Presentación en Ribeira
Posted via email from Certo.gl, o xornal dixital de Barbanza e Noia
8.4.11
Boiro: o ribeirense Carlos Callón presenta "En castellano no hay problema" o 29 de abril
Presentación en Ribeira
Compártelo
A Pobra do Caramiñal: o conselleiro de Industria visitou Congalsa
A Pobra do Caramiñal, 8 de abril de 2011. A visita do conselleiro de Industria da Xunta de Galicia, Javier Guerra, esta mañá a Congalsa xerou unha nota de prensa por parte do equipo de goberno do PP que reproducimos de xeito íntegro e sen responsabilizarnos -non podía ser doutro xeito- de que dita nota incumpra a reformada Lei Electoral nalgúns párrafos, xa que nestas datas non se pode fachendear do feito ou por facer, aínda que estamos a ver que todas as formacións se saltan á lixeira a normativa e logo aínda lle queren botar a culpa aos mensaxeiros -neste caso os medios de comunicación-. Nota do equipo de goberno (PP) da Pobra:"Esta mañá o Conselleiro de Economía e Industria, Javier Guerra acompañado do Alcalde de A Pobra do Caramiñal visitou a factoría de CONGALSA no Polígono Industrial de A Tomada, a chegada a mesma estaban esperando o Director Xeral de CONGALSA, D. Luis Miguel Simarro, o Presidente da entidade do Polígono Industrial de A Tomada, D. Manuel Durán o Presidente da Asociación de Empresarios de A Pobra , D. Manuel Tomé e o concelleiro delegado de Industria, D. Manuel Fontao e o RRII de CONGALSA, D. Ramón Doval. Nas súas declaracións o Director Xeral de CONGALSA, destacou o esforzo do Concello de A Pobra do Caramiñal, na ampliación do Polígono Industrial, xa que na mesma a empresa ampliará a factoría número 4 en 10.000 m2 . O Alcalde da Pobra do Caramiñal, Isaac Maceiras, destacou que esta empresa é pioneira no I+D+I , unha empresa que traballa nas novas tecnoloxías e que está empezando a ampliar o seu horizonte no estranxeiro.Destacou tamén que coa Ampliación do Polígono Industrial de A Tomada, está empresa ampliará a súa factoría o que redundará na Creación de novos postos de traballo, dato moi significativo para A Pobra do Caramiñal nestes momentos de crise económica e cos datos de paro máis altos da historia do noso país. Sinalou tamén que desde a Alcaldía de A Pobra e desde a Xunta de Galicia, están e estarán sempre ao lado dos empresarios que apostan polas novas tecnoloxías e a innovación, así como pola creación de postos de traballo. O Conselleiro de Economía e Industria, Javier Guerra, dixo que esta era unha visita moi desexada e que se sentía moi honrado de visitar esta fábrica, ademais nestes momentos de crises é bo escoitar a un empresario dicir que vai crecer, ampliar horizontes, manter postos de traballo e incluso atreverse a crear novos postos. A innovación significa apostar por novos produtos ao mesmo tempo que incrementar a produtividade, dixo, a innovación empresarial hacia o mundo da internacionalización está crecendo neste aspecto e a consellería sempre apostará polos empresarios que estean dispostos a facelo. Xa que isto nos permite crecer e competir. Esta empresa conta con 300 postos de traballo, trescentas familias, que están seguras do seu futuro, grazas ao crecemento da súa empresa.Os empresarios saben que desde a Consellería creouse un novo plan I2C ( investigación, innovación e crecemento ) [….O eixo estratéxico do I2C baseado na innovación empresarial fai énfase na promoción da innovación aberta, coa que os procesos de innovación saen dos departamentos de I+D das empresas para dar lugar a procesos baseados na colaboración. Ademais, o novo Plan contempla novas figuras de soporte á creación de empresas de base tecnolóxica e de apoio económico a proxectos de innovación que transcenderán o mero ámbito da subvención implicando o desenvolvemento doutros axentes e instrumentos de financiamento, todo isto a través de 19 liñas de actuación. O conselleiro continuou a súa intervención facendo referencia ao empeño que o Alcalde puxo na Ampliación do Polígono Industrial de A Tomada para que fora unha realidade e o que disfruta explicando o crecemento do Polígono, das empresas e o significado que iso ten para A Pobra do Caramiñal. Explicou tamén que os empresarios e comerciantes saben que teñen a Consellería á súa disposición para explicarlles as propostas que teñen cara as súas empresas e as novidades para as mesmas".
