Outes, 29 de xuño -Día de San Pedro e San Pablo- de 2012. As imaxes do álbum que encabeza esta información son da procesión e inauguración do cruceiro da Canle en Outes, co motivo das festas patronais de San Pedro. Este cruceiro era o que se denominaba "cruceiro da Canle", e estaba ubicado máis arriba do lugar de Outes, ata que un accidente de automóbil derrubouno. Coas aportacións dos veciños da parroquia de San Pedro de Outes conseguiron restauralo, e tamén recuperaron as festas patronais. A información e as imaxes son do veciño de Outes Vicente Abelleira Cambeiro, que considera que estas fotografías "fan historia". Así o cremos tamén en Certo, pois o patrimonio pétreo do pobo galego debe coidarse e restaurarse para as vindeiras xeracións.
Porto do Son e Boiro, 29 de xuño de 2012. O pleno da Deputación Provincial da Coruña aprobou esta mañá diversos convenios de colaboración que se asinarán nos próximos días tanto con concellos da provincia como con asociacións culturais e benéficas. O importe total destes concellos suma máis de 1 millón de euros. En concreto, e no que se refire aos concellos, aprobouse a concesión de 20.000 euros para axudar ao concello de Boiro á posta en marcha das actividades a realizar no Centro Arqueolóxico do Barbanza e outros tantos para as actividades do Centro de Interpretación do Castro de Baroña en Porto do Son.
Plan de Modernización de Mercados Locais para Boiro, Lousame, Ribeira, Muros e Porto do Son
En total, todos estes convenios suman unha aportación da Deputación Provincial de 446.000 euros, aos que hai que sumar outras dúas obras autorizadas esta mañá polo pleno: a ampliación da rede de saneamiento en Aranga, por 120.431,21 euros con cargo ao Proxecto Mandeo; ou a primeira anualidade corresponde ao ano 2012 do Plan de Modernización de Mercados Locais. Desta axuda da Deputación beneficiaránse nesta ocasión os concellos de Boiro, Lousame, Ribeira, Muros e Porto do Son, que recibirán cada un 36.238 euros. O cómputo xeral desta primeira anualidade é, por tanto, de 199.170,62 euros, aínda que no ano está prevista a achega total de 435.000 euros repartidos entre os 12 concellos das comarcas de Barbanza, Muros-Noia e o Sar que participan neste programa. Se se ten en conta o plan na súa totalidade, resulta que a Deputación investirá na reforma de mercados locais un total de 1.128.000 euros ou, o que é o mesmo, 94.000 euros para cada un dos doce concellos beneficiarios deste programa.
Convenio marco
Noutro punto do orde do día aprobouse o convenio marco que establece as bases de colaboración entre a Deputación e os concellos para a regulación das comunidades intermunicipais de servizos públicos consorciados, un documento que servirá de base para a colaboración entre concellos e que non implica a creación de ningún organismo novo, xa que a firma de convenios puntuais entre os concellos que desexen constituir unha comunidade non suporá a aparición dunha nova figura xurídica.
Segundo informou o presidente provincial, o que fai a Deputación Provincial é promocionar e potenciar a colaboración e a cooperación entre concellos “mediante acordos puntuais, sempre voluntarios, que se farán tomando como base este documento”.
Xestión do Patrimonio Provincial
Finalmente, tamén o pleno deu luz verde á creación dunha comisión de estudo que comezará a traballar na procura dun novo xeito de xestión para o patrimonio conxunto da Deputación. “Este avance é realmente destacable, porque somos conscientes de que temos un patrimonio moi importante, que temos que coidar e nestes tempos é máis sinxelo e máis económico que o fagamos dun xeito común e cunhas condicións comúns”, informou Calvo ao resto dos deputados da corporación provincial.
