21.12.10

Dodro: o Concello contribúe á difusión da guía Agasallo.eu co seu servizo de Normalización Lingüística

O Concello de Dodro, a través do seu Servizo de Normalización Lingüística está a difundir Agasallo. Propostas de regalos en galego, unha guía editada pola Área de Normalización Lingüística da Deputación da Coruña en colaboración coa Coordinadora de Traballadores/as de Normalización da Lingua (CTNL), e na que se dan arredor de 250 ideas de regalos en galego para o tempo de Nadal.
 

Agasallo inclúe unha selección de novas creacións e produtos, de libros, discos, aparellos electrónicos, fragrancias, camisolas, cinema, xogos, etc. E, aínda que necesariamente só poden estar algúns dos que son, son todos os que están. Porque todas as ideas que inclúe este catálogo teñen unha cousa en común: a lingua galega.

A personaxe mítica do Nadal galego que lle trae agasallos aos nenos e ás nenas, o Apalpador, fala galego e dispón de todos os agasallos que aparecen na guía. Ao Papá Noel e mais aos Reis Magos, que falan todas as linguas do mundo, failles tamén moita ilusión que en cada lugar se fale e apoie a lingua propia e que, polo tanto, apoiemos os produtos e creacións en galego.

Por estas razóns, desde a Deputación da Coruña, desde a CTNL e desde o Servizo de Normalización Lingüística do Concello de Dodro se quere contribuír a visibilizar a lingua galega e a recomendar os agasallos que a usan, que son moitos, e dos que na guía figuran algúns.

Así, quérese contribuír a difundir socialmente os produtos de agasallo en galego de todo tipo e para todas as idades; a promocionar os produtos culturais e, polo tanto e ao mesmo tempo, a promocionar a nosa música, a literatura, o cinema, etc. Deste xeito procúranse aproveitar as festas do Nadal para promocionar a lingua galega para contribuír a que estea presente na vida social cotiá e no lecer.

Do catálogo Agasallo editáronse 45.000 exemplares, que son distribuídos principalmente a través dos 46 servizos de normalización lingüística (SNL) que existen nos diversos concellos da provincia. Tamén está dispoñíbel a través do enderezo web www.agasallo.eu.

O SNL de Dodro distribúe 350 exemplares entre os diferentes centros de ensino e espazos públicos municipais.

www.agasallo.eu

Posted via email from Certo.gl, o xornal dixital de Barbanza e Noia

Política: o ribeirense Ruíz Rivas, premiado como "Látego da oposición" e o outiense Lage Tuñas, finalista como "Látego do goberno", concedido por xornalistas parlamentarios

Fotos aportadas polo Psoe

Barbanza-Noia, 21 de decembro de 2010. O ribeirense Manuel Ruiz Rivas, portavoz parlamentario do Partido Popular no Parlamento, foi premiado por un grupo de xornalistas que cobren a información na Cámara autonómica como "Látego da oposición" polo seu traballo de "control á oposición, ás súas posicións e aos seus cambios de postura". Quedou finalista o seu compañeiro de filas, o conselleiro de Presidencia, Alfonso Rueda.

O outiense José Manuel Lage Tuñas quedou finalista como "Látego do goberno", por detrás da nacionalista Teresa Táboas. Valorouse neste parlamentario a súa "marcaxe e seguimento aos procesos selectivos" da Administración pública galega. En Certo levamos publicadas numerosas noticias e iniciativas sobre a posible corrupción nas oposicións do Sergas e a maioría foron presentadas ou promovidas por Tuñas.

Ademais, o voceiro do Grupo Parlamentario do PSdeG, Xaquín Fernández Leiceaga, foi galardoado co premio Deputado do Ano que, por terceiro ano consecutivo, concederon os xornalistas galegos que habitualmente cobren a información da Cámara galega. Salientouse a súa profundidade nos debates económicos durante esta lexislatura marcada pola crise. Ao deputado Ismael Rego déuselle o premio honorífico á carreira política, pois é agora un dos deputados que máis leva sentado no Parlamento, dende 1986.

