22.9.11

Ribeira: planean levar o programa de dinamización dos vellos a todas as parroquias

Programa_maiores

  • A festa do Maior celebrarase o 23 de outubro na praza de España 

 

Ribeira, 22 de setembro de 2011.- O concelleiro de Servizos Sociais e Promoción Social de Ribeira, Vicente Mariño de Bricio, deu a coñecer hoxe o Programa de Dinamización para os Nosos Maiores organizado dende a súa área municipal, e que afronta como gran reto para este curso 2011/2012 a aspiración de que todas as parroquias de Riveira dean cabida a algunha das actividades da iniciativa. 

Con este motivo, os Servizos Sociais confían en que haxa demanda suficiente tamén nas tres parroquias que aínda non albergaron ningunha actividade para maiores, é dicir, Artes, Corrubedo e Oleiros, para que se poidan sumar a Olveira, Carreira e Corrubedo (que dan cabida a este tipo de actuacións dende o ano pasado) e ás xa tradicionais Olveira, Carreira e Corrubedo, lugares onde este tipo de oferta está totalmente consolidadas.  

Illamento

Vicente Mariño, que estivo acompañado pola xefa de servizo María Francisca Vidal e pola coordinadora da programa, María José Carreira, incidiu en que o plan de dinamización promovido coa colaboración dos clubs de xubilados existentes no concello, ten como o obxectivo romper a situación de illamento e soidade que teñen que sufrir moitos dos maiores, así como mellorar a súa saúde física e mental e aumentar a súa autoestima colectiva. 

Para tal fin, os obradoiros organizados serán os xa tradicionais de Enriquecemento Educativo (con grupos en Ribeira, Aguiño, Palmeira, Artes e Oleiros, con posibilidade de ampliación ao resto das parroquias segundo a demanda), Estimulación Cognitiva (en Ribeira), Informática (tanto de iniciación como de perfeccionamento, que ademais de en Santa Uxía se intentará celebrar tamén na aula multimedia de Aguiño), As Nosas Historias (obradoiro en galego en colaboración con Normalización Lingüística) e Bailes de Salón e Pandeireta (en colaboración coas Amas de Casa, con grupos en Ribeira, Aguiño e Palmeira).  

A maiores e como novidade, haberá tamén un novo taller de Inglés impartido polo voluntariado social. 

A día de hoxe xa hai varios centros de persoas anotadas nalgúns destes cursos, pero todos os maiores interesados poden facelo ata o día 5 de outubro nas novas dependencias dos Servizos Sociais na praza 8 de marzo (número 981 874 131). 

Xuntanza do maior e escola de Braille

Mariño de Bricio anunciou tamén que a sexta edición da Xuntanza dos nosos Maiores celebrarase o domingo 23 de outubro e que cambiará de escenario con respecto a convocatorias anteriores e celebrarase na praza de España. Preténdese que este evento sirva de xornada lúdica en que os maiores gocen dun distinto, con música e baile, ademais dun xantar. 

Aproveitando a súa intervención, o edil municipal tamén avanzou que se está a preparar unha Escola de Braille que estará aberta a calquera persoa con independencia da súa idade que queira aprender a linguaxe dos invidentes e que será impartida polo voluntariado social.

Posted via email from Certo.gl, o xornal dixital de Barbanza e Noia

Boiro: presentan "Lume de Cobiza" este sábado 24 de setembro. Logo, debate co autor, Miguel Anxo Fernández

Miguel_anxo

Boiro, 22 de setembro de 2011.        Este sábado 24 de Setembro terá lugar a presentación da última novela de Miguel Anxo Fernández, titulada "LUME DE COBIZA". Será ás 21.00 horas no local social de Aturuxo (r/Principal nº118 Boiro). Prometen dende este colectivo xuvenil ter "un interesante debate arredor da produccion literaria e do mundo do cinema na Galiza e ao remate teremos uns pinchos".

Nota biografica do autor:

O Carballiño, Ourense, 1955.

Profesor de Comunicación Audiovisual na Universidade de Vigo, escritor, ensaísta e director da revista trimestral Audiovisual Galego .

Crítico de cine e televisión en La Voz de Galicia .

Colaborador do programa Planeta Cine (Televisión de Galicia) e do espazo Diario cultural (Radio Galega).

Membro da Sección de Lingua, Literatura e Comunicación do Consello da Cultura Galega .

Coordinador do programa Audiovisual nas Aulas para o Consorcio Audiovisual de Galicia desde 2003.

Director do curso de verán promovido anualmente pola Fundación Carlos Casares e a Universidade de Vigo desde 2005, especializado en audiovisual.

Pertence á Academia de las Ciencias y las Artes de Televisión de España, á Academia Audiovisual Galega, ó Patronato del Museo do Pobo Galego e ó Pen Club de Galicia.

Foi presidente-fundador da Federación de Cine Clubs de Galicia e vicepresidente da Academia Galega do Audiovisual .

Dirixiu entre 1984 e 1995, as Xornadas de Cine e Video en Galicia, Xociviga.

Presentou e dirixíu na Televisión de Galicia o programa Galicia no cine Versión orixinal nos anos 1986 e 1987.

Asesor cinematográfico da CRTVG (1985-1987).