Posted via email from Certo.gl, o xornal dixital de Barbanza e Noia
Compártelo
Ribeira: Pepe Hombre e Sergio Contremo colgan as fotos de "Crear sen límites" no auditorio ata o 20 de abril
Ribeira, 8 de abril de 2011.- A Sala Alta do Auditorio Municipal acubilla dende esta semana e ata o próximo 20 de abril a exposición colectiva de fotografía “Crear Sen Límites”. Producida por Noelia González, esta mostra recolle arredor de trinta creacións dos artistas Pepe Hombre e Sergio Contremo. Cabe destacar que tanto a produtora Noelia González como Pepe Hombre son de orixe ribeirense. Ambos formáronse na Escola de Imaxe e Son da Universidade da Coruña, centro ao que asistiu igualmente Sergio Contremo, natural de Salvaterra de Miño. Entre outros traballos, no currículo de Pepe Hombre (nacido en 1984) figuran traballos como fotógrafo/retratista para bandas de música ben coñecidas por estes pagos, como A Compañía do Ruído, Tevra, Rasa Loba, Mongollica, Rever ou Fisfuchin Hotel. Tamén ten realizado ilustracións para o libro “Leyendas de Aozora” e pinturas en lenzo destinadas a tendas e pequenas galerías. En canto a Sergio Contremo, ten participado en exposicións celebradas en Val de Mahía (Ames, Brión) e na Coruña, e realizado os books de diferentes modelos de Galicia. A exposición está aberta de luns a venres de 11 a 14 horas, e martes, mércores e sábados, de 19 a 21 horas.
Posted via email from Certo.gl, o xornal dixital de Barbanza e Noia
Compártelo
Rianxo: os nacionalistas reclaman o arranxo de dúas pontes do paseo do río Té
Rianxo, 8 de abril de 2011. O Bng de Rianxo reclama o amaño de dúas pontes de madeira derrubadas polas enchentes do inverno e que afectan ao paseo fluvial do río Té. "Xunto a iso é preciso acometer unha limpeza xeral, especialmente nalgunha zona onde a vexetación chega a cegar o camiño. Coa chegada do bo tempo e comezar a saír as familias a gozar do paseo polo río faise necesario agora acometer esa limpeza e os arranxos e recolocación das estruturas movidas pola enxurrada", conclúen os nacionalistas.
Posted via email from Certo.gl, o xornal dixital de Barbanza e Noia
Compártelo
Ribeira: do 18 ao 20 de abril, campamento urbano para conciliar vida familiar e laboral
É de balde, aberto a nenos de 6 a 12 anos, cun total de 100 prazas Ribeira, 8 de abril de 2011.- “Que os nenos se sintan por uns días donos da cidade”: ese é un dos obxectivos cos que, segundo explicou hoxe o edil Vicente García Rivas, a Concellería de Xuventude pon en marcha un Campamento Urbano durante as primeiras datas da Semana Santa. Así, esta Área Municipal organiza para os días 18, 19 e 20 de abril esta actividade dirixida a rapaces de entre 6 e 12 anos, coa finalidade adicional de que os pais poidan conciliar a súa vida familiar e laboral nuns días que teñen carácter laboral pero non lectivo. Dende hoxe mesmo os interesados poden inscribir aos seus fillos no campamento, que funcionará entre as 9 e as 17 horas (se ben os pais poderán levar aos seus nenos coa xornada xa iniciada). Hai 100 prazas en oferta, que serán cubertas por orde de inscrición. A asistencia é gratuíta.
