2.5.12

Noia: Feijóo segue a quentar motores na precampaña cunha inauguración dun anaco da variante noiesa, que se vai adiar un ano

  • Púxose en servizo o novo vial de conexión do enlace de Sampaio da VAP Brión-Noia coa estrada AC-543

  • Nun discurso electoralista, cualificou a zona como "unha das máis importantes de Galicia" pero esquecéuselle referirse aos expropiados que levan sen cobrar dende 2010

Fotos: Xunta de Galicia

Noia, 2 de maio de 2012.- O presidente da Xunta, Alberto Núñez Feijóo, destacou hoxe o compromiso do Goberno galego coa vertebración da Ría Muros-Noia con Compostela, reflectido na apertura, o vindeiro ano -tiña que ser para este-, da Variante de Noia e nun investimento de 155 millóns de euros. “Estamos vertebrando unha das zonas máis importantes de Galicia e cumprindo o compromiso de devolverlle as vilas aos cidadáns e que as estradas non interrompan os cascos urbanos. E estamos posibilitando que en Galicia se poda vivir nun sitio e traballar noutro; estamos posibilitando aquel vello sono de que o 80% da poboación galega estea a menos de 10 minutos dunha vía de alta capacidade”, manifestou o presidente da Xunta nun acto eminentemente propagandístico e pre-electoral ao que asistiron os alcaldes da bisbarra e mesmo o xefe da oposición noiesa -do PP-.

Durante a posta en servizo do novo vial de conexión do enlace de Sampaio da VAP Brión-Noia coa estrada AC-543, cun investimento de 1,7 millóns de euros; Feijóo salientou a aposta do Executivo autonómico pola Galicia “única e global” e afirmou que a nova infraestrutura supón achegar a Vía de Altas Prestacións Brión-Noia aos veciños da comarca e, sobre todo, de Noia e Lousame.

“En outubro de 2010, puxemos en servizo o treito Brión-Martelo do novo corredor; en xaneiro de 2011, inauguramos a ponte do Engano, en Outes; en febreiro de 2011, fixemos o propio en Lousame co treito Martelo-Noia, que conecta directamente a ría coa rede de estradas de altas prestacións da Xunta. E, hoxe é a cuarta data, na que poñemos a disposición unha conexión para poñer o corredor ao servizo de máis veciños”, lembrou Feijóo, logo de reafirmar que a próxima gran infraestrutura que o Goberno galego porá a disposición da Ría de Noia-Muros “será a conexión histórica e definitiva entre Porto do Son e Noia; será a Variante de Noia, que inauguraremos o próximo ano”.

Ao longo da súa intervención, o presidente do Executivo autonómico recordou o compromiso deste Goberno, durante esta lexislatura, de manter os servizos públicos esenciais e de que, en plena crise económica, a sanidade, a educación e os servizos sociais avanzaran a pesar da diminución drástica dos ingresos da Xunta e das transferencias do Estado á Comunidade. “Pero tamén nos comprometemos –engadiu- a finalizar os investimentos estratéxicos de Galicia; e 155 millóns de euros de investimento nesta ría é a expresión máis gráfica, máis concreta e máis explícita dun esforzo en materia de infraestruturas para finalizar os grandes compromisos que asumimos en época de bonanza e que teñen que estar financiados en época de dificultade”.

Así mesmo, Feijóo subliñou que estes investimentos supoñen tamén eficiencias económicas, sociais e ambientais para a comarca. “Eficiencias económicas, porque estamos reducindo o consumo de combustible de máis de 8.000 vehículos que percorren este corredor; eficiencias sociais, porque estamos afastando os tráficos de longo percorrido do centro das vilas; e eficiencias ambientais, porque estamos minimizando a emisión de CO2 á atmosfera. 7.600 vehículos diarios deixaron de cruzar polo medio de localidades como Urdilde, San Xusto ou Albariza; e son 5.000 os vehículos diarios que deixaron de pasar polo centro de Outes ao utilizar a variante”. Uns razonamentos máis que dubidosos, pois todos os que circulamos por este corredor, que ten unhas pendentes enormes, sabemos que o consumo de combustible increméntase considerablemente. En canto ás eficiencias sociais: non opinan o mesmo os donos de negocios de hostalería dos pobos polos que xa non se pasa. Agora nin para un café se para neles.

