1.11.10

Porto do Son: os comuneiros de Baroña comezan a identificar o gando equino

A Comunidade de Montes de Baroña comezou coa identificación de eguas e cabalos para acatar a lei e baixo unha orde de axudas concedida pola Consellería de Medio Rural

Porto do Son, 1 de novembro de 2010. Segundo informa Ovidio Queiruga González, presidente da Comunidade de Monte de Baroña, "esta medida de identificación estaba sendo demandada pola Comunidade de Montes de Baroña dende xa foi moito tempo debido a que esta comunidade está a facer grandes esforzos e investimentos para o control do gando que se atopa no monte". Agora hai varios peches habilitados para a estadía de eguas e cabalos en semiliberdade coa finalidade de limpar o monte mediante o silvopastoreo, e deste xeito evitar que os cabalos galopen sen control polo monte, co conseguinte problema que supón se provocan danos a terceiros (accidentes nos camiños, entradas nas leiras de particulares, desfeitas nas colleitas e demais).

A egua "Pastora", apadriñada polo alcalde

      A implantación do microchip nos animais que se atopan dentro dos peches da Comunidade comezou hoxe, 1 de novembro, e repetirase noutra xornada máis debido ao elevado número de reses a identificar. Neste primeiro acto de identificación dos cabalos asistiron varios comuneiros e veciños da parroquia e foron convidados o Alcalde e a Tenente Alcalde do Concello de Porto do Son, invitados pola directiva da Comunidade para presenciaren in situ o proceso de recollida dos animais, así como a implantación do microchip e a identificación das novas crías. O alcalde de Porto do Son, Xoán Pastor Rodríguez Santamaría, apadriñou un exemplar de Pura Raza Galega, unha euga á que se nomeou “Pastora”, na súa homenaxe.

Comuneiros identificando gando cabalar nun curro de Baroña
     Esta actuación está promovida pola Consellería de Medio Rural para ordenar o sector equino mediante a implantación de microchips do tamaño dun gran de arroz, que se coloca no terzo superior esquerdo do pescozo do cabalo, e que a través dun letor electrónico, permite coñecer todos os datos de identificación do cabalo así como o responsable da explotación á que pertence.

     Debido ao  convenio de colaboración asinado entre a Consellería de Medio Rural e o Consello Galego de Colexios Veterinarios, o acto clínico de identificación dos cabalos e o material utilizado polos veterinarios para a colocación do microchip está subvencionado nun 90%, co fin de compensar os gastos derivados desta obriga legal.

Relacionada:

Baroña: marcados a ferro en pleno século XXI

Posted via email from Certo.gl, o xornal dixital de Barbanza e Noia

Noia: 600.000 euros para 80 novas prazas de amarre no porto de Testal

As obras, cuxo anuncio de adxudicación se fixo hoxe, consisten na demolición e retirada dunha das ramplas de varada do porto, na ampliación das liñas de pantalán existentes e nunha dragaxe


Noia, 1 de novembro de 2010.- O ente público Portos de Galicia anunciou no Diario Oficial de Galicia a adxudicación definitiva das obras de ampliación das instalacións para embarcacións menores no porto do Testal, en Noia. O presuposto de adxudicación é de 691.724,14 euros e o prazo de execución de seis meses.

Actualmente existe unha instalación de pantaláns en forma de peine que serven de atraque para as embarcacións menores. Debido ao incremento crecente do marisqueo nos bancos próximos ao porto é necesario dotar a Testal de máis prazas de amarre para soportar a actual flota.

As obras consisten basicamente na demolición e retirada dunha das ramplas de varada do porto e na ampliación das liñas de pantalán existentes. Esta rampla non é necesaria debido a que coa outra existente, que cobre as necesidades do porto e as descargas realízanse principalmente a través do pantalán. Os pantaláns a ampliar servirán para dotar a estas instalacións portuarias de mais prazas de amarre para embarcacións menores. Finalmente realizarase unha dragaxe de mantemento de calados e pecharase a zona da rampla demolida cun peirao semellante ao existente.

A rampla actual de 58 metros de lonxitude e vinte de ancho, será demolida a escavarase nesa zona para acadar os dous metros de calado. Ademais realizarase unha reposición de calados ata un metro na zona próxima ás ramplas, sendo o volume total a dragar de preto de mil metros cúbicos.

Debido ao incremento de embarcacións maiores de 6 metros remodelarase unha das caras dun dos pantaláns transformando as prazas para embarcacións de 6 metros de eslora en prazas de 7 metros. Ademais da remodelación deste pantalán ampliaranse outros tres en 37 metros de longo. Con esta remodelación créanse 80 prazas de amarre para embarcacións menores repartidas en 51 prazas de 6 metros e 29 de 7 metros. Todas as prazas irán dotadas de brazos de amarre e terán as instalacións necesarias tanto de auga e alumeado como de seguridade. O peirao cubrirá a zona de arranque da rampla demolida e dará continuidade ao actual peirao. Este tramo terá unha lonxitude de 20 metros e dous de calado, para o que será necesario facer unha dragaxe en gabia para acadar as cotas adecuadas.

Posted via email from Certo.gl, o xornal dixital de Barbanza e Noia

Twitter

Related Posts with Thumbnails Banner: Regale selva tropical