- Emocionante acto de entrega destes galardóns nun salón de plenos no que non collía unha agulla
Ribeira, 13 de setembro de 2012.- Acostumados a ver como se entregan medallas de ouro e outros títulos simbólicos de Concellos e Administracións a xente de avanzada idade, deu gloria ver onte en Ribeira como o Concello agasallaba coa súa medalla de ouro a dúas rapaciñas novas, dúas campioas en cadanseu deporte: o triple salto (Ana Peleteiro) e a natación (María Vilas).
O salón de plenos do Consistorio quedouse pequeno durante a celebración na tarde de onte do emotivo acto de entrega da Medalla de Ouro do Concello de Riveira ás deportistas Ana Peleteiro Brión e María Vilas Vidal, segundo acordo unánime da Corporación adoptado en sesión plenaria de 30 de xullo de 2012.
Os integrantes dos distintos grupos da Corporación Municipal, os pais e nais das homenaxeadas, o presidente da Federación Galega de Atletismo (Isidoro Hornillos), o vicepresidente da Federación Galega de Natación (Carlos Bremón, o presidente e o adestrador do Club Natación Riveira (José Antonio Prada e Juan Carlos Brión) ou a filla adoptiva Magdalena Bringas son algunhas das numerosas persoas que encheron o salón de sesións neste acto solemne.
Foi o alcalde Manuel Ruiz Rivas quen deu a benvida aos asistentes, a continuación do cal o secretario en funcións do Concello, José Martínez de Llano, leu o acta de outorgamento das medallas a María Vilas e Ana Peleteiro, así como os principais méritos deportivos que distinguen ás condecoradas, ao que se lle intercalou a proxección duns vídeos conmemorativos de cada unha delas.
Acto seguido tivo lugar o acto de entrega das medallas de ouro ademais de sendos diplomas conmemorativos a Peleteiro e Vilas por parte do rexedor municipal.
Tomou a palabra María Vilas para expresar o seu agradecemento por recibir este recoñecemento “de aqueles que me viron medrar, que seguiron os meus pasos, que sempre estiveron ao meu lado e nunca me negaron o seu apoio”. “Isto é algo que me fai esforzarme aínda máis”, salientou.
Ana Peleteiro tamén se sumou ás palabras de agradecemento e salientou a importancia do premio outorgado polo Concello. “Espero seguirvos dando alegrías o ano que vén e durante moitos anos”, rematou.
Finalmente, Manuel Ruiz lembrou que ata agora na etapa democrática unicamente os irmáns Fran e José Ramón González Pérez foran distinguidos con estas insignias hai unha década.
O alcalde afirmou que pese á xuventude das condecoradas, xa teñen un palmarés que as fan acredoras a recibir estas medallas e resaltou a importancia de contar co apoio duns pais, familiares, adestradores, clubs e federacións “que están por detrás, que saben o valor do deporte e sobre todo saben inculcarlles a forza necesaria cando os resultados ou as lesións non acompañan”. Ruiz Rivas fixo fincapé no talento que caracteriza a ambas deportistas e expresou a esperanza do pobo de Riveira de poder velas competindo nos xogos olímpicos de Río de Xaneiro en 2016.
“Queridas Ana e María, levade con orgullo o que todos os ribeirenses quixemos darvos”, concluíu.
Posted via email from Certo.gl, o xornal dixital de Barbanza e Noia