En 1989 foi comisario en Vigo da mostra única Cinegalicia na que se presentaron as tres primeiras longametraxes galegas de ficción: "Sempre Xonxa" (Chano Piñeiro), "Continental" (Xavier Villaverde) e "Urxa" (Alfredo G. Pinal/Carlos A.L. Piñeiro).

Autor de numerosa obra de ensaio, entre os seus títulos destacan Crónica de Cine. O Carballiño 1900-1994 (I Premio ex-aequo Historia Cinematográica de Galicia, CGAI, 1994), Carlos Velo. Cine e exilio (A Nosa Terra, 1996), As imaxes de Carlos Velo (Premio Sempre en Galiza, A Nosa Terra, 2001), A Bella Otero, pioneira do cine (V Premio Historia Cinematográfica de Galicia, CGAI, 2003), Emilio Baños Santos. Unha vida entre películas (Xunta de Galicia/Festival de Cine de Ourense, 2003),Rodado en Galicia (Consorcio Audiovisual de Galicia, 2005, 2007), Las imágenes de Carlos Velo (UNAM, México, 2007) e Las huellas del exilio (VV AA., Tébar, 2008). Tamén editou Os amigos de Chano Piñeiro (Xunta de Galicia, 2007) e 25 anos de Mamasunción (Xunta de Galicia, 2008). Coordinador xunto a José Luis Cabo de Diccionario del Cine en Galicia 1896-2008(CGAI, 2008).

Como escritor de ficción en galego, é autor da triloxía protagonizada polo detective privado Frank Soutelo, formada por Un nicho para Marilyn (Premio de Novela García Barros, 2002), Un luar no inferno (2006) e Tres disparos e dous friames (2008), publicadas na editorial Galaxia. Tamén escribiu O sabre do francés (2002), Capitol, última sesión (2004) e O sangue dos Cortiña(2004).

Entre os numerosos recoñecementos recibidos, destacan o premio de honra Fernando Rey concedido pola Academia Galega do Audiovisual en 2001 e o Premio Honorífico da Fundación AISGE no 2004.

Posted via email from Certo.gl, o xornal dixital de Barbanza e Noia

Ribeira: a segunda "Galiña Azul" acubillará a 72 nenos, dúas prazas menos das que prometera xa a conselleira Mato a Torres Colomer

Visita_servizos_sociais

  • O alcalde anunciou que o proxecto básico estará  listo este ano
  • A secretaria xeral de Familia, Susana López Abella, visitou hoxe as novas dependencias de Servizos Sociais

Ribeira, 22 de setembro de 2011.- A segunda gardería pública de que disporá o concello de Ribeira terá capacidade para albergar a 72 nenos e nenas do municipio. Así o anunciou hoxe o alcalde, Manuel Ruiz Rivas, no transcurso dunha visita que realizou ás novas dependencias dos Servizos Sociais e o CIM, acompañando á secretaria xeral de Familia e Benestar da Xunta de Galicia, Susana López Abella. Nun primeiro anuncio desta "Galiña Azul", na pasada precampaña electoral autonómica, a conselleira Beatriz Mato faláralle a Torres Colomer de 74 prazas, como publicamos -nota do Concello tamén- aquí.

Ruiz Rivas explicou outros datos referentes á gardería, como que estará dividida en 8 unidades ou que o seu proxecto básico estará terminado antes de rematar o ano (as previsións apuntan a que a construción da instalación estea lista antes de finalizar o 2012). 

A visita de Susana López Abella serviu tamén para deixar testemuña das excelentes relacións de colaboración existentes entre Secretaría Xeral e Concello. Así, tanto a responsable da Xunta como o rexedor local fixeron fincapé en que están garantidas as achegas autonómicas para dependencia ao Concello nun importe de 198.000 euros e resaltaron tamén o feito de que en Ribeira non existe lista de espera en atención domiciliaria, grazas en boa medida a que este servizo conta con seis profesionais adicionais contratados grazas a colaboración da Xunta vía Secretaría Xeral de Familia e Benestar e Dirección Xeral de Formación. 

Centro de Día

Outra das novidades que transcenderon durante o encontro foi o feito de que o Centro de Día de ámbito comarcal existente na cidade ribeirense vai contar con outras 10 prazas novas, destinadas aos enfermos que padecen alzhéimer ou outras doenzas dexenerativas. 

López Abella loou durante a súa visita as novas dependencias de Servizos Sociais e fixo fincapé na intimidade e comodidade destas instalacións. Pola súa parte, Ruiz Rivas indicou que se está a traballar en dotalas de máis mobiliario. 

Con 581 metros cadrados de superficie, nas oficinas están a prestar o seu servizo dez traballadores. 

O Departamento de Servizos Sociais está distribuído nun espazo de recepción/administración, 11 despachos de técnicos, dúas salas de espera para usuarios, una sala de xuntas unha sala para equipamento informático, un office, un carto da limpeza, un almacén, dous arquivos, dous baños públicos e dous baños para persoal. 

Polo que respecta ao CIM, dispón dun recibidor, tres despachos, dúas aulas, unha sala de espera, dous baños, un carto da limpeza e un arquivo. 