Noia, 29 de xuño de 2012. O Concello de Noia, a través da Concellería de Casco Histórico e Patrimonio, segue a elaborar expedientes dos denominados “do deber de conservación”, a fin de esixirlle aos propietarios de inmobles con síntomas de deterioro, unha mínima intervención neles, para que ese estado non acabe levando aos mesmos a unha situación de ruina irreversible.
Neste caso concreto advertíuselles aos donos do inmoble número 6 da rúa do Cantón (Edificio da Droguería LUMA). É ésta unha edificación resultante da renovación dunha construción anterior, con composición de ocos seguindo eixos verticais, con galería corrida rematando a fachada principal, e balcón baixo alero nunha das laterais. Estímase que a súa contrución pode datar de finais do século XIX ou principios do XX. Conta cun nivel de protección que obriga á preservación das fachadas, ao considerar os autores do Plan Especial do Casco Vello, que o edificio é importante pola súa integración no contexto, configurando ademais o frente da pequena praza onde se inicia a citada rúa.
Urxencia da proteción da galería
A orde cursada aos propietarios consiste en que procedan con carácter urxente á proteción da galería para evitar a caída de vidros ou elementos de madeira á rúa. Tamén á demolición dun pequeno engadido, construido sobre o muro que da á rúa Nosa Señora da Axuda, e que se atopa en situación de total inestabilidade, dado o estado de abandono no que se atopa.
O deber de conservación é unha figura que vén recollida, tanto na Lei do Patrimonio Cultural de Galiza, así como no propio texto da Lei do Solo establecendo que os propietarios de toda clase de terreos, construcións, edificios e instalacións deberán mantelos en condicións de funcionalidade, seguridade, salubridade, ornato público e habitabilidade segundo o seu destino, e con arreglo ás normas de protección do medio ambiente, do patrimonio histórico e da rehabilitación.
Basean a súa poesía na forza dos sentimentos para explicar o mundo actual
Ribeira, 29 de xuño de 2012.- O Conservatorio Municipal foi o escenario elixido para desenvolver no día de onte, no marco do Xuño da Cultura e as Artes, a presentación literaria de “Antoloxía de Referencia. Etapa de Implantación”, da editorial Bubela, que incluíu unha calorosalectura poética por parte de tres dos autores que figuran nesta publicación.
O acto comezou cunha introdución musical. Anxo Martínez Torres, xoven ex alumno do propio Conservatorio Municipal, interpretou ao piano a coñecida sonata “Claro de luna” de L. V. Beethoven.
A continuación, interviñeron os dous coordinadores do libro, Carlos Arias e Mariña Pérez Rei, os cales, ademais deexpresar o seu agradecemento ao Concello, explicaron os valores que se quere defender a través do movemento Sentimentalismo: teoría artístico-filosófica baseada nos sentimentos e na súa importancia para interpretar o mundo que foifundamentada polo escritor Xesús Manuel Valcárcel, quen estivera precisamente en Ribeira no pasado abril dentro da programación dos “Xoves Literarios na Biblioteca”.
Este novo compendio vén a ser a continuación da “Antoloxía da Etapa da Fundación do Sentimentalismo”, aparecida en 2011 baixo a coordinación de Manuel Celso Matalobos e Olga Patiño Nogueira.Os textos das autoras e autores seleccionados na nova compilación afondan na pluralidade de voces e estilos, pero sosteñen un valente posicionamento cara o feito poético. No transcurso da presentación, incidiuse varias veces na importancia da poesía e do ethossentimental para contrarrestar os ventos de crise imperantes.
Olalla Cociña, no medio, é unha das autoras "sentimentalistas"
As autores e autores que figuran no libro son Yolanda Castaño, Eva Veiga, Olalla Cociña, Baldo Ramos, Xulio Cid Neira,Francisco Xosé Fernández Naval e Xabier López Marqués.
