26.4.10

Ribeira: a praza do Plaza, endemoniada!

Moito artista hai en Ribeira! E 1984 non era un ano calquera... era case coma hoxe 2012. Cada pouco temos unha apocalipse, coma os porcos polo San Martiño!

Posted via web from Certo.es, o xornal virtual de Barbanza e Noia

Cinema: o Carpe Diem dunha mosca

Incrible curta para pararse a reflexionar un anaco... Hai que vela ata a fin!
Vía Cachatronic

Posted via web from Certo.es, o xornal virtual de Barbanza e Noia

Ribeira: os da Dorna xa teñen cor para as sudadeiras. Azul opusino. Non, perdón, marino

-As Javotas van Jopas
-Parrochas Papudas.
-Viquinjos da Tomasa.
-Longueirons con collóns.
-Os mexillons con toxina non se come, cochino.

É que con eses nomes nas peñas confunden a calquera. Azul marino, ma ri no!
E este 1 de maio, consertaso!!!!!

O vindeiro 1 de Maio ás 19:32 no Parque García Bayón contarán coa participación de: Generación Perdida, Pirufláuticos, Oito Ferrados + 3uMC e Ribeira Enferma.
Non hai que ir! Hai que arrebolarse, dorneiros!

Posted via web from Certo.es, o xornal virtual de Barbanza e Noia

Rianxo: concerto polo sétimo aniversario da Banda da Escola de Música, este sábado 1 de maio

Antón Alcalde Rodríguez, compositor rianxeiro

Rianxo, 26 de abril de 2010. O vindeiro sábado, Día do Traballo, este 1 de maio de 2010, a Banda da Escola de Música de Rianxo cumpre xa sete anos. Vaino celebrar cun concerto monográfico do seu músico e compositor mozo máis senlleiro nestes momentos: Antón Alcalde.


A partires da unha da tarde, no auditorio rianxeiro, o programa será:

· Rúa da Fonte

· Suite Galaica.

· Pinocho.

· Serengetti.

· Pórtico.

· Contos da Aldeia.

Tanto Rúa da Fonte, como Serengetti e Contos da Aldeia son pezas de Alcalde que se estrearán este Día dos Pepes. 

Relacionada: Antón Alcalde, premiado no certame da Federación Galega de Bandas de Música

Posted via email from Certo.es, o xornal virtual de Barbanza e Noia

A Pobra do Caramiñal: o Equipo de Normalización do instituto traduciu Wackwall, co que podes crear a túa rede social en galego

Crea a túa propia rede social en galego

O ENDL do IES da Pobra do Caramiñal pon a disposición de todo o mundo a tradución que vén de realizar da plataforma de creación de redes sociais Wackwall. Este servizo aínda está nos seus comezos, pero xa ofrece interesantes posibilidades. É social, de balde, sen publicidade e ten en desenvolvemento funcionalidades como a creación de grupos e eventos ou o aloxamento de arquivos. Confiamos en que tales condicións se manteñan, aínda que na rede nada é seguro. De feito, esta iniciativa parte do anuncio feito por Ning -onde abrimos varias redes educativas- de que deixa de ser gratuíto.

Tras traducir as 1.200 cadeas, aproximadamente, puxémonos en contacto coa plataforma para solicitar a inclusión do galego entre as (primeiras) linguas que se ofrezan como activábeis na administración de calquera sitio web aberto en Wackwall. Entregámoslle o arquivo e agardamos que esta opción non tarde en ser incorporada.

Mentres, para ter a túa rede en galego, sigue estes pasos:

  1. Descarga a versión en galego aquí (.ZIP), descomprímea e gárdaa nunha carpeta do teu computador.
  2. Entra na Administración (Admin) do teu sitio Wackwall e, despois de xestionar os plugins que che interesen, accede a Linguas (Languages) e preme en Linguas dispoñíbeis (Available Languages).
  3. Unha vez aí, clica en clonar o Inglés (CLONE); abrirase unha ventá que solicita o nome da lingua (pon Galego) e o ISO tag (pon gl-GZ). Terás o galego como lingua inactiva. Pois agora activa o Galego e desactiva o Inglés.
  4. Se tes a copia que chamaches Galego activa, elimina o Inglés (é importante facer isto).
  5. Engade abaixo os ficheiros .XML que descargaches, un a un (polo de agora non acepta o .ZIP), marcando as casiñas correspondentes e seguindo de cada vez o proceso que se indica. Xa terás o teu sitio galeguizado.