Posible peaxe por autovías nun futuro cercano

Logo da ameaza do presidente do Goberno, o popular pontevedrés Mariano Rajoy, de que cada venres se ían tomar novas medidas de recortes -o que na neolingua popular se chaman axustes-, unha das medidas que máis sona é a de implantar unha peaxe, disque "branda", por circular por autovía. Por suposto, Feijóo en ningún momento aludiu a estas impopulares taxas, pois atópase en plena precampaña electoral, nin quixo falar dos expropiados por estas obras da variante que levan sen cobrar dende 2010. Tampouco fixo referencia, nin el nin o conselleiro de Infraestruturas, ao arraso para o Patrimonio que vai supoñer o viaduto sobre o castro de Taramancos nin a desfeita na paisaxe de toda esta zona, "unha das máis importantes de Galicia", ao entender -nas verbas pero non nos feitos- do presidente da Xunta da Galicia.

Posted via email from Certo.gl, o xornal dixital de Barbanza e Noia

Ribeira: case 50.000 euros para unha web e imaxe do proxecto Riveira Atlántica 2015, cofinanciado na maior parte con fondos europeos

Ribeira, 2 de maio de 2012.- O Concello informa hoxe da adxudicación do contrato para a prestación dos servizos de apoio de comunicación e publicidade do proxecto Riveira Atlántica 2015, cofinanciado nun 70% con fondos FEDER dentro do eixo “desenvolvemento sostible local e urbano”. A devandita adxudicación recaeu na empresa Relaciones Públicas Galicia, S.L., por un importe de 46.610 euros.

En virtude deste contrato, a empresa adxudicataria encargarase da confección do Manual de Identidade Corporativa que recolla os elementos constitutivos da identidade visual do proxecto e a súa convivencia coa imaxe corporativa do Concello.  Tamén se lle encomendará a creación dunha páxina web coa que contribuír a divulgación e posta en valor deste ambicioso plan: unha páxina que terá carácter multilingüe e contará ademais cunha versión específica para dispositivos móbiles.

Co idéntico obxectivo de potenciar a difusión da iniciativa, a proposta inclúe tamén a edición de folletos-guía, carteis, plotters-roll up e abundante material para uso en actos institucionais, así como a asistencia á hora de efectuar a comunicación entre os medios do proxecto Riveira Atlántica e das actuacións incluídas nel.

As once actuacións contempladas no marco deste proxecto Ribeira Atlántica 2015 son:

   1. Creación dun centro social e de ocio saúdable de Oleiros
   2. Construción dun paseo marítimo-terrestre polo borde litoral de Ribeira
   3. Creación dun parque biosaúdable e itinerarios verdes en Oleiros-Artes.

   4. Recuperación ambiental e patrimonial do río Artés ou Arlés
   5. Plan de mobilidade e accesibilidade da área portuaria

   6. Recuperación da antiga aldea mariñeira na illa de Sálvora e promoción de visitas á illa
   7. Construción dun novo mercado municipal
   8. Creación dunha web turístico-patrimonial
   9. Creación dunha rede de miradoiros e vías paisaxísticas de Ribeira
  10. Plan de recuperación de núcleos tradicionais
  11. Recuperación e interpretación do complexo mar-industrial de Área Secada




Posted via email from Certo.gl, o xornal dixital de Barbanza e Noia

Rianxo: "Retrospectiva", do Fotoclub Sálvora, do 4 ao 23 de maio no auditorio

Cartel_expo_rianxo

  • A inauguración é o venres 4 de maio ás 20:30 horas
  • Esta mostra fotográfica está rotando por todo Barbanza e Noia

Horarios do auditorio:

Luns: 8 a 15 -ás veces péchase por traballo interno-
Martes a venres: de 8 a 22 horas
Sábados: 10 a 14 e 16 a 20
Domingos e Festivos: pechado

Antes, en Certo:




Posted via email from Certo.gl, o xornal dixital de Barbanza e Noia

Ribeira: están a escoller tres técnicos para atender as oficinas de turismo no verán


 

Ribeira, 2 de maio de 2012.- O Boletín Oficial da Provincia do día de hoxe, 2 de maio, recolle un anuncio polo que se informa a convocatoria de proceso selectivo para a contratación laboral temporal de tres técnicos para a atención das oficinas municipais de turismo situadas en Ribeira.

 

As solicitudes para tomar parte neste proceso selectivo faranse mediante instancia que se presentará no Rexistro Xeral da Corporación durante un prazo de dez días naturais, que se iniciará a partir do día seguinte ao da publicación do anuncio no BOP.

 

O obxecto da convocatoria é a contratación dos tres técnicos indicados por un proceso de selección de oposición libre para a atención das oficinas turísticas por un período de tres meses coincidentes co período estival: dende o 15 de xuño ata o 15 de setembro.

