8.9.10

Boiro: 800.000 euros para financiar o remate das obras do centro sociocultural de Cabo de Cruz e dotalo de mobiliario

Fernández Moreda e Xosé Deira asinaron onte o convenio de colaboración

O presidente da Deputación da Coruña, Salvador Fernández Moreda, e o alcalde de Boiro, Xosé Deira Triñanes, asinaron na sede da institución provincial, un convenio para  financiar a  segunda e terceira fase das obras do centro sociocultural e de usos múltiples da parroquia de Santa María de Castro, en Cabo de Cruz (Boiro), para o que o organismo provincial achegará 800.000 euros. Deste orzamento, 96.813 euros destinaranse á adquisición de mobiliario para o centro.

O edificio está situado no predio ocupado polo antigo mercado municipal de Cabo de Cruz, e conta con soto,  planta baixa, e tres alturas, o que supón unha superficie total construída de 4.233 m2.

O centro contará, entre outras, coas seguintes instalacións: salón social, salón de actos, aula de usos múltiples, cafetería, biblioteca, despachos, sala de xuntas e sala de exposicións. Aínda que esta nova infraestrutura sociocultural beneficiará a toda a poboación boirense, prevese que os  principais usuarios sexan nenos e adolescentes e maiores de 60 anos.

OBRA: Centro sociocultural e de usos múltiples en Cabo de Cruz (BOIRO)

A nova construción, da que parte unha zona central formando unha “U”, ocupa a totalidade da parcela do antigo mercado. O edificio contará cun gran patio central que permitirá iluminar as distintas estancias, á vez que serve de zona de entrada a nivel de planta primeira, o que simplifica a utilización da zona de exposición e auditorio.

Obras incluídas na segunda e terceira fase:

- División das zonas definidas que non se completaron na primeira fase.

- Acabado dos locais e pavimentos das plantas

- Instalación de electricidade, fontanería, e ventilación.

- Colocación de teitos acristalados no acceso da planta baixa e recepción.

- Antepeito de ladrillo no baixo cuberta, sobre a biblioteca.

- Colocación de varios tramos de varanda e pasamáns en aceiro inoxidable.

- Colocación de portas e acristalamentos interiores.

- Beirarrúas e canalizacións varias

Subministro de mobiliario para a cafetería (mesas, cadeiras e taburetes), mobiliario para a sala da terceira idade (zona de lectura, zona de tv e xogos), mobiliario de oficinas, aulas, despacho, vestiarios e biblioteca. Expositores e bancos para a zona de exposición. Mostrador e armario do gardarroupas. Butacas para o auditorio. (96.813, 58 euros)

DISTRIBUCIÓN DO EDIFICIO

PLANTA SOTO (996,89 m2)
Instalacións
Almacéns
Salas polivalentes
Aseos

PLANTA BAIXA (869,83 m2)
Recepción
Zona 3ª Idade
Despachos
Oficinas
Cafetería
Aseos

PLANTA PRIMEIRA (806,05 m2)
Sala de Exposicións
Aulas
Oficina
Aseos

PLANTA SEGUNDA (679,24 m2)
Auditorio
Aulas
Vestíbulo-Gardarroupa
Oficina

PLANTA TERCEIRA (574,32 m2)
Biblioteca
Auditorio
Vestíbulo

PLANTA BAIXO CUBERTA (307,45 m2)

Despachos

Sala de Xuntas

Alto Biblioteca

Aseos

TOTAL METROS CONSTRUÍDOS     4.233,76 m2.

Posted via email from Certo.gl, o xornal dixital de Barbanza e Noia

A Pobra: a Deputación da Coruña destina 100.000 euros para financiar o proxecto Deán Stock Centro Formativo

A iniciativa inclúese no Plan Director do Comercio para as comarcas de Muros-Noia, Barbanza e O Sar

A Deputación da Coruña destinará 100.000 euros para financiar a posta en marcha na Pobra do Caramiñal do proxecto Deán Stock Centro Formativo, incluído no Plan Director do Comercio para as comarcas de Muros-Noia, Barbanza e O Sar. Así se estipula no convenio suscrito esta mañá, na sede da institución provincial, polo presidente da Deputación, Salvador Fernández Moreda, e a súa homóloga da Asociación do pequeno comercio da Pobra do Caramiñal, Amparo Cerecedo Sánchez, nun acto que contou tamén coa asistencia da deputada provincial Rosana Pérez.

