Barbanza, por Certo: 01/08/11

1.8.11

Boiro: convocado o V certame fotográfico "Os habitantes de praia" para o sábado 13 de agosto

Bases:

V CONCURSO DE FOTOGRAFÍA “Os Habitantes da praia”

Participantes

Calquera persoa interesada, sexa profesional ou afeccionada á fotografía

Tema As praias de Boiro e o seu entorno

Categorías A- escenas e situacions da xente na praia (xogos infantís, deportes, xantar, baños, ...)

B- natureza (paisaxes, animais, plantas, ...)

C- denuncia medioambiental (obxectos atopados na area, residuos, vertidos na auga, ...)

Obras Cada participante deberá presentar 3 fotografías, unha por cada categoría (A-B-C) : orixinais, inéditas e non premiadas en concursos anteriores.

Formato

Medida tamaño A4 (20x30 cm aproximadamente)

Técnica

Técnica libre en papel fotográfico. En cor ou branco e negro (en todas as súas variantes). Admitiranse retoques dixitais que non manipulen o senso da imaxe.

Presentación

En papel fotográfico e tamaño A4.

No reverso da fotografía poñerase unha lenda que idenficará o sobre pechado a entregar cos datos persoais do autor ou autora: nome, enderezo, teléfono.

No mesmo reverso cada fotografía deberá levar unha indicación da categoría a que pertenece (A. B, C).

Lugar e prazo de presentación

As fotografías deberàn entregarse a organizaciòn entre as 17 h. e as 19 h. do sabado 13 de agosto xunto o campo de volei da praia de Barraña.

Xurado

O xurado será seleccionado pola organización do concurso entre persoas cualificadas para exercer esta función.

O fallo do xurado poderá declarar desertos ou compartidos algún ou todos os premios, así como outorgar mencións especiais se o estimase oportuno.

Premios

Establécense os seguintes premios as millores coleccións de 3 fotografías nas 3 categorías:

Ø 1º premio – Cámara dixital 2º premio 75 € 3º premio 50 € (en vales de compra)

Exposición Mostra fotográfica o aire libre dos premios e unha selección das obras o domingo

14 de agosto no paseo de praia Xardín, entre as 18 h. e as 20 h.

Entrega dos premios as 19´30 h.

Propiedade das obras

As fotografías premiadas quedarán en propiedade do Concello de Boiro. As non premiadas deberán recollerse a partir da clausura do concurso na oficina de Turismo. O Concello de Boiro reservarase o dereito de exposición, reproducción e calquera outro uso non comercial e sempre relacionado coa promoción da cultura e o deporte, das imaxes premiadas no concurso, citando sempre o nome do autor.

Os participantes responsabilízanse de que non existan dereitos a terceiros nas obras presentadas, así como de toda reclamación por dereitos de imaxe. En calquera caso, a organización do concurso queda eximida de posibles conflictos de publicación ou utilización das obras presentadas e dos que poidan derivarse.

Consideracións finais

O xurado será competente para resolver calquera circunstancia non prevista nas bases.

A participación neste concurso implica a aceptación íntegra das súas bases

mais información na OFICINA DE TURISMO DE BOIRO

Posted via email from Certo.gl, o xornal dixital de Barbanza e Noia

Noia: a Xunta di que se corta o carril esquerdo da AC-543 en Sampaio ata o 11S

A estrada neste lugar conta con tres carrís dos cales o da marxe esquerda quedará interrompido durante o período de obras, polo tanto o tráfico discorrerá por os outros dous carrís, un para cada sentido de circulación
A Dirección Xeral de Infraestruturas lembra que se establecerá a sinalización adecuada para anunciar o corte con antelación, garantindo a seguridade viaria no treito no que se restrinxe o tráfico

Noia, 1 de agosto de 2011.- A Consellería de Medio Ambiente, Territorio e Infraestruturas pecha ao tráfico o carril esquerdo da estrada AC-543, en Sampaio (Noia), dende este luns, día 1 de agosto, ata o vindeiro 11 de setembro. O motivo deste corte no intervalo comprendido entre os puntos quilométricos (pq) 27+490 e 27+660 é a execución da conexión entre a variante de Noia e a localidade de Sampaio.