Cando se incorporen novas funcionalidades, actualizaremos este arquivo.

En relación con iso,unha das eivas actuais de Wackwall é carecer de editor, aínda que as caixas de texto admiten HTML. Xustamente, estamos a elaborar unha guía cos elementos da linguaxe HTML máis necesarios e empregados, que tamén pode ser útil para revisar anotacións de blogue e outros espazos de publicación na rede. Achegarase aquí en breve.

Parabéns por esta iniciativa, pero temos que confesalo: nunca escoitaramos falar de Wackwall. Dará resultado? Paga a pena outra rede social en galego se xa está en galego http://cabozo.com?

Posted via web from Certo.es, o xornal virtual de Barbanza e Noia

Cinema: Xacobeo Filme reúne a 11 festivais de cinema. Noia non está entre eles

Porto do Son: Festa dos Maiores o 1 de maio, só para xubilados deste municipio


Estes señores, como non son de Porto do Son, non irán a esta festa. Supoñemos

Porto do Son, 26 de abril de 2010. O vindeiro 1 de maio, San Xosé Obreiro e Día do Traballo, terá lugar a típica Festa dos Maiores. Haberá misa en San Vicente de Noal ás 12 da mañá, cantada pola coral de xubilados "Virxe do Carme". O xantar comezará sobre as dúas e media da tarde, no pavillón municipal. Só poden ir vellos sonenses, xa que o Concello avisou de que haberá control ao entrar. Amenizará a sobremesa a orquestra Odisea.
Haberá autobuses fletados en cada parroquia que sairán para a misa sobre as once e cuarto da mañá. Xantar gratuíto ao que se poden anotar os xubilados interesados nos teléfonos 981. 86. 74. 14 e 981. 76. 75. 89

Posted via email from Certo.es, o xornal virtual de Barbanza e Noia

Ribeira: A vaca Palmira excitou a imaxinación dos nenos no Día do Libro

O Auditorio Municipal de Ribeira acolleu a obra “A Vaca Palmira” a cargo de Monicreques Trécola, nunha función especial para homenaxear a conmemoración do Día Internacional do Libro, o pasado venres 23 de abril. Enchéronse as 278 butacas do aforo do recinto con outros tantos rapaces de Segundo e Terceiro Ciclo de Educación Primaria procedentes dos distintos centros educativos da Centenaria (25 por colexio), os cales aplaudiron con entusiasmo a actuación que se prolongou durante preto dunha hora.

Posted via email from Certo.es, o xornal virtual de Barbanza e Noia

Ribeira: abren o prazo para ofertas de remodelación do polideportivo municipal da Fieiteira

A actuación ten un orzamento de 1,2 millóns de euros e un prazo de execución de 6 meses

Entrada deteriorada á Fieiteira

Ribeira, 26 de abril de 2010.- O Concello de Ribeira informa de que xa está aberto o prazo para a presentación de ofertas para a realización da reforma para o Complexo Polideportivo Municipal de A Fieiteira que, cun orzamento de 1.241.103,84  euros, é a máis cuantiosa das actuacións promovidas pola Corporación Local que se incardinan dentro do Fondo Estatal para o Emprego e a Sostibilidade Local. O prazo de execución da obra é de 180 días (6 meses), a adxudicación terá lugar a través dun procedemento aberto con multiplicidade de criterios de valoración e con tramitación urxente, e as ofertas deberán presentarse no rexistro do Concello.

