle ó concello:» ¿Vas responder o que che preguntei?»

O concello non responde.

O Valedor vólvelle preguntar unhas cantas veces: «¿Vas responder o que che preguntei?»

O concello, por fin, responde: «Non me gusta ó que me obriga a lei e, como xa pedín que o puxesen como a min me gusta, non vou cumprir a lei».

O Valedor sentenza: «O concello acepta parcialmente o meu recordatorio».

O Valedor pecha o expediente.

A toponimia: ten quen a valla?"

O Concello é o de Ribeira e o último documento do Valedor sobre este asunto é o que segue:

valedor_do_pobo_Ribeira.pdf Download this file

Como xa explicamos varias veces en Certo, e aclaran os da Asociación Galega de Onomástica, Riveira co v é unha falacia, unha deturpación que, curiosamente, só se emprega en Santa Uxía. Non atoparán outra "Riveira" en toda Galicia nin en países da lusofonía, onde podemos atopar Ribeira do Pombal, por exemplo, en Brasil, ou Ribeira Grande en Azores (Portugal).

A Xunta, na que goberna a misma cor política -a azul- que no Concello, faise a sueca. E, con toda a faciana -pétrea, que dixo un día Feijóo sobre o pobo galego nunha inauguración na Cidade da Cultura- advirte á Wikipedia, a enciclopedia en liña máis grande do planeta, para que respete os topónimos en galego. Mais ao Concello de Ribeira nin chío. Un Concello no que goberna Manuel Ruiz Rivas, un alcalde que, de ser certo o que contou a presidenta de Galicia Bilingüe, Gloria Lago, paga do seu peto publicidade nunha revista que se adica a denostar as leis de Toponimia e Normalización Lingüística aprobadas polo Parlamento de Galicia no seu día. Trátase de "Vosotros", da que até o de agora só saíu un exemplar e do que xa informamos en Certo no seu día.

Media_httpfarm6static_hgbbf

Teimudez instalada xa socialmente

Media_httpfarm4static_qkkqd

Riveira con v gañaron o certame de comparsas de 2009

Mais como aconteceu co topónimo da Coruña, que o turrón e presunto socialista Paco Vázquez aseguraba que tiña que levar o L no artigo e moita poboación o defendía, en Ribeira sucede o mesmo. Tanto é así que hai unha asociación chamada "Riveira se escribe con v" (sic) que ademais adoita gañar os concursos de comparsas no entroido. Mais con iso e todo, esta asociación e o Concello están a comportarse como delincuentes, ou sexa, como alguén que comete un delito. Como ben explica o dicionario da Real Academia Galega, delito é o quebrantamento da lei. E ten un sinónimo: malfeito.

Posted via email from Certo.gl, o xornal dixital de Barbanza e Noia

Ribeira: o sábado, 1 de decembro, "Barco a pique" clausura "Retranca da Ría" con Cándido Pazó

Barco_a_pique

Ribeira, 26 de novembro de 2012. O I ciclo de "Retranca da Ría" chegará ao seu fin o vindeiro sábado 1 de decembro, cunha actuación de Cándido Pazó. Este contacontos xa estivera en maio deste ano en Ribeira e volta desta vez cun espectáculo que presentará en primicia en Ribeira, por tratarse dunha vila moi vinculada ao mar. Baixo o título de "Barco a pique. No X aniversario do afundimento do Prestige" Pazó encandilará e logrará, de seguro, sacar un sorriso aos veciños da comarca contando historias, anécdotas e contos sobre o afundimento do petroleiro Prestige no ano 2002.

O evento terá lugar na Cervexería Noite Meiga 2.0, ás 23:30 horas, e a entrada ten un prezo de 5€ e gratuita para os socios, que se poderán adquirir na entrada do local media hora antes do comezo ata encher o aforo.

Dase así por finalizada a I edición deste ciclo, que tivo o pracer de contar co xa citado Cándido, Evaristo Calvo (un dos de Mofa e Befa) e Quico Cadaval. Flor de Toxo agradece a todo o público que ten asistido ás actuacións, pois o aforo quedouse pequeno en todas elas. Esta entidade xa programa as próximas actividades como viaxe á neve, nadal musical, fundación dunha comparsa de xigantes e cabezudos etc..