O proxecto pretende a posta en marcha dunha tenda-escola para comerciantes, impulsada polo centro comercial aberto O Deán, na que se formaran tanto os futuros empregados do comercio como os comerciantes en activo, a través de cursos adaptados ás súas necesidades, que se axusten ás demandas actuais dos consumidores e ás novas tendencias comerciais, e que contribúan a mellorar as súas competencias profesionais e a adquirir novas habilidades.

A formación desenvolverase nunha simulación de tenda que permitirá aos alumnos desenvolverse cos clientes e os produtos, facilitándolles unha formación orientada á práctica profesional. Os obxectivos do proxecto son a profesionalización do sector do pequeno comercio, mellorando a cualificación dos traballadores, a dignificación dunha profesión que achega o 16% do PIB galego, e a promoción de novas iniciativas empresariais, tendencias e fórmulas de negocio nun sector caracterizado polo seu gran dinamismo e polo contacto directo co cliente.

O centro servirá ademais para crear novas vocacións, ofertando unha formación axeitada a aqueles que queiran entrar no mundo do comercio tradicional e garantirá aos empresarios a contratación de persoal cunha cualificación profesional garantida.

A formación teórica e práctica impartida no centro incluirá diferentes aspectos da profesión que van dende os aspectos formais do trato co cliente e a presentación adecuada dos beneficios do produto, á xestión de stocks, o escaparatismo, ou transito eficaz no punto de venda.

Tres millóns de euros para potenciar o comercio

O presidente da Deputación da Coruña, Salvador Fernández Moreda, lembrou que esta iniciativa enmárcase no Plan Director do Comercio para as comarcas de Muros-Noia, Barbanza e O Sar, “un ambicioso proxecto no que imos investir máis de 3 millóns de euros nos vindeiros catro anos, para modernizar e promocionar o pequeno comercio” nos concellos da Pobra do Caramiñal, Boiro, Dodro, Muros, Noia, Lousame, Outes, Padrón, Porto do Son, Rianxo, Ribeira e Rois, cunha poboación estimada de 130.000 habitantes.

As achegas orzamentarias da Deputación da Coruña para o financiamento do Plan serán de 700.000 euros no ano 2010; 1.223.500 no ano 2011; 822.500 (ano 2012); e 372.000 (ano 2013).

Fernández Moreda subliñou que o Plan conta con tres eixos fundamentais: a dinamización do comercio local a través de feiras de produtos típicos, outlets, e do reforzo de campañas comerciais; a modernización dos mercados locais, e a mellora da formación e xestión do pequeno comercio, aspecto no que se investirán preto de 600.000 euros e no que o proxecto Dean Stock Centro Formativo “terá un papel fundamental”, segundo o presidente provincial.

Pola súa banda, a responsable da Asociación do pequeno comercio da Pobra do Caramiñal, Amparo Cerecedo, agradeceu a achega provincial para o financiamento do proxecto e subliñou o compromiso da Deputación co comercio tradicional da comarca.

Posted via email from Certo.gl, o xornal dixital de Barbanza e Noia

Noia: a gravidade axudada por un fungo racharon unha póla dun magnolio dos xardíns de Felipe de Castro

Noia, 8 de setembro de 2010. Un dos magnolios que escolta o lanzal busto de Felipe de Castro en Noia rachou case á metade debido, por pura lei física, á gravidade. Un fungo contribuíu a que a enorme árbore, danada nos seus tecidos internos, cedese polo seu propio peso.

O magnolio (árbore da familia das magnoliáceas), como moitos outros vexetais, vese afectado por fungos como o oídio -máis coñecido nas nosas terras por afectar ás viñas) ou por outros menos coñecidos como os que causan a antracnose, enfermidade que se caracteriza por destruír os tecidos vexetais que toca. Segundo o fungo que detecten os especialistas, haberá que aplicarlle funxicidas ou cortar, como popularmente se di, "polo san".