Estes premios concédenos unha vintena de xornalistas de 15 medios de comunicación entre os que non está Certo -nin falta que fai, tamén o sinalamos-. O "Minuto de Ouro" levouno o mesmísimo presidente da Xunta, Alberto Núñez Feijóo, pola súa poética "¿Que é crise? ¿E ti pregúntasmo? Crise es ti" que lle dixera a Pachi Vázquez nunha arroutada becqueriana-parlamentaria.

O premio ao "Residente Ausente", que o ano pasado levara Touriño, foi parar ás fileiras do PP, ao deputado Carlos Negreira, que hoxe si que estaba para a foto, aínda que adoita faltar bastante ao seu posto no Parlamento. O galardón á "iniciativa peregrina" foi para todos, nunha evidente crítica ao nunca cumprido pacto antitransfuguismo. Recolleron este galardón, como se ve nas imaxes, o popular e candidato á alcaldía de Allariz Antonio Rodríguez Miranda, a socialista Mar Barcón e o nacionalista Alfredo Suárez Canal.

Posted via email from Certo.gl, o xornal dixital de Barbanza e Noia

Ribeira: Andrés Villar coroou o Aconcagua e plantou a bandeira do Concello a case 7.000 metros de altura

Tras 3 días de expedición o alpinista coroou a cima máis alta de América. Prevé regresar a Galicia antes da Noiteboa.


Ribeira, 21 de decembro de 2010.- Xa se pode dicir que o teito do continente americano foi conquistado polo Concello de Ribeira. O pasado mércores día 15, o alpinista Andrés Villar Murillo, en compañía do seu colega Ramón Figueira, chegou por fin á cima do monte Aconcagua tras tres días de escalada, e a bandeira de Ribeira, cuxo Concello é o patrocinador da expedición, puido ondear no cumio da emblemática montaña. Quedará para o recordo no alto deste enclave arxentino a praza de Ribeira con que Andrés Villar bautizou un recuncho da súa orografía.

Villar comentou que a cita co cumio desta montaña, de 6.962 metros de altitude, debería ter sido o domingo 12, "pero as condicións climatolóxicas foron tan extremas que preferimos actuar con prudencia e agardar uns días antes de atacar a cima". De feito, Andrés Villar informa de que o 70% dos montañeiros que a escalaron nesas datas tan adversas descenderon con serias conxelacións.

Peripecias

Por esta razón, en lugar de establecerse no campamento 1 que instalaron o sábado a 5.300 metros de altura, deixárono semiequipado, con pedras enriba, e regresaron ao campamento base á espera de que aminorasen os ventos de 150 km/h que imperaban naquel arisco lugar, chamado Nido de Cóndores. Unha vez de volta o luns, atoparon a tenda de campaña semisoterrada na neve despois dunha intensa búsqueda e puideron pasar nela a primeira noite.

Ao día seguinte, martes, Andrés Villar e Ramón Filgueira chegaron á zona coñecida como Berlín para montar o campo 2, a 5.850 metros de altitude. A intención era iniciar o ataque á cima ás 6 horas do día seguinte, xa que as previsións meteorolóxicas anunciaban que o mal tempo regresaría o mércores, pero o frío reinante impediulles deixar a tenda ata as 8 da mañá.

Unha vez chegados á  cota de 6.000 metros, en Independencia, atopáronse con outras expedicións que habían iniciado o ascenso ás 2 da madrugada. Tras un breve descanso e algo de hidratación, Villar e Filgueira proseguiron o seu camiño atopándose con outros montañeiros que estaban dando volta por mor dunha meteoroloxía á que non estamos afeitos aquí, na que se mesturaban néboa, neve e sol.

Afortunadamente, unha vez chegados á zona de Canaleta, a 6.500 metros de altura, sopraban ventos de tan só 25 km. por hora e temperaturas de pouco máis de 10 grados baixo cero. Non obstante, estaban ante a zona máis difícil e vertical, onde se deixa sentir ademais a falta de oxíxeno. Pero tras numerosas paradas e moito esforzo, puideron alcanzar o cumio ás 13.30 horas.


Posted via email from Certo.gl, o xornal dixital de Barbanza e Noia

Rianxo: denuncian que se emprega o Concello como garaxe de motos antes que ceder un local ao grupo municipal do BNG

O alcalde de Rianxo prefire almacenar motos na Casa Consistorial que cumprir coa lei e conceder un local ao grupo municipal do BNG como ten solicitado, indican os nacionalistas

Rianxo, 21 de decembro de 2010. Desde comezos desta lexislatura o grupo municipal do BNG ten solicitado en varias ocasións o cumprimento do establecido nas leis e que prevé ceder nas casas do concello locais para que os concelleiros dos distintos grupos do BNG poidan xuntarse con veciños con medios materiais para facelo.