Entre as súas funcións do persoal figuran a de dar información, orientación e asesoramento (3.057 persoas se beneficiaron de xeito directo no 2010 deste concepto), o servizo de axuda no fogar (con atención a 77 unidades familiares), o programa de educación familiar (cun volume de 197 usuarios, 65 deles menores de idade), o proxecto de axudas á escolaridade (29 beneficiarios), prevención e inserción social (con 153 persoas ás que se lle cubriron necesidades básicas e outros casos de aloxamento con carácter de urxencia), acollida e integración de inmigrantes e emigrantes retornados (275 persoas atendidas), programas de dinamización e animación sociocomunitaria para maiores e un longo etcétera.

Antes, en Certo:

Media_httpfarm6static_jsvom

Gardería de 74 prazas para finais de 2012, promete Mato

Posted via email from Certo.gl, o xornal dixital de Barbanza e Noia

A Pobra: proxectan unha rede de sumidoiros na rúa Luís Seoane e o saneamento e abastecemento de auga en Cadreche-Freixo

  • Polo de agora son só proxectos presentados na Deputación Provincial, non hai datas de realización
Media_httpfarm6static_dqyku

O novo campo de fútbol de Cadreche non ten rede de abastecemento nin saneamento

A Pobra, 22 de setembro de 2011. Informou hoxe o Concello de que xa están presentados na Deputación Provincial dous proxectos de obras "moi importantes para levalos a cabo na maior brevidade posible".

Ditos proxectos son:

  1. INSTALACIÓN DE REDE DE SUMIDOIROS NA RÚA LUÍS SEOANE: obra moi necesaria e moi demanda polos veciños, que conta cun orzamento de 235.784,45 € e que consistirá en:
    1. Instalación dunha rede de saneamento de 258 m.l. en tubaria PVC-SN4 compacta de 315 mm de diámetro para recoller as augas residuais da zona e de 8 pozos de rexistro de ata 155 cm de profundidade.
    2. Instalación dunha rede de pluviais de 240 m.l. en tubaria PVC-SN4 de saneamento de 400 mm de diámetro para recoller as augas pluviais da zona, 12 pozos de rexistro de ata 155 cm de profundidade e 27 sumidoiros prefabricados de 60x30 cm.
  1. INSTALACIÓN DE REDES DE ABASTECEMENTO E SANEAMENTO EN CADRECHE-FREIXO: esta obra conta cun orzamento de 235.922,97 € e dará servizo, ademais de aos veciños da zona, ao novo campo de fútbol de Cadreche e o máis importante, ao Colexio Público Pilar Maestú Sierra. As obras consistirán en:
    1. Instalación dun sistema de bombeo, con bombas somerxibles, dentro do depósito de auga potable existente en Cadreche conformado por dous equipos grupo motor-bomba cun caudal de 38,1 m3/h, camisa de refrixeración, cadro eléctrico con baleirador de velocidade para axustar presión o caudal constante e depósito de membrana.
    2. Instalación de rede de abastecemento desde o grupo de presión anterior de 924 m.l. en tubaria PEAD de 110 mm de diámetro, 6 válvulas de comporta embridada de 100 mm, 2 válvulas de comporta embridada de 60 mm e 2 válvulas de ventosa trifuncional de 60/65 mm.
    3. Instalación de rede de saneamento de 649 m.l. en tubaria PVC-SN4 de 315 mm de diámetro e 25 pozos de rexistro de ata 155 cm de profundidade.

Posted via email from Certo.gl, o xornal dixital de Barbanza e Noia

Política: o Psoe denuncia que a Xunta non cumpre as recomendacións do Consello de Contas e ten no Sergas "un burato negro"

  • José Manuel Lage Tuñas defende o traballo do órgano fiscalizador pero considera que “o Goberno galego practica o escapismo permanente ao incumprir as súas recomendacións nun 60% das mesmas"
  • Propón ao Consello de Contas que analice a utilidade da administración paralela e fiscalice “o burato negro da función pública e concretamente do Sergas”
  • Defende que o órgano fiscalice se as entidades, organismos e sociedades públicas están cumprindo o fin para o que foron creadas e esixe á Xunta que siga a recomendación do ente fiscalizador de harmonizar salarios na función pública

Media_httpfarm3static_jrghd

Corren xa rumores de que este servizo vai desaparecer

Santiago de Compostela, 22 de setembro de 2011. O portavoz do Grupo Socialista na Comisión do Consello de Contas, José Manuel Lage, revelou hoxe que o Goberno galego incumpre preto do 60 por cento das recomendacións do ente fiscalizador. Así o dixo no debate en Comisión do último informe de fiscalización emitido polo organismo, no que Lage pediu que analice a utilidade da administración paralela.

O portavoz da Área Institucional do Grupo Socialista recoñeceu o traballo do ente pero criticou o “escapismo permanente” do Goberno galego ao incumprir reiteradamente estas recomendacións. Sinalou que actualmente a Xunta só cumpre o 40,6 por cento das propostas, co que “só 4 de cada 10 propostas son implantadas de xeito pleno” polo goberno galego.

Lembrou así o incumprimento por parte da Xunta da recomendación de harmonizar salarios para postos semellantes na administración pública. Lage Tuñas lamentou que tanto o Goberno galego como o PP no Parlamento de Galicia rexeitaron establecer “orde” nos salarios para fixar retribucións acorde cos postos tanto no debate da Lofaxga como nas diferentes propostas presentadas polo PSdeG-PSOE.

