21.6.10

A Pobra do Caramiñal: se alguén esperaba ao Hidria, que se vaia sentando

"A Consellería de Cultura e Portos de Galicia prescindiron da presencia do Hidria no programa de Portos Xacobeos, de forma unilateral, sen explicacións, e unha semana antes de empezar", contan en Culturamaritima.org, xunto coa nota de prensa dos armadores deste vapor, auténtica xoia que aínda suca os nosos mares. Un dos portos onde ía recalar para este programa de Portos Xacobeos, que comezou con moi mal pé ao deixar fóra Noia (menos mal que rectificaron hai uns días), era o de A Pobra do Caramiñal. Semella que non vai poder ser, nun acto de improvisación máis ao que nos ten acostumados a consellería de Roberto Varela.
Toda a nova en http://www.culturamaritima.org/node/16170

Posted via web from Certo.gl, o xornal dixital de Barbanza e Noia

Ribeira: isto non é África

Pero a canción di que si...
E xusto estes días, cinema africano na Centenaria. Casualidades? Non cremos. O Mundial ten moito que ver! (e máis terá se non volta a selección para a casa xa)

Posted via web from Certo.es, o xornal virtual de Barbanza e Noia

Política: Xuventudes Socialistas denuncia que a Xunta quere prohibir a entrada de menores nos ciberlocutorios

María Torres denuncia que “Feijóo, no seu afán de prohibir ós menores, tamén inclúe ós ciber entre aqueles establecementos nos que terán prohibida a súa entrada, coa correspondente multa se incumpren a prohibición”.

 

Santiago de Compostela, 20 de Xuño de 2010.- A secretaria xeral das Xuventudes Socialistas de Galicia (XSG), María Torres, lamentou hoxe que a Xunta de Galicia non teña reparos no seu afán prohibicionista, e que teña incluído ós ciberlocutorios entre os establecementos nos que os menores terán prohibida a súa entrada se o anteproxecto de lei de prevención de alcohol entre menores sae adiante na súa tramitación parlamentaria.

María Torres denuncia que “Feijóo ten un único fin coa mocidade galega que é eliminala pouco a pouco de determinados espazos públicos, empregando ademais un criterio hipócrita e cínico.” E afondou dicindo: “Parece cando menos insultante que se lles vaia a prohibir a súa entrada nos ciber nos que non se dispensa en moitos casos bebidas alcohólicas, e non se faga o mesmo con cafeterías ou restaurantes nos que se dispensa alcohol dende as 8 da mañá, aplicando a lóxica prohibicionista que parece querer seguir a Xunta de Galicia neste terreo”

María Torres cree que “Non ten sentido eliminar a presenza física dos menores de determinados espazos como medida de protección cando se deixa a porta aberta a que un/ha profesor/a nun centro docente poida estar bebendo alcohol en presenza dos seus alumnos/as”.


Non é o mesmo "alcohólico sospeitoso" que "sospeitoso alcohólico"

Este anteproxecto ten un obxectivo claro, sempre segundo Xuventudes Socialistas, "o cal é establecer medidas de control da Administración en espazos de dominio público”, o cal permitirá entre outras cousas que calquera funcionario en labores de inspección, poida realizar pola rúa controis de alcoholemia a menores, que para a Xunta parece que se convirten por regra xeral en alcohólicos sospeitosos” “Esta actitude dá boa mostra da falla de interese por previr e educar por parte da Xunta de Galicia, que máis ben parece interesada en aplicar en clave “xuvenil” unha nova lei de “vagos e maleantes”, recriminou Torres Pose.

“Estamos ante unha lei que non vai actuar na vía preventiva, unha lei que evita ter en conta a situación mozos e mozas con problemáticas específicas familiares e persoais, unha lei que ante consumos abusivos de alcohol non pon enriba da mesa nin unha soa medida educativa para modificar as circunstancias que levaron a que se produza esa situación”, matizou Torres Pose.