Aínda que o campamento estará centralizado no pavillón polideportivo de Coroso, o conxunto da cidade vai ser o eixo central do mesmo, de xeito que, salvo mal tempo, a gran maioría das actividades e xogos programados realizaranse en prazas, rúas, parques e praias de Riveira. Ademais, os nenos terán oportunidade de coñecer diversas instalacións municipais, como as recentemente inauguradas Casa Museo Municipal e Sede da Policía Local ou a propia Casa do Concello. Cómpre dicir que os nenos deberán traer a súa propia comida. Estes estarán en todo momento acompañados por 20 monitores en actividades de tempo libre (é dicir, o dobre do que marca a lei). Para inscribirse no campamento ou ben obter máis información, hai que dirixirse á Área de Xuventude (preguntar por Mario Vidal) sita no Auditorio Municipal (teléfono: 981 835 650; e-mail: xuventude@riveira.com). Pódese descargar documentación dende a propia páxina web.
Museo e novas dependencias policiais
Aínda que o campamento estará centralizado no pavillón polideportivo de Coroso, o conxunto da cidade vai ser o eixo central do mesmo, de xeito que, salvo mal tempo, a gran maioría das actividades e xogos programados realizaranse en prazas, rúas, parques e praias de Riveira. Ademais, os nenos terán oportunidade de coñecer diversas instalacións municipais, como as recentemente inauguradas Casa Museo Municipal e Sede da Policía Local ou a propia Casa do Concello. Cómpre dicir que os nenos deberán traer a súa propia comida. Estes estarán en todo momento acompañados por 20 monitores en actividades de tempo libre (é dicir, o dobre do que marca a lei). Para inscribirse no campamento ou ben obter máis información, hai que dirixirse á Área de Xuventude (preguntar por Mario Vidal) sita no Auditorio Municipal (teléfono: 981 835 650; e-mail: xuventude@riveira.com). Pódese descargar documentación dende a propia páxina web.
Posted via email from Certo.gl, o xornal dixital de Barbanza e Noia
Compártelo
Arqueoloxía: o Diario Oficial de Galicia recolle hoxe no rexistro de Bens de Interese Cultural varias antas e pedras fitas de Boiro, Noia e Ribeira
A Casota do Páramo, en BoiroBarbanza-Noia, 8 de abril de 2011. A Lei de Patrimonio estatal, de 1985, declaraba por defecto Ben de Interese Cultural calquera mostra de arte rupestre pero en Galicia aínda non se fixera o catálogo completo destes bens. Hoxe, o diario oficial de Galicia publica unha listaxe dos 33 depósitos megalíticos con pinturas deste tipo que se incorporan ao Rexisto de Bens de Interese Cultural da Comunidade. En total son 28 cámaras megalíticas e 5 pedras fitas. Entre elas destacan a Casota do Páramo e a Arca de Barbanza, en Boiro; a Cova da Moura, en Argalo, Noia; e o menhir de Cristal ou Bretal, en Ribeira.
Cova da Moura en Argalo (Noia) Na provincia da Coruña enuméranse as cámaras megalíticas da Arca do Barbanza e da Casota do Páramo en Boiro; a Anta da Mina de Parxubeira en Mazaricos; a Cova da Moura ou Dolmen de Argalo en Noia; o Forno dos Mouros en Toques; a Casa dos Mouros ou Pedra da Arca na zona entre Vimianzo e Dumbría; a Arca da Piosa ou Pedra da Arca entre Vimianzo e Zas; e a Anta de Serramo ou Pedra da Lebre, a Casota de Berdoias, a Pedra Cuberta e a Pedra da Moura integramente no Concello de Vimianzo. Asemade inclúese o Menhir de Cristal ou Bretal en Ribeira. Dentro da provincia de Lugo, inclúense neste rexistro de BICs os