Estiveron na presentación os tres últimos escritores citados, os cales deleitaron ao público presente cunha amena lectura poética dos seus versos: lectura que, no caso de López Marqués (profesor do IES Nº1 de Riveira e membro do xurado no último Certame de Novela Curta Cidade Centenaria) tivo lugar a dúas voces, xa que contou coa asistencia de Alicia Padín (responsable de Normalización Lingüística do Concello), quen declamou algúns dos poemas contidos na compilación, en tanto que o autor deu lectura a unhaeséxese da obra de San Juan de la Cruz, obra que lle serviu de fonte de inspiración para as súas creacións.
Como nota exótica, cabe dicir que estas lecturas tiveron un curioso fondo musical: o duns cuncos tibetanos tocados por Carlos Arias.
Para finalizar, a concelleira de Educación, Mª Carmen Vizcaya,felicitou aos participantes no acto de presentación e manifestou a súa intención de seguir acollendo eventos como este co afán de seguir acercando a literatura á cidadanía do concello.
A Pobra do Caramiñal, 29 de xuño de 2012. Segundo denuncia o Psoe da Pobra en nota de prensa, "esta semana o equipo de goberno da Pobra anunciaba a bombo e platillo que creaban un portal sobre cuestións medioambientais para empresas e veciños relacionadas co medio ambiente e a sostibilidade. Non tivemos que esperar máis que un día para que os vertidos percorran o río Morto. Sinceramente, prescribirlle un duro tratamento de psicoanálisis a este goberno local sería o máis sensato que un especialista fixera porque coa problemática de vertidos e o permanentemente mirar cara outro lado, sen que sexan capaces de aplicar o regulamento que eles mesmos fixeron e aprobaron, presumir e habilitar un portal desas características é tomarlle o pelo aos cidadáns. ¡Por algo vivimos no pobo do creador do esperpento!".
A voceira do grupo socialista, Teresa García Guillán insta ao alcalde "a que colgue as fotos do río Morto contaminado en dito portal e ofreza ao mundo a súa incompetencia na defensa do medio ambiente. Nesta alcaldía semella imposible que se faga un control das verteduras industriais para afrontar dun xeito decidido unmal endémico que vén padecendo dende fai moitos anos o noso concello. Os veciños da Pobra do Caramiñal estamos sufrindo un ataque permanente á saúde dos nosos ríos e da ría de Arousa pola pasividade do goberno municipal, o que ten consecuencias nocivas para a poboación".
Como se pode comprobar en noticias anteriores neste xornal, as verteduras ao Río Morto son continuadas, non se trata dunha cuestión puntual, senón que se teñen detectado todo tipo de produtos químicos ameazando permanentemente a saúde ambiental do río Morto. "Os responsables municipais deben traballar para facer compatible o desenvolvemento económico, a través das industrias asentadas na zona, co respecto ó medio ambiente e ó cumprimento da lexislación ambiental", finaliza o Psoe, que denunciou de novo estes feitos ante as autoridades.
Un portal ambiental xeneralista en castelán
O Concello da Pobra, nunha discreta cuadrícula mal ligada -apunta a lineaverdeapobra.org cando o dominio é lineaverdeapobra.com- ao fondo do seu web oficial http://www.apobra.org anuncia a súa Línea Verde, un portal onde hai que rexistrarse para obter os servizos que promete: "La Línea Verde es una iniciativa del Ayuntamiento de A Pobra do Caramiñal para proporcionar un servicio de consultas medioambientales para las empresas y los ciudadanos del municipio. Un grupo de expertos se pondrán en contacto con usted en un plazo máximo de 24 horas de manera personalizada, contrastada y fiable, sin coste alguno para la ciudadanía y las empresas. Cubre diversos ámbitos en materia ambiental: legislación, trámites administrativos, noticias, eventos de interés, ayudas y subvenciones, etc".
Nin unha liña adicada ao Concello propiamente dito, á parte das xa incluídas na web deste (horarios de Punto Limpo e información turística) e tampouco a ningún dos problemas medioambientais que denuncia Adega ou a oposición continuamente.