A máxima responsable da organización xuvenil socialista apostou por crear espazos de diálogo e entendemento entre a mocidade e as administracións.”É preciso garantir o acceso a servizos asistenciais eficaces, que conten con persoal axeitadamente formado tanto para a atención dos mozos e mozas que consumen alcohol de xeito abusivo como para as súas familias; é preciso potenciar a educación como ferramenta “imprescindible” para os hábitos de vida saudables; é preciso potenciar a autonomía da nosa mocidade para que poidan tomar decisións responsables e informadas, fomentando a adquisición de habilidades sociais e persoais que poidan influír sobre os factores que determinan a súa saúde”, concluíu María Torres.

Posted via email from Certo.es, o xornal virtual de Barbanza e Noia

A Pobra do Caramiñal: agardan que as obras de reforma dos xardíns Valle-Inclán rematen antes do 20 de agosto



A Pobra, 21 de xuño de 2010. Mañá martes comezarán as obras do proxecto “Acondicionamento dos Xardíns de Valle-Inclán” solicitado polo Concello da Pobra do Caramiñal ao abeiro da convocatoria do Plan de Cooperación cos Concellos (PPC 2008-2011). Ten un orzamento de 129.650 € a financiar con cargo aos orzamentos da Deputación Provincial e do propio concello. A empresa adxudicataria das devanditas obras é OYS Noroeste S.A.
Segundo explica o equipo de goberno de A Pobra, "os xardíns de Valle-Inclán son un dos centros neurálxicos do noso concello, lugar de reunión de persoas de todas as idades". O obxecto do proxecto divídese en tres accións.
     1.- Pavimentación dos eixes centrais con embaldosado de granito de 5 cm que conecta coas zonas pavimentadas xa existentes e que estará flanqueado por dous canais de auga de 40 cm que servirán para canalizar a auga de choiva. Na zona da fonte colocarase un adoquinado de 15 cm de espesor para marcar o seu caracter de centro dentro do conxunto do xardín.
     2.- Adecuación do saneamento de pluviais mediante unha rede de colectores soterrados ata os cales se conducirá a auga de choiva dende os canais citados anteriormente.
     3.- Preinstalación de electricidade para iluminación, deixando preparadas as caixas de rexistro necesarias para os puntos de luz que se coloquen no futuro.
     Con estas obras, ademais de eliminar as pozas e o barro que a choiva produce nos eixes centrais, coas molestias que isto supón para os viandantes, adecúanse todas as instalacións e infraestruturas do xardín e fréase o afundimento do terreo por mor da erosión que produce a auga.
     4.- Reparación e substitución das canalizacións existentes do rego automático para posibilitar o seu correcto funcionamento.

     Desde o concello quérese, por todos os medios, que as obras estean rematadas antes do 20 de agosto, data de comezo das festas do Carme dos Pincheiros, polo que se chegou a un acordo coa empresa adxudicataria para que, no posible, se dobren as quendas de traballo. "Agradecemos polo tanto a OYS Noroeste este esforzo e pregámoslle aos veciños a súa colaboración e a súa paciencia durante o tempo que duren estas obras", conclúen no equipo de goberno do PP pobrense.

Ribeira: entregadas por fin 18 das vivendas de Xarás, en réxime de alugueiro

A meirande parte dos adxudicatarios pagará entre 123 e 141 euros de aluguer mensual por unhas vivendas nas que o IGVS investiu preto de 1,6 millóns de euros

O delegado territorial da Xunta na Coruña, Diego Calvo, botoulle a culpa ao anterior Goberno Bipartito da parálise na construción das vivendas e do proceso de adxudicación

Ribeira, 21 de xuño de 2010.- O delegado territorial da Xunta na Coruña, Diego Calvo, e o director do Instituto Galego da Vivenda e Solo (IGVS), Antonio Boné, presidiron esta mañá, no concello de Ribeira, o acto de entrega aos seus adxudicatarios das 18 vivendas de promoción pública construídas por este organismo en Xarás.

