16.11.10

Política: os socialistas engaden novas irregularidades ás xa numerosas detectadas nas oposicións do Sergas

Lage esixe á Xunta que investigue as oposicións do Sergas pola sospeita de máis irregularidades. Pregunta “se é unha casualidade ou un milagre” que unha familiar directa do opositor que se corrixiu o seu propio exame acadara a mellor nota nas probas ás que se presentou

Santiago de Compostela, 16 de novembro de 10. O portavoz da Área Institucional do Grupo Parlamentario dos Socialistas de Galicia, José Manuel Lage Tuñas, esixiu hoxe á Xunta de Galicia que investigue a fondo as probas selectivas do Sergas correspondentes á Oferta Pública de Emprego 2008/2009 “pola existencia de sospeitas de máis irregularidades”.

O parlamentario socialista presentou unha Proposición non de Lei na que esixe ao Goberno galego que cumpra coas recomendacións recollidas no informe elaborado polo Valedor do Pobo, que evidencia a existencia de irregularidades. Así, reclama “as avaliacións estatísticas que permitan coñecer as casualidades existentes polas que sinaladas persoas obtiveron as mellores puntuacións” nas devanditas probas.

Lage Tuñas pregunta “se é unha casualidade ou un milagre” a noticia coñecida hoxe na que se destapa que unha familiar directa do opositor que se corrixiu o seu propio exame acadara a mellor nota nas probas ás que se presentou. Ademais, engadiu, “á vista das denuncias que seguimos recibindo sobre as oposicións do Sergas pedimos que se estenda a investigación á totalidade das categorías nas que se ofertaron prazas”.

O viceportavoz do Grupo Parlamentario dos Socialistas de Galicia instou ao presidente da Xunta a “adoptar decisións inmediatas” polos “graves feitos descubertos” nestas oposicións asumindo as responsabilidades políticas derivadas da situación producida nestes procesos selectivos. Denunciou que Feijóo “está baltarizando o Sergas ao permitir irregularidades que outorgan unha situación de clara vantaxe a determinados opositores”.

Lembrou que Feijóo “a día de hoxe aínda non se pronunciou para explicar si avala a xestión das oposicións nas que un opositor corrixiu o seu propio exame”. Lembrou que, tal e como conclúen o Valedor e mesmo o informe interno da Consellería de Presidencia, os exames das oposicións do Sergas imprimíronse nunha sala sen control nin vixilancia, e os exames pasaron por varias mans nun pen-drive “rompendo a cadea de custodia”.

O parlamentario socialista advirte de que “acrecéntanse as dúbidas sobre a existencia de máis beneficiarios das irregularidades e ausencias de controis nos procesos previos á realización dos exames en diferentes categorías”.

Por este motivo reclamou “a extensión da investigación aberta a instancias do grupo parlamentario socialista e do Valedor do Pobo ao conxunto das categorías incluídas na Oferta Pública de Emprego do ano 2008 / 09 debida a existencia de numerosas denuncias onde se poñen de manifesto serias sospeitas sobre posibles novos beneficiarios das irregularidades xa denunciadas”.

Antes publicamos todo isto sobre o mesmo asunto

Posted via email from Certo.gl, o xornal dixital de Barbanza e Noia

Ribeira: o venres 19 preséntase "O Grupo. 60 anos no corazón de Ribeira", libro do profesor Luís Teira


Será ás oito da tarde no conservatorio

Antes publicamos:

'O Grupo' celebra o seu 60 aniversario, aquí

Galería de fotos da exposición en 'O Grupo', aquí

Posted via email from Certo.gl, o xornal dixital de Barbanza e Noia

Boiro: o cineforum de Ámbar en Acción! incideu sobre a promoción da autonomía persoal

Boiro, 16 de novembro de 2010. O cineforum "Nada sobre nós sen nós", dentro do festival audiovisual Acción!, tivo lugar o 13 de novembro  no Espazo Leña Verde do Concello de Boiro e colaboraron nel o Departamento de Cultura deste concello, o Foro de Vida Independente e Lapepa Producións. 

"A volar" está producido por Lapepa: http://www.lapepaproducciones.com

A Asociación Ámbar organizou este cineforum que, na súa primeira edición, proxectou o documental 'A volar', que recolle as historias de vida de catro persoas con diversidade funcional, co fin de incidir na importancia da asistencia persoal como ferramenta social para a cidadanía e as novas perspectivas sobre a autonomía persoal e a vida independente dentro da comunidade, entre outros aspectos.