xacementos da Medorra número 1 de Acebedo en Outeiro de Rei e a Roza das Modias en Vilalba como cámaras megalíticas; así como o Menhir do Alto da Goia de Guntín e a Pedra de Chantada de Vilalba como pedras fitas. Na provincia de Ourense figuran a Mámoa número 1 da Serra das Motas de Lobeira e a Mota Grande número 1 de Verea como cámaras megalíticas; e a Pedra Alta de Cortegada ou Pedra Grande de Antela nos Concellos de Sarreaus, Vilas de Barrio e Xunqueira de Ambía como menhires ou pedras fitas. Na provincia de Pontevedra inclúense as cámaras megalíticas de As Namelas 2 e 3; a Chaira do Medio e a Mámoa dos Muíños en Agolada; a Mámoa da Cruz en Lalín, o Chan de Castiñeiras 2 ou Mámoa de Pedralonga en Marín; a Casiña da Moura en Meis; o Chan de Arquiña en Moaña; a Anta do Meixueiro ou Meixoeiro en Mos; o Coto dos Mouros en Rodeiro; a Mámoa do Rei ou Chan de Castiñeiras 1 en Vilaboa; e a Anta 1 Chan dos Touciños, a Casa dos Mouros e a Mámoa do Monte Vixiador en Vigo. Asemade, tamén é obxecto de catalogación BIC o menhir da Lapa de Gargantas no Concello de Moraña.Vía
Posted via email from Certo.gl, o xornal dixital de Barbanza e Noia
Compártelo
Lousame: organizan a II Marcha BTT o vindeiro sábado 30 de abril
Lousame, 8 de abril de 2011. O club de BTT "O Treito", de Lousame, en colaboración co Concello, organizan a "II Marcha Cicloturista Btt Concello de Lousame" que terá lugar o Sábado 30 de Abril de 2011 pola tarde. A ruta será de dificultade técnica e física de nivel alto e terá unha distancia aproximada de 40 km dos cales 2 serán por estrada asfaltada (a maioría o comezo) e o resto por sendeiros, trialeiras e pistas de terra. Realizarase un avituallamento líquido sen paradas e un segundo líquido e sólido aproximadamente no km 20 na ermida de San Cristovo (Ces), ao remate poderán disfrutar duns petiscos e algunha sorpresa máis (en especial para as mozas que se apunten) no Polideportivo Municipal.
A entrega de dorsais e firma de estatutos realizarase a partir das 15:00h ata as 15:45h no "Polideportivo Municipal Pilar Barreiro Senra" que se sitúa a 1 km do Concello de Lousame. Saída ás 16:00 h.
Para apuntarse poden chamar ó teléfono 981 820 494 (de Luns a Venres de 9:00 a 14:00) ou ben na dirección de correo electrónico deporteslousame@gmail.com indicándonos nome e apelidos, d.n.i., teléfono e lugar de procedencia con data límite o 27 de abril. O límite de inscrición será de 300 participantes e a cota de inscrición terá un módico prezo de 5 euros (federados e non federados) a ingresar no número de conta 2091 0381 71 3040003248 do noso Club "BTT O TREITO LOUSAME" en NovaCaixaGalicia ou ben o mesmo día da marcha a un prezo de 7 euros.
NOTA: O RESGARDO DEBE LEVARSE PARA ENTREGAR NA RECOLLIDA DE DORSAIS.
A inscrición da dereito á participación, a un regalo, servizo de lavado de bicicletas e duchas, servizo de recollida de bicicleta en caso de avaría, ambulancia e varios sorteos que se farán na organización ao finalizar a proba.
REGULAMENTO “II MARCHA BTT CONCELLO DE LOUSAME”
1. O Concello de Lousame e o clube btt O Treito, organizan a II Marcha BTT Concello de Lousame que terá lugar o sábado 30 de abril, cun percorrido de 40 km. de dificultade técnica e física alta. A mesma será de carácter non competitivo. A saída terá lugar ás 16:00 horas no “Polideportivo municipal Pilar Barreiro Senra” en Lousame, situado a 1 km da Casa do Concello .