Todas as vivendas entregadas son en réxime de alugueiro. Proximamente entregaranse outras tres vivendas en réxime de compravenda, que están pendentes de aprobación do préstamo hipotecario pola entidade financeira. A meirande parte dos adxudicatarios (16) pagarán cantidades mensuais que oscilan entre os 122 e os 140 euros. Nos outros dous casos as rendas a pagar son de 93 e 234 euros mensuais. As diferenzas responden ás distintas superficies das vivendas e á subvención recibida sobre o prezo real do alugueiro, que pode ser do 60 ou do 40 por cento, segundo os ingresos familiares ponderados.

O delegado territorial da Xunta na Coruña, Diego Calvo, destacou que o Instituto Galego da Vivenda e Solo investiu 1.591.189 euros na construción das 21 vivendas, “que xa foran iniciadas polo Goberno anterior ao bipartito, en marzo de 2005 e que, lamentablemente, estiveron paralizadas nos anos de Goberno bipartito na Xunta”, recordou.

Construción das vivendas e elaboración das listas de adxudicatarios

Calvo lembrou que “a antiga Consellería de Vivenda e Solo tardou dous anos en rescindir o contrato coa empresa adxudicataria que estaba a incumprir os prazos previstos no programa de traballo, mantendo un ritmo de execución moi lento”. Finalmente o fixo en maio de 2007, “pero despois diso as obras aínda estiveron paradas case outro ano máis. Non foi ata abril de 2008 cando contrataron unha nova empresa para a execución das obras”, explicou Calvo.

Polo que respecta á elaboración das listas de adxudicatarios tamén houbo retrasos. Foi necesario realizar dúas convocatorias, xa que na primeira quedaron vivendas vacantes. Calvo asegurou que a lista definitiva quedou aprobada en xaneiro de 2010 “seis meses despois da constitución da Comisión Provincial de Vivenda do actual Goberno na Xunta, pola contra, a antiga Consellería de Vivenda necesitou dous anos para aprobar a mesma lista na primeira convocatoria”.

En maio de 2005 iniciouse a primeira das convocatorias. A lista provisional foi aprobada polo Concello en decembro dese mesmo ano. O expediente foi remitido ao IGVS o 20 de febreiro de 2006. Exactamente dous anos máis tarde. Despois dunha “longa revisión” dos expedientes, o anterior departamento autonómico de Vivenda aprobou a primeira lista definitiva en febreiro de 2008.

Dado que na primeira convocatoria só se adxudicaron 15 das 21 vivendas construídas, en febreiro de 2008 iníciase unha nova convocatoria para a adxudicación das seis vivendas vacantes. O Concello aprobou a lista provisional en outubro dese ano, pero os anteriores responsables da Consellería de Vivenda nin sequera realizaron a revisión dos expedientes. Dita revisión realizouse despois do cambio de goberno en 2009. En xullo dese ano constituíuse a Comisión Provincial de Vivenda e, seis meses despois, en xaneiro de 2010, quedou aprobada a lista.

Insólitas subvencións
De maneira insólita, a antiga Consellería de Vivenda e Solo gastou un total de 62.000 euros en subvencións imprevistas aos primeiros integrantes da lista provisional de adxudicatarios das vivendas de Xarás. “É o único caso de que se ten constancia na historia da vivenda de promoción pública no que se outorgaron subvencións polo mero feito de estar a formar parte dunha lista de adxudicatarios de vivendas de promoción pública, que ademais era provisional”, explicou Calvo.

Os adxudicatarios que ocupaban os 16 primeiros postos da lista provisional de adxudicatarios recibiron un pago de 2.000 euros en marzo de 2008. Un ano máis tarde, o 20 de febreiro de 2009, só uns días antes das eleccións autonómicas, recibiron un segundo pago por importe doutros 2.000 euros por familia. Neste caso foron 15 as familias que recibiron a axuda, xa que un dos integrantes da lista provisional xa renunciara á vivenda.

