Ribeira: este sábado, 16 de xullo, estrea de "Bailadela da morte ditosa", de Roberto Vidal Bolaño

• Será posta en escea polo Grupo Xuvenil de Teatro de Ribeira
• É unha actividade da "Fiestra da Cultura"
  

Ribeira, 13 de xullo de 2011.- A concelleira de Cultura de, Elvira Pisos Arnoso, e o director do Grupo Municipal Xuvenil de Teatro, Segundo Chiki Durán, ofreceron hoxe detalles da cuarta montaxe que, baixo o título de “Bailadela da Morte Ditosa” (obra orixinal do prestixioso dramaturgo Roberto Vidal Bolaño) este elenco vai estrear o vindeiro sábado, 16 de xullo, dentro do programa de actividades enmarcadas en “A Fiestra da Cultura”.

Segundo informou Elvira Pisos, esta actuación suporá a despedida dalgúns compoñentes do grupo despois de anos de traballo actoral, no que foron dando conta da súa valía para estar enriba dun escenario. Pisos Arnoso quixo desexarlles que o seu futuro lles outorgue, como mínimo, os éxitos que ao longo destes anos lograron dentro do grupo, ao tempo que mandar tamén unha forte mensaxe de ánimo a todos aqueles que desembarcan no grupo xuvenil procedentes do grupo municipal infantil.

Así e logo, o grupo está formado por 25 persoas entre actrices, actores e persoal de apoio, tanto técnico como escenográfico. Obras como “Volverasme ver”, “Bandas rivais”, ou “Como na casa”, conforman o currículo dun equipo que vai dando conta do resultado que, ano tras ano, levan realizado ao longo do curso de interpretación.

A concelleira aproveitou a súa intervención para convidar a todos os veciños e visitantes  a esta estrea que terá lugar este vindeiro sábado, día 16 de xullo, ás 21,30 horas no Auditorio Municipal, lembrándolles que as entradas, coma sempre gratuítas, poderán retirarse media hora antes da citada función.

Pola súa parte, Chiki Durán explicou que a obra orixinal está dividida en seis cadros, dos que eles elixiron catro, nos que “se contan outros tantos encontros coa morte, unha morte que chega cando ten que chegar ou á que se chama cando a vida xa carece de sentido, porque a dor, o abandono, ou mesmo o desamor convértena en insoportable”.

Cada unha das escenas remata cunha “Cantiga” final, diferente en cada caso, contribuíndo ao climax dramático en cada unha delas. Dramas como o dun home que se sente impotente para paliar a dor Terminal da súa muller… ou dunha neta que sabe que, cando a súa abóa morra vai quedar soa e desamparada… a historia dunha muller núa que volta xunto ao seu home, morto anos atrás, para convencelo de que segue a ser o amor da súa vida, ou a dunha muller que ve como o seu negocio de toda a vida vese abaixo e con ela a súa vida enteira, arrastrando, na súa desesperanza ás traballadoras da súa fábrica de pirotecnia…, conforman xunto coa Morte e a Pega, unha nova montaxe na que o Grupo Municipal Xuvenil de Teatro de Riveira intenta homenaxear a un dos mestres e un dos maiores expoñentes do teatro galego… Roberto Vidal Bolaño.

Dúas actividades do Verán Cultural

Elvira Pisos aproveitou para lembrar o desenvolvemento mañá e pasado mañá de dous actividades organizadas pola súa Concellería que están adscritas ao programa Verán Cultural.

Así, mañá xoves, ás 20 horas, na Aula Multimedia de Riveira terá lugar a primeira das proxeccións enmarcadas dentro do ciclo audiovisual Onda-Cinema, titulada “Pinocchio 1573”, en colaboración co Consorcio Audiovisual Galego.

Por outra parte, o venres ás 12.00 do mediodía, na praza do concello terá lugar a primeira actuación de “Monicreques Empraza-2” a cargo da compañía Duendesico coa posta en escena da montaxe “Quen quere ser paiaso”.

See the full gallery on Posterous

Posted via email from Certo.gl, o xornal dixital de Barbanza e Noia

Noia: programa do ciclo Rúas Vivas 2011

O programa funciona dende hai varios anos cada verán

Noia, 13 de xullo de 2011. O programa de animación cultural do verán, Rúas Vivas, xa ten a programación completa. Está organizado polo Concello de Noia e a Asociación Noia Histórica.  

