Boiro: os Cafés Científicos voltan á comarca os venres 15 e 29 de outubro e o venres 12 de novembro

Vídeo do realizado no bar Plaza, en Ribeira, en 2007

Boiro, 3 de outubro de 2010. O Grupo NEUROcom organiza os Cafés-teatro-científicos, unha actividade de divulgación co obxectivo de acercar o coñecemento científico en xeral á sociedade. Nesta edición introducen novidades diversificando os temas a tratar. Ademais dos dous neurocientíficos do grupo organizador, contan cunha matemática, un ecólogo, un físico e un biólogo evolutivo. Realizarase a través de charlas-discusión, nas que poderán participar todos os asistentes en xeral. O lugar de celebración será nunha cafetería/bar, en distintas vilas, os venres á tarde.Os venres 15 e 29 de outubro e o 12 de novembro o escenario será o bar Pousada das Ánimas de Boiro.

Esta actividade está financiada pola Fundación Española para Ciencia e Tecnoloxía do Ministerio de Ciencia e Innovación e a Consellería de Economía e Industria, da Xunta de Galicia e organizada en colaboración coa Universidade da Coruña.

Os encargados de levala a cabo son Xurxo Mariño e Casto Rivadulla, investigadores pertencentes a NEUROcom, ademais dos científicos colaboradores: Elena Vázquez, Luís Sampedro, Eduardo Sánchez e Alberto Velando, acompañados dos actores:Vicente de Souza e César Goldi.

Web de referencia:
http://www.udc.es/dep/medicina/neurocom/cafes_gal.html

Posted via email from Certo.gl, o xornal dixital de Barbanza e Noia

Ribeira: as próximas camiñatas de "Ponte a Andar", o 17 de outubro e o 21 de novembro

Ribeira, 3 de outubro de 2010. O ciclo de andainas "Ponte a Andar", que organizan conxuntamente a Cofradía da Dorna e o Concello de Ribeira, xa ten programadas as vindeiras datas das camiñadas, que serán, neste mes, o domingo 17 e no próximo, novembro, o domingo 21. 

A do domingo 17 de outubro sairá ás dez da mañá da praia de Espiñeirido e percorrerá Lagoas e Furnas, con volta ao punto de orixe, na praia de Espiñeirido. A saída terá lugar dende o aparcadoiro do Chiringuito O Paraiso (lat. 42°36'9.87"N - 9° 3'35.05"O) na Praia de Espiñeirido, e transitarase pola costa, por enriba das pasarelas de madeira e camiños ata as Lagoas (e o miradoiro de aves) para chegar á Praia das Furnas.

A do domingo 21 de novembro sae tamén ás dez do campo de fútbol de Palmeira (lat. 42°35'12.56"N - 8°58'12.49"O) e vai por Moldes, A Tomada e Chacín, con volta ao punto de partida. Nesta ruta haberá uns 4 quilómetros de subidiña inicial, que ainda que non son pronunciados e ben asumibles, convén ir prevenido

As características destes roteiros son os seguintes: Teñen lugar o domingo pola mañá, con horario de saida ás 10:00 h. e chegada aproximada ás 12 do mediodía; a inscrición é libre e gratuita, non fai falla anotarse en ningún sitio, ainda que se agradece que notifique a asistencia pois dende a organización deben facer certas previsións; as distancias estarán entre os 10 e os 12 quilómetros, en función das particularidades do terreo polo que escorra a ruta; están dirixidas a tódolos públicos e non se precisa unha forma física excepcional, pero si unha boa disposición a camiñar (o ritmo de camiñata será de 4-5 km./h).

Os únicos requisitos que se piden son puntualidade na hora da saída, e no lugar que se indica en cada ruta; roupa e calzado cómodo e apto para o tipo de actividade que se leva a cabo; algo de beber para o camiño, ou un recipiente no que poder portar líquido e atende-las intruccións dos monitores en cada ruta.

Os nenos e menores de 16 anos deben ir acompañados dos pais ou tutores que se facerán responsables deles e lle notificarán ós monitores quén é o adulto que os tutela. Non se permiten animais de compañía.   

Webs relacionadas:
http://www.cofradiadadorna.com
http://noticiasdorneiras.blogspot.com

Posted via email from Certo.gl, o xornal dixital de Barbanza e Noia

Pesca: este luns 4 de outubro comeza a campaña de libre marisqueo en Cabío

Técnicos da Consellería do Mar e os patróns maiores das 12 confrarías da Ría de Arousa que faenan nestes bancos reuníronse esta semana para organizar diferentes aspectos que atinxen ao traballo conxunto da campaña

A Pobra do Caramiñal, 3 de outubro de 2010.- Mañá comeza a campaña extractiva de libre marisqueo para os mariscadores da ría de Arousa. Técnicos da Consellería do Mar e os patróns maiores das 12 confrarías desta ría que faenan nos bancos de libre marisqueo, como Lombos do Ulla, O Bohído e Cabío, reuníronse esta semana para organizar diferentes aspectos que atinxen ao traballo conxunto da campaña. Entre eles acordouse o período de desenvolvemento da actividade que se prolongará ata o 1 de abril de 2011 e que poderá ser modificado pola dirección xeral de Ordenación e Xestión dos Recursos Mariños trala petición do sector e atendendo aos datos biolóxicos dos bancos e da evolución dos prezos no mercado.

En Cabío e no resto de zonas de libre marisqueo da ría, as cotas máximas son de 5 quilos para as especies de berberecho, ameixa xaponesa, ameixa bicuda e carneiro; 21 quilos para a ameixa rubia, 6 para a ameixa babosa e 2 quilos para a fina. No que atinxe aos horarios, a actividade extractiva realizarase de luns a xoves en horario de 8:00 a 14:00 horas. Para o labor de extracción están autorizadas como artes de marisqueo dende embarcación os rastros, os raños e as ganchas. A separación mínima entre varillas será de 17 mm.

Outro dos temas principais tratados na xuntanza foi o das cotas máximas de captura. No caso dos Lombos, as cantidades consensuadas entre administración e sector para o berberecho foi de 6 quilos máximo por tripulante, 2 quilos para a ameixa fina, a mesma cantidade para a ameixa babosa e 6 quilos para a ameixa xaponesa. No Bohído, os topes de capturas diarias por tripulante son de 2 quilos para a ameixa fina, tamén esta cantidade para a ameixa xaponesa e 5 quilos para cada unha das especies de ameixa babosa, ameixa bicuda e carneiro.

Permítense rastros, raños e ganchas para faenar, cunha separación mínima entre varillas de 17 milímetros

En canto á vixilancia da zona e dos puntos de control, realizaranse conxuntamemte entre os vixilantes das confrarías da Ría de Arousa coa colaboración do Servizo de Gardacostas de Galicia da Consellería do Mar.

 TÁBOA TOPES DIARIOS POR TRIPULANTE

Especies	Lombos do Ulla	O Bohído	Cabío	Resto de zonas
Berberecho	6	-	5	5
Ameixa fina	2	2	2	2
Ameixa babosa	2	5	6	6
Ameixa xaponesa	6	2	5	5
Ameixa rubia	-	-	21	21
Ameixa bicuda	-	5	5	5
Carneiro	-	5	5	5

Posted via email from Certo.gl, o xornal dixital de Barbanza e Noia