 Tamén se proxectou a curtametraxe 'O pantallazo', que recolle a intervención dun grupo de cidadáns manifestándose sobre “os efectos da burocracia infinita sobre as vidas das persoas”. Durante a presentación, a presidenta de Ámbar, Milagres Rey, dixo que as persoas con diversidade funcional e os vellos “poden e deben vivir incluídos dentro dos nosos pobos, para o que precisan de apoios adecuados ás súas necesidades” e explicou que o obxectivo do cineforum é explicar e reflexionar sobre os instrumentos que mellor se poden utilizar na nosa comarca para “que ninguén se vexa apartado da vida na comunidade”.

Na actividade estiveron presentes os alcaldes de Boiro e Pobra, Xosé Deira e Isaac Maceiras, o concelleiro de cultura de Boiro, Xerardo Piñeiro, e as concelleiras de Asuntos Sociais, Natalia Laíño e Balbina Lojo. Entre os asistentes había diversas persoas que acudiron de distintos puntos da comarca barbancesa e de Pontevedra.

Tra-las proxeccións tivo lugar un interesante e vivo coloquio, no que tanto autoridades como público participaron con entusiasmo, percorrendo diversos temas relacionados cos contidos da mostra: exploráronse dende os anecdotarios persoais ata as políticas públicas e os recursos destinados á promoción da autonomía en diversos contextos e ámbitos, accesibilidade, vivenda, transporte e demais. O cineforum prolongouse ata as nove da noite e dende Ámbar califícano como un "éxito".

Posted via email from Certo.gl, o xornal dixital de Barbanza e Noia

Noia: 19 vivendas protexidas de promoción privada en Castro do Santo

Poden optar ás mesmas os solicitantes que estiveran escritos no Rexistro de Demandantes a data de oito de novembro. As solicitudes deberán presentarse ata o tres de decembro.

Noia, 16 de novembro de 2010. O Instituto Galego da Vivenda e Solo (IGVS) iniciou o procedemento para a adxudicación de 247 vivendas protexidas de promoción privada construídas nos concellos da Coruña, Fene, Mugardos, Ames, Noia, Ordes e Oroso, segundo o establecido na normativa do Rexistro Único de Demandantes de Vivenda de Galicia. En Noia serán dezanove as vivendas de réxime xeral adxudicadas. Están emprazadas na rúa Castro do Santo e o seu remate prevese para outubro de 2012.

Poden optar á adxudicación de ditas vivendas os solicitantes que estiveran inscritos no Rexistro de Demandantes na data do oito de novembro en que o Xefe Territorial da Coruña da Consellería de Medio Ambiente, Territorio e Infraestruturas ditou as resolucións de inicio do procedemento de adxudicación das devanditas vivendas. Os solicitantes deberán estar inscritos no réxime, modalidade e localidade da promoción á que se opte.

As solicitudes deberán presentarse ata o día tres de decembro en calquera rexistro público ou portelo único, dirixidas á xefatura provincial do IGVS na Coruña, empregando o modelo de solicitude que se pode atopar na web do IGVS:
(http://igvs.xunta.es/web/actuamos/celebracions-sorteos-rexistro-demandantes).

Posted via email from Certo.gl, o xornal dixital de Barbanza e Noia

Rianxo: Antón Alcalde estivo na presentación en Santiago do IV Certame Galego de Bandas de Música


Rianxo, 16 de novembro de 2010. Ás 12.00 horas desta mañá tiña lugar no Concello de Santiago de Compostela a presentación do IV Certame Galego de Bandas de Música, que se celebra esta fin de semana vindeira, e da edición das partituras premiadas no II Concurso de Composición. O acto contou coa intervención da concelleira de Cultura e Centros Socioculturais do Concello de Santiago de Compostela, Socorro García Conde, do presidente da Federación Galega de Bandas de Música Populares, Rubén Souto Santos, e de dous dos premiados no II Concurso de Composición: o rianxeiro Antón Alcalde Rodríguez (premiado na Sección Banda de Música con Pórtico e na Sección Sinfónica con Marea Negra) e Juan Eiras (finalista na Seccion Banda de Música con Auga Levada) cuxas obras serán obrigadas para a presente edición do Certame Galego.

Socorro García Conde salientou o traballo da FGBMP e a labor que se realiza dende a propia Federación para con a xuventude e loou o traballo diario que realizan as bandas de música populares para acadar o alto nivel no que se sitúan na actualidade. Pola súa parte, Rubén Souto Santos, insistíu tamén na importancia do proxecto e dos seus compoñentes: na actualidade o 78% dos 4500 músicos que aglutina a FGBMP non supera os 30 anos de idade e algo mais do 35% do total non chega á maioría de idade. Así mesmo, fixo fincapé no feito de que o Certame Galego coloca ás bandas de música galegas e aos seus compositores no contexto universal, de feito, a canle en youtube da FGBMP suma xa máis de 600.000 reproducións.