O programa é o que segue:

>                                          MARTES
>                                     NOITES DE CINE
>                          22:30 h na  Praza do Tapal excepto *
>
>                  19 de Xullo - Los muertos van deprisa 
>                  26 de Xullo - UP ( animación )
>                  2 de Agosto - Crepúsculo : Luna nueva
>                  9 de Agosto - El secreto de sus ojos
>              * 16 de Agosto - Avatar -   As 22:15h
>
>
>                                       MÉRCORES
>              ANIMACIÓN PARA RAPACES NA PRAZA DO CANTÓN
>                               12 h na praza do Cantón
>
>                   20 de Xullo - Fredi Circanelo
>                   27 de Xullo - Pablo Trasno
>                   3 de Agosto - MANUalidades
>                  10 de Agosto - Mago Cayetano
>                  17 de Agosto - Obradoiros para rapaces na Praza do Cantón
>
>
>                                          XOVES
>                                     MONÓLOGOS
>                            22:30 h na Praza do Cantón
>                         
>                  21 de Xullo - Carlos Aguilera (Madrid, Paramount comedy)
>                  28 de Xullo - Juan Solo ( Madrid , Paramount comedy)
>                  4 de Agosto - Toni Cano ( Barcelona,TV3)
>                 11 de Agosto - Denny Horror ( Galicia, Paramount comedy)
>                 18 de Agosto - Danny Boy-Rivera (Galicia,Paramount Comedy)    
>
>
>                                         VENRES
>                                          MÚSICA
>                           22:30h na Praza do Cantón
>
>                  22 de Xullo - Najla Shami & Narci Rodríguez
>                  29 de Xullo - Rafa Rodríguez Cuarteto
>                  5 de Agosto - Ruso Negro (Dúo)
>                 12 de Agosto - Snatch
>                 19 de Agosto - Sinestesia
>
>
>                  CANTON´S JAZZ & BLUES -   
>                   2 e 3 de Setembro.             
>                   22:30h na Praza do Cantón

Pode que tamén lle interese:

Feira Medieval: así loce o cartel. Do 15 ao 17 de xullo

Baile: cursos intensivos este verán

Vodas de ouro: do párroco de San Martiño, adiadas por enfermidade

Actividades verán: listaxe de obradoiros e actividades deportivas

Posted via email from Certo.gl, o xornal dixital de Barbanza e Noia

Ribeira: simulacro de rescate no mar a cargo de Protección Civil co helicóptero Pesca 1

Ribeira, 13 de xullo de 2011. Efectivos de Protección Civil de tomaron parte o pasado luns nun simulacro de rescate no que se contou coa colaboración do helicóptero Pesca 1, do Servizo de Gardacostas de Galicia. 

A manobra tivo lugar no entorno da illa de Rúa. Dúas embarcacións de Protección Civil situáronse nas inmediacións deste enclave e, nun primeiro momento, simulouse a caída ao mar de dúas persoas, unha das cales era o concelleiro de seguridade e mobilidade cidadá, Víctor Reiriz Lampón. 

En poucos instantes entrou en acción o Pesca 1, que rescatou a estas dúas persoas e trasladounas ata o Hospital da Barbanza facendo uso do heliporto alí situado. 

Acto seguido, simulouse que un terceiro individuo caera ao mar, de tal xeito que e o helicóptero regresou ao lugar dos acontecementos e tamén logrou izala padiola ata o vehículo de transporte aéreo. Tamén foi levada ao hospital inmediatamente. 

Víctor Reiriz agradeceu a colaboración prestada polos servizos de salvamento da Xunta de Galicia e destacou a importancia de poñer en práctica este tipo de exercicios de colaboración para ofrecer un servizo máis coordinado e eficiente. Así mesmo, adiantou que no futuro se seguirán impulsando este tipo de accións, tanto no mar, como en acantilados, etc...

See the full gallery on Posterous

Posted via email from Certo.gl, o xornal dixital de Barbanza e Noia

Noia: continúa aberto o prazo de inscrición para catro obradoiros deste verán destinados a rapaces de 8 a 13

Noia, 13 de xullo de 2011. Dende a casa de cultura de Noia infórmannos de que continúa aberto o prazo de inscrición dos obradoiros de verán do Concello para nenas e nenos de 8 a 13 anos. Os interesados deben achegarse á casa da cultura de 8:30 a 14 horas para informarse e, de ser o caso, anotarse.