A estrada neste lugar conta con tres carrís dos cales o da marxe esquerda quedará interrompido durante o período de obras, polo tanto o tráfico discorrerá por os outros dous carrís, un para cada sentido de circulación. Para a incorporación dos camións ao carril esquerdo é preciso cortar o tráfico en ambos os dous sentidos simultaneamente, de forma temporal e por corto período de tempo ao longo da duración dos traballos.

A Dirección Xeral de Infraestruturas lembra que se establecerá a sinalización adecuada para anunciar o corte con antelación, garantindo a seguridade viaria no treito no que se restrinxe o tráfico. Durante a ocupación do dominio público e corte de carril adoptaranse as precaucións oportunas para que en ningún caso se produza arrastre de terras á plataforma da estrada.

Variante de Noia
Na actualidade, os traballos de desbroce das obras da Variante de Noia están concluídos e co 90% do saneo en cimentación de terrapléns executados. Tamén a drenaxe transversal está totalmente finalizada, así como o paso de fauna existente. Con respecto ao resto de estruturas, realizáronse sondaxes e estudos xeotécnicos correspondentes ás cimentacións das estruturas. Ao mesmo tempo, tamén se atopa en execución o enlace de Rebordiño, empezando co saneo dos ramais e estanse levando a cabo os traballos de cimentación de servizos afectados eléctricos.

A obra mellorará as comunicacións entre Porto do Son e Muros, permitindo un aforro de 10 quilómetros; e entre Porto do Son e Santiago, reducindo en 4 quilómetros a distancia actual.

Posted via email from Certo.gl, o xornal dixital de Barbanza e Noia

Dodro: curso semipresencial de creación de empresas para mulleres

CARTEL CURSO CREACION EMPRESAS-1.pdf Download this file

Posted via email from Certo.gl, o xornal dixital de Barbanza e Noia

Noia: a Xunta segue empeñada en obter gas do "Gran Burato", fronte ás costas noiesas

Xa van así consignadas dúas expedicións, que custan 1,26 millóns de euros. O conselleiro de Industria di que é necesaria outra ante "o éxito da primeira campaña"
O conselleiro de Economía e Industria asina o convenio que fará posible a posta en marcha da segunda expedición de investigación ao maior volcán submarino do mundo, producido por unha erupción de gas
A segunda centrarase nas tres áreas de interese máis prometedoras, definidas na primeira investigación
Os labores de exploración acotaranse a un área de 1.130 quilómetros cadrados, o que equivale a un cuarto da superficie da Provincia de Pontevedra

Noia, 1 de agosto de 2011.- A Consellería de Economía e Industria tense convertido na promotora das dúas campañas de investigación do Gran Burato, cun esforzo para o financiamento dos labores do equipo de investigadores liderado pola Universidade de Vigo que suma 1,26 millóns de euros.

O conselleiro de Economía e Industria, Javier Guerra, asinou hoxe o convenio de colaboración que fará posible a posta en marcha da segunda expedición de investigación ao maior volcán submarino do mundo, producido por unha erupción de gas, atopado fronte ás costas de Noia.

Javier Guerra salientou que o Goberno galego “apoia as fontes de enerxía autóctonas máis rendibles e limpas” (ignoramos se se refire ao gas ou ao vento) e gabouse de que “a política gasista da Xunta é ambiciosa e está orientada a acelerar o desenvolvemento económico e social de Galicia”, xa que “confía no gas como un recurso enerxético de futuro e máis de presente”.

O titular de Economía adiantou que a segunda campaña de investigación da “morfoestrutura singular”, coñecida como “Gran Burato”, terá como obxectivo a confirmación das evidencias de existencia de gas no subsolo mariño, atopadas no transcurso da expedición levada a cabo nos meses de outubro e novembro de 2010, a bordo do Buque Oceanográfico Sarmiento de Gamboa.