2. Poderán participar na ruta todas aquelas persoas que realizaran axeitadamente o proceso de inscrición.
3. O prazo de inscrición finalizará o día 27 de abril ás 14:00 horas, ou una vez inscritos 300 participantes. A inscrición farase efectiva mediante chamada telefónica ó número 981 820494, ou ben enviando un correo electrónico a deporteslousame@gmail.com onde figurarán o nome e apelidos, data de nacemento e DNI dos participantes. A cota de inscrición, será de 5 € a ingresar na conta do Clube btt O Treito en novacaixagalicia 2091 03081 71 3040003248. No caso de pagar en man o mesmo día da proba o prezo será de 7€ A inscrición dará dereito á participación na proba, e incluirá os avituallamentos, un agasallo, servizo de lavado de bicicletas, servicio de ambulancia, e servicio de recollida no caso de avería. Só serán considerados participantes aqueles que realizaran a inscrición correctamente e leven o dorsal visible en todo momento. O devandito dorsal será facilitado pola organización.
4. A concentración e entrega de dorsais terá lugar a partir das 15:00 horas, do sábado 30 de abril de 2011 no Polideportivo Municipal Pilar Barreiro Senra. A saída efectuarase ás 16:00 horas. A recollida de dorsais farase de xeito individual, presentando DNI.
5. O emprego do casco é obrigatorio, e non levalo implica a retirada do dorsal e da marcha. O Clube btt O Treito non se fai responsable dos accidentes, nos que puidera ser causa, a neglixencia dos participantes, así como os danos que estes puideran ocasionar durante a realización da marcha.
6. O percorrido da proba transcorre na súa maior parte por camiños rurais e forestais do Concello de Lousame, existindo cruces con tramos de estradas, que se atopan abertos ao tráfico para outros usuarios polo que se deberá extremar a precaución por parte dos participantes, respectando as normas de circulación contidas na Lei de Seguridade Vial e no Regulamento Xeral de Circulación.
7. Todos os participantes deben respectar o entorno por onde transcorre a proba, quedando terminantemente prohibido tirar lixo en todo o recorrido a excepción dos contedores situados nos puntos de avituallamento.
8. En todo momento respetaranse e acataranse as ordes e directrices do director da marcha, non sobrepasando en ningún momento ó vehículo que abre a mesma, o cal será obxecto de descalificación inmediata.
9. A Organización contará con servizo de ambulancia, a disposición dos participantes, ao igual que dun Seguro de Responsabilidade Civil, non facéndose responsable de ningún accidente nin gastos fora desta cobertura, debendo entenderse que os participantes inscritos asumen e coñecen os riscos do BTT.
10. A organización resérvase o dereito a modificar a presente normativa, así como a modificación do percorrido, quilometraxe e data da proba.
11. O feito de inscribirse na proba, supón a aceptación total do presente regulamento.
Posted via email from Certo.gl, o xornal dixital de Barbanza e Noia
Compártelo
Ribeira: obradoiro de xestión do dó, no Centro de Información á Muller
Fotograma de "Sobre a morte do Bieito", de Xudit Casas Ribeira, 8 de abril de 2011. O Centro de Información á Muller de Ribeira (CIM) pon en marcha para esta un Obradoiro sobre Xestións Emocionais do Dó.
A finalidade desta iniciativa é a prevención de situacións de crise emocional que desencadeen en patoloxías ou recaídas psiquiátricas (depresión, ansiedade ou os seus síntomas: illamento social, somatizacións, problemas alimenticios, etc.), co resultado de mellora do equilibrio emocional da persoa, da súa estabilidade.
A actividade celebrarase todos os xoves, dende o 14 de abril ata o mes de xuño. O lugar no que se desenvolverá o taller serán as Aulas que os Servizos Sociais teñen na rúa Cristóbal Colón. O horario será de 11 a 12.30 horas.
Os obxectivos son:
- Coñecemento da terminoloxía do que é o dó (Dor ou aflicción que se sente por algo. Dó pola morte dun ser querido), as súas fases, as características os seus síntomas, os tipos.
- Dotar de ferramentas ou técnicas de xestión emocional para poder pasar as situacións de dó (en xeral)
- Previr estados de crise –por situacións de perda, etc – co aprendido no obradoiro.
- Aprender a expresar unha mala noticia a un menor e manexar o control de emocións que isto xera, sen que as desborde e xere medo e indefensión no menor.