Ten que ter decentes 34 inmobles por pouco máis de 300.000 euros
Ribeira, 29 de xuño de 2012.-O Concello informa de que se acaba de adxudicar a contratación do servizo de limpeza en edificios públicos, deportivos e centros escolares dependentes desta Administración Local. A empresa Limpiezas Germania, S.L., resultou a adxudicataria do concurso ao obter a mellor puntuación das 7 entidades que acudiron ao mesmo.
O prezo anual do contrato ascende a un total de 306.800 euros e abarca un total de 34 inmobles de carácter público (que equivalen a 29.360 metros cadrados de superficie global).
Hai que recordar que no plego de licitación se indicaba expresamente que o contrato poderá estenderse a outros locais ou dependencias que pasen a formar parte do Concello por ampliación de servizos. A este respecto, o prezo ofertado para esta circunstancia é de 0,870 euros / metro cadrado, por mes de contrato.
34 inmobles
Os 34 inmobles afectadosinicialmenteson o edificio da Casa Consistorial (2.261 metros), a sede da Policía Local (797 metros), as dependencias dos Servizos Sociais (403 m), os locais de actividades dos Servizos Sociais (230 m), as dependencias do CIM (178 m), UAD (353 m), OMIC (152 m), o Conservatorio (1.436 m), a Casa da Cultura de Castiñeiras (247 m), as dependencias do taller de emprego en Carreira (60 m), o pavillón da Fieiteira (3.305 m), as piscinas municipais da Fieiteira (1.000 m), os vestiarios do campo de herba sintética da Fieiteira (200 m), o polideportivo Santa Uxía en Coroso (1.406 m), o polideportivo de Artes (1.496 m), o polideportivo de Sirves (1.550 m), o Centro de Interpretación Arqueolóxica de San Roque (230 m), a Casa da Xuventude (600 m), a Biblioteca Municipal (474 m), a Casa Museo de Riveira (382 m), a Aula Multimedia de Riveira (151 m), a Aula de Informática de Aguiño (190 m), a Lonxa (1.713 m), a Oficina de Turismo de Xarás (19 m), o Mercado de Palmeira (246 m), o Colexio de Artes (448 m), o Colexio de Palmeira (3.282 m), o Colexio de O Caramecheiro (312 m), o colexio O Grupo e instalacións deportivas (2.136 m), o Colexio Pé do Corniño de Carreira (730 m), o colexio de A Capela de Carreira (258 m), o edificio de usos múltiples de Corrubedo (384 m), as instalacións deportivas do Colexio de Aguiño (1.280 metros) e o colexio de Olveira (1.451 metros).
Colaboración: "Un Rolling Stone en Galicia", por Javier Ferreirós post.ly/82Wvq
Noia, 29 de xuño de 2012. Pepo Suevos e Oswaldo Digón ofrecerán esta noite en Noia o seu espectáculo de monólogos R. Pero queren traballar a cuberto e a actuación que, nun principio contábase con realizar na Praza do Tapal, e se traslada agora para o pavillón Alonso Rodríguez. Comezarán ás 21,30 horas. Gargalladas aseguradas!
Noia, 29 de xuño de 2012. Onte pola noite, ao parecer dous mozos, intentaron prenderlle lume ás máquinas que están a traballar na ponte da variante de Noia na zona do Río do Porto, que pertence á parroquia de Santa Cristina de Barro. Ignórase se se trata dunha simple -pero grave- gamberrada ou dunha sabotaxe destas obras, as cales foron contestadas no seu día por unha parte da poboación noiesa. Os danos materiais tan só se produciron nun bidón e nunha lona de obra que ardeu, pois os autores desta trasnada foron sorprendidos ao pouco de comezar o lume e fuxiron, amparándose na escuridade, xa que era noite pechada, sobre as doce e media. Forzas de seguridade -Policía e Garda Civil- están a investigar os feitos.
Noia: Pepo Suevos e Oswaldo Digón ofrecen esta noite en Noia o seu espectáculo de Monólogos R. No pavillón Alonso Rodriguez ás 21,30 horas.