 

Entre os requisitos necesarios para poder aspirar a unha das tres prazas, figura a de ter cumpridos os 16 anos de idade e estar en posesión do Título académico de Formación Profesional de Ciclo Superior de “Información e Comercialización Turísticas”, “Animación Turísticas” ou “Axencias de Viaxes”. Tamén serán admitidos os diplomados ou licenciados en turismo e licenciados universitarios na rama de humanidades.






Posted via email from Certo.gl, o xornal dixital de Barbanza e Noia

Ribeira: deportistas de taekwondo que participarán nos Xogos Olímpicos de Londres entrenaranse neste municipio

  • Entre os motivos para animalos a prepararse en Ribeira está "a calidade dos sparrings". En Ribeira hai moi bos deportistas desta especialidade, que cada ano colleitan máis éxitos nas súas competicións internacionais

Suvi Mikkonen vén dende Finlandia

Ribeira, 2 de maio de 2012.- Distintos deportistas do máis alto nivel, practicantes da especialidade de taekwondo, escolleron este municipio e o Centro Galego de Tecnificación Deportiva de Pontevedra para afinar a súa preparación de cara a súa participación de nos Xogos Olímpicos de Londres 2012.


Bineta Diedhiou, en Senesport.info

O primeiro olímpico en chegar foi a senegalesa Bineta Diedhiou, clasificada en – 57 kgs (tamén o fixo Balla Dieye, medallista mundial en - 68 kgs, para preparar os Xogos francófonos). Así mesmo, recalou na Comunidade galega o equipo de Guatemala (con sete membros, entre os que destacan a recente medalla do mundial júnior de Exipto a cargo Francisco Palacios e o deportista de para Tae Kwon Do e medalla mundial Gerson Mejía).


Combate de Gabriel Mercedes (o máis moreno)

Proximamente chegará o medallista olímpico Gabriel Mercedes (República Dominicana, clasificado para Londres 2012 en – 58 kgs), a Finlandesa Suvi Mikkonen (clasificada para Londres – 57 kgs) e o equipo de Marrocos, dirixido polo ex adestrador do CGTD Jesús Benito con tres clasificados para a Olimpíada: Sanaa Atabrour (- 49 kgs), Wia Dislam (+ 67 kgs) e Isaam Chernoubi (- 80 kgs).

Tamén está pendente de confirmación a campiona olímpica María Espinoza (México – clasificada Londres + 67 kgs), quen en vindeiras datas concretará esta viaxe. Á hora de decantarse por Ribeira e Pontevedra para ultimar a súa preparación, predominaron como motivos a calidade dos deportistas que exercen de sparrings, a tranquilidade e posibilidade dunha máxima concentración de cara os adestramentos, as instalacións e recursos materiais existentes, as facilidades que dende os centros de adestramento se lles ofertan e a proximidade entre todos servizos necesarios para a vida cotiá destes deportistas (ximnasio – centros médicos e hospitais – fisioterapia). Está previsto que o Concello faga en próximas datas unha recepción oficial a estes deportistas.

Posted via email from Certo.gl, o xornal dixital de Barbanza e Noia

A Pobra do Caramiñal: o Psoe non vai á comida dos vellos deste venres por considerala prescindible "e máis nestes tempos de graves recortes"

A Pobra, 2 de maio de 2012.- A voceira do PSdeG-PSOE da Pobra do Caramiñal, Teresa García Guillán, informou nunha nota de prensa que non asistirá ao XIII Xantar dos Maiores, "organizado polo Goberno do PP da Pobra que se celebrará o venres 4 de maio, no Polideportivo Municipal de Venecia por solidaridade cas persoas que están pasando necesidades, por entender que debemos distribuír os cartos dos veciños ca maior dilixencia, por coherencia e por convicción".

Segundo a voceira socialista, "desde o Goberno do Estado estanse a facer recortes que afectan a toda a poboación e de maneira moi especial ao colectivo dos maiores. Faise a máis importante agresión ao Sistema Público de Saúde dende a chegada da democracia co pago de medicamentos por parte dos pensionistas, obrígase aos usuarios a pagar as ortoprótesis (cadeiras de rodas, muletas e calzas, xeonlleiras, tobilleiras), obriga tamén a pagar os produtos dietéticos, por exemplo vai a afectar a alimentación nutricional que se lles subministra por vía oral ou por sondas de alimentación ós grandes dependentes e desnutridos, afecta ao transporte sanitario non urxente,  aos maiores de 26 anos que non cotizan á Seguridade Social que perden o seu dereito á asistencia sanitaria, a Dependencia, afecta gravemente a educación, a investigación, repercute no nivel de vida das familias coas subidas do gas, da luz, co IRPF e un longo etcétera.  Son tantos e tan graves os recortes que a Administración Local debe racionalizar e priorizar os recursos dos que dispón: hai actividades ás que se pode renunciar por ser prescindibles ou posiblemente as realizan por facer escaparatismo e propaganda política".