Os obradoiros abertos son:

• AULA EN MOVENTO (MÚSICA)

• A ARTE DA CALIGRAFÍA

• CREACIÓN PLÁSTICA

• AEROBIC RECREATIVO

Todos estes obradoiros terán lugar os xoves e venres deste mes de xullo na Casa da Xuventude.

Antes, en Certo:

Actividades verán: listaxe de obradoiros e actividades deportivas

Pode que tamén lle interese:

Feira Medieval: así loce o cartel. Do 15 ao 17 de xullo

Baile: cursos intensivos este verán

Vodas de ouro: do párroco de San Martiño, adiadas por doenza cardiaca

Posted via email from Certo.gl, o xornal dixital de Barbanza e Noia

A Pobra: este xoves 14, charla sobre os intentos do PP de privatizar a sanidade pública

Barbanza, 13 de xullo de 2011.  A plataforma en defensa da Sanidade Pública da comarca da Barbanza informa de que este xoves, día 14, ás 20.30 horas no salón de actos do ISM na Pobra do Caramiñal, terá lugar unha charla-coloquio sobre Iniciativas privatizadoras na sanidade pública nestas bisbarras.

Posted via email from Certo.gl, o xornal dixital de Barbanza e Noia

Noia: a Xunta di que as obras da primeira fase da rede de colectores comezan despois do verán

• O presidente de Augas de Galicia asinou esta mañá o contrato de obra, cun orzamento de case catro millóns de euros
• Esta actuación levarase a cabo en virtude dun convenio de colaboración entre a Consellería de Medio Ambiente, Territorio e Infraestruturas e o Concello de Noia
• O proxecto prevé a disposición de colectores xerais, de pluviais ou de fecais así como melloras do sistema de bombeo
• Esta actuación tamén permitirá avanzar na mellora do saneamento da ría de Noia, que se completa con outras actuacións

Noia, 13 de xullo de 2011.- As obras da primeira fase da rede de colectores no Concello de Noia comezarán despois de verán. Así o confirmou esta mañá o presidente de Augas de Galicia, Francisco Menéndez, na firma do contrato de obra desta actuación hidráulica, cuxo orzamento se eleva a 3,8 millóns de euros e que foi adxudicada a UTE Movex vial Abeconsa.

Tal e como subliñou Menéndez a rede de sumidoiros actual é unitaria nun 95%, polo que é necesario xestionar as augas en tempo de choiva. Só o casco histórico conta cunha rede separativa. Na actualidade, a rede de colectores ten graves deficiencias, como pozos de rexistro con infiltracións, tramos en contrapendente, bombeos inutilizados, ou colectores por praias ou marxes de ría.

A finalidade deste proxecto é mellorar as condicións de funcionamento da rede de saneamento de Noia, co fin de acadar o saneamento e a depuración das verteduras, evitándoas á ría de Noia. En definitiva, estas obras permitirán rehabilitar os treitos existentes, recollendo case toda a rede de saneamento municipal e garantir o seu funcionamento ao illala das infiltracións.

O proxecto recolle a execución dun colector interceptor xeral que permita derivar todas as augas fecais á estación depuradora de augas residuais (EDAR) de Noia. Tamén se proxecta a implantación dunha primeira fase de rede de colectores de augas pluviais que posibilite a evolución cara unha rede de saneamento separativa.

As infraestruturas previstas son un colector interceptor norte dividido en dous tramos, cun total de 423 metros e a reparación dunha bomba existente, un colector interceptor sur dividido en 11 treitos cunha lonxitude de 2.888 metros, a execución de dúas bombas de nova planta e a construción de cinco bombeos e máis de 1.000 metros de impulsións.

Os traballos desta primeira fase centraranse na reconstrución do colector interceptor xeral de forma completa, tanto as conducións, como o sistema e bombeos e alivios, de forma que deriven as augas en tempo seco cara á EDAR municipal. Para iso actúase sobre todos os tramos do colector interceptor, a excepción do tramo máis próximo á EDAR, situado na marxe sur do interceptor, entre a última bomba e a depuradora, tramo que se mantén nas súas actuais características.