Lage Tuñas sinalou que o PP e a Xunta rexeitaron establecer o salario do presidente como máximo na administración pública e fixar a partir de aí os criterios, rexeitando implantar as recomendacións do Consello de Contas neste mesmo sentido. Dixo que a situación de “disparidade e asimetría” entre os empregados públicos “non é razoable”, e reclamou que cumpra coa recomendación para adecuar os contratos directivos ás súas funcións reais.

Tamén lembrou o incumprimento das recomendacións do órgano relativas á licitación e adxudicación por parte da administración “respectando os principios de contratación pública, así como evitar que se realicen tarefas habituais correspondentes a un ente concreto por parte de empresas externas”.

O portavoz socialista pediu ao Consello de Contas que analice a utilidade de entes organismos e sociedades da coñecida como administración paralela, e propuxo que fiscalice si as entidades, organismos e sociedades públicas están cumprindo o fin para o que foron creadas.

Burato negro

Tamén propuxo ao ente que leve a cabo unha “fiscalización exhaustiva do que sucede co burato negro da dirección xeral de Función Pública e concretamente no Sergas”, xa que “non pode ser alleo das situacións que se presentan” sobre o acceso á función pública con irregularidades que mesmo teñen sido analizadas e denunciadas polo Valedor do Pobo, con situacións arbitrarias recoñecidas pola propia administración en informes internos”.

O responsable socialista dixo que o informe presentado hoxe, correspondente ao ano 2008, reflicte que a situación económico – financeira do goberno galego “comparativamente non ten nada que envexar coa das demais comunidades autónomas”, “malia as críticas” dos actuais responsables da Xunta. Dixo así que “a realidade contable reflicte moitas mais luces que sombras”.

Posted via email from Certo.gl, o xornal dixital de Barbanza e Noia

A Pobra: palentinos de visita no Museo Valle-Inclán

A Pobra, 22 de setembro de 2011. Un grupo de 67 veciños chegados desde Villa Alcázar de Sirga, na provincia de Palencia, achegáronse esta mañá ata as instalaciós do Museo Valle-Inclán, onde, unha vez máis, foron recibidos pola técnica Begoña Olveira Sanisidro, encargada de guialos polas distintas dependencias e contidos da casa-homenaxe ao creador do esperpento.

Trátase dun grupo namorado das terras galegas que, dúas veces no ano se lles resulta posible, fan un percorrido por Galicia, e que escolleron desta volta as terras barbanzanas, tan ligadas á figura e a literatura de Valle-Inclán, polas que moitos deles sinten verdadeira admiración.

Ante as portas do Museo quixeron plasmar a lembranza do seu paso pola Pobra do Caramiñal a través dunha fotografía de grupo, logo da cal pasearon polas rúas máis céntricas da vila antes de encamiñarse cara ao cumio da Curota.

Relacionada:


Museo Valle-Inclán: dende o 20 de setembro, horario de inverno

Posted via email from Certo.gl, o xornal dixital de Barbanza e Noia

Mar: o Psoe considera que a regulación dos pérmex do 15 de xullo é "un atentado á dignidade das mulleres traballadoras de Galicia"

pregunta violencia.PDF Download this file

-A portavoz de Pesca do Grupo Parlamentario dos Socialistas de Galicia, Marisol Soneira dixo que “tódolos seus artigo desprenden un arrecendo paternalista e discriminatorio descoñecido na lexislación española e autonómica dende fai moito tempo”

- A Xunta, pola contra, defende que esa normativa "promove a igualdade ao conceder permisos ás mariscadoras para coidar fillos e familiares"

Media_httpfarm4static_aqxaa

Santiago de Compostela, 22 de setembro de 2011. A portavoz de Pesca do Grupo Parlamentario dos Socialistas de Galicia, Marisol Soneira interviu hoxe na Comisión 8ª do Parlamento para reclamar explicacións sobre a Orde do 15 de xullo de 2011, pola que se regula o permiso de explotación para o marisqueo a pé.

Soneira afirma que esta Orde “é un dos maiores atentados á dignidade das mulleres traballadoras”. Dixo que “tódolos seus artigos desprenden un arrecendo paternalista e discriminatorio descoñecido na lexislación española e autonómica dende fai moito tempo”.

A parlamentaria explica que nos seus 19 artigos e 8 disposicións hai "todo un compendio de prácticas que agochan o machismo solapado e o caciquismo como un criterio fundamental e determinante para o acceso ao pérmex". Advirte que a discriminación en función do modo en que se exerce o marisqueo, o clientelismo máis rancio e a intromisión da administración no goberno das confrarías e agrupacións de mariscadoras, e destas na asunción de trámites que deberan ser propios da Administración pública. 

Ademais asevera que esta Orde establece un baremo, para acceder ao pérmex, que, na situación económica e socio-laboral na que nos atopamos, lonxe de fomentar o acceso ao emprego das persoas en función de necesidades obxectivas, segue a fomentar o amíguesmo e o clientelismo como forma de acceder a un posto de traballo.