O Complexo da Fieiteira xa experimentou no pasado diversas ampliacións e hoxe consta de dous edificios: un recinto polideportivo e unha piscina. Ademais, na zona exterior sitúase unha pista de atletismo con graderío, un campo de fútbol de céspede natural de 108x69 metros e un campo de fútbol de céspede artificial.

O recinto polideportivo dispón de sala de kárate, vestiarios de árbitros, almacén, vestiarios de usuarios e sala de musculación en planta baixa, mentres que na planta alta ubícanse o graderío para espectadores, aseos e unha recta de atletismo interior. En canto á piscina, conta con dous vasos de natación, vestiarios, graderío e oficinas administrativas. Ambos edificios comparten acceso, que se sitúa no edificio dedicado a piscinas, e escaleiras e aseos de planta alta, que se sitúan no edificio polideportivo.



Dúas zonas de acceso

A nova actuación responde entre outros obxectivos á necesidade dun maior aproveitamento dos espazos existentes e á necesidade de diferenciación de circulacións dos distintos usuarios, abonados e non abonados. Con tal motivo, realizarase a separación dos distintos usuarios ubicando o vestíbulo de acceso no edificio polideportivo, construíndose un control de acceso para a zona de abonados e outra de acceso directo a usuarios. Na zona do polideportivo demoleranse as actuais dependencias utilizadas como vestiarios e construíranse uns novos; e ademais aproveitarase o espazo baixo gradas para situar tres salas de actividades, e construirase un almacén de pista na zona próxima ás escaleiras de acceso ás gradas.

Ximnasio e ascensor

O espazo ocupado pola actual recta de atletismo en planta primeira adecuarase para o seu uso como ximnasio. Para mellorar a accesibilidade tanto a este espazo como os outros que se sitúan en planta alta, construirase un ascensor.

Piscina


No que respecta ao edificio que alberga os vasos de natación, ampliaranse e reformaranse os vestiarios e crearase unha nova zona de tratamentos accesibles dende a zona dos vasos. Ademais, substituiranse as máquinas de climatización e caldeiras existentes por outras de maior potencia e impermeabilizaranse e pavimentaranse as praias dos vasos e renovarase o revestimento do vaso de aprendizaxe.

Zona wellness

En alusión á devandita zona de tratamentos ou wellness, deseñouse un circuíto cos seguintes servizos:
  1. Hidroterapia: instalación dun jacuzzi dotado con jets de auga e aire e placas de aire tanto no chan como nos asentos.
  2. Tratamento con calor: instalación dunha sauna e un baño de vapor, que teñen efectos sobre o organismo de eliminación de toxinas a través do suor, tonificantes e vasodilatadores.
  3. Aplicación en contraste frío-calor: instalaranse tres sistemas de contraste: ducha-cubo (ducha de contraste con caída de auga sobre o corpo do usuario); ducha bitérmica secuencial (ducha secuencial de auga fría e quente que se toma despois da prestación de calor para estimular os sistemas nerviosos e musculares e activar a circulación; conta con jets de ducha, cadro hidráulico e pulsador antivandálico) e ducha de chorros (ducha con jets situados a distintas alturas para poder aplicar unha hidromasaxe de zonas lumbares, cervicais, dorsais, etc... producindo un efecto terapéutico; conta con jets de encastre e pulsador antivandálico).

Ademais, dotarase á  zona con equipamento de tumbonas térmicas que se colocarán na zona de praia e que conformaran a zona de descanso despois do tratamento do circuíto.

Posted via email from Certo.es, o xornal virtual de Barbanza e Noia

Política: O Psoe denuncia que a austeridade de Feijóo "non é tal" e apunta o gasto improdutivo de Presidencia

”Rueda faltou á verdade no Parlamento xa que 45 despois de entrar en vigor a lei de orzamentos xa tiveron que facer unha modificación de máis de 5 millóns de euros dirixidos a gastos improductivos como se pode comprobar na documentación remitida ao parlamento a través dunha modificación orzamentaria feita o 15 de Febreiro de 2010”, explicou Lage Tuñas

Rueda, á esquerda de Feijóo, nun consello da Xunta de Galicia

Noia, 26 de abril de 2010. O Viceportavoz do Grupo Parlamentario dos Socialistas de Galicia, José Manuel Lage Tuñas presentou xunto aos deputados Xoaquín Fernández Leiceaga e María José Caride unha pregunta oral en Pleno co obxecto de coñecer como valora agora o goberno galego o incremento do gasto corrente con respecto ao ano 2009 nun 5´4%.