Hai 22 prazas. Inscricións no CIM de Ribeira (preguntar á psicóloga: Ángeles Pazos).
Posted via email from Certo.gl, o xornal dixital de Barbanza e Noia
Compártelo
Ribeira: Corrubedo acolle o Xoves Santo, 21 de abril, o Kurrala Rock 2011
Ribeira, 8 de abril de 2011. Pensabamos que só había dous festivais este mes -que xa é unha barbaridade para abril- e faltounos o Festival de Punk-Rock por excelencia do Barbanza, o Kurrala Rock 2011, con concertos aos que xa lle gustaría a Chuck Norris -dinos a organización que non vén por problemas de axenda- escoitar.
O Kurrala Rock conta desta volta con cinco bandas galegas e unha de Euskadi que van atronar nun campo de fútbol no que haberá 16 metros de escenario, 15.000 watios de son, 60.000 de luces e litros e litros de bebidas espirituosas -sede responsables coa vosa sede- para que a noite sexa caralluda. Comezan ás nove da noite e, como é lóxico, non aventuran hora de remate. Haberá varios técnicos profesionais de sonido e luces para que todo vaia como debe ser (a pedir de Milhouse), haberá barra para refresca-la gorxa a prezos económicos (populares non se pode dicir que estamos en precampaña electoral) e ampla zona para aparcar. Tamén, para o bandullo, haberá bocatas, que non todo vai ser beber, galopíns. O que non se mova en coche nin furgalla hippie pode coller un bus desde Ribeira ás 19.20 e 21.35 (neste último chegaredes tarde, informais). Para os máis finos, o teléfono da parada de taxi de Ribeira é 981 87 04 66 e o do Radio Taxi, 636 27 37 27. Que podemos dicir das bandas que tocan?SUTURA (Basque Punk Legends), TRINTXERPE-EUSKAL HERRIA é unha banda que leva máis de 10 anos pateándose os principais escenarios de festivais, gaztetxes e prestixiosas salas, tanto de Euskal Herria con do resto do estado. Compartindo escenarios con U.K.SUBS, GATILLAZO, VOMITO, ENVIDIA KOTXINA, LEHENDAKARIS MUERTOS, ANTI-REGIMEN e outros grupos cañeiros (potentes, non que tomen cañas).Acaban de chegar de Inglaterra para presentar en exclusiva para KURRALA ROCK o seu novo cd: "SUEÑOS PODRIDOS". Será o seu primeiro concerto en Galicia dentro da xira que o o grupo ten previsto facer nestas datas. COMPAÑIA DO RUIDO (mestizaxe), de Galicia. É unha formación multitudinaria con gran éxito en todo o panorama musical galego. Foi a primeira banda que tocou no Kurrala alá polo ano 2003. Oito anos máis tarde, e despois de percorrer centos de escenarios e verbenas por todo o país cun espectáculo á altura dos máis grandes, veñen presentar o seu novo traballo discográfico. Arrasan por onde pasan e non deixan títere sen bailar a ritmo de SKA-PUNK-REGGAE...tamén se deixan levar pola música tradicional, os ritmos balcánicos, cha cha cha, rock&roll...Mes-ti-za-xe en estado puro. INLLORFEIS (hardcore/punk) KORRUBEDO-TIERRA DE FUEJO. É o grupo residente do festival Kurrala. Tocaron en tódalas edicións desde que o KURRALA se facía no patio dunha casa. Tamén veñen presentando o seu novo traballo "ALPABARDA", así como a un novo membro na banda. Este cd levounos de xira por EUSKADI. Tamén estiveron facendo varios concertos por Galicia, así como varias entrevistas para diversos medios;como a participación no programa PLANETA FURANCHO da RADIO GALEGA. Tamén en CERTO, Radio Boiro... THE SIBERETS(rock alternativo) RIBEIRA/POBRA DO CARAMIÑAL.
