Porto do Son: os alumnos de SonCine suben a Internet un vídeo da matanza do porco no rural

<p>a mata from SonCine on Vimeo.</p>

Porto do Son, 15 de febreiro de 2011. Xa se pode ver na Rede, aí o teñen, encima destas verbas. Un documento etnográfico de primeiro nivel, con estándares de alta calidade no audiovisual. Un novo reto do proxecto "O meu Son", de SonCine, no cal os alumnos de audiovisuais de 3º de ESO do instituto levan unha cámara fotográfica Lumix compacta para casa e filman o seu lugar preferido. Desta volta presentan un vídeo sobre a matanza nunha casa do rural, costume que está a retroceder en Galicia ante a paseniña industrialización da morte animal con destino á alimentación humana.

"Discutimos sobre se subir ou non este material á rede. Decidimos que si, non hai crueldade nos feitos, hai conciencia, mesmo respeto", explican na información do vídeo do instituto. "O sacrificio prodúcese conforme ás normas cunha aparello de ar comprimido. Despois de morto o animal sángrase ao xeito tradicional. Calquera pode comparar isto con vídeos da web onde se reflicten as condicións nas que son criados, transportados, e sacrificados, de maneira industrial, os animais dos que nos alimentamos diariamente e dará un duro paso cara a conciencia do horror. En calquera caso pensamos que facernos concientes deste suceso é tamén educación. Por outra parte a filmación capta os sucesos de maneira natural e realista", conclúen.

Como cantaba Steel Flow no rap rural que deu banda sonora ao anterior vídeo de "O meu Son", "porcos, ghaliñas, feiras, piñas, isto é rap rural, é a pura Ghalisia; non veño da sity, non, non veño tal, sonche máis de ghaliñeiro que de sentro comersial". Por estas bisbarras somos máis de matanza na casa que de matadoiro industrial...

Hai tres anos, no YouTube de Certo, fixemos unha lista de reprodución con matas en varios países:

Posted via email from Certo.gl, o xornal dixital de Barbanza e Noia

Rianxo: o Bng mantivo unha reunión cunha das asociacións de mexilloeiros, Aspromeri

Rianxo, 15 de febreiro de 2011. Na súa rolda de reunións con colectivos de Rianxo, o candidato do BNG á alcaldía, Adolfo Muíños, reuniuse cunha nutrida representación da Xunta Directiva de Aspromeri, a asociación de mexilloeiros de Rianxo. Tamén solicitou unha xuntanza co outro gran colectivo de mexilloeiros de Rianxo, a Asociación Rianxeira.

Adolfo Muíños manifestou o seu interese e do BNG en manter unha óptima colaboración cun dos sectores fundamentais sobre os que se asenta a economía de moitas familias rianxeiras. "Aínda que as competencias municipais sobre este sector non son moitas sí é o obxectivo de unir esforzos, concello con asociacións de produtores rianxeiros, para estabelecer sinerxias que apoien o tecido produtivo e que o mexillón da nosa ría teña toda a proxección exterior que precise para a súa comercialización", manifestou.

O alcaldable nacionalista garantiu "o apoio para mellorar a recentemente impulsada festa de exaltación do mexillón e que se convirta na segunda gran cita gastronómica do municipio, xunto coa da xouba, totalmente consolidada". "Como non colaborar!, manifestou Adolfo Muíños, co que é unha das bases produtivas de moitas familias rianxeiras? O mexillón é tamén un dos sinais de referencia turística do concello polo que debe ser esta festa un grande escaparate para o produto e para o concello en xeral, de aí que deba contar cos medios posíbeis, humanos e materiais, para que manteña a súa andaina e mellore ano a ano".

Preocupación polas verteduras á Ría

Compartiu o candidato e os membros do grupo que con el acudiron á xuntanza con Aspromeri a preocupación polos episodios constantes de verteduras que sofre a ría de Arousa e do Concello de Rianxo en particular. Muíños sinalou á xunta directiva que "por fin se centrou o problema sen rodeos e se asumiu que é precisa unha nova estación depuradora con capacidade suficiente para tratar as augas do municipio mesmo cando aumenta a poboación polo verán. Unha vez diagnosticado o problema a Xunta deberá resolvelo nun horizonte próximo".

Mellorar a fachada marítima

Noutro orde de cousas, o BNG trasladou tamén a preocupación pola falta de participación do concello e da sociedade rianxeira en xeral no que atinxe á ordenación e remodelación dos usos portuarios e no deseño da fachada marítima de Rianxo. "Queremos -manifestou o candidato- que o concello e as forzas políticas que forman parte da corporación interveñan neste debate fundamental que até o de agora está cheo de escurantismo pois a información é moi cativa e chega a través dos medios de comunicación nunhas xuntanzas nas que só participan uns poucos interlocutores, nin sequera o conxunto dos afectados". Puxo o BNG como exemplo tamén o recente caso da gasoliñeira de mar nas que se botou abaixo o concurso dunha maneira sospeitosa e caprichosa despois de seis meses de licitado, con empresas e con propostas presentadas, polo que se veñen de pedir explicacións no Parlamento.