Neste sentido, Guerra explicou que “tras o éxito da primeira campaña”, na que o equipo científico atopou evidencias da presenza de acumulacións locais de gas libre en sedimentos do subsolo profundo e tamén algúns indicios da presenza de hidratos de gas máis próximos, “faise necesaria unha segunda expedición”.

A nova expedición a bordo do Buque Oceanográfico Sarmiento de Gamboa, farase desde o 14 de agosto ao 13 de setembro (28 días), para continuar afondando posteriormente no análise e o estudo dos datos polos investigadores.

Nesta ocasión, a campaña, financiada pola Xunta, centrarase nas tres áreas de interese máis prometedoras, definidas no transcurso da primeira investigación. De xeito que os labores de exploración acotaranse a un área de 1.130 quilómetros cadrados, o que equivale a un cuarto da superficie da Provincia de Pontevedra, nunha zona de traballo que se sitúa a 1.700-2.000 metros de profundidade.

Ademais, o conselleiro destacou a calidade do “excelente equipo de traballo” apoiado pola Consellería de Economía e Industria, que nesta segunda edición continúa a estar liderado polo Grupo de Xeoloxía Mariña e Ambiental da Universidade de Vigo, coa colaboración de diferentes departamentos desta universidade, do Instituto Español de Oceanografía e do seu homólogo francés, así como doutras universidades españolas, francesas e portuguesas.

Antes, en Certo:

Gas: máis cartos para buscalo fronte a Noia

Petróleo ou gas fronte a Noia? A Xunta volve buscar

Ecoloxía: Océana non quere que se busquen hidrocarburos fronte a Noia

See the full gallery on Posterous

Posted via email from Certo.gl, o xornal dixital de Barbanza e Noia

Lousame: visita da nova delegada territorial da Xunta, Belén do Campo, á que o alcalde lle pediu cartos para as penosas estradas

Lousame, 1 de agosto de 2011.- A delegada territorial da Xunta, Belén do Campo, visitou esta mañá o concello de Lousame, onde foi recibida polo alcalde, Santiago Freire. Na reunión de traballo, Do Campo e Freire analizaron a situación dos proxectos que desenvolve a Xunta no municipio.

A máxima representante do Goberno galego na provincia e o rexedor avogaron por continuar coa liña de colaboración e cooperación institucional dos últimos anos e por manter unha comunicación fluída entre ambas administracións para sacar adiante as demandas dos veciños.

Freire aproveitou para trasladarlle a Do Campo as solicitudes do seu Concello ao Executivo autonómico, que pasan fundamentalmente por mellorar a calidade das infraestruturas viarias. A delegada comprometeuse a "estudalas e traballar intensamente" para darlles cumprimento no menor prazo de tempo posible.

A desta mañá foi unha visita institucional enmarcada na rolda de contactos iniciada pola delegada da Xunta na Coruña dende que tomou posesión do seu cargo, momento no que se comprometeu a reunirse cos responsables municipais dos 94 concellos da provincia. Do Campo reiteroulle ao rexedor “todo o apoio, diálogo e cooperación do Goberno autonómico para traballar de xeito coordinado á hora de satisfacer as necesidades dos cidadáns”.

Posted via email from Certo.gl, o xornal dixital de Barbanza e Noia

Ribeira: actuación das corais do Círculo Mercantil e Municipal no auditorio

Ribeira, 1 de agosto de 2011. A Coral Polifónica Municipal de Ribeira e a Coral Polifónica do Círculo Mercantil e Industrial actuaron na Mostra de Música que, enmarcada dentro da programación da Fiestra da Cultura 2011, foi celebrada na tarde do domingo pasado no salón de actos do Auditorio.

Esta instalación municipal encheuse completamente de veciños e visitantes que non se quixeron perder a actuación das dúas corais, dirixidas respectivamente por Enrique Paisal (ex-Los Tamara) e Antonio Fernández.