Logo de explicar o funcionamento do Certame (consultar toda a información), Rubén Souto Santos deulle a palabra a Antón Alcalde e a Juan Eiras, ámbolos dous premiados na segunda edición do Concurso de Composición do que se presentaba a edición en papel nun pack que recolle as cinco obras galardoadas e un cd coa gravación da estrea por parte da Banda Sinfónica da FGBMP, que agradeceron o premio e recalcaron a importancia da continuidade co Concurso por representar unha oportunidade única para os compositores galegos.


O certame terá lugar esta fin de semana no Auditorio de Galicia, en Santiago

Bandas participantes no IV Certame Galego de Bandas de Música que se celebrará, os días 19, 20 e 21 de novembro, no Auditorio de Galicia:

Sección Terceira

  • Agrupación Musical de Belesar
  • Agrupación Musical de A Guarda
  • Banda de Música de Guitiriz
  • Banda de Música de Chapela
  • Banda de Música de Arca

Sección Segunda

  • Banda de Música Xuvenil de Torroso
  • Agrupación Musical de Goián
  • Agrupación Músico - Cultural de Ribadumia
  • Banda de Música Xuvenil de Barro
  • Banda de Música Popular de Rubiós

Sección primeira

  • Banda de Música Cultural de Salceda de Caselas
  • Banda de Música de Vilagarcía de Arousa
  • Banda da Escola de Música de Rianxo
  • Banda de Música Municipal de Valga
  • Banda Escola de Música de Beade
  • Agrupación Musical de Vincios

Sección Especial

  • Unión Musical de Valladares
  • Banda de Música Municipal de Caldas de Reis

Web da Federación Galega de Bandas de Música:
http://fgbmp.net/

Posted via email from Certo.gl, o xornal dixital de Barbanza e Noia

Ribeira: concerto solidario a prol de África, este domingo 21 na casa do mar

Ribeira, 16 de novembro de 2010. Este domingo 21 de novembro, en Ribeira, haberá un concerto solidario con África. Actuarán Tonhito de Poi e Miki Nervio&BluesMakers, todos músicos ribeirenses ou con orixes cercanas. Organiza a ong Égueire, que traballa neste continente.

Posted via email from Certo.gl, o xornal dixital de Barbanza e Noia

Noia: o venres 19 de novembro represéntase "Smóking", do grupo de teatro do Liceo da vila


Noia, 16 de novembro de 2010. Este venres, 19 de Novembro, ás 21:00 horas, o Grupo Teatro Liceo de Noia representa a obra "Smóking", de Santiago Moncada, no teatro Coliseo Noela. O pasado sábado 6 representouse no teatro Elma da Pobra do Caramiñal.

A agrupación teatral do Liceo de Noia está dirixida polo escritor, e tamén actor, Ramón Carredano Cobas. "Smóking" acadou o segundo premio e catro nominacións a actores destacados  no XIII certame de Teatro Afeccionado Don Bosco da Coruña.

A obra, non apta para menores de 14 anos e de 150 minutos de duración, trata dunha glamourosa comedia na que priman a resistencia a entrar na idade de xubilación; o respecto e admiración dos xóvenes polas formas de facer dos maiores e a amizade entre dous homes na plena madurez.

A acción ten lugar integramente nun salón de ambientación moderna, de luxo e seducción, na vivenda dun prestixioso arquitecto, maduro, atractivo, interesante e sempre disposto á aventura. Un arquitecto que ten éxito coas mulleres, cunha vida familiar estable e feliz.

Aparentemente. o protagonista dispón de todo e está convencido de que todas as mulleres con encanto se encaixan perfectamente a el. Imposible para o arquitecto imaxinar o xeito de pasar o resto da vida sen a súa dona, compartindo piso co seu mellor amigo.
“Smóking” é unha comedia na que destacan o seus excelentes e intelixentes diálogos, mergullados no cinismo

Posted via email from Certo.gl, o xornal dixital de Barbanza e Noia

Rianxo: o mago local Alán Golías actúa este sábado 20 de novembro no auditorio

Rianxo, 16 de novembro de 2010. O sábado 20 de novembro, ás 20.30 h, no Auditorio de Rianxo terá lugar o espectáculo de maxia, música e teatro "Tocando o imposible" a cargo do ilusionista rianxeiro Alán Golías.

Alán Golías é un mozo ilusionista da nova xeración de magos galegos que pretende innovar e modificar o estilo clásico de maxia para transformalo nunha incrible fusión artística entre, música en directo, teatro e, por suposto, maxia.

Partindo deste proxecto nace “Tocando o imposible”, un novo espectáculo adaptado para todos os públicos que fai posible a difusión do fenómeno chamado “ilusión musical”.

