18.5.11

Ribeira: Queremos Galego leu un manifesto fronte á sala museo municipal a prol do galego

Media_httpfarm3static_eicvo

Ribeira, 18 de maio de 2011. Coincidindo co día das Letras Galegas, a plataforma Queremos Galego no Barbanza, xunto coa asociación cultural Altofalante organizaron mobilización expansiva" pola lingua que nos une".
Media_httpfarm4static_ejckb

Esta actividade foi case simultánea en diferentes lugares do planeta e serviu para conmemorar a vida do poeta “punk” e cosmopolita Lois Pereiro e para pór en evidencia os ataques á lingua que está facendo, segundo esta plataforma, o actual goberno da Xunta de Galicia.

Media_httpfarm6static_ssuwg

En Ribeira este acto celebrouse na Rúa de Galicia en fronte ao Museo Municipal “Casa de doña Adela” ante un nutrido grupo de persoas. Ademais do manifestó léronse poemas de Lois Pereiro e textos de Castelao relacionados coa lingua. Entre os participantes da lectura estiveron: Xosé Antonio Vázquez Cobas (presidente de Altofalante), Luís Teira (concelleiro do BNG) e Dominga Brión (candidata á alcaldía polo Bng).

Media_httpfarm3static_csknb

MANIFESTO LIDO

Paremos os ataques contra o galego!
 

As galegas e os galegos festexamos no Día das Letras o feito de termos un idioma propio, milenario e fértil. Celebramos a lingua que nos une; a fala que herdamos e queremos deixar en herdo; a escrita que nos pensa, nos canta e nos soña.

Mais neste Día das Letras do ano 2011 non só podemos festexar e celebrar. Tamén nos vemos na necesidade de chamar a atención sobre os ataques que está a recibir nestes momentos o noso idioma. Estas inxustas agresións poñen en perigo o futuro da nosa lingua e da nosa cultura, ademais de debilitaren gravemente a convivencia e a cohesión social do país.

Temos que erguer a nosa voz para denunciar que a indefesión dos nosos dereitos lingüísticos é maior desde o momento en que a persoa que debería ser a primeira valedora do noso idioma –o presidente da Xunta– é o seu inimigo número un. Desde que Alberto Núñez Feijóo tomou posesión como presidente do Goberno galego, hai xa dous anos, a Xunta aínda non adoptou nin un mísero adianto para a nosa lingua en ningún ámbito. Ben ao contrario, desde 2009 estamos a ver como se tenta facer, pola vía dos feitos, que o galego deixe de ser na realidade lingua oficial.

É difícil facer unha listaxe completa de todo o destruído, mais recordemos cando menos algunhas cousas:
 
- A pesar da oposición dos sindicatos, o PP aprobou en solitario unha reforma da Lei da Función Pública que elimina de feito o galego como requisito, colocándoo nunha posición secundarizada a respecto do castelán.
 
- A pesar do rexeitamento de sindicatos, asociacións de nais e pais, asociacións estudantís, institucións culturais, Consello Escolar de Galiza, etc., a Xunta aprobou un decretazo contra o galego que supón o modelo educativo máis regresivo de todo o Estado español. O galego é o único idioma do Estado que ten prohibido o seu uso en determinadas materias de ensino. Nestes momentos, só 10% da educación infantil das cidades é en galego, a pesar de que o solicitaron 40% das familias. Esta realidade amosa o verdadeiro sentido da mal chamada Lei de Convivencia, que persegue reducir aínda máis a presenza do galego na escola.

- Na administración de Xustiza, a Xunta distribuíu un programa informático que, desde maio do ano pasado, impide usar o galego.

- A Xunta ordenou aos centros de ensino que se desfixesen de 190.000 libros de texto gratuítos para as familias, adquiridos pola propia Xunta na anterior lexislatura e que tiñan unha vida útil de dous anos máis. O motivo é que estaban escritos en galego. A Asociación Galega de Editores calcula en 3,8 millóns de euros o valor dos volumes desbotados, que nunha parte volveu a financiar a Xunta –cun diñeiro público que sería moi necesario para outros cometidos–, e que tiveron que cubrir as familias no resto.

- A Xunta de Galiza, que tanto vende “austeridade”, leva malgastadas cantidades inxentes de diñeiro só en tentar reducir o galego no sistema educativo. A eses 3,8 millóns de euros de libros de texto inutilizados hai que sumarlle os 40.000 euros que custou mudar as Galescolas en Galiñas Azuis, os 160.995 euros da pseudoconsulta ás familias, etc. A presión social logrou parar unha campaña sobre o decretazo que a Xunta xa tiña adxudicada, por valor dun millón de euros, mais descoñécese a indemnización que a Xunta afrontou pola suspensión do proxecto.