A réplica da Xunta ás acusacións socialistas:

Mar promove a igualdade na orde que regula os pérmex ao conceder permisos ás mariscadoras para coidar fillos e familiares

O director xeral de Ordenación e Xestión dos Recursos Mariños lembrou que a normativa incorpora as conclusións do último Encontro de Mariscadoras celebrado o pasado ano e recolle vellas demandas do colectivo

A Xunta persegue retomar a actividade marisqueira normal, crear emprego e frear o furtivismo co sistema de reinstalación de molusco procedente de zonas clasificadas como C

A Consellería do Mar está a traballar para tratar de manter e incrementar os postos de traballo da frota que faena no Cantábrico-Noroeste, como pasou o ano pasado

A Xunta apoiará todos os proxectos de produción de semente de bivalvo “sempre que sexan sostibles e viables nos eidos social, económico e medioambiental”
 

Santiago, 22 de setembro de 2011.- A nova orde que regula os permisos de explotación para o marisqueo a pé prevé a posibilidade de que as mariscadoras pidan permisos de ata tres años polo nacemento dun fillo ou por adopción ou acollida, así como dun ano para o coidado de familiares. O director xeral de Ordenación e Xestión dos Recursos Mariños, Pablo Fernández, dixo hoxe na comisión 8ª de pesca e marisqueo que isto pon de manifesto “que a Consellería é sensible aos problemas da sociedade actual e do sector marisqueiro a pé e persegue mellorar as condicións das mulleres que se ven inmersas en situacións que poden limitar o exercizo da súa actividade profesional”.

Fernández Asensio lembrou que a normativa ademais favorecerá ás vítimas de violencia de xénero que se vexan na necesidade de abandonar a súa actividade laboral para facer efectiva a súa protección ou o seu dereito á asistencia social integral. Tal e como amosa o documento, a suspensión temporal poderá acordarse nestes casos por un período dun ano en función da sentenza xudicial e ata un máximo de 18 meses.

O director xeral subliñou que este documento recolle “as peticións do sector para a súa mellor organización” e que foi froito do diálogo en diferentes comisións de traballo e no VI Encontro de Mariscadoras celebrado en febreiro de 2010. Precisamente, unha das demandas do sector de a pé foi a renovación anual dos títulos administrativos habilitante, argumentando que o atraso desta renovación poderían darse casos de falta de implicación nas tarefas complementarias á propia actividade extractiva, tales como limpezas, traslados ou vixilancia..

O responsable de Ordenación e Xestión dos Recursos Mariños explicou ademais que esta diferenza con respecto ao marisqueo a flote ten sentido porque “está vinculado a una persoa física, a diferenza de o de a flote, que está ligado a unha embarcación, que é quen ten esta arte ou modalidade no seu pérmex”.

Reinstalación de moluscos procedentes de zonas C
Pola súa banda, a directora do Intecmar, Covadonga Salgado, insistiu en que a reinstalación de marisco procedente de zonas C permitirá recuperar a actividade normal e, polo tanto, normalizar os ingresos de todos os mariscadores que traballan nas 15 confrarías de toda Galicia que contan con bancos marisqueiros localizados en zonas catalogadas como C. “Galicia contará cunha zona de reinstalación por provincia”, asegurou e lembrou que este procedemento permite depurar naturalmente o molusco procedente destas áreas.

A directora do Intecmar subliñou que a Consellería persegue, con esta fórmula, “crear emprego e frear o furtivismo, xa que a rexeneración destas zonas dará cabida a novos mariscadores”. Cabe lembrar que esta fórmula permitirá poñer no mercado máis de 450 toneladas de marisco de calidade e garantía hixiénico-sanitaria e xerará arredor de 6 millóns de euros nas lonxas e para os mariscadores galegos.

Salgado informou ademais das garantías sobre este proceso de reinstalación xa que as mermas por mortalidade superior ao 10% serán aboadas, aínda que destacou que os resultados achegados polas mostras efectuadas amosaron que non se chega a ese porcentaxe. Asemade, subliñou que o produto sometido a esta reinstalación estará a disposición dos mariscadores en breve espazo de tempo e non supón ningún custe para os mariscadores galegos.

167 postos de traballo novos no 2010
Por outra banda, o director xeral de Competitividade e Innovación Tecnolóxica, Juan Maneiro, informou do incremento de 167 tripulantes o ano pasado nos buques con porto base en Galicia que faenan no caladoiro do Cantábrico-Noroeste. Maneiro explicou que 1.050 tripulantes se deron de alta no Instituto Social da Marina durante o ano pasado, fronte aos 883 que se deron de baixa. Son os resultados da enquisa Ocupesca, elaborada pola Consellería sobre a poboación ocupada na frota galega que realizou a súa actividade en augas interiores de Galicia e no caladoiro nacional Cantábrico-Noroeste durante o ano pasado.
O responsable de Competitividade e Innovación salientou tamén que a maioría dos traballadores por conta allea, que son 5.841 persoas, gozan de contrato indefinido -un 61,7 %- fronte ao 33,85 que teñen contrato temporal. O director xeral asegurou que a Consellería do Mar “está a traballar intensamente para tratar de manter e incrementar os postos de traballo neste sector estratéxico para Galicia neste ano, a pesar das complicadas circunstancias ás que se enfronta o sector tralos recortes dos TACs e cotas establecidos pola UE para o presente ano 2011”.

