15.12.10

A Pobra do Caramiñal: o Psoe denuncia o pouco respeto polos veciños próximos á Tomada por parte de Augas de Galicia


A Pobra do Caramiñal, 15 de decembro de 2010. Os socialistas pobrenses informaron hoxe en rolda de prensa que a finais de novembro do presente ano Augas de Galicia deu resposta as alegacións presentadas polos veciños e polo Grupo Municipal Socialista, en relación coa ampliación do polígono industrial da Tomada e coa derivación do rego do canal de Xunqueiras. Na resolución o ente recoñece que “deberán separarse as augas pluviais xeradas no ámbito do polígono das derivadas polo canal de Xunqueiras, evitando que por escorrenta cheguen augas a dito canal”.


Segundo o Psoe da Pobra, "ésta era unha das alegacións formuladas polos veciños e por este grupo político xa que unha das mesmas era que dito rego non ten o cauce suficiente para absorber as augas pluviais procedentes da impermeabilización de 100.000 m2. Outra condición que Augas de Galicia impón é que “a canle deberá ter unha dimensións mínimas equivalentes á 1,30 x 0,80 m”. É dicir que amplían o caz de formigón prefabricado xa que o considerabamos de dimensións escasas.Tamén din que “para proceder aos labores de conservación e mantemento da canle, no ámbito do polígono, é suficiente o ancho de 5 m. da zona de servizo”. Ata aquí estamos de acordo con dita resolución pero o que nos parece alarmante e que “as augas pluviais producidas recolleranse mediante tubos e serán dirixidas cara a un pozo de tormentas e unha balsa de decantación a construír ao sueste do ámbito da ampliación, e posteriormente conducidas e vertidas a un afluente do río Morto.”


Os socialistas aclaran que tal afluente do río Morto é unha fonte chamada “Fonte da Pedra”, a cal non nace no límite da futura ampliación, senón que para que as augas cheguen a esa fonte antes teñen que pasar por propiedades que non teñen ningunha servidume. "Por iso entendemos que hai un nulo respecto polos propietarios desas parcelas", denuncian.

Outra cuestión que salientan é que se trata dunha fonte pequena: é un pequeniño rego e que ten uns pozos que se utilizan para o regadío. Este rego, afirman, "tampouco ten cauce para que podan circular as augas pluviais procedentes da impermeabilización de 100.000 metros cadrados".


Animan a alegar ao Plan Parcial da Tomada


Para o Psoe pobrense "o máis grave e fundamental é que o río Morto xa leva un caudal excesivo cando chove, desbordando na Pontenaveira e arrastrando a terra das fincas de labor que están o seu carón. Por estas cuestións este grupo municipal volveu a alegar en tempo e forma  e fai un chamamento para que cando o Plan Parcial da ampliación da Tomada estea a exposición pública,  todas as persoas que teñan propiedades limítrofes co río Morto ou se vexan afectadas polas augas da fonte da Pedra, que fagan alegacións o proxecto, porque as Administracións deben respectar a todos os cidadáns e os seus bens. Si para facer un proxecto fai falta máis inversión que invistan pero que non danen ás persoas que xa están instaladas no medio".


"Nós, os socialistas estaremos o lado dos veciños porque é preciso buscar solucións aínda que sexan máis custosas. O río Morto non ten capacidade para levar outra tanta cantidade de auga como a que está levando na actualidade cando chove. O paseo fluvial que se está construíndo non soluciona os problemas de enchentes augas arriba", rematan.

Posted via email from Certo.gl, o xornal dixital de Barbanza e Noia

Dodro: o domingo 19 de decembro entrégase o premio "Eusebio Lorenzo Baleirón" de poesía no colexio do mesmo nome

Dodro, 15 de decembro de 2010. O vindeiro día 19 de decembro, ás 17:00 horas terá lugar no CPI Eusebio Lorenzo Baleirón o acto de entrega do Premio de poesía do mesmo nome ao traballo gañador deste ano 2010, obra de Luís Valle Regueiro.

No transcurso da velada, haberá unha actuación poético­ musical de Eva Veiga para rematar co tradicional aperitivo de celebración que o Concello lles ofrece a todas as persoas asistentes.