A Coral do Círculo Mercantil constituíse no ano 1977 e a día de hoxe está composta por unhas 50 voces. Ao longo da súa historia ten participado en cidades galegas como Vigo, Ourense, A Coruña ou Santiago de Compostela e mesmo no país portugués e diversas provincias españolas.

Polo que respecta á Coral Municipal, foi fundada en 1991 e está formada por 40 voces. Ademais de participar no territorio galego e estatal, o elenco ten viaxado a lugares tan afastados como New York e Washington ou Baltimore.

Comezou a actuación de onte a Coral Polifónica do Círculo Mercantil e Industrial e a continuación o fixo a Coral Polifónica Municipal. Ambas formacións puxeron o broche final á sesión cantando en conxunto o Himno Galego.

Entre os asistentes ao espectáculo, presentado por Unai González, estivo presente a concelleira delegada de Cultura do Concello, Elvira Pisos, quen ao finalizar o acto dixo unhas palabras de felicitación ás dúas corais e entregou un agasallo institucional a cada unha, consistente nunha pomba de porcelana cun poema de Rosalía de Castro gravado.

See the full gallery on Posterous

Posted via email from Certo.gl, o xornal dixital de Barbanza e Noia

Ribeira: clausuran o obradoiro sobre novas tecnoloxías do Verán Cultural

Ribeira, 1 de agosto de 2011. – Un total de 26 nenos e nenas participaron durante o mes de xullo no obradoiro de novas tecnoloxías Inforxogo, organizado polo Concello no marco da programación do Verán Cultural.

Para proceder á clausura desta iniciativa, o pasado venres déronse cita na Aula Multimedia, situada no paseo do Malecón, os concelleiros de Cultura e de Enerxía e Novas Tecnoloxías, Elvira Pisos Arnoso e Emilio Pérez Outeiral, respectivamente.

A actividade foi desenvolvida polo axente TIC Abel Alonso, tamén presente no acto de peche, no que os dous edís municipais encargáronse de entregar os correspondentes programas aos rapaces participantes.

See the full gallery on Posterous

Posted via email from Certo.gl, o xornal dixital de Barbanza e Noia

Ribeira: o Bng volta denunciar a perigosidade do amianto na antiga fábrica de Castiñeiras

O anterior goberno do PP fixérase "o tolo" dicindo que non pasaba nada e mesmo o actual alcalde afirmara que o Bng alarmaba sen motivo á poboación
Agora hai no lugar unha empresa especializada na extracción deste perigoso material

Ribeira, 1 de agosto de 2011. O Bng de Ribeira vén de informar que unha empresa especializada procede estes días á extracción conforme á lei dos materiais con amianto da fábrica de Castiñeiras. "O BNG denunciara no seu momento a irresponsabilidade do concello de Ribeira ao permitir (ou promover?) a retirada das planchas de fibrocemento e outros materiais contaminados con este material canceríxeno. Mágoa que o mal xa estea feito en grande parte, pois moitos dos materiais xa foran retirados sen control. Cómpre lembrar que mesmo o candidato” popular”, hoxe alcalde, afirmara que non había perigo e que o BNG “alarmaba á poboación sen motivo”, explican os nacionalistas ribeirenses.

Favoritismos á hora de cumprir a lei

"Como agora se demostra, o BNG tiña razón e o Concello, ademáis de poñer en risco a saúde pública, demostrou que a lei so se lle aplica a quen convén. E recoñecerá agora tamén o actual rexedor que “daquela se equivocou”? Ou non se equivocou e actuou en base aos seus intereses electorais?", conclúen.

Máis información:
Solicitan a retirada inmediata dos cascallos da Fábrica de Castiñeiras polo risco que o amianto que conteñen supón para a saúde pública

O Goberno do PP pon en perigo á cidadanía consentindo unha demolición ilegal

Posted via email from Certo.gl, o xornal dixital de Barbanza e Noia

Ribeira: Fernández Pazos presentou en rústica o seu libro sobre o naufraxio do Santa Isabel

A publicación foi presentada polo autor o pasado venres na Sala Museo
O autor rescatou a historia do afundimento do correo vapor Santa Isabel neste libro porque se estaba a perder entre rumores e lendas

Ribeira, 30 de xullo de 2011.- Coincidindo co 90º aniversario do afundimento do vapor correo Santa Isabel, o escritor e xornalista ribeirense Xosé María Fernández Pazos acaba de publicar unha reedición revisada do seu libro “Sálvora. Memoria dun Naufraxio. A traxedia do Santa Isabel”, cuxa primeira edición data de 1998 e hoxe non se da atopado.