Os deputados do PSdeG fan fincapé na súa iniciativa na necesidade de denunciar “a enxeñería contable” da que se valiu Alfonso Rueda para presentar no pasado mes de outubro as contas da súa consellería para o ano 2010. Lage Tuñas explicou que “o conselleiro da Presidencia xa está gastando un 5´4% máis en gasto corrente do que presupostou o anterior goberno progresista para o ano 2009 e iso só nos primeiros 45 días do ano en curso”. Os socialistas galegos advertiron sobre a modificación orzamentaria feita por Alfonso Rueda como conselleiro da Presidencia, onde se transferiron máis de 5 millóns de euros da partida de gastos de capital dentro da sección 23 do orzamento correspondente a Gastos para continxencias para incrementar en menos de 45 días o gasto corrente da consellería de Presidencia en máis dun 15%.


Lage Tuñas

Lage Tuñas denuncia “o engano masivo de Rueda durante a tramitación parlamentaria do proxecto de lei de orzamentos para o ano 2010, xa que daquela gabouse de reducir o gasto corrente con respecto ao anterior goberno, cando era falso como agora se demostra”. “É unha clara mostra da enxeñería contable e de desprezo ás prácticas de transparencia no uso dos recursos públicos” apostillan dende o PSdeG. “Estarán na mesma situación o gasto corrente no resto da consellerías?” preguntábanse os socialistas galegos ao observar unha modificación orzamentaria feita só 45 días despois de ter aprobado un orzamento para o conxunto do ano 2010. “En corenta e cinco días descubriron que a electricidade, o teléfono e a limpeza eran gastos correntes necesarios e descubriron que se esqueceran de presupostalos corrretamente para intentar vender unha falsa austeridade como agora queda demostrado”, insistiu Lage Tuñas. ”Rueda maquillou as contas públicas para agochar fraudulentamente o gasto corrente da súa consellería, superior nun 5,4% ao do anterior goberno da Xunta de Galicia”, argúen, e a "modificación orzamentaria feita o 15 de Febreiro de 2010 evidencia que Rueda faltou á verdade no Parlamento xa que 45 despois de entrar en vigor a lei de orzamentos xa tiveron que facer unha modificación de máis de 5 millóns de euros dirixidos a gastos improductivos, co que Rueda vacía en 45 días a sección número 23 do orzamento destinada a atender continxencias durante todo o ano 2010”.

“Están poñendo en risco a posibilidade de atender contixencias reais que poidan xurdir ao longo do ano, e fano recortando a partida de gastos de capital para destinalo a gasto non productivo”. “A transferencia de máis de 5 millóns de euros da sección 23 destinados inicialmente a gastos de capital, dedícanos a incrementar o gasto corrente da Consellería de Presidencia, Administracións Públicas e Xustiza en máis dun 15% no capítulo II, poñendo en evidencia a nula austeridade do Goberno presidido por Alberto Núñez Feijóo e a ausencia de contención no gasto non produtivo”, explicou o viceportavoz do Grupo Socialista, José Manuel Lage Tuñas. Os socialistas galegos entenden que “tamén terá que explicar o conselleiro da Presidencia como en só tres meses do ano 2010 ten que modificar o seu orzamento para incrementar o gasto corrente, xa que ou fixeron un orzamento irreal destinado a "vender" unha falsa austeridade, ou ben son uns malos xestores que descoñecían as necesidades de gasto corrente da consellería.

Posted via email from Certo.es, o xornal virtual de Barbanza e Noia

Twitter

Related Posts with Thumbnails Banner: Regale selva tropical