Apoio á produción de semente de bivalvos
Por último, o director xeral fico fincapé en que a Consellería vai continuar apoiando decididamente todos aqueles proxectos empresariais da pesca, o marisqueo e a acuicultura, sempre e cando sexan sostibles e viables nos eidos social, económico e medioambiental, como é o caso de produción de semente de bivalvos. O director xeral subliñou que “se fará, como vén facendo dende o comezo da lexislatura, cun rigor extremo tanto na autorización de novas instalacións de produción coma no financiamento con fondos públicos deste tipo de instalacións”. Maneiro recalcou que se trata de actividades económicas e como tales deben desenvolverse con criterios “de eficiencia e eficacia económica e por suposto de rendibilidade”.

Maneiro sostivo que a achega de sementes de calidade é un dos factores clave no desenvolvemento sostible do noso sector marisqueiro e acuicultor e unha condición imprescindible para que este sector poida ser considerado plenamente coma unha actividade máis da acuicultura e poder así beneficiarse das axudas que a UE destina a este sector. “Neste senso calquera actividade que vai neste camiño contará co apoio da Xunta”, asegurou.

Na actualidade, en Galicia existen 16 autorizacións para a semente de bivalvos das cales 13 son de titularidade privada e 3 de titularidade pública. Todas están autorizadas para ameixa babosa, fina e xaponesa e algunhas a maiores poden cultivar outras especies como a ostra plana. A semente prodúcese para o seu posterior engorde nas concesións marisqueiras.

Posted via email from Certo.gl, o xornal dixital de Barbanza e Noia

Ribeira: Ámbar conta cunha nova embarcación case feita á medida para o programa "Vela para todos"

Dsc_0430_1

Ribeira, 22 de setembro de 2011. A asociación AMBAR incorpora una nova embarcación ó Programa Vela para Todos. Dende 2007, as actividades de Vela para Todos veñen funcionando con tres embarcacións construídas en Australia do modelo “Access 303”, financiadas polas empresas locales Congalsa e Serdeco.

Coa experiencia acadada durante este tempo, nesta ocasión foron os propios monitores e participantes no programa os que suxeriron a idea de traballar na recuperación de embarcacións de vela lixeira en desuso, contribuíndo activamente nas fases de deseño e fabricación. Partindo dunha embarcación de iniciación á vela modelo “Cadete MK III” donada por un particular, propuxeron nunha serie de cambios na estrutura e aparellos para que puidese ser accesible e navegable para calquer persoa. Logo duns meses de esforzo o resultado foi a botadura do prototipo “Singular Cadet” para navegación individual que estará a disposición nas xornadas náuticas que ao longo de todo o ano se desenvolven no Clube Náutico de Ribeira.

 

 

Posted via email from Certo.gl, o xornal dixital de Barbanza e Noia

Mar: o Psoe pide a dimisión de Maneiro Cadillo pola desidia coa sementeira de bivalvos

pregunta bivalvos.PDF Download this file

-A portavoz de Pesca do Grupo Parlamentario dos Socialistas de Galicia, Marisol Soneira dixo que o Goberno de Feijoo “non é capaz de solucionar os problemas de contaminación, donde hai investidos mais de 7 millóns de euros”, como sucede en Ribeira

- Soneira pediulle a Maneiro Cadillo que se desminta as acusacións  dos parquistas de Carril nas que asegura que son discriminados por razóns politicas, reclamoulle que as denuncie por vía xudicial “ou senón ten que dimitir, porque quen cala outorga”

-A parlamentaria afirma que  “no IGAPE parece que non vive ninguén”

Media_httpfarm4static_bcwla

Santiago de Compostela, 22 de setembro de 2011. A portavoz de Pesca do Grupo Parlamentario dos Socialistas de Galicia, Marisol Soneira interviu hoxe na Comisión 8ª do Parlamento para reclamar á Xunta explicacións sobre a avaliación que fai das necesidades de semente de moluscos bivalvos para os distintos parques e concesións marisqueiras galegas.

A portavoz de Pesca lembra ademais que o Grupo Parlamentario Socialista reclamou , o pasado 8 de setembro mediante unha proposición “recuperar e poñer en activo as instalacións acuícolas destinadas á producción de semente de bivalvos, que como consecuencia da crise ou por causas alleas á súa propia actividade están paradas ou abandonadas”. Pero lamentou que a proposta foi rexeitada polo Partido Popular. 

Dixo que o Goberno de Feijoo “non é capaz de solucionar os problemas de contaminación, donde hai investidos mais de 7 millóns de euros”, como sucede en Ribeira. E advirte que a administración autonómica non pode dar a calada por resposta. E insiste nas súas criticas: “no IGAPE parece que non vive ninguén”. 

Soneira explica que os bivalvos son unha das principais producións das nosas rías, tanto polo volume de produción como polo número de postos de traballo que xeran, e pola importancia económica que teñen sobre a economía de milleiros de familias. 

Sinala que a evolución dos bancos marisqueiros é especialmente importante nas concesións en parques, como pode ser o caso de Carril, onde os titulares invisten gran cantidade de recursos económicos e técnicos que lles permiten acadar niveis de productividade moi por riba das medias. 