Débedas pendentes de 2007 nunhas comidas que si paga o Concello

Segundo explica Teresa García Guillán, "na relación de facturas con data de emisión 2 de marzo de 2011, facilitada pola intervención do Concello a día 2 de marzo de 2012 aparece aínda sen pagar “Resto xuntanza 3ª idade 2007” 11.590,40 e “comida 3ª idade 2010” 11.932,11 euros, sumadas estas cantidades ao  resto de comidas oficiais do equipo de goberno teñen unha débeda de case 30.000 euros en gastos dos que se poden prescindir como unha inauguración dun paseo que nos valeu aos Pobrenses 1.043,25 euros. Hai que ter en conta que xa pasou máis dun ano desde esa última fiscalización polo tanto a débeda seguiría aumentando tanto no gasto en festas como no resto de conceptos".

E conclúe: "Por solidaridade coas persoas que están pasando necesidades, por entender que debemos distribuír os cartos dos veciños ca maior dilixencia, por coherencia, por principios, non asistirei a dito xantar. Non é falta de respecto aos maiores que asistan, nin desprezo por un día que se reencontran e que o pasan ben é unha cuestión de establecer prioridades e dedicar eses recursos a cubrir as necesidades básicas da poboación como poden ser atender a dependentes. Desde o goberno de España están esixindo continuos esforzos ás familias pero estarían nunha mellor situación si as Administracións deran exemplo ca elección das súas actividades".

Opinión de Certo:

Onte mesmo fíxose unha comida para a terceira idade en Porto do Son, con paseo de autoridades incluída, neste caso o conselleiro de Infraestruturas, Agustín Hernández, xa que no concello goberna agora o PP. Este tipo de actos de propaganda afectan a todos os partidos (dende os celebérrimos bailes nestas comidas do antigo dirixente do Bng Anxo Quintana ata moitos concellos do Psoe, pero sobre todo ao PP, pois goberna a grande maioría de concellos desta terra). Son gastos que non teñen razón de ser, pois estase a discriminar -e aproveitar politicamente- a unha parte da poboación fronte a outras. Por que non comidas para mozos? Potitos para bebés agora que sacaron os cheques? Churrascadas para os autónomos, que son os que sosteñen o país? Delicatessen para os empresarios locais, que son os que dan traballo? E así ata o infinito: é un sinsentido, un diñeiral que sae do peto aos contribuíntes, aínda que algunha xefa de prensa intente despistarnos, enganarnos e facerse a escandalizada por lle chamar ás cousas polo seu nome.

Onte mesmo, no twitter, discusión entre un dirixente do PP e outro do Psoe sobre o mesmo:



Pode que tamén lle interese:


Posted via email from Certo.gl, o xornal dixital de Barbanza e Noia

A Pobra: o venres 4 de maio inaugúrase mostra de escultura e pintura de Manuel Teira no Pazo de Xunqueiras

Pobra_mirada_da_luz


Torre Xunqueiras foi empregado para múltiples usos na súa longa historia. Na imaxe, como plató de cinema para un documental sobre Valle-Inclán

A Pobra do Caramiñal, 2 de maio de 2012. Este vindeiro venres, 4 de maio, ás 20:30 horas terá lugar a inauguración da mostra "A mirada da luz", do escultor e pintor pobrense Manuel Teira, no Pazo Torre dos Xunqueiras.

"Nunha iniciativa insólita na comarca do Barbanza, os empresarios Pablo Pouso e Javier Pouso ( propietarios do restaurante Lagar), chegaron a un acordo co escultor pobrense Manuel Teira, e ceden un espazo expositivo permanente no Pazo Torre dos Xunqueiras, onde, a partir do día 4 de maio se vai poder contemplar de xeito permanente a obra deste prolífico autor da Pobra do Caramiñal", explican os organizadores, que cren que "iniciativas coma ésta, sen dúbida, incentivan e dotan de imaxinación este local hosteleiro, enmarcado nun dos edificios históricos máis sobresaíntes da comarca do Barbanza, a Torre fortaleza de Xunqueiras. Pazo dos Xunqueiras, este local de restauración, a partir de agora compaxinará  gastronomía e cultura. A creación deste espazo alternativo gastronómico-cultural vai marcar unha referencia no Barbanza e ofrecéralle aos seus clientes a posibilidade de recrearse entre os sabores e a arte".

Posted via email from Certo.gl, o xornal dixital de Barbanza e Noia

Twitter

Related Posts with Thumbnails Banner: Regale selva tropical