Para facilitarlles a asistencia aos veciños de Dodro, dispoñeranse 2 microbuses da empresa Autocares Bustelo que farán unha recollida polos lugares habituais.

Ruta 1 : Bustelo-­Teaio-­Devesa­-Castro­-Imo­-Bexo-­Manselle- Laíño para o CPI
Ruta 2 : Pexegueiro­-Traxeito-­Paisal-­Rialiño-­Lestrobe­-Dodro-Vigo para o CPI

A recollida será a partir das 16:00 horas (catro da tarde).

Un día antes, tamén en Dodro:


A de Axuda: o sábado 18, xornada deportivo-solidaria

Antes publicamos:


Premio de poesía "Eusebio Lorenzo Baleirón": fallo do xurado en 2010

Posted via email from Certo.gl, o xornal dixital de Barbanza e Noia

Boiro: obradoiros de "ConTacto" o venres 17 e mércores 22 para nenos entre 8 e 11 anos


Nos obradoiros usaranse latas de conserva para reconvertilas en adornos

Boiro, 15 de decembro de 2010. A ONGD ConTacto organiza un obradoiro de manualidades de temática relacionada co Nadal para nenos de entre 8  e 11 anos. A actividade farase nas oficinas centrais de ConTacto o venres 17 e o mércores 22 de decembro en horario de 17:00 a 19:00 horas.

O obxectivo do obradoiro é que os pequenos aprendan a usar refugallos como latas de conservas ou envases de iogures para reconvertiros en adornos e agasallos de Nadal. Tamén se busca axudar ás familias na conciliación da vida laboral e familiar ofrecendo actividades de ocio para os nenos que inician as súas vacacións de inverno. Más información no teléfono 981847307. Prazas limitadas.

 
 

ONGD ConTacto, "Asesoría al Inmigrante y su Integración" 
Ofic. Central: Rúa Principal Nº 3 Edif. Polivalente. Boiro - A Coruña. CP.15930 
Teléfono: 981847307. E-mail: contactoongd@gmail.com
Ofic. Noia: Rúa Corredoira s/n, Casa de la Cultura. Noia - A Coruña. CP.15200 
Móvil: 626367343. E-mail: contactoongdnoia@gmail.com

Posted via email from Certo.gl, o xornal dixital de Barbanza e Noia

Noia: o xeógrafo irlandés Patrick O'Flanagan estivo onte na tertulia literaria "Noia, porto de Compostela"

Noia, 15 de decembro de 2010. A última sesión da tertulia literaria "Noia, porto de Compostela" tivo lugar onte, martes, e os protagonistas foron o académico e xeógrafo irlandés Patrick O`Flanagan e a súa dona, María Jesús.

Patrick O`Flanagan é un xeógrafo e académico irlandés cuxa principal investigación se centra na Europa Atlántica, con particular interés no Atlántico de Iberia. O fío condutor da tertulia foi o debate xerado trala lectura das obras “Xeografía Histórica de Galicia” e “Puertos de las ciudades del Atlántico de Iberia, c. 1500-1900”. Este prestixioso profesor e xefe do Departamento de Xeografía da Universidade de Cork (Irlanda) comentou que sempre mantivo relacións coas universidades do Atlántico na Península Ibérica e especialmente coa Universidade de Santiago de Compostela. No ano 1969 visitou por primeira vez a vila de Noia, momento en que contactou co catedrático Antonio Gutiérrez de Velasco, co cal mantivo unha amizade que trascendeu o profesional.

Tres anos de tertulia literaria

Nun acolledor espazo do café bar “Baixamar”, cada martes, gozan da maior saúde os compoñentes da tertulia literaria, “Noia, porto de Compostela”. Incrementar coñecementos a partir de comentarios e análisis de textos literarios ou xornaísticos, así como debater o contexto social, económico e político de Noia dende unha perspectiva crítica do pasado, presente e futuro, son os obxetivos principais polos que semanalmente comparte o tempo o mencionado clube de lectura.