Magnolios e palmeiras foron escollidos dende o século XVII en Galicia para adornar pazos e lugares señoriais. É unha especie que debe o seu nome a un botánico francés, Pierre Magnol, que a bautizou arredor do ano 1700, pero é das máis antigas na terra. Segundo os científicos, hai evidencias de plantas desta familia dende hai 95 millóns de anos.


Ademais de proporcionar unha sombra gorentosa, o magnolio ten unhas flores enormes e moi curiosas. Como se desenvolveu antes que apareceran abellas na terra, a flor está deseñada para ser polinizada por escarabellos. Non ten nin pétalos nin sépalos: houbo que buscarlles un nome: chámanse tépalos.


Posted via email from Certo.gl, o xornal dixital de Barbanza e Noia

Política: o Psoe acusa ao PP de darse moita présa en suprimir libros de texto gratuítos pero tardar en disolver chiringuitos da administración pararela

Download now or preview on posterous
39773 pnc lage.PDF (97 KB)

O PP rexeitou unha iniciativa socialista para racionalizar a administración paralela antes que remate este ano 2010


Lage di que as fundacións comarcais xa debían estar disoltas

Santiago, 8 de setembro de 2010. O portavoz da Área Institucional do Grupo Parlamentario dos Socialistas de Galicia, José Manuel Lage, acusou hoxe ao PP de terse amosado “veloces como o raio para eliminar os libros de texto gratuítos pero lentos como tartarugas para disolver as fundacións comarcais”. Así o dixo logo de que o PP rexeitara unha proposta socialista en Comisión para que a Xunta elimine a administración paralela antes de 2011.

O tamén viceportavoz do Grupo Socialista contrapuxo os recortes executados pola Xunta do PP en educación e sanidade “mentres manteñen os chiringuitos” da administración paralela intactos. Reclamou que “expliquen aos galegos por qué hai moitos menos profesores nas escolas, as listas de espera medran, pechan as camas dos hospitais” e retrasan as valoracións da dependencia mentres a administración paralela “segue igual”.

Tildou a Feijóo de “home anuncio” logo de anunciar a racionalización da administración en novembro de 2009 e en Consello da Xunta de abril de 2010, con un goberno “vivindo dos anuncios pero non dos feitos”. Criticou que o presidente da Xunta ve a Galicia “como estación de paso”, polo que “leva un terzo da lexislatura e non fixo máis que falar dos demais sen dar conta do que fai como goberno”.

O parlamentario socialista reclamou á Xunta que “explique ónde vai recortar para reducir os 1.000 ou 2.000 millóns de euros que desaparecerán dos orzamentos” e dixo que “os socialistas apostamos por reducir o gasto improductivo, suprimir os delegados territoriais, eliminar as fundacións comarcais e preservar o sistema sanitario público e investir na educación pública”.

“Estamos diante dos 30 anos de maior benestar económico e social da historia de Galicia, e Feijóo está comezando a recortar o gasto na sanidade e na educación, materias que deberíamos preservar e mellorar, precisamente recortando “chiringuitos” e organismos prescindibles”.

Proposición non de Lei

Lage reclamou á Xunta que aplique a Lei 12/2008 que modifica a Lei de Desenvolvemento Comarcal para suprimir a totalidade das fundacións comarcais e proceder antes de que finalice o ano 2010 á disolución do resto de organismos e entidades, cumprindo o anuncio do Consello da Xunta de 24 de abril. Tamén propuxo fusionar as 4 xestures provinciais nunha soa e integrar no Igape o Centro Europeo de Empresas e Innovación de Galicia, S.A. –BIC Galicia-.

O parlamentario socialista lembrou o anuncio incumprido do conselleiro de Presidencia de aforro de 180.000 euros anuais en alugueiros por pechar 34 fundacións comarcais e outros 274.000 por prescindir das oficinas de outros 5 entes. Dixo que “todo fume, todo propaganda. Non van a aforrar nada, e agora terán que explicar onde está ese aforro seis meses despois de telo anunciado”.