A parlamentaria asegura que esta puxanza productiva e as extraordinarias condicións naturais das nosas rías vense diante dun auténtico colo de botella, debido a gran dependencia que o sector marisqueiro ten da semente de bivalvos, con que repoboar os bancos marisqueiros, procedentes do exterior. Non obstante, téñense posto en marcha iniciativas interesantes en Galicia que tentan dar respostas a esta necesidade evidente. 

Así as cousas asegura que algunhas iniciativas postas en marcha non parece que dean respostas axeitadas ás necesidades que o sector marisqueiro demanda. Afirma que hai, tamén, iniciativas privadas que, con gran esforzo e dificultades de todo tipo, tentan buscar resposta a unha necesidade evidente e que ao mesmo tempo pode significar a resposta galega  á producción de semente de bivalvos en cantidade e calidade que nos permitan non só cubrir as nosas necesidades, senón tamén gañar mercados internacionais. 

Dimisión de Maneiro Cadillo 

Subliña ademais que os parquistas de Carril teñen acometido proxectos interesantes neste sentido e mesmo teñen constituído proxectos empresariais, onde se xogan o seu patrimonio persoal en moitos casos, para procurarse semente de calidade para si mesmos e para outros que o precisen.

Na súa intervención tamén lembrou as denuncias feitas polos parquistas de Carril nas que asegura que son discriminados por razóns políticas. Xa que aseguran que hai un agravio comparativo fronte a Pescanova. Neste punto pediulle a Maneiro Cadillo que se desminta estas acusacións  ou ben as denuncie vía xudicial “ou senón ten que dimitir, porque quen cala outorga”, espetou Soneira. E proseguiu “seguro que lembra algunha reunión nun Hotel de Carril”, para tratar estes e outros asuntos 

Problemas de viabilidade 

A parlamentaria dixo que este, e outros proxectos, precisan tamén de apoio institucional e teñen recibido recursos para a posta en marcha dos seus emprendementos. Pero denuncia que “desgraciadamente, algúns deles están atopándose con serios problemas de viabilidade pola desidia e a falla de compromiso da Xunta de Galicia con este nicho de actividade económica e mesmo parecera que a Consellaría do Mar, ve estas iniciativas como un problema e non como unha oportunidade de emprego e de negocio para un sector estratéxico da nosa economía”, concluíu.

Antes, en Certo:


Posted via email from Certo.gl, o xornal dixital de Barbanza e Noia

Turismo: xornalistas de Suiza, Austria e Alemania percorren vilas mariñeiras. Barbanza e Noia non existen no destino "España Verde"

Xornalistas_espaa_verde

  • Profesionais de medios de comunicación especializados en turismo e náutica dos mercados suízo, alemán e austríaco percorren durante esta semana Galicia e Asturias nunha viaxe de prensa organizada polas comunidades do norte de España que conforman a marca turística España Verde, en colaboración con Turespaña e ‘Villas Marineras’.
  • As bisbarras de Barbanza e Noia, unha vez máis, non contan como destino turístico para a Xunta de Galicia
 

Barbanza e Noia, 22 de setembro de 2011.- Un grupo de periodistas procedentes de Zürich, Viena e Düsseldorf participan durante esta semana nunha viaxe de prensa organizado polas comunidades que conforman a marca turística España Verde –Galicia, Asturias, Cantabria e Euskadi, xunto con Turespaña- en colaboración con ‘Villas Marineras’. Aerzte Journal, Ocean 7 e Spanien-Reisemagazin son os medios nos que se difundirán as reportaxes que durante estes días elaboran os xornalistas coa información que recompilen durante as súas visitas e experiencias turísticas no seu percorrido por algunhas privilexiadas vilas mariñeiras de Galicia e Asturias. 

No marco do convenio de colaboración entre o Instituto de Turismo de España, a Sociedad Anónima Pública Basquetour S.A., Turgalicia, a Sociedad Regional de Turismo del Principado de Asturias e a Sociedad Regional de Turismo de Cantabria para o desenvolvemento de accións conxuntas de márketing dos destinos e produtos turísticos asociados á marca España Verde, inclúese esta acción promocional que se desenvolve en colaboración con Villas Marineras e que percorrerá as vilas de Baiona, Sanxenxo, Sada, Ortigueira, Viveiro, Cudillero, Llanes, Ribadesella e Xixón. Os xornalistas non coñecerán os atractivos da vila mariñeira de Rianxo, nin verán o porto de Ribeira, e tampouco se decatarán de que Noia foi, hai séculos, "Porto de Compostela". Por suposto, nin chío do turismo náutico de Porto do Son nin do potencial turismo mariñeiro da Pobra. Dirá algo Arousa-Norte desta discriminación? Fará algo a Asociación Rural de Desenvolvemento Muros-Noia? Ou limitaranse a fundir os fondos europeos en campañas turísticas erráticas, en sinais atrapa-turistas e confunde-propios? E os alcaldes destas bisbarras, van facer algo ao respecto?

‘Villas Marineras’ en España Verde

No seu percorrido por Baiona, os xornalistas visitarán o casco histórico, a réplica da Carabela Pinta, a Virxe da Roca e máis o faro de Cabo Silleiro. En Sanxenxo visitarán a ermida da Nosa Señora da Lanzada, o porto deportivo Xoán Carlos I e o Paseo de Silgar. Desprazaranse posteriormente a Sada e a Ortigueira, facendo unha parada na fábrica de Cerámica de Sargadelos. O Teatro da Beneficiencia e o Museo Ortegalia serán algunhas das paradas que realizarán durante o percorrido. A visita a Galicia completarase percorrendo o porto e o casco histórico de Viveiro. 