O Partido da Terra, organizador da convocatoria, quere que as parroquias decidan antes de fusionar nada
Noia, 29 de xuño de 2012. A protesta pública para que non se fusione Lousame con Noia terá lugar neste domingo dia 1 às 11:30 diante da casa consistorial de Noia, convocada polo Partido da Terra. Segundo explican en nota de prensa, "diversos meios informativos deram notícia nas últimas semanas sobre os encontros levados a cabo entre os mandatários de Noia (PSOE) e de Lousame (PP) para fusionar estes dous municípios. Se estes planos se chegam a realizar Lousame deixaria de existir como município sendo anexionado por Noia sem prévia consulta aos habitantes das nossas paróquias. Isto implica afastar ainda mais a capacidade de decidir das nossas aldeias e paróquias, que desta forma passariam a estar governadas desde uma vila que dá as costas ao rural e às suas necessidades. A dívida do novo município superará o 20% do orçamento anual, o que levará à inevitável subida de impostos: imposto de bens imóveis, rústica, veículos, lixo, águas, saneamento, etc." Piden democracia directa parroquialTamén deixan claro que "estamos a favor de mancomunar serviços e reduzir gastos, mas em contra de que se nos retire a nossa capacidade política para decidir. Cremos que antes de tratar qualquer proposta de fusionar municípios se deve devolver a capacidade de decidir às nossas aldeias e paróquias, tendo potestade sobre orçamentos, gastos, impostos e todas as prerrogativas que livremente queiramos assumir. Queremos constituir assembleias paroquiais e conselhos de aldeia com poder político real, seguindo o funcionamento tradicional em concelho aberto das nossas mancomunidades de montes. Estamos fartos de manter políticos profissionais que vivem à nossa conta. Para reduzir realmente os gastos, queremos que se fusionem todos os municípios da comarca... depois, claro está, de devolver-nos o poder às paróquias. Somos maiores de idade e podemos decidir! Basta de viver da política à nossa conta! DEMOCRACIA DIRETA PAROQUIAL!". Máis información e lugar para asinar contra a fusión: http://www.partidodaterra.net/convocatoria/concentracao-em-noia/ http://www.peticaopublica.com/?pi=lousame Relacionadas:
Jorge Campaña sae elexido novo Secretario Xeral do PSdeG boirense por unanimidade
Aseguran que a nova comisión executiva é "resultado dunha renovación xeracional"
Boiro, 29 de xuño de 2012. A Agrupación Local boirense do PSdeG celebrou onte unha asamblea na que elixiu por unanimidade a candidatura encabezada por Jorge Campaña Dieste, única presentada para o proceso de renovación da Comisión Executiva Municipal. Jorge Campaña foi nomeado Secretario Xeral do PSOE boirense coa totalidade dos votos dos afiliados socialistas asistentes. Nesta nova andadura, Campaña vai acompañado de Jose Luis Ruiz como Secretario de Organización. Completan o equipo Rafael Suárez, un militante histórico da agrupación e encargado da Secretaría de Administración, Urbanismo e Pesca; Silvia G. Mirón, Secretaria de Política Municipal; Pilar Dieste, Secretaria de Educación; Diana Sánchez, Secretaria de Acción Electoral; e Adriana Castro, Secretaria de Xuventude e Formación. Sede aberta todos os días e participación de veciños en asembleasNo discurso previo a votación, o xa Secretario Xeral, fixo unha presentación do proxecto que elaboraron entre os membros da executiva entrante, na que destacan a apertura da sede a cidadanía tódolos días da semana, o establecemento de reunións periódicas cos colectivos e a presencia nas redes sociais como ponte para acadar coñecemento directo das inquedanzas da sociedade do municipio. A Agrupación boirense pretende ser o interlocutor dos cidadáns de Boiro ante o Goberno local, poñendo a disposión dos veciños e veciñas tódalas súas posibilidades, coñecementos e ferramentas, como por exemplo, asesoramento xurídico, urbanístico, etc. Como novidade, Campaña quixo destacar que "todo o cidadán que o desexe, pode participar nas asembleas do partido, con voz pero sen voto", facendo, deste xeito, unha forte aposta pola implicación da sociedade na organización política. Por outra banda, o novo Secretario Xeral quixo salientar "a ilusión, forza e gañas de traballar que amosaron os membros da nova dirección do Partido Socialista de Boiro. Somos un grupo novo pero con experiencia dentro da dirección do partido". Campaña confirmou que, asemade, a nova executiva conta "co apoio indiscutible" dos membros máis veteranos do PSdeG-PSOE de Boiro.