Co obxecto de minimizar o bombeo das augas do sistema de saneamento en tempo seco, débese reducir a contaminación de augas limpas que se produce sobre a devandita rede unitaria nese tempo seco.

Detectáronse tres zonas de achega en tempo seco importantes, unha localizada sobre a zona do Estadio de San Lázaro, outra no barrio de Labarta e outra na zona da Horta da Zapateira. Na primeira e última zona constrúense colectores interceptores de pluviais, que posibilitan a recondución de augas pluviais que proceden de dous regatos que se atopan agora mesmo canalizadas sobre a rede xeral unitaria.

Na zona do barrio de Labarta a achega de augas limpas en tempo seco ten unha orixe indeterminada, xa que non se pode identificar unha achega concreta, debido á magnitude da rede secundaria que acomete sobre a zona, e ao seu grao de urbanización. Tamén é precisa a construción dunha rede interceptora de pluviais extensa, que se estende ata o barrio de vista Alegre. O colector funcionará no futuro como parte estruturante de toda a rede de pluviais nun esquema separativo e, na rede actual, como alivio co obxecto de derivar a punta de augas menos contaminadas e que non entre sobre a rede interceptora unitaria.

A Consellería de Medio Ambiente, Territorio e Infraestruturas estima que a poboación conectada á rede será de 23.061 habitantes equivalentes. Esta actuación tamén permitirá avanzar na mellora do saneamento da ría de Noia, que se completa con outras actuacións levadas a cabo pola Administración galega, como son os colectores xerais e a Edar de Esterio, en Muros, cun investimento de 6,7 millóns de euros; ou os colectores xerais e a Edar de Porto do Son, nos que a Xunta investiu 12,2 millóns de euros.

Posted via email from Certo.gl, o xornal dixital de Barbanza e Noia

Cultura: unha exposición sobre a traxectoria de Castelao comeza a súa andaina en Santiago

• Inaugurouse hoxe na biblioteca Ánxel Casal
  
• Con esta mostra, que poderá visitarse ata o 31 de xullo, a Xunta de Galicia contribúe a difundir a figura de Castelao no 125 aniversario do seu nacemento

Santiago, 13 de xullo de 2011.- O director xeral do Libro, Bibliotecas e Arquivos, Francisco López, participou hoxe na inauguración da exposición Castelao na Biblioteca Anxel Casal de Santiago de Compostela, onde estará aberta ao público ata o vindeiro 31 de xullo. Con motivo do 125 aniversario do nacemento do escritor de Rianxo, a Xunta de Galicia, a través da Secretaría Xeral de Política Lingüística e da Dirección Xeral do Libro, Bibliotecas e Arquivos, promove esta mostra itinerante que, tras estar no Museo de Pontevedra, percorrerá nos próximos meses as bibliotecas nodais da comunidade galega e os centros escolares, co fin de achegarlle á sociedade a figura e a obra de Alfonso Daniel Rodríguez Castelao.

Este proxecto expositivo, comisariado por Xosé Ramón Fandiño e que conta co asesoramento do Director do Museo de Pontevedra, Carlos Valle, repasa a biografía de Castelao e os acontecementos da súa polifacética personalidade a través de sete paneis con desenvolvemento teórico e complementados con sistemas interactivos e música ambiental galega.

Na súa intervención, o director xeral do Libro, Bibliotecas e Arquivos, Francisco López, destacou que a inauguración desta exposición ten lugar dous días despois de facerse pública a decisión da Dirección Xeral do Patrimonio de iniciar o procedemento para a declaración do conxunto da obra de Castelao como Ben de Interese Cultural. Francisco López asegurou que esta e outras iniciativas “confirman que en si algo estamos de acordo os galegos é en que non hai outra figura con máis presenza, con máis impronta en Galicia que Castelao”.

O director xeral asegurou que “aínda queda moito por facer”, pero recalcou que “a lembranza de Castelao que hoxe traemos aquí é a dunha traxectoria vital que queremos ter como referencia para afrontar o futuro con confianza”. Nesta liña, destacou a importancia de transmitir o legado de Castelao á xuventude galega, polo que se decidiu que esta mostra percorrese as bibliotecas e centros escolares galegos.