- O presidente da Xunta ameaza con derrogar a Lei de normalización lingüística, aprobada por unanimidade no Parlamento hai case 30 anos. Quere que os nosos nomes de lugar deixen de ter como forma oficial a propia, a galega.

- A vida cultural galega, nas súas diferentes expresións (audiovisual, teatro, música, etc.), está  a ser minusvalorada e desprotexida pola Xunta, ao mesmo tempo que desprezada e infrarrepresentada na CRTVG.

- A pesar de que o Estatuto de Autonomía sinala a obriga dos poderes públicos galegos de potenciar o uso do noso idioma tamén no ámbito informativo, moitos dos medios que utilizaban con normalidade a nosa lingua viron na obriga de fechar. A Xunta deu de baixa as subscricións e negouse a pór publicidade nos xornais electrónicos ou impresos que usaban o noso idioma e daban unha visión da realidade diferente á oficial. Debemos denunciar con claridade que esta política pon en perigo a liberdade de expresión.
 
O poeta Lois Pereiro, a quen lle dedicamos este ano o Día das Letras, di nun dos seus poemas:

      A amizade protexe e o amor cura

      o odio contaxia e fire

      a indiferencia mata.

Apliquemos estes versos á nosa lingua. Fronte ao odio e fronte á indiferenza, o noso amor.
 
Paremos os ataques contra o galego!

Media_httpfarm3static_ftqhb

Posted via email from Certo.gl, o xornal dixital de Barbanza e Noia

Noia: este venres 20, "O achado do castro", no Liceo

o achado do castro.pdf Download this file

Tamén pode interesarlle:


Festas de Sta Rita de Argalo: do 20 ao 22 de maio


Charla: este venres 20 de maio, Tuenti para familias


Peregrinación: a Sta Rita, en Compostela, este sábado 21


Programación cultural: maio e xuño

Posted via email from Certo.gl, o xornal dixital de Barbanza e Noia

Ribeira: entregados os premios do Certame das Letras Galegas que organizou o Concello

Ribeira, 18 de maio de 2011. Dezaoito nenas e nenos de Ribeira con idades comprendidas entre 7 e 13 anos resultaron galardoados na 19ª edición do Certame Literario das Letras Galegas: un concurso promovido polo Concello a través das súas Áreas de Cultura e Educación, co fin de distinguir os traballos literarios máis destacados elaborados por rapaces de Primaria dos distintos colexios do municipio.  

Un total de 207 obras foron presentadas a estes premios, estruturados en tres categorías (prosa, poesía e banda deseñada), subdividíndose estas á súa vez nas modalidades de entre 7 e 10 anos e de entre 10 e 13 anos. 

Os edís Luciano Fernández e Juana Ermitas Crugeiras foron os encargados de entregar os diplomas e agasallos correspondentes aos rapaces distinguidos ante un Auditorio Municipal completamente cheo polos seus compañeiros de escola. Previamente, houbera un espectáculo de maxia a cargo de Dani García co título de Acción. 

Ademais, cada neno e nena participante recibirán un diploma e unha camiseta de agasallo que se entregará a cada colexio para a súa distribución. Por outra parte, todos os asistentes á función de maxia recibiron un cubilete de ceras do Maio Cultural. 

Relación de premiados

Na modalidade de prosa, os galardoados na categoría de 7 a 10 anos foron: Alba Pérez Prol, do colexio de Aguiño, pola obra “Alba, Sálvora e as Sereas”; Vania Lucía Traygo Cornejo, do Galaxia, por “Araña Maraña”; e Pablo Abad García, do colexio O Grupo, por “Mensaxe nunha botella”. 

Na categoría de 10 a 13 anos, os premiados foron María Roo Sampedro, do colexio de Aguiño, por “Bolboretas en perigo”; Laura Martínez Ayaso, do colexio A Milagrosa de Oleiros, por “Irmá dos mares”; e Jacobo Placer Frey, do CEIP de Palmeira, por “A patria”. 

Na modalidade de poesía, os distinguidos na categoría de 7 a 10 anos foron: Uxía Castromán Couselo, do colexio O Grupo, por “A primavera”; Javier Súarez Lijó, do colexio de Artes, por “O meu gatiño”; e Isabel Montero Santiago, do colexio A Milagrosa, pola obra “A casa dos Libros”. 

Na categoría de 10 a 13 anos, foron Andrea Rivas Pérez, do CEIP de Palmeira, por “Os namorados”; María Melón Bretal, do colexio Galaxia, por “A miña horta”; e Raquel Fernández Oliveira, do colexio de Artes, por “Alegría”. 