Descrición das vivendas
As 21 vivendas construídas en Ribeira distribúense en sete casas con portais independentes, dispoñendo cada una delas de planta baixa, planta alta e baixo cuberta. Na planta baixa sitúanse unha vivenda e os garaxes, rochos e locais de instalacións. Nas plantas alta e baixo cuberta emprázanse as vivendas de catro dormitorios, tipo dúplex, das que existen dúas en cada edificio.

En total son 14 as vivendas tipo dúplex, dotadas de catro dormitorios cada unha e cunha superficie útil de 90 metros cadrados. Outras seis vivendas dispoñen de tres dormitorios e unha superficie útil de 78,45 metros cadrados. Finalmente, unha vivenda de dous dormitorios está adaptada para o seu uso por persoas con mobilidade reducida e dispón de 78,70 metros cadrados. Todas as vivendas contan con salón, cociña, baños, unha praza de garaxe e rocho.

Os edificios teñen fachada con recebo monocapa sobre cerramento con dobre tabique de ladrillo e cámara illada, e carpintería exterior de aluminio lacado en cor. A carpintería interior é de madeira e os pavimentos son de linoleum monocapa homoxéneo no corredor, salón comedor e dormitorios e baldosa de gres en cociña, rochos e zonas húmidas.

Relacionada:

Xarás, o conto de nunca entregarás

E máis novas sobre o asunto, aquí

Posted via email from Certo.es, o xornal virtual de Barbanza e Noia

Ribeira: o instituto Coroso sométese a unhas obras de mellora que ascenden a 45.000 euros


O delegado territorial na Coruña, Diego Calvo, e a xefa territorial de Educación, Teresa Villaverde, realizaron unha visita ao centro, onde as obras comezaron hai uns días

Ribeira, 21 de xuño de 2010
.- O delegado territorial da Xunta na Coruña, Diego Calvo, e xefa territorial de Educación, Teresa Villaverde, acompañados do director do centro, José Antonio Rendo Rodeiro, visitaron hoxe as obras no IES de Coroso, nas que a Consellería investirá 45.351 euros.

As obras consisten na canalización da rede de pluviais do centro, para o que a empresa construtora terá que demoler a beirarrúa e o dintel do portal, limpar o borde da cuberta, repoñer a arqueta e colocar os canalóns e as baixantes. Deste xeito, Educación atende ás demandas deste centro cunha actuación que beneficiará aos 415 alumnos cós que conta o IES de Coroso, distribuídos en 24 aulas, ademais de profesores e persoal non docente. Os traballos estarán rematados para o comezo do próximo curso escolar.

Obras en cinco centros de Ribeira
Aos 45.351 euros que a Xunta investirá neste centro, hai que sumar os 115.842 euros que dedicou a outros cinco centros de Ribeira, o que representa unha inversión na localidade de 161.193 euros. Así, o IES número 1 de Ribeira recibiu 9.190,68 euros para acometer a reposición das pranchas de Tégola e reparación das gretas nos cumios; o CEIP O Grupo, recibirá 10.000 euros para obras de adecuación de espazos para a ampliación de aulas de Educación Infantil ; ao CEIP de Carreira correspondéronlle 5.351 euros para substituír as tuberías danadas de saneamento por outras de PVC.

As maiores contías leváronas o CEIP de Carreira, con 36.145 euros para a restauración da cuberta e 5.351 euros para substituír as tubería danadas de saneamento por outras de PVC. Nesto centro tamén se realizarán traballo de substitución da caldeira da calefacción por importe de 10.000 euros. Por último, no CEIP de Frións, a achega é de 45.255 euros para a reparación de gretas e rehabilitación da fachada do centro. Estes centros suman preto de 1.500 alumnos, que serán, xunto con profesores e persoal non docente, os beneficiarios destas actuacións.