Ó principio estaba Bill Wyman, que xa fumaba cando aínda non existía o rock and roll. Cando Bill tiña vinte anos, chegaron do outro lado do mar Elvis e Compañía, e estableceron o Novo Novo Mundo. Non sabemos moi ben que fixo Bill, aparte de fumar, ata que volvemos a atopalo cun baixo na man o 7 de decembro de 1962, nunha proba para tocar cos Rollin´ (aínda sen “G”, daquela levábaa Franco nas moedas) Stones. A Bill, sete anos maior que o monstro Jaggerrichards, quedoulle claro dende aquel segundo principio: máis que querelo a el, aqueles espichos querían o seu ampli.
Chegaron noticias dende a metrópole: mataran ó rei Kennedy de Camelot, e cando volveu matárono outra vez. Así que non quedaba outra que cabalgar montados nas grupis cara o abismo. Xa en 1971, como os artistas antigos que solo Bill lembraba, os Rolling Stones instaláronse no Sur de Francia, e mentres o baixista buscaba a luz do Midi francés para pintar, Jaggerrichards buscaba a sombra para seguir cabalgando por dentro e para ocultarse do fisco británico, que nada sabía do establecemento daquel Novo Novo Mundo que, para que negalo, xa abandonara as colonias.
Bill paseaba pola campiña con Chagall e cun detector de metais que hoxe en día leva o seu nome, e que por aquel entón lle servía para atopar moedas sen “G”, polos novos vellos tempos, mentres o resto dos Stones, ocultos nos seus pasadizos, non sospeitaban que un día o detector de metais Wyman (marca rexistrada) podería delatalos atopando o rastro de próteses metálicas.
Así que no ano 30 Despois de Camelot, en 1993, Wyman colleu o seu ampli e marchou, renunciando a un posto de alto funcionario satánico en Babilonia para abrir un restaurante e quedar con outros amigos, sen parvadas de rapaces sete anos máis novos ca el, para tocar e así dar fe de que unha vez uns homes chegados do outro lado do mar trouxeron un son chamado rock and roll que non precisaba de jets privados nin finais da Superbowl.
O pasado 19 de xuño Bill apareceu no Palexco da Coruña cos seus outros amigos, chamados os Rhythm Kings, nada menos. E unha vez máis, como nos videoclips, era un tipo serio que só pasaba por alí, que leva cincuenta anos pasando por alí, e ó que eu lle agradecerei eternamente a liña de baixo de “Miss You”. Por un instante de hora e media quedou quieto pulsando as cordas e mirando ó infinito, coma sempre, e co detector de metais apagado. Alí estaba o representante dun Vello Novo Mundo que renunciara ó seu posto, incomprensiblemente para nós, que queremos ser todos funcionarios.
Ó final do show abalanzámonos a darlle a man coma vendedores de froita cando para o tren e se asoma pola xanela o Vicerrei da India. Porque Bill Wyman é un señor moi inglés. E para aqueles que aínda crean na imaxinaria guerra civil inglesa entre Beatles e Rolling Stones, dicir que ningún Beatle puxo nunca un pé en Galicia. Aínda que unha vez nas dunas de Corrubedo vin a un señor moi parecido a Ringo perdido e buscando unha sombra.