Dende o inicio dos encontros, hai uns tres anos, pasaron por esta tertulia noiesa invitados como Rafael García Guerrero, alcalde de Noia; Xerardo Estévez Fernández, ex alcalde de Santiago de Compostela e arquitecto ou o tamén arquitecto Ignacio Hermo Túñez, entre outros. Os diálogos co ribeirense José Antonio Ventoso Mariño sobre a súa “Historia das historias da escola”, ou co poeta e premio Cervantes Antonio Gamoneda, supuxeron para os lectores da tertulia de Noia a oportunidade de descubrir diversos aspectos das súas obras, as súas faces e as súas voces.

Relacionada:


Literatura: o poeta noiés Leiceaga con Gamoneda en Santiago

Posted via email from Certo.gl, o xornal dixital de Barbanza e Noia

Boiro: o sábado 18 de decembro inaugúrase a exposición "D-Construccións" de Manuel Silva "Bisgue"


Bisgue traballou como ilustrador no filme Leo, de Fernando Cortizo, que podes ver aínda en Flocos.tv

Boiro, 15 de decembro de 2010. O próximo sábado 18 de decembro inaugúrase no centro social de Boiro unha exposición de escultura e pintura do artista boirense Manuel Silva "Bisgue". O acto terá lugar ás oito da tarde e haberá música en directo. A mostra dos traballos estará ata fin de mes (e ano, por conseguinte).

Quen é Manuel Silva Piñeiro, alias "Bisgue"?

Ficha na Asociación Galega de Profesionais da Ilustración, aquí
Currículum en Galegos.info, aquí
A súa canle en Vimeo, cos seus traballos en vídeo, en http://vimeo.com/bisgue

Posted via email from Certo.gl, o xornal dixital de Barbanza e Noia

Dodro: o sábado 18, xornada con actividades deportivas para todos os públicos e por unha causa solidaria


Dodro, 15 de decembro de 2010. Este vindeiro sábado 18 a concellaría de Deportes de Dodro ten prevista unha xornada de solidaridade no pavillón polideportivo. Búscase que as veciñas e veciños leven alimentos non perecedeiros para unha campaña solidaria coa que axudar aos que menos teñen. Entre estes víveres pódense atopar conservas de todo tipo, legumes como lentellas ou aceite.
Haberá un campionato de fútbol de 2x2 de 14:00 a 16:30, xogos con porterías inchables, unha clase de Cardio Dance, un partido de liga cadete de voleibol e unha gimkana en bicicleta para os máis pequenos. Se chove suspéndese.

Posted via email from Certo.gl, o xornal dixital de Barbanza e Noia

Dodro: presentado un manual do sistema operativo libre Ubuntu

Edítase en galego, a primeira lingua do estado na que ve a
luz, pois é unha traducción directa desde o inglés.

Dodro, 15 de decembro de 2010. O salón de actos da Casa de Cultura de Dodro acubillou onte a presentación da primeira edición do manual de Ubuntu en lingua galega. José Andrés Freire en representación da área TIC da USC e Vitoria Rei Mariño, tenenta de alcalde de Dodro, salientaron a súa satisfacción por ver o produto xa publicado e dispoñíbel para a súa distribución e uso por todo tipo de público. Tamén agradeceron o financiamento que se obtivo da Deputación da Coruña e da Secretaría Xeral de Política Lingüística. Vitoria Rei engadiu que esta publicación "demostra unha vez máis que en galego tamén estamos na vangarda: neste caso o noso idioma convírtese na mellor ferramenta para o acceso ás novas tecnoloxías".

Na presentación estivo tamén Miguel Branco Vázquez como presidente da asociación cultural Proxecto Trasno, quen fixo fincapé no interese de dar continuidade a este tipo de iniciativas en que polo interese xeral colaboran tanto a Administración como entes cívicos. Remataron a quenda de intervencións os responsables dos servizos técnicos do Concello e da USC implicados así como Miguel Bouzada, que representou aos tradutores voluntarios.

A obra "Comezar con Ubuntu 10.04", que agora sae editado en papel, é unha guía para principantes do sistema operativo Ubuntu. O manual, que tamén se pode obter de balde por Internet (http://ubuntu.usc.es/manual) axudaralle aos usuarios noveis a familiarizarse coas tarefas diarias deste potente sistema: navegar pola web, escoitar música ou escanear documentos. Destaca o doado de seguir as instrucións e é axeitado para todos os niveis de experiencia. Escrito cunha licenza de código aberto, o manual conta coa correspondente versión electrónica, accesible dende a web propia desta, que é de balde para descargar, ler, modificar e compartir (http://ubuntu.usc.es/manual).