Foron gañadores do I CONCURSO ABERTO DE BANDAS organizado por KURRALA ROCK e a A.C. BASTANTES LLON. Despois de chegar moi lonxe en concursos moi prestixiosos a nivel nacional, como o EISV LIVE MUSIC, chegan ao festival presentando o seu primeiro traballo discográfico.Trala súa actuación no certame Kurrala e o concerto que deron na II NOITE KURRALEIRA, este grupo ganouse a pulso ser unha das primeiras confirmacións para o KURRALA´11. GENERAZIÓN PERDIDA (punk de toda a vida), de RIBEIRA.
Esta xoven banda ribeirense está dando moito que falar no panorama musical local. Participaron na maioría dos concertos organizados polas principais asociacións ribeirenses. Versionan grandes clásicos do punk estatal intercaladas con cancións de colleita propia. Actualmente están compartido unha especie de xira con INLLORFEIS. A ambos grupos gústalle tocar xuntos e non dubidan en facelo sempre que poden a berro de: ABRIIMOS NOOS!!! Entón, nena, neniño: valo perder? E pode que tamén teñas máis gañas de festa ao ler:
Concerto: o 22 de abril, Sutura, Inllorfeis e Curva á eskerda
- Ribeira: en abril, máis música que nunca
Posted via email from Certo.gl, o xornal dixital de Barbanza e Noia
Compártelo
A Pobra: o instituto de Valmiñor, de Nigrán (Pontevedra) visitou o Museo de Valle Inclán
A Pobra, 8 de abril de 2011. O xoves 6 de abril chegou un novo grupo ás instalacións do Museo Valle-Inclán da Pobra do Caramiñal: nesta ocasión foi un colectivo formado por 40 persoas, entre alumnos e mestres que, procedentes do centro de ensinanza I.E.S. de Valmiñor, da localidade de Nigrán, percorreron os lugares máis emblemáticos do centro da Pobra relacionados co escritor (Villa Eugenia, Farmacia Tato, Pazos do Couto e Aguiar), para logo ser recibidos na Torre de Bermúdez e conducidos pola técnica Begoña Olveira a través das distintas dependencias do Museo.
Unha nova visita terá lugar este sábado día 9 pola tarde: ao Museo Valle-Inclán de A Pobra chegará un grupo de 20 persoas que a partir das 17:45 h. poderán disfrutar do edificio e o seu contido a través dunha percorrido guiado que os achegará ao insigne escritor galego en castelán.
Posted via email from Certo.gl, o xornal dixital de Barbanza e Noia
Compártelo
Dodro. o PP acusa ao bipartito de ocultar información sobre as contas de 2009
Cren que o Concello de Dodro está máis endebedado do que recoñece o equipo de goberno
Dodro, 8 de abril de 2011. O pasado día 1 de abril celebrouse no Concello de Dodro a sesión da comisión de contas para aprobar as contas do ano 2009. Segundo explican os do Grupo Municipal do PP en Dodro en nota de prensa, "unha vez máis o alcalde socialista, Arturo Díaz, e a tenente-alcalde do Bloque, Vitoria Rei, coa colaboración do secretario substituto, ocultaron toda a información posible ós concelleiros do Partido Popular. Se ben a lei marca claramente que a información das contas do Concello deben estar a disposición dos concelleiros 15 días antes, os representantes do Partido Popular a recibiron tan só 10 minutos antes de dar comenzo a reunión da comisión". Segundo os conservadores dodrenses, "tanto a Rei Mariño como Arturo Díaz deron por boa a reunión a pesar de pisotear unha vez máis o elemental dereito á información, e todo iso coa intención de agochar a dramática situación financeira pola que está a pasar o Concello de Dodro, tal e como vén denunciando dende o Partido Popular. Así, se ben no ano 2008 o déficit foi de -135.000 euros, no ano 2009 o desfase orzamentario foi de -157.000 euros segundo a información facilitada polo propio goberno PSOE-BNG aínda que o Partido Popular ten sospeitas de que en realidade é moi superior. Pero é que ademáis o remanente de tesourería reflicte un déficit de -198.000 euros, o que significa que existe un desfase entre gastos comprometidos e a financiación de máis de 500.000 euros como mínimo". Continúan os do PP, na oposición, denunciando que "a situación aínda é máis preocupante, se se ten en conta que os saldos en contas correntes do Concello de Dodro descenderon en máis de 250.000 euros en tan só un ano, e a pesar de que segundo Rei Mariño o noso concello recibira moitas subvencións. O máis grave é que estes datos refírense ó ano 2009, e aínda falta por coñecer a realidade do ano 2010 no que as subvencións e axudas víronse reducidas por causa da crise económica mentres os gastos do goberno PSOE-BNG non deixaron de medrar. O desfase económico a día de hoxe podería acadar o medio millón de euros o que equivale á capacidade de inversión do Concello durante ano e medio". Conclúen os populares que "tal e como xa fixo o goberno Touriño-Quintana na Xunta de Galicia, o goberno Díaz-Rei Mariño volve facer o mesmo sen importarlle o máis mínimo os intereses dos nosos veciños e están conducindo ao noso concello a unha situación que requirirá dun enorme sacrificio para poder saír adiante".