Posted via email from Certo.es, o xornal virtual de Barbanza e Noia

Vivenda: as oficinas de rehabilitación de Noia e Rianxo asumen máis competencias mentres lle baixan a subvención

Parte dos alcaldes quéixanse de que se reducen as partidas orzamentarias e se aumentan os traballos a realizar

Imaxe de grupo dos alcaldes que asinaron o convenio hoxe en Santiago

Rianxo-Noia, 21 de xuño de 2010. Ata o de agora, as competencias das oficinas de rehabilitación (nestas bisbarras hai unha en Rianxo e outra en Noia, ademais das cercanas de Padrón e Muros) eran tan só ofrecer información e tramitar axudas das áreas de rehabilitación, así como expedir os informes da cédula de rehabilitación. Agora, segundo o convenio asinado esta mañá pola Consellería de Medio Ambiente e Territorio, a través do Instituto Galego de Vivenda e Solo (IGVS), pasarán tamén a ser puntos de información sobre axudas de rehabilitación do Plan de Vivenda alleas á área de rehabilitación e polo
tanto aplicables a todo o concello; punto de información sobre axudas autonómicas para rehabilitación en conxuntos históricos e punto de información sobre axudas autonómicas de rehabilitación rural.
No que atinxe a Noia e Rianxo, este acordo supón incrementar os traballos do persoal destas oficinas cando a subvención (o 90% dos gastos corrían por parte do IGVS e agora, se os datos son correctos, baixan ao 50%) non medra. A Noia concédenselle 42.368,77 euros, a Rianxo 35.000, a Muros 46.599,54 e a Padrón 40.120. Os concellos que poden verse algo beneficiados son os que pasan de 25.000 habitantes, aos que se lles aumentan as axudas nun 33%, segundo a Xunta.

Nota de prensa íntegra da Consellería de Medio Ambiente:

Un momento da comparecencia do conselleiro de Medio Ambiente, Agustín Hernández

Santiago, 21 de xuño de 2010.- A Consellería de Medio Ambiente, Territorio e Infraestruturas, a través do Instituto Galego da Vivenda e Solo (IGVS), asinou hoxe convenios con trinta e tres concellos galegos que dispoñen de oficina de rehabilitación, regulando nos mesmos a colaboración na difusión das axudas en materia de vivenda e a tramitación de determinados aspectos das mesmas. O convenio co concello de Lugo, que tamén dispón de oficina de rehabilitación, foi asinado o pasado mes de maio. Os convenios tamén regulan o financiamento das oficinas de rehabilitación por parte do IGVS e a posibilidade de que os concellos se acollan ao financiamento, para os mesmos fins, do Ministerio de Vivenda, comprometéndose o IGVS a levalo ante a Comisión Bilateral de Seguimento do Plan de Vivenda.

O acto estivo presidido polo conselleiro de Medio Ambiente, Territorio e Infraestruturas, Agustín Hernández, e ao mesmo tamén asistiron o presidente da FEGAMP, Carlos Fernández, así como alcaldes e representantes municipais dos 34 concellos asinantes. O responsable da política de vivenda da Xunta de Galicia salientou que as oficinas de rehabilitación convértense, tras a firma destes convenios, nun instrumento ao servizo dos cidadáns para mellorar o acceso a unha vivenda digna. Neste sentido, salientou importante esforzo realizado nun momento de dificultades, incrementando nun 33% as axudas aos concellos de mais de 25.000 habitantes. O investimento da Xunta de Galicia en 2010 para potenciar as oficinas municipais de rehabilitación ascenderá a 1,8 millóns de euros (para 34 concellos, polo que corresponde unha media de 52.000 euros escasos para cada un, se fose proporcional e non atendese a parámetros poboacionais).


Oficina de rehabilitación de Noia

Con estes convenios poténcianse as oficinas municipais de rehabilitación como portelos únicos e búscase un mellor emprego dos medios e persoal existente. Procúrase ademais unha actuación máis eficaz evitando a repetición de actos administrativos, como a inspección das mesmas obras por parte de técnicos municipais, técnicos da oficina de rehabilitación e técnicos da Xunta de Galicia cando ditas inspeccións poden ser realizadas exclusivamente polos técnicos da oficina de rehabilitación. Os convenios asinados hoxe regulan a colaboración entre administracións a través das oficinas de rehabilitación municipais-portelos únicos de información e xestión sobre axudas do plan de vivenda e outras actuacións das políticas de vivenda.