Comezar con Ubuntu 10.04 é un proxecto de colaboración entre o  Concello de Dodro, a Oficina de Software Libre da Universidade de Santiago de Compostela e o colectivo cultural Proxecto Trasno, que forneceron o persoal técnico tanto lingüístico como informático e que chega ao soporte en papel financiado que se editan do libro, pola Deputación da Coruña, a Fundación para o Fomento da Calidade Industrial e o Desenvolvento Tecnolóxico de Galicia e a Xunta de Galicia, e que xa ten asegurado unha nova reimpresión ao abeiro do convenio cos grupos de usuarios de software libre coa SX de Modernización e Innovación Tecnolóxica da cal AC Trasno é asinante.

A tenenta de alcalde de Dodro tamén quixo salientar que "presentamos este traballo desde o un concello rural, o que demostra que hoxendía non hai fronteiras nin estamos dispostos a aceptalas en concellos como Dodro, situandonos á cabeza sen complexos tamén neste tema. Podemos decir que estamos a cumprir unha das premisas nacionalistas cando accedemos ó goberno municipal: poñer a Dodro no mapa, é máis, podemos dicir que poñemos a Dodro no mundo, neste caso a través da
Rede, construíndo país e traballando sempre en positivo”.

Considérase que tanto a implantación na rede de locais socioculturais do Concello de Dodro, as aulas libres da USC así como os cursos de formación da Asociación Trasno serán os primeiros en recibir este material. Sen dúbida a implantación do programa Abalar, por parte da Xunta de Galicia e baseado no mesmo sistema operativo, será unha fonte de demanda importante para este tipo de materiais e así se espera que se poida seguir mantendo actualizado de cara ao futuro, explicaron os promotores.

Sábado 18 de decembro

Por outra banda, este vindeiro sábado 18 a concellaría de Deportes de Dodro ten prevista unha xornada de solidaridade no pavillón polideportivo. Búscase que as veciñas e veciños leven alimentos non perecedeiros para unha campaña solidaria. Haberá un campionato de fútbol de 2x2 de 14:00 a 16:30, xogos con porterías inchables, unha clase de Cardio Dance, un partido de liga cadete de voleibol e unha gimkana en bicicleta para os máis pequenos.

Posted via email from Certo.gl, o xornal dixital de Barbanza e Noia

Boiro: Verdegaia presenta o documental "Gran Superficie" este venres 17 no centro social

Boiro, 15 de decembro de 2010. O venres 17 de decembro Verdegaia vai presentar ás sete e media da tarde no Centro Social do Concello de Boiro o documental "Gran Superficie", de Ecologistas en Acción. A dita proxección invítase á cidadanía en xeral do Concello. Durante a proxección vaise debater e reflexionar sobre ás nosas actitudes e comportamentos fronte ao consumo, "especialmente nun Nadal en tempos de crise", explican dende esta organización ecoloxista.


"Interésanos particularmente a participación da xuventude e de aquelas persoas que teñan responsabilidade na educación como o profesorado ou as familias. Por este motivo, estamos a invitar expresamente ás ANPAs do Concello e aos centros de ensino. Queremos que o documental sirva para reflexionar sobre o impacto que a publicidade ten nas nosas vidas, a influencia das marcas no noso comportamento persoal ante as demais persoas, a importancia da educación no consumo e a súa influencia de cara a frear o consumismo, a posta en valor do consumo de proximidade, e mesmo da influencia do consumo na nosa (in)felicidade", aclaran.

O documental consta de oito capítulos: I. Publicidade, II. Estratexias, III. Alimentación e estética, IV. Educación, V. Consumo, VI. Grandes superficies, VII. Contorna, e VIII. Infelicidade.

A entrada é de balde.

Posted via email from Certo.gl, o xornal dixital de Barbanza e Noia

Twitter

Related Posts with Thumbnails Banner: Regale selva tropical