Posted via email from Certo.gl, o xornal dixital de Barbanza e Noia
Compártelo
Ribeira: o instituto Coroso celebra a súa III Semana da Ciencia do 11 ao 15 de abril e convida a científicos televisivos
O corrector de números de "Cifras e Letras", Jorge Mira, dará un paseo polos bordes da ciencia cercana. Os interesados tamén poderán aprender que é o grafeno ou os fullerenos.
Ribeira, 8 de abril de 2011. Un ano máis o instituto de ensino secundario Coroso celebra a súa “Semana das Ciencias”, que chega á terceira edición e está organizada polos departamentos de Matemáticas, Física e Química, Bioloxía e Tecnoloxía.Durante unha semana (do 11 ó 15 de Abril), desenvolveranse no instituto diferentes actividades: conferencias, proxeccións de documentais e películas, exposicións, talleres e visitas , todas elas encamiñadas a divulgar o mundo científico ós rapaces fóra do ambiente das clases.
Contarán coa presenza do profesor Jorge Mira Pérez, catedrático de Física e director do programa CONCIENCIA da USC, que impartirá a conferencia “Un paseo polos bordes da ciencia cercana”. Mira, que acaba de publicar un libro, é coñecido tamén pola súa participación no concurso "Cifras e letras", da TVG, na que, xunto a Iolanda Castaño, exercía como corrector dos concursantes.
Fernando Fernández Domonte do INTECMAR falará do “Programa de control da calidade do medio mariño en Galicia”. Haberá tamén unha charla de Francisco Sóñora do Proxecto Climántica: “Fontes e vectores enerxéticos”.
O profesor de Física da Materia Condensada da USC, Jesús Mosqueira Rey falará dun tema de actualidade: ”As novas variantes do carbono: grafeno, fullerenos e nanotubos”.
O martes día 12 de Abril, os alumnos visitarán a illa de Ons, onde desenvolverán diferentes actividades.
Haberá tamén no centro dúas exposicións: ”Momentos matemáticos”, para promover a apreciación e coñecemento do papel relevante que as Matemáticas desempeñan na Ciencia, na Natureza, na Tecnoloxía e na cultura. A outra exposición , “EXPOMETEORO”, está dedicada ao mundo da Meteoroloxía.
Segundo a organización desta Semana das Ciencias, "na sociedade de hoxe en día preténdese que o alumnado teña cada vez máis unha cultura máis ampla. Tendo en conta a optatividade do ensino da ciencia, hai alumnado que remata a educación secundaria con moi pouca cultura científica, mentres que a sociedade reclama unha alfabetización científica cada vez máis ampla como factor estratégico do desenvolvemento das persoas. Por esta razón, entendemos que a Semana das Ciencias constitúe unha plataforma de divulgación científica non formal que pode axudar ó estudantado a acadar unha perspectiva distinta e enriquecedora do coñecemento científico. Dende o IES COROSO esperamos que esta semana volva ser un éxito na participación e satisfacción do noso alumnado, para potenciar deste xeito a súa formación integral como cidadáns".
Posted via email from Certo.gl, o xornal dixital de Barbanza e Noia
Compártelo
Suscribirse a:
Entradas (Atom)