Flor_de_toxo_portugal

Flor de Toxo co Director Xeral de Xuventude, Ovidio Rodeiro Tato

Flor de Toxo en Braga

A Asociación Xuvenil e Cultural Flor de Toxo vén de participar na cidade portuguesa de Braga no 12º ENAJ (Encontro nacional de Associaciçoes Juvenis) durante os días 23,24 e 25 de novembro. Alí, nesa cidade portuguesa puideron compartir e intercambiar ideas con outras asociacións do país luso. Participaron ata 67 persoas de Galicia e coordinou a viaxe a Dirección Xeral de Xuventude e Voluntariado. A comarca estivo representada por mozos de Ribeira e Boiro.

Pode que tamén lle interese:

Posted via email from Certo.gl, o xornal dixital de Barbanza e Noia

Literatura: ata o 31 de decembro para optar á praza na residencia de escritores de Axóuxere en Rianxo

  • A autora ou escritor interesados deberán enviar unha proposta co traballo que queren desenvolver durante 30 días entre febreiro e abril de 2013 en Xens, Leiro, Rianxo, onde a editora Axóuxere ten a súa residencia de escritores
  • A cambio da estadía, totalmente gratuíta, a escritora ou autor escollidos deberán dar un obradoiro literario no municipio e entregar algún material publicable do proxecto
  • Axóuxere xa vai pola súa cuarta experiencia con este chamamento. Antes estiveron a poetisa canaria Irena La Sen, o galego-islandés Elías Portela e a luguesa Nerea Pallares

Toda a información neste dossier:

Axóuxere_Inverno.pdf Download this file

Ou na web da editorial rianxeira: http://axouxerestream.com/residencia-de-escritores/


Relacionada:

 

Posted via email from Certo.gl, o xornal dixital de Barbanza e Noia

Rianxo: o IES "Félix Muriel" celebra o Ano de Celso Emilio Ferreiro con varias actividades

  • 100 voces para 100 poemas de Celso Emilio Ferreiro que rematan en recitado conxunto o 12 do 12 ás 12 do "Deitado frente ao mar"
  • A lectura de máis de 100 poemas diferentes do autor por máis de 100 voces diferentes, un concurso de recitado de poemas, a decoración dos corredores e das escaleiras do centro co poema “Deitado fronte ao mar”, e o recitado conxunto deste poema o día 12 do 12 ás 12 da mañá configuran as principais actividades programadas.

 

Media_httpfarm5static_irank

Este verso de "Deitado frente ao mar" está en Foz, na Mariña luguesa

Deus ke te crew musicou o poema

Rianxo, 26 de novembro de 2012. O Equipo de Normalización e Dinaminazión Lingüística do IES Félix Muriel de Rianxo organizou, coa colaboración activa da biblioteca do centro e a implicación directa de alumnado, unha homenaxe ao poeta celanovés Celso Emilio Ferreiro. Para  os dous últimos meses do ano 2012, ano no que se celebra o centenario do nacemento, programáronse varias actividades que van desde a lectura de máis de 100 poemas diferentes do autor ata un recitado conxunto do poema “Deitado frente ao mar” que está promovido pola Coordinadora Galega de Equipos de Normalización e Dinamización Lingüística (CGENDL)

 

Dende a  segunda semana do mes de novembro, ata mediados do mes de decembro, levaránse a cabo as seguintes actividades programadas:

  • Deseño e pegado de cartaces anunciando a actividade polos corredores do centro.

  • Selección, lectura e gravación de cen poemas de Celso Emilio lidos por diferentes  membros da comunidade educativa durante os recreos na biblioteca do centro.

  • Concurso de recitado de poemas todos os venres para o alumnado de ESO, bacharelato e ciclo formativo, con premios para os tres mellores recitadores.

  • Entre as actividades de carácter artístico, o alumnado participa activamente na elaboración de cartaces anunciando a actividade, destacando a divulgación dos versos do poema  “Deitado frente ao mar” que, escritos en tiras moi grandes de papel, serviron para empapelar os corredores e os espazos comúns do centro e tamén para familiarizar ao alumnado co poema.

  • Continuando coas actividades de ambientación, un grupo de alumnos e alumnas asesorados por un dos profesores de E. Plástica, están modelando unha barricada de cartón-pedra que será exposta no vestíbulo central do instituto e que servirá como soporte para colocar poemas de Longa noite de pedra.