"Son catro anos de darnos longas: non hai sitio, agora estamos en obras, cando rematen, cando abramos os antigos xulgados... A sorpresa e indignación do BNG é maior cando vemos que os antigos despachos de urbanismo, na planta baixa do concello, desocupados logo do traslado deste servizo, están ocupados como garaxe das motos da policía local", explican.

"Sabemos agora de que lle ten maior estima ao futuro das motos que ao cumprimento das leis pero instarémoslle a que tome medidas e que non siga pensando na Casa do Concello como o seu couto privado. Logo das obras pagadas cos impostos de todos e todas non ten excusa para incumprilas como non sexa o desprezo e o querer afastar aos grupos municipais do seu traballo cos veciños como fiscalizadores do desgoberno do executivo do PSOE", argumentan dende o Bng local, que tamén aportan na súa nota de prensa o artigo 27 do reglamento de entidades locais, por se o actual grupo de goberno non soubera del:

Real Decreto 2568/1986, de 28 de noviembre, por el que se aprueba el Reglamento de organización, funcionamiento y régimen jurídico de las Entidades locales.

Artículo 27.

En la medida de las posibilidades funcionales de la organización administrativa de la entidad local, los diversos grupos políticos dispondrán en la sede de la misma de un despacho o local para reunirse de manera independiente y recibir visitas de ciudadanos, y el Presidente o el miembro de la Corporación responsable del área de régimen interior pondrá a su disposición una infraestructura mínima de medios materiales y personales.

Posted via email from Certo.gl, o xornal dixital de Barbanza e Noia

A Pobra do Caramiñal: os socialistas voltan reclamar o contedor de lixo no Conchido

Ribeira: manifesto institucional de apoio ao sector local do Mar ante o TAC sobre a bacaladilla para 2011



Ribeira, 21 de decembro de 2010. Onte leuse en Ribeira un o manifesto institucional ao inicio do pleno ordinario da Corporación Local despois de ser acordado polos portavoces de todos os grupos políticos con representación municipal. Replicámosllo íntegro:

A Corporación Municipal de Ribeira desexa manifestar a súa fonda preocupación ante os resultados derivados do último Consello de Ministros de Pesca da Unión Europea, celebrado o pasado día 15 de decembro, que poñen en serio risco a supervivencia de gran parte da flota de Ribeira.  

O descenso nun 93% do TAC sobre a bacaladilla para 2011 supón un golpe pode que definitivo para os nosos arrastreiros de litoral, xa que, coa irrisoria cifra de 824 toneladas de lirio como tope de capturas no ano que ven, vanse ver abocados irremisiblemente ao amarre ou mesmo ao desguace, coa conseguinte perda de empresas, postos de traballo directos e indirectos e puxanza económica no concello e na bisbarra. 

Ribeira, como primeiro porto de baixura de España en volume de descargas e facturación, non pode permanecer calada ante unha decisión desproporcionada e claramente atentatoria para os seus intereses.  

Por iso, dende o Concello de Ribeira, queremos instar ao Ministerio de Medio Ambiente, Medio Rural e Mariño, á Consellería do Mar e á Comisaria de Pesca da UE, dona Maria Damanaki, a que medien e busquen as solución oportunas para asegurar o futuro da flota dunha localidade que ten na pesca e os seus derivados a súa principal fonte de sustento. 

A Corporación Local quere expresar así mesmo o seu máis firme apoio e solidariedade cos armadores, mariñeiros e outros traballadores do mar, así  como ás súas familias e sectores afectados por unha decisión comunitaria inxusta e desproporcionada.