Para presentar a reedición acudiu na tarde do venres pasado á Sala Museo Municipal o autor, onde foi recibido polo alcalde Manuel Ruiz e pola concelleira de Cultura Elvira Pisos (tamén estaba prevista a participación no acto de Alfonso Cabaleiro, secretario xeral de Medios da Xunta, pero finalmente non puido acudir por xurdirlle a última hora un asunto familiar ineludible).

Medio cento de persoas quixeron acudiron ao evento, no que Fernández Pasos explicou como se interesou pola historia local sendo un rapaz e como por boca da súa avoa Ramona coñeceu o episodio do afundimento do buque, “unha historia da que curiosamente non había apenas referencias nin na prensa dos últimos anos nin no rueiro da vila, senón que todo se reducía a comentarios na rúa nos que se mesturaba a realidade coa imaxinación”.

O escritor decidiu entonces recompilar datos sobre o naufraxio acontecido na noite do sábado ao domingo do 2 de xaneiro de 1921, no que 213 persoas, entre elas 60 nenos, perderon a vida, constituíndo a maior traxedia marítima da historia de Galicia.

Falsos rumores e lendas negras

Xosé María Fernández aproveitou a súa intervención para aducir a falsidade de certas crenzas que xurdiron a raíz do naufraxio, como a de que os veciños cortaran os dedos dos naufragados para roubar os seus aneis ou a de que os raqueiros ou salteadores de barcos tiveron protagonismo neste suceso. “Todo o contrario, o expediente do xulgado de Mariña realizado polo xuíz instrutor non amosa causa algunha de pillaxe, senón que salienta o heroísmo e a entrega dos mozos da illa e o comportamento destacado dos habitantes de Aguiño”, dixo.

Tamén se referiu á apoteótica recepción que se lle fixo en Vigo ás heroínas de Sálvora en novembro de 1921, cando milleiros de persoas aclamaron ás mulleres mentres eran conducidas polas rúas principais da cidade camiño da sede do Concello para seren homenaxeadas.

En canto ao libro, dividido en catro partes e que ademais de relatar o naufraxio do vapor Santa Isabel se refire a moitas outras historias relacionadas coa illa, o escritor manifestou que moitas persoas lle pediron que reeditase a obra e daí que agora publique esta edición actualizada e en rústica, o que permitirá achegar o seu contido a moita máis xente. Dende Certo convidámolo a que colgue o libro en pdf na Rede, para que calquera interesado nesta historia a poda consultar, agora e no futuro, dende calquera parte do mundo.

Ruiz Rivas salientou que Ribeira precisa xente como José María, que permanentemente estea facendo unha labor de estudo que dignifique a historia do municipio. Sobre esta nova edición, destacou o seu contido mellorado e no que os lectores poderán descubrir moitos feitos curiosos da nosa historia e tamén algunhas lendas negras que o autor desmonta con sólidos argumentos.

Así mesmo, aproveitou a súa intervención para informar de que o Concello e a Consellería de Medio Rural están traballando na elaboración dun convenio para poñer en valor a aldea de Sálvora.

Tamén falou na presentación a edil Elvira Pisos, quen destacou a traxectoria profesional do autor en diferentes medios de comunicación, desenvolvendo actualmente o seu labor na Radio Galega, ademais de ser responsable do arquivo sonoro do ente público autonómico.

Ao final do acto proxectouse un documental sobre o Santo Isabel realizado por Fernández Pazos en 1997.

Pode que tamén lle interese:

Sálvora: 15 fondeos e 125 persoas