  • Coa consigna de  “o 12 do 12 ás 12”   terá lugar, no edificio central do centro,  o recitado conxunto do poema “Deitado frente ao mar” no que participará alumnado, profesorado, persoal non docente, nais, pais e tamén a Concelleira de Educación, cultura e normalización lingüística do Concello de Rianxo, Hadriana Ordóñez.

Máis información sobre as actividades do ENDL do "Félix Muriel" en http://www.bicodaria.com

Posted via email from Certo.gl, o xornal dixital de Barbanza e Noia

Outes: polémica e oposición veciñal ao peche dunha farmacia en Ceilán

  • Levan máis de tres mil sinaturas contra este peche, pois é un establecemento do que se benefician non só os de Outes, senón tamén veciñanza de Negreira e Noia
Media_httpfarm6static_vchjl

PonteNafonso é o lugar contiguo a Ceilán e son os seus veciños os que promoven esta vindicación da farmacia. Agora uníronse moitos máis.

Outes, 26 de novembro de 2012. Unha asociación veciñal do municipio coruñés de Outes reuniu máis de 3.000 sinaturas para tentar frear a orde de peche que pesa sobre unha farmacia situada no lugar de Ceilán, cerca do hospital abandonado poucos anos despois de inaugurarse. Dada a súa proximidade ao límite municipal cos concellos de Noia e Negreira, son moitos os habitantes alleos a Outes que se adheriron á petición por sentirse afectados como usuarios, temerosos de perder este servizo e solidarios ante o que consideran unha inxustiza.

Secuencia histórica do caso

Pascual Rosón López abriu as portas do seu negocio hai agora oito anos, despois de serlle concedida a licenza polo Colexio Farmacéutico Provincial (e confirmada polo Consello Xeral de Colexios Oficiais de Farmacéuticos de España), ao cumprir os requisitos de ratio poboacional e distancia das outras farmacias, situadas no núcleo urbano de Serra de Outes, a 4 quilómetros. Pero xa nese momento empezaron os problemas: dous farmacéuticos da vila non estaban conformes e presentaban un recurso xudicial. O Colexio Farmacéutico obrigaba a Pascual Rosón a abrir a farmacia, ou perdería a súa licenza. A súa intención era instalarse en Ponte Nafonso, pero un novo recurso dos dous farmacéuticos outenses obrígao a facelo en Ceilán. 

En 2005, coincidindo co nacemento dos seus fillos xemelgos, Pascual e os seus opoñentes acoden aos tribunais. A sentenza ditamina que non cumpre un dos requisitos: hai menos de 2.000 habitantes. O propio xuíz entende que a dispersión rural é propia de Galicia, pero obriga ao peche por non acadar a ratio poboacional. A apelación ao Tribunal Supremo non foi admitida. Aínda así o Tribunal Superior de Galicia admite a inexecución da sentenza, por atoparse xa o local no mapa farmacéutico galego, e propoñen que a Xunta de Galicia saque a concurso público a explotación da farmacia. Os outros dous boticarios volven solicitar a execución da sentenza; o mesmo Tribunal Superior de Galicia falla a favor deles, pero invitaba á Consellería de Sanidade a promover a inexecución da sentenza en defensa do interese público da oficina da farmacia.

Hai menos dun ano presentouse unha segunda solicitude de inexecución de sentenza, esta vez ofrecéndolles 30.000 euros a cada un dos outros dous contendentes (isto é, unha execución substitutiva por diñeiro), pero estes néganse. De nada vale que Pascual lles diga que verán incrementadas as gardas mais non os clientes. A xuíza recibe un comunicado da Xunta de Galicia: en Outes sobran farmacias. Ante a negativa ao acordo económico ordénase o peche. A data límite sería o 27 de decembro.

Mobilización veciñal

Cando isto se fai público a Asociación de Veciños de Ponte Nafonso, lugar contiguo a Ceilán, mobilízase e comeza a pedir sinaturas. Reúnense co alcalde para que medie no asunto. Pero a denuncia non se retira. A Asociación de Veciños de Cuns únese á de Ponte Nafonso en busca de solución, e reciben a adhesión das do Freixo e San Ourente.

Pascual Rosón López agradece o apoio recibido dos que foron os seus clientes durante estes oito anos, así como dos demais farmacéuticos da zona. Desexa que polo menos os veciños consigan que a botica saia a concurso público e non perdan así o seu servizo. E lamenta que esvaeza o soño que tivo desde neno. Se nada o remedia, terá que enfrontarse máis indefenso ás súas débedas hipotecarias e, igual que a súa empregada, buscar un novo traballo para poder criar os seus dous fillos pequenos.