EQUIPO TÉCNICO:

    * DIRECTOR ESCÉNICO E AUDIOVISUAL: Francisco Gómez
    * ASESOR DE LUZ SON E FOTOGRAFÍA E ASESOR ARTÍSTICO: Píruco
    * ASESOR MUSICAL: Antón Alcalde
    * MÚSICOS: Eloy Fernández (piano), María Varela (clarinete), Carlos (guitarra) e Patricia Túñez (violín)
    * ACTORES: Román Castaño, Duarte Galbán, Lois Cristobo, Brais López e Miguel Gómez.
    * ILUSIONISTA E PARTENAIRE: Alán Golias e Miriam Rodríguez
    * IDEA ORIXINAL: Alán Golias

Este espectáculo está promovido polo Concello de Rianxo. As entradas para asistir a el poderán ser retiradas unha hora antes do comezo (máximo dúas por persoa).

Web do mago:

http://alangolias.com

(A páxina en galego está así)


Web do Concello:
  www.rianxo.com

Posted via email from Certo.gl, o xornal dixital de Barbanza e Noia

Ribeira: magosto autoxestionado este sábado 20 no parque de San Roque para promocionar o banco de tempo


Queres participar neste magosto? Pois a levar as túas castañas!

Ribeira, 16 de novembro de 2010. O programa de difusión do Banco de Tempo de Rbveira, actividade dependente do CIM (Centro de Información á Muller), ten no  Parque Periurbano este sábado día 20 de novembro unha nova cita. A partir das 12 do mediodía organízase un magosto no que tomarán parte os socios do Banco do Tempo, así como todos os que teñan interese en recibir información sobre esta iniciativa de intercambio de pequenas tarefas por tempo. 

Cada participante deberá levar castañas e algo para beber. Así mesmo, no transcurso do magosto exporanse distintas receitas de postres típicos de Galicia elaborados con castañas. A actividade rematará en torno  ás 14 horas 

Os interesados en participar só teñen que pasarse polo parque periurbano.

Posted via email from Certo.gl, o xornal dixital de Barbanza e Noia

Ribeira: a seguinte camiñata de "Ponte a Andar", este domingo 21, entre Palmeira, Moldes e A Tomada


A camiñata transcorrerá, como dirían no Ateneo Valle-Inclán, por Ribeira do Caramiñal

Ribeira, 16 de novembro de 2010. Xa queda menos para a vindeira andaina do ciclo "Ponte a Andar", así que aínda están vostedes "a tempo de entrenar un pouco e poñervos a tono para facer os nove quilómetros dunha tirada", indican os da organización, que sinalan que "ainda que chova imos ir, xa que alguén anda preguntando se arredramos porque chove... polo que se ve, ainda non nos coñecen ben. Con chuvia tamén se disfruta do monte. Eso si, vinde preparados con botas e chuvasqueiro".

A primeira metade da andaina ten tramos con certa pendente, pero xa se avisa na convocatoria que sería de dificultade "media". Insisten coa teima dos nenos: "que veñan acompañados dun adulto, e, por suposto, que sigan todo o tramo acompañados polo adulto" e co dos cans: "hai xente á que lle molestan, e a actividade organízase para as persoas... quizais noutra ocasión denos por orjanizar algo para os animais".

A saída será do campo novo de fútbol de Palmeira, ás dez da mañá. A hora prevista de remate son as 12 do mediodía. A inscrición é gratuíta e libre, pero hai que aparecer no punto de partida á hora especificada. Do campo de fútbol subirase a Moldes, logo baixada á Tomada e remátase no punto de partida.

Antes publicamos:


Ribeira: "Ponte a andar" retoma as camiñatas. A seguinte, o 21 de novembro

Posted via email from Certo.gl, o xornal dixital de Barbanza e Noia

Noia: andamios movidos na ponte medieval do Traba coa última riada


Varias pólas e toros, nada pequenos, de árbores quedaron atascados contra a armazón de andamios

Noia, 16 de novembro de 2010. Na pasada fin de semana, coas intensas chuvias e o aumento de nivel da auga nos ríos da comarca, diversos lugares víronse afectados. Un deles foi a ponte de Traba, no que están a piques de rematar as obras de afianzamento e reforma. Se non adían máis os prazos, a actuación ten que estar rematada este mes (xa ía ser para setembro, e logo para outubro).

Operarios do grupo municipal de intervención rápida de Noia tiveron que sacar as pólas e toros de grandes árbores que quedaron estancados contra a armazón de andamios e a base da ponte. A forza da auga e o choque destes toros fixeron que se movera a andamiaxe da pasarela provisional, pola que houbo que cortar a circulación durante a fin de semana. Os peóns puideron  pasar pola ponte medieval, á que lle falta botar a cuberta final para o tráfico rodado e tamén rematar os pretís de pedra que leva a cada lado.

Posted via email from Certo.gl, o xornal dixital de Barbanza e Noia

Twitter

Related Posts with Thumbnails Banner: Regale selva tropical