O contido da mostra fai un percorrido pola obra e a vida de Castelao desde a súa infancia en Rianxo e a adolescencia como emigrante na Pampa arxentina, ata o exilio, primeiro en Nova York e despois en Bos Aires. Nese percorrido, a exposición recolle os aspectos máis salientables da súa faceta de escritor, de artista gráfico, de debuxante e de político. Os seus primeiros pasos como debuxante e caricaturista, a incorporación en 1917 ás Irmandades da Fala, a súa traxectoria como deputado pola provincia de Pontevedra nas Cortes Constituíntes de 1931 ou seu papel na fundación do Partido Galeguista son algúns dos episodios que nos achega a exposición.

Logo do seu paso pola Biblioteca Anxel Casal de Santiago, a mostra realizará a súa próxima parada na Biblioteca González Garcés, onde estará desde o 2 ao 22 de setembro.

Relacionada:

• Rianxo: a obra de Castelao, camiño do BIC Inmaterial

Posted via email from Certo.gl, o xornal dixital de Barbanza e Noia

Arte: a Xunta promociona a dixital con estadías no estranxeiro para 24 mozos en "Imaxina Atlántica"

• A Dirección Xeral de Xuventude e Voluntariado xa ten aberto o prazo de inscrición para que participen rapaces entre os 18 e os 30 anos
  
• O programa desenvólvese nos ámbitos da arte dixital en Porto (Portugal), Bangor (Gales, Reino Unido), e Angoulème (Francia), financiado con fondos europeos
  
• A prioridade é promover proxectos transnacionais de innovación e redes empresariais

Algunhas estadías son para asistir a certámenes internacionais

Santiago, 13 de xullo de 2011.- A Dirección Xeral de Xuventude e Voluntariado, dependente da Consellería de Traballo e Benestar, vén de lanzar o proxecto ‘Imaxina Atlántica’ que, ao abeiro do programa “Espazo Atlántico” financiado con fondos FEDER, oferta 24 estadías noutras rexións de Europa para mozos e mozas profesionais de entre 18 e 30 anos centradas na arte dixital.

En concreto, o programa –para o que xa está aberto o prazo de inscrición- desenvólvese nos ámbitos da Comunicación Audiovisual, Publicidade, Produción Artística, cultural e visual, Multimedia, Patrimonio ou Turismo aplicado á arte dixital, en Porto (Portugal), Bangor (Gales, Reino Unido), e Angoulème (Francia) e os mozos interesados poderán enviar a súa candidatura a xuventude@xunta.es.

A iniciativa oferta doce estadías de quince a trinta días de duración que inclúen viaxe, aloxamento e manutención; e outras doce de tres ou catro días para asistir á certames internacionais, feiras internacionais ou exposicións.

O obxectivo desta actividade é fomentar a formación dos mozos profesionais, nun contexto europeo, axudando á realización de estadías en empresas, asociacións e institucións doutras rexións de Europa, con fin de favorecer o fortalecemento e a creación de redes empresariais desde o espazo atlántico e ofrecer aos participantes prácticas profesionais, adquisición e uso de coñecementos, competencias e cualificacións con vistas ao desenvolvemento persoal, a empregabilidade e a participación no mercado laboral europeo.

Este programa é para arte dixital en concreto

Como prioridades deste programa tamén está promover a mobilidade europea da mocidade creadora galega, apoiar as melloras da calidade e a innovación e a súa transferencia entre distintos países, promover a aprendizaxe de idiomas nun contorno empresarial, adquirir autonomía persoal e mellorar a capacidade de traballo con persoas de distintos contornos culturais.

O espazo de cooperación do territorio que cubre este programa comprende as rexións de Poitou-Charentes en Francia, norte de Portugal, País de Gales do Reino Unido, e Galicia. A prioridade do proxecto é a de promover redes transnacionais empresariais e de innovación, pero non só se centra na innovación científica e técnica, senón tamén noutros elementos da economía actual do coñecemento, como novos tipos de servizos empresariais ou técnicas de márketing innovadoras, con especial consideración pola dimensión transnacional destas prácticas.

Pode que lle interese:

• Arte: bases do III Premio Atlante de Gravado

• Lousame: artistas franceses expoñen na casa da cultura en xullo

Exposición: no Centro Social de Boiro, do 15 de xullo ao 15 de agosto, Sabela Rey

Posted via email from Certo.gl, o xornal dixital de Barbanza e Noia