Peche o 23 de novembro logo de ameaza de multa

Na tarde do día 22 de novembro os veciños (que non entenden as razóns desta suposta ilegalidade) reuníronse para organizar futuras mobilizacións, pero ese mesmo día un burofax ordena o peche inmediato baixo ameaza de multa. O 23 a farmacia de Ceilán pecha as súas portas. Xusto o día no que se entregan na Consellería de Sanidade, quizais xa tarde, as 3.000 sinaturas.

Posted via email from Certo.gl, o xornal dixital de Barbanza e Noia

Boiro: máis de medio cento de asistentes ás xornadas "O Prestige en imaxes"

  • Organizounas a asociación cultural Borobó
  • Puidéronse ollar os últimos documentais sobre a catástrofe que inda se está a xulgar agora, logo de dez anos de que sucedera

[[posterous-content:pid___0]]

Boiro, 26 de novembro de 2012. A Asociación Cultural Borobó pechou as xornadas audiovisuais “O Prestige en imaxes” celebradas durante os pasados venres 16 e venres 23 deste mes de novembro. Finalmente, máis de cincuenta persoas achegáronse ao Centro Social de Boiro para asistir ás proxeccións das xornadas.


Tras proxectar “Marea blanca” de Isabel Coixet e “Carcamáns” de Marcos Nine, contando con este último director, na segunda das sesións os asistentes puideron visionar o documental “Man, home sen paz” dirixido por Simón Vázquez. Asemade contouse co guionista e productor da obra, David Formoso, para a presentación e o posterior coloquio que se prolongou ante o gran interese dos alí presentes pola obra, vida e morte do artista e anacoreta Manfred, Man o de Camelle.

Dende a asociación Borobó amóssanse "realmente entusiasmados coa boa acollida das xornadas, facendo fincapé no interese en buscar a forma de non esquecer o acontecido fai dez anos co accidente e afundimento do petroleiro Prestige en fronte da costa de Galicia". Segundo sinalou a presidenta da entidade, Silvia García Mirón, “o que queríamos con esta actividade era lembrar dende Boiro as graves consecuencias socioeconómicas que tivo para a
sociedade galega o desastre do Prestige e, de aí, a necesidade de esixir responsabilidades e decisión políticas urxentes en relación coa seguridade marítima”.



Posted via email from Certo.gl, o xornal dixital de Barbanza e Noia

Ribeira: 150 atletas no Duatlón Trail, que gañaron Teresa Barreira e Raúl Castro

  • Conseguiron rematar 125 dos participantes
  • A satisfacción e interese dos participantes invita á organización a darlle continuidade con futuras edicións

Ribeira, 26 de novembro de 2012. Onte, domingo 25 de novembro de 2012, no lugar de Balteiro, parroquia de Oleiros (Ribeira), tomaron a saída os 150 atletas que participaron no I DUATLON TRAIL DE RIBEIRA, que consistía nunha primeira parte de 15 quilómetros en BTT (bicicleta de montaña) e outros 5 quilómetros de carreira a pé. 

Ambos trazados discorreron case na súa totalidade por pistas e corredoiras dos arredores do Camping Ría de Arosa 2, lugar que serviu de saída, chegada e transición entre as dúas probas que remataron 125 "duatletas" e recibiron soporte en todo momento por parte do equipo de Sport Bike.

Houbo trofeos para os 15 primeiros homes e 5 primeiras mulleres. Como vencedor absoluto quedou Raúl Castro Lago en homes e Teresa Barreira Salgado en mulleres. Na entrega de trofeos estuveron presentes representantes das entidades que secundaron a iniciativa e coorganizaron a actividade xunto con Arousa Natureza e Ocio:

CONCELLO DE RIBEIRA
ECOPLÁS
CAMPING RÍA DE AROSA
NAUTICA A POUTADA
SPORTBIKE
EPHADAX

Clasificación íntegra



DUATLON TRAIL DE RIBEIRA - 2012.pdf Download this file

Posted via email from Certo.gl, o xornal dixital de Barbanza e Noia

Twitter

Related Posts with Thumbnails Banner: Regale selva tropical