Dodro: as actividades de Nadal inclúen un ciclo de títeres, teatro e as típicas panxoliñas

Tamén adquire relevancia neste mes o fallo (este sábado 11) e a entrega (o domingo 19) do premio que sitúa a Dodro no Parnaso literario galego: o "Eusebio Lorenzo Baleirón" de poesía, este sábado 11

Unha das actividades do ano pasado tamén incluía maxia

Dodro, 8 de decembro de 2010. A tenenta de alcalde de Dodro, a nacionalista Victoria Rei, informou sobre a programación de actividades culturais do Nadal de 2010, das cales se irán dando detalles conformen cheguen as datas de celebración.

"Durante este ano foron moitas as actividades que viñemos desenvolvendo desde a concellaría de Cultura para maiores e pequenos e agora que chega o Nadal pretendemos pechar o ano cunha serie de actuacións distribuídas entre os principais núcleos das nosas parroquias, onde conseguimos asentar a rede de locais culturais co fin de chegar a toda a xente para que teñan oportunidade de aproveitalas en familia nestes días que contamos con máis tempo de vacacións e de encontro", explicou.

Programación

Día 11 de decembro: faise pública a resolución do XXIII Premio de Poesía Eusebio Lorenzo Baleirón.

Día 13. Ás 17.00 h. Ciclo de TÍTERES, con Duendesico: "Elba e Marcos e os xoguetes encantados". En Lestrobe, no local sociocultural do Concello.

Día 15, ás 17.00 h. Ciclo de TÍTERES, con Duendesico: "Tolo regalo de Nadal"
en Imo, no local sociocultural (antiga escola unitaria)

Día 16, ás 17.00 h. MAXIA, con Altega: "Gusi o mago sen sombreiro" na Casa
de Cultura, Tallós.

Día 17, ás 11.00 h. Ciclo de TÍTERES, con Duendesico: "O roubo da saca de
regalos de Nadal" para o alumnado de Primaria no CPI Eusebio Lorenzo
Baleirón. Ás 11.30 TEATRO para a ESO no Colexio Eusebio Lorenzo Baleirón.

Comedia bífida, representación en Dodro en xuño do ano pasado

Día 18, ás 18.00 h. TEATRO, con Ateaco: "Comedia Bífida", no Salón de Actos
da Paxareira.

Entrega do ano pasado, a Costas Currás
Día 19, a partir das 17.00 h.: XXIII Entrega do Premio de poesía Eusebio
Lorenzo Baleirón do 2010.

Día 26, ás 18.00 h. Recital de panxoliñas coas corais de La Salle, Laíño e
Padrón, ademais do grupo Bellón Maceiras.

Posted via email from Certo.gl, o xornal dixital de Barbanza e Noia

Rianxo: esta fin de semana, festas e feira de Santa Lucía na parroquia de Asados

Rianxo, 8 de decembro de 2010. A parroquia rianxeira de Asados celebra esta fin de semana as festas de Santa Lucía.

O sábado 11 de decembro, na sesión vermú, mentres se degustan de balde mexillóns, actuará a orquestra Superfama. Pola tarde, sobre as seis, magosto e viño, tamén gratuitos, con música dos gaiteiros "Río do Toxo" e de Superfama. É o previsto para este día do San Ramón.

O domingo 12 de decembro, tradicional feira de Santa Lucía. Animan aos veciños e visitantes a vir con roupa de época. Roteiro con cabalos pola parroquia ben cedo, ás nove e media da mañá. A misa solemne será ás doce e media e logo o pregoeiro, que desta volta será o director do grupo de teatro Airiños, o escritor Xesús Santos, louvará estas festas no seu discurso.

Pola tarde, dende as tres e media, haberá xogos para nenos e espectáculo ecuestre no vello campo de fútbol. Como toda feira que se prece, haberá polbo, rosquiñas, churros e postos para comer churrasco. Tamén se venderán flores, produtos da horta da bisbarra, maquinaria agrícola e outras. Incluso se prevé un obradoiro con forno para facer pan artesá.

O día de Santa Lucía, que é o luns 13 de decembro, haberá misas na igrexa dende as oito e media da mañá.

Posted via email from Certo.gl, o xornal dixital de Barbanza e Noia

Porto do Son: programadas varias actividades para celebrar este mes de Nadal

Porto do Son, 8 de decembro de 2010. O vindeiro luns, 13 de decembro, vaise inaugurar unha mostra de olería de Buño, que estará ata o remate das festas de Nadal, en xaneiro.

Alfarería de Buño, no flickr de r0sk Oscar

O día 18, dentro das actividades Nadal Máxico 2010, chega o Mago Cali. Tamén virán Cayetano Lledó, Mago Mimo Anyo, Martín Camiña e Javier Muro. Dende as seis da tarde na casa de cultura da Atalaia.

Tamén haberá a tradicional mostra ornitolóxica, organizada cada ano por Azor en colaboración co Concello. Paxaros de todas as castes estarán na fin de semana do 17 ao 19 na casa de cultura.

Exposición ornitolóxica do ano 2008

Festivais de Nadal

O domingo 19 de decembro o Festival de Nadal correrá a cargo dos integrantes da catequese e a asociación Loa. O día 22 haberá outro protagonizado polos escolares do colexio Santa Irene.

Nas diversas casas de cultura haberá actividades relacionadas coa música tradicional destas datas e tamén baile.

Tren infantil

O xoves 23 e venres 24 de decembro haberá un tren infantil de Nadal, así como o xoves 30 e venres 31 de decembro.

Tamén haberá obradoiros e teatro para os máis pequenos. De todas as actividades e os seus horarios hai cumprida información na casa de cultura.

Posted via email from Certo.gl, o xornal dixital de Barbanza e Noia