Posted via email from Certo.gl, o xornal dixital de Barbanza e Noia

Boiro: o Concello, distinguido co "Ciudad de la Ciencia y la Innovación", pola súa aposta pola investigación, a innovación e o desenvolvemento


Boiro, 21 de decembro de 2010. Onte saíu no BOE a concesión do distintivo "Ciudad de la Ciencia e Innovación" que se outorga por vez primeira a trinta cidades españolas. Entre elas, e como única en Galicia, está Boiro. Con este premio, instaurado este ano, preténdese recoñecer a estas cidades e vilas "o importante esforzo e compromiso desempeñado na I+D+I e a súa contribución na esfera local ao cambio de modelo produtivo", segundo aclarou o Ministerio de Ciencia e Innovación, entidade que organiza estes premios.

O galardón divide aos municipios por categorías, respondendo á súa poboación. Menos de 20.000, como é o caso de Boiro, de 20.001 a 100.000 e máis de 100.000. En cada categoría resultan escollidos 10 premiados.Mais non é un galardón que se da e se esquece: ten un periodo de vixencia de tres anos e renóvase ou non segundo se comporte o municipio galardonado. Entre os beneficios de ser escollido para este distintivo está o integrar a Rede de Cidades para a Ciencia e a Innovación, chamada INNPULSO, que aporta medios para reforzar e fomentar a ciencia e a innovación no ámbito local e municipal. A avaliación dos candidatos para este premio fíxose coa colaboración do Ministerio de Política Territorial. 

Listado de ganadoras

Ata 20.000 habitantes
Comunidade Autónoma Provincia Localidade
Canarias Santa Cruz de Tenerife Buenavista del Norte
Castilla- La Mancha Ciudad Real La Solana
Castilla y León Salamanca Béjar
Castilla y León Salamanca Palaciosrubios
Cataluña Barcelona Vilanova del Camí
Galicia A Coruña Boiro
Madrid Madrid Colmenarejo
País Vasco Vizcaya Ermua
Valencia Alicante Benilloba
Valencia Alicante Gata de Gorgos
De 20.001 a 100.000 habitantes
Comunidade Autónoma Provincia Localidade
Asturias Asturias Avilés
Cataluña Barcelona Cerdanyola del Vallès
Cataluña Barcelona Manresa
Cataluña Barcelona Sant Boi de Llobregat
Cataluña Barcelona Viladecans
Extremadura Cáceres Cáceres
Extremadura Badajoz Almendralejo
Madrid Madrid Rivas Vaciamadrid
Madrid Madrid Tres Cantos
País Vasco Guipúzcoa Eibar
Máis de 100.000 habitantes
Comunidade Autónoma Provincia Localidade
Andalucía Sevilla Dos Hermanas
Asturias Asturias Gijón
Cantabria Cantabria Santander
Castilla y León Valladolid Valladolid
Cataluña Barcelona Barcelona
Cataluña Barcelona Mataró
Cataluña Barcelona Terrassa
La Rioja La Rioja Logroño
País Vasco Guipúzcoa San Sebastián
Valencia Valencia Valencia

Entre os méritos de Boiro está o seu parque empresarial da Espiñeira e a súa iniciativa de crear nel un viveiro de empresas, un sobre iniciativas locais de emprego e ademais de promover varios proxectos sobre economía verde.

A entrega de galardóns terá lugar en Madrid a comezos de 2011, coa presenza dos Príncipes de Asturias.

Beneficios da rede INNPULSO

É unha rede permanente, con vocación de medrar e que aposta polos concellos para o cambio de modelo produtivo. Formar parte dela, como o vai facer agora Boiro, significará:

.- Autorización para o uso da distinción "Ciudad de la Ciencia y la Innovación" na comunicación e promoción do Concello a todos os niveis.

.- Fomento e impulso de proxetos colaborativos entre municipios que integran a Rede.

.- Integración na Rede como entidade de referencia dentro dun grupo de traballo con institucións sobre turismo científico.

.- Promoción internacional en congresos, seminarios e outras actividades relacionadas co I+D+I

.- Consideración preferente destes concellos e cidades para ubicar instalacións científicas e tecnolóxicas de titularidade ou participación estatal.

.- Priorización de Boiro como lugar preferente para organizar reunións do departamento coas Comunidades Autónomas e outros axentes dos sistemas de Innovación e Desenvolvemento, así como para celebrar congresos e seminarios dos organismos públicos de investigación.

Posted via email from Certo.gl, o xornal dixital de Barbanza e Noia

Twitter

Related Posts with Thumbnails Banner: Regale selva tropical