Ditas oficinas de rehabilitación-portelos únicos continuarán xestionando as axudas relativas ás áreas de rehabilitación declaradas en cada unha das cidades asinantes dos convenios, pero tamén prestarán servizos como instrumento técnico de asesoramento e colaborarán na divulgación das axudas estatais e autonómicas do Plan de Vivenda, así como dos programas autonómicos en materia de rehabilitación que se aproben no período de vixencia do convenio. Os convenios asinados tamén encomendan ás oficinas de rehabilitación-portelos únicos as tramitacións de tipo técnico referidas ás actuacións en materia de rehabilitación con axudas autonómicas ou estatais, como son as axudas de áreas de rehabilitación, as axudas Renove do Plan de Vivenda e as axudas autonómicas de rehabilitación en conxuntos históricos ou no medio rural.

O obxectivo da Xunta de Galicia é mellorar a atención que a administración presta aos cidadáns, racionalizando o emprego dos medios técnicos e humanos dispoñibles e que ata o de agora estaban infrautilizados. Desta maneira, ao traballo das oficinas de rehabilitación incorporase ofrecer información sobre axudas tales como a rehabilitación de edificios e vivendas do Plan de Vivenda 2009-2012, as axudas autonómicas de rehabilitación rural e de cascos históricos (cando sexa o caso) e calquera outra axuda en materia de rehabilitación.

Financiamento
O IGVS financiará ata o 50 por cento dos custes das oficinas municipais de rehabilitación-portelos únicos, co límite de 80.000 euros para cada oficina emprazada en concellos de máis de 25.000 habitantes e 60.000 para o resto de concellos. Este ano o financiamento do IGVS para as oficinas de rehabilitación de concellos de máis de 25.000 habitantes incrementouse nun 33 por cento, pasando de 60.000 a 80.000 euros.

O cincuenta por cento da cantidade asignada a cada concello pagarase despois da sinatura do convenio e o restante 50 por cento unha vez que o Concello certifique o total do gasto realizado en 2010. Os convenios tamén recollen a posibilidade de que os Concellos, se é a súa vontade, se poidan acoller ao financiamento do Plan de Vivenda con cargo ao Ministerio de Vivenda, comprometéndose o IGVS a impulsar a súa solicitude ante a Comisión Bilateral de Seguimento do Plan de Vivenda, que reunirá a representantes do Ministerio de Vivenda e do IGVS.

Posted via email from Certo.es, o xornal virtual de Barbanza e Noia

Noia: o grupo de teatro do Liceo, segundo no XIII Certame "Candilejas D. Bosco" de teatro afeccionado en A Coruña


Noia, 21 de xuño de 2010
. O grupo de teatro Liceo de Noia, dirixido por Ramón Carredano, acadou onte o 2º premio no XIII certame de teatro afeccionado D. Bosco, organizado polo grupo Candilejas de A Coruña.
Polo escenario do colexio Calvo Sotelo pasaron outras tres compañías da comarca do Barbanza : grupo de teatro municipal de Ribeira, Muros e xubilados da Cruz Vermella de Noia.
Sen lugar a dúbidas, a mencionada edición pasará á historia debido á intervención da Sociedade General de Autores que, sen ter comprobado o tipo de xente que participou no concurso nin os obxetivos, chegaron ó extremo de reclamar o abono das taxas ás compañías senior que interpretaron obras das que os dereitos foron xestionadas por Autores.
A pesar de tratarse de obras representadas por actores e actrices amateur, nun recinto escolar como é o colexio Calvo Sotelo e de entrada libre, a SGAE, non conforme coa difusión cultural, afirma que se trata dun proceso que segue un curso normal.
Onte, durante a entrega de premios, todos os grupos fixeron alusión á SGAE, indicando que o premio recibido ía dedicado á susodita sociedade.
(Información vía Isabel V. M.)

Twitter

Related Posts with Thumbnails Banner: Regale selva tropical