Na modalidade cómic, de 7 a 10 anos, foron premiados: Simón Sampedro Pego, do colexio de Artes, por “As letras galegas van en camiño”; Melisa Freiría Chauza, do colexio Galaxia, por “Un acontecemento inesperado”; e Sergio Martínez Martínez, tamén do Galaxia, por “Viaxe ao mar”. 

De 10 a 13 anos, os galardoados foron: Ana Pérez Arnoso, do CEIP de Aguiño, por “O aniversario de Sabela”; Lucas Fernández Falque, do colexio O Grupo, por “A invasión dos antigalegos”; e Irene Fariña Martínez, do CEIP de Palmeira, por “O can disfrazado”. 

Ao remate do acto entregouse aos colexios participantes lotes de libros de Lois Pereiro, a biografía que realizou Antón Lopo sobre o escritor homenaxeado nas Letras Galegas 2011, e varias publicacións promovidas polo Concello, como a última novela de Plácido Betanzos (“Paravea no Inferno”), o homenaxe poético a Riveira de Agustín Fernández Oujo e o libro sobre o patrimonio etnográfico e arqueolóxico de Barbanza de Ledicia Lustres Viturro.

Pode que lle interese:


Cultura: "Paravea no inferno", de Plácido Betanzos


Maio cultural: adicado a Lois Pereiro e Álvaro Cunqueiro

Posted via email from Certo.gl, o xornal dixital de Barbanza e Noia

A Pobra: os socialistas denuncian o desleixo da escola de música do Campiño e da unitaria do Camiño Ancho

A Pobra do Caramiñal, 18 de maio de 2011. As fotos primeiras corresponden ó estado en que se lles entregou a escola de música do Campiño para celebrar un mitin do PSdeG- PSOE aos socialistas.
As seguintes corresponden o estado en que se encontra o piso superior da escola unitaria do Camiño Ancho. Anteriormente celebráranse mítines doutros partidos nos que había cadeiras: ante a sorpresa da falta das mesmas, explican os socialistas, "miramos nas portas por se se gardaran noutro lado. A inmundicia na que se atopan os locais públicos pola falta de coidado mantemento é evidente: estas fotos falan por si mesmas".

Posted via email from Certo.gl, o xornal dixital de Barbanza e Noia

Ribeira: ata o 3 de xuño para presentarse ás probas de acceso ao conservatorio

Hai que escoller tres instrumentos dos que se ofertan

Ribeira, 18 de maio de 2011. O Conservatorio Profesional de Música informa de que o prazo para formalizar a matrícula necesaria para poder presentarse ás probas de acceso ao primeiro curso do grao elemental terá lugar do 18 de maio ao 3 de xuño, ambos inclusive. 

A proba de acceso propiamente dita terá lugar o día 20 de xuño pola tarde, a partir das 17.00 horas. Cabe lembrar que, por lei, para poder optar a asistir a este primeiro curso hai que ter entre 8 e 14 anos (cumpridos durante o ano 2011) e presentarse  a unha proba de acceso, que consta de exercicios moi básicos e sinxelos co fin de valorar aspectos como a psicomotricidade, a  entoación, o ritmo, etc... 

A matrícula deberá realizarse nas oficinas do centro en horario de mañá. É necesario presentar dúas fotos e fotocopia do DNI ou, en caso de non ter DNI, fotocopia do libro de familia.  

Tamén é preciso elixir tres instrumentos, dos que se ofertan no conservatorio,  por orde de preferencia. Como as prazas son limitadas, adxudícanse pola orde da puntuación acadada na proba de acceso, polo que se algún alumno non pode optar á primeira opción escollida, daráselle praza na segunda e se é o caso na terceira.

Posted via email from Certo.gl, o xornal dixital de Barbanza e Noia

Noia: este sábado 21 de maio parte unha peregrinación a Santa Rita en Compostela

Sta._Rita-11[1].pdf Download this file

Media_httpfarm3static_hdtcp

Saída ás 11 da noite (23:00 horas) da praza do Concello, ollo...

Posted via email from Certo.gl, o xornal dixital de Barbanza e Noia

Ribeira: o Sálvora, campións da Copa do Concello

Ribeira: resultados da Carreira da Virxe da Guía

GUIA 2011. IV CIRCUITO.xlsx Download this file

Media_httpcarreirainf_rnvig

Fotos, vídeo e toda a información en http://www.virxedaguia.org

Así queda a clasificación para o Circuíto de Carreiras Populares de Ribeira:

Posted via email from Certo.gl, o xornal dixital de Barbanza e Noia

Twitter

Related Posts with Thumbnails Banner: Regale selva tropical