Lage Tuñas recordou que “xa no ano 1992, o conselleiro da Presidencia anunciaba a creación dunha comisión de racionalización da administración institucional. Pois case mellor que non tiveran racionalizado tanto porque 18 anos despois atopámonos cunha administración paralela inmensa, pouco eficiente e moi costosa”.

Posted via email from Certo.gl, o xornal dixital de Barbanza e Noia

Boiro: o presidente da Deputación inaugura as beirarrúas de Amanecida a Beluso o luns 13 de setembro


Boiro, 8 de setembro de 2010. O Presidente da Deputación da Coruña, Salvador Fernández Moreda, asistirá o luns, día 13 de setembro, ás 13.30 horas, ao acto de inauguración da construción de beirarrúas na estrada provincial C.P. 1104, entre Amanecida e Beluso, na parroquia de Bealo (CP 1104 Boiro a Ponte de San Francisco, P.K. 8,4 a 10, 15). O importe da actuación ascendeu a 275.200 euros, que foron aportados pola Deputación da Coruña. 

Á inauguración, que estará presidida polo alcalde, Xosé Deira Triñanes. Están convidadas a corporación municipal, as asociacións veciñais e sociais de Bealo e tódolos veciños que desexen participar. O punto de encontro é o cruce coa estrada que vai á igrexa de Bealo, de onde partirá a comitiva percorrendo as novas beirarrúas ata chegar á Amanecida, lugar no que se celebrarán as intervencións e se servirá un viño ofrecido polos veciños da parroquia.

Igrexa de Bealo

A dotación de beirarrúas a esta zona é unha antiga reivindicación veciñal e permitirá aumentar sensiblemente a seguridade viaria nesta estrada, que rexistra un alto índice de tráfico de vehículos. En total, executáronse uns dous quilómetros de beirarrúa, á parte de acometer a rede de augas pluviais e repoñer os servizos afectados, como o alumeado, a rede eléctrica ou a telefonía.

 

Posted via email from Certo.gl, o xornal dixital de Barbanza e Noia

Ribeira: a Casa do Concello sométese durante un mes a distintas reparacións


Ribeira, 8 de setembro de 2010. A Casa Consistorial ribeirense está sendo obxecto esta semana dunha serie de actuacións de mantemento, que inclúen a reparación do tellado do inmoble, a limpeza de canalóns e a impermeabilización das canaletas destinadas á recollida de pluviais. 

As obras teñen un orzamento de 33.350 euros, 25.000 dos cales corresponden a un suplemento de crédito aprobado no pleno do pasado mes de xullo, con cargo ao remanente de tesourería derivado da liquidación dos orzamentos do 2009. 

A actuación está sendo executada por Construcciones Mariscal S.L. e durarán arredor dun mes.

 

Posted via email from Certo.gl, o xornal dixital de Barbanza e Noia

Boiro: orde do día do pleno do xoves 9 de setembro das oito da tarde

A Pobra: este venres 10 reábrense os xardíns Valle-Inclán tralo remate das reformas

A Pobra do Caramiñal, 8 de setembro de 2010. Como anunciara no seu día o Concello, aínda que non se cumpriron as previsións que indicaban que se rematarían antes do 20 de agosto, as obras de reforma nos xardíns Valle-Inclán están listas. O vindeiro venres 10 de setembro ten lugar a súa reapertura, para o que está previsto un acto oficial.

Ás oito da tarde haberá unha recepción de autoridades no Concello e media hora despois procederase á reapertura oficial, na que haberá xigantes e cabezudos da Confraría do Carme dos Pincheiros e actuación da banda de gaitas A Carballeira de Ourense.

Antes publicamos:

Agardan que as obras dos xardíns Valle-Inclán estean rematadas antes do 20 de agosto

Posted via email from Certo.gl, o xornal dixital de Barbanza e Noia

Twitter

Related Posts with Thumbnails Banner: Regale selva tropical