Cero euros no GAC5

Adolfo Muíños tamén expresou o abraio do BNG en que ningunha empresa de Rianxo, nin colectivo, nin institución, se beneficiara do primeiro reparto de fondos do Grupo de Acción Costeira de Arousa, o GAC 5 para o ano 2010, e manifestou o desexo de abrir unha oficina municipal de apoio ao emprendimento que entre outros, canalice as axudas europeas existentes e que non están a parar en Rianxo, como o caso dos GAC e mesmo do programa LEADER, con efectos tamén cativos nos sectores produtivos do concello.

Relacionada:

Gasoliñeira do mar: seis meses perdidos

Posted via email from Certo.gl, o xornal dixital de Barbanza e Noia

A Pobra do Caramiñal: programación e premios de Entroido 2011

Se o quere ver en grande, aquí

Posted via email from Certo.gl, o xornal dixital de Barbanza e Noia

Ribeira: ata o 22 de febreiro, prazo para inscribirse e participar no Festival de Murgas e Comparsas de Entroido

Download now or preview on posterous

Bases Actualizadas Entroido 2011.doc (1025 KB)

O ano pasado o desfile de murgas e comparsas cadrara no día de San Valentín

Ribeira, 15 de febreiro de 2011. Queda unha semana, así que espabilen @s que queiran participar no Festival de Murgas e Comparsas deste ano no Entroido ribeirense. A Concellería de Cultura e Festexos acaba de informar de que xa está aberto o prazo de inscrición, que remata o 22 deste mes ás 13.30 horas. As solicitudes deben presentarse no Rexistro do Concello ou no Auditorio Municipal. 

Establécense dúas categorías de participación: infantil (ata 15 anos) e adulto (dende os 16 anos). As murgas deberán estar formadas por un mínimo de 20 participantes, sen límite máximo, e as comparsas con 15 como mínimo. Na categoría infantil ademais deberá contar con 1 adulto por cada 6 nenos/as. 

As murgas ou comparsas deberán representar a unha asociación, entidade ou agrupación do termo municipal de Ribeira ou da comarca do Barbanza (Arousa Norte: Ribeira, Pobra do Caramiñal, Boiro ou Rianxo), establecendo o máximo permitido de unha murga ou comparsa por categoría, modalidade e asociación. 

En  total destínanse 6.000 € para gratificacións pola participación no festival (categorías de adulto, infantil e comparsa) tal e como se establece nas bases. 

O festival será o domingo 6 de marzo con desfile en pasarrúas dende o Auditorio ás 18 horas e seguidamente festival na praza do concello. 

Galardóns

As murgas, na categoría de Adultos, optarán os seguintes Galardóns: mellor vestiario, mellor letra, orixinalidade e creatividade, e mellor interpretación no seu conxunto. As comparsas, na categoría de Adultos, optarán a un único galardón: mellor interpretación e vestiario. As comparsas e murgas infantís non optarán a ningún galardón. 

Segundo as bases de participación, que se achegan, xunto coa solicitude de participación deberá achegarse letra/s da murga (debendo ademais presentalas en soporte dixital xunto ao logo identificativo da agrupación: cd, pendrive, email...) e a relación dos integrantes do grupo, co nome e apelidos de cada participante, así como o nome da Murga ou Comparsa. No caso de non tratarse dunha entidade deberán presentar fotocopia de DNI de todos os integrantes da Murga ou Comparsa e aplicaráselle o IRPF correspondente á gratificación que corresponda. Tamén haberá que nomear un representante de cada grupo ante o Concello, que deberá entregar fotocopia do DNI e datos fiscais (CIF da entidade) para o pago da gratificación correspondente. 

Para ambas as dúas categorías (infantil e adulta), as letras das murgas deberán ter unha extensión máxima de 1 canción, non superiores no seu conxunto a 50 versos, nin cunha duración total superior a 5 minutos. 

Gañadoras do ano pasado, "Ribeira se escribe con v"

O vestiario debe estar en consonancia con algún dos temas principais das letras das murgas ou un tema de actualidade ou interese xeral. Poderase introducir elementos complementarios en relación coa interpretación dos temas e letras, sempre que non constitúan un risco nin perigo para a cidadanía. 

Máis información no Auditorio Municipal (teléfono 981 835 650 e correo electrónico culturaefestexos@riveira.com).

 

Posted via email from Certo.gl, o xornal dixital de Barbanza e Noia