Xa en Asturias, farán o percorrido Llanes de Cine, no que visitarán a costa e os escenarios nos que tivo lugar a rodaxe de varias producións cinematográficas, así como os miradoiros e as praias máis emblemáticas da cidade. Os cubos da memoria e o Llanes mariñeiro e medieval completarán a visita a esta vila. En Ribadesella visitarán as Cuevas de Tito Bustillo e en Xixón o muro de San Lorenzo e mais o casco histórico. 

Ademais de descubrir os aspectos relacionados co carácter mariñeiro destas localidades, os xornalistas poderán gozar da magnífica gastronomía típica de cada unha das vilas e dos seus aloxamentos singulares.  

O turismo alemán en Galicia

Accións promocionais deste tipo están dirixidas a incrementar o peso do turismo destes mercados en Galicia que no caso de Alemaña, por exemplo, é xa bastante significativo. O ano pasado o 11,9% dos turistas estranxeiros que se aloxaron en establecementos regrados de Galicia procedían de Alemaña. O mercado alemán é xa o segundo mercado estranxeiro máis importante da comunidade, por detrás de Portugal. En 2010 rexistráronse preto de 90.000 viaxeiros e 160.000 pernoitas nos establecementos hoteleiros da comunidade de turistas procedentes de diferentes puntos do país xermano. 

Doutra parte, no que atinxe exclusivamente ao Camiño de Santiago e á procedencia dos peregrinos, Alemaña sitúase neste segmento como o principal país de orixe dos peregrinos estranxeiros, cun total de 14.522 peregrinos durante o Ano Santo 2010, o 17,3% do total internacional.

Posted via email from Certo.gl, o xornal dixital de Barbanza e Noia

Boiro: operativo contra o furtivismo en Cabo de Cruz nun establecemento no que se identificou a cinco persoas e se comisaron máis de mil quilogramos de marisco

  • Di a Xunta que esta acción se desenvolveu nun establecemento de Esteiro e qu e o marisco comisado carecía de documentación de procedencia e o local no que se requisou non está autorizado para a venda
  • Este golpe engádese aos 4 operativos especiais que os Gardacostas realizaron ao longo deste mes nas zonas de Cabo de Cruz e Rianxo xunto con corpos e forzas de seguridade do Estado
Media_httpfarm6static_bdkeg

Entre o marisco comisado había berberechos, navallas, ostras e nécoras, pero sobre todo ameixas. A imaxe, de arquivo, é da Festa do Berberecho de Foz

Boiro, 22 de setembro de 2011.- Axentes do Servizo de Gardacostas de Galicia, dependente da Consellería do Mar, en colaboración con axentes da Unidade do Corpo de Policía adscrita á Comunidade Autónoma de Galicia (UPA), realizaron ao longo desta mañá un operativo nun establecemento de Esteiro, en Cabo de Cruz (Boiro) no que os Gardacostas comisaron arredor de 1.300 quilos de distintas especies de marisco, na súa maioría ameixa, e identificaron a 5 persoas.

O resto das especies comisadas foron berberecho, navalla, ostra e nécoras. Parte da mercadoría comisada estaba depositada nas 3 piscinas que contén o establecemento e o resto estaba sendo empaquetado para destinar á venda. Este marisco foi requisado por carecer de documentación de procedencia e por manipularse para a venda nun local non autorizado para esta actividade. Tralo comiso, os Gardacostas procederán á destrución de todo o marisco.

Este golpe contra o furtivismo é froito do seguimento e control que a Xunta realiza para garantir a trazabilidade do produto e vense engadir aos 4 operativos especiais que os Gardacostas realizaron ao longo deste mes nas zonas de Cabo de Cruz e Rianxo xunto con corpos e forzas de seguridade do Estado. Nestas zonas, a Consellería do Mar intensificou os controis deste tipo de operativos tras detectar un repunte do furtivismo.

Unha vez máis, a Consellería do Mar quere facer un chamamento aos cidadáns para que só consuman o marisco adquirido de forma legal xa que, o contario, pode supór un risco para a súa saúde. A Xunta lembra que só aquel produto que sexa extraído e comercializado seguindo os cauces legais será óptimo para o seu consumo, por iso apela á concienciación dos consumidores e comercializadores para que adquiran os produtos do mar a través dos cauces legais.

Media_httpfarm4static_jiefa

Vixiancia contra o furtivismo
A propósito da vixiancia, a Consellería do Mar quere lembrar que a maiores da exercida polos Gardacostas en colaboración coa UPA, nas zonas suxeitas a plans de explotación son as propias confrarías as que se fan cargo de asexar a través da contratación directa de gardapescas. A Xunta colabora coas confrarías cofinanciando esta contratación no marco dos convenios de vixiancia, nos que se crea unha comisión de seguimento da que forman parte membros da Consellería do Mar e das confrarías para o control do cumprimento deste convenio.

Posted via email from Certo.gl, o xornal dixital de Barbanza e Noia

Porto do Son: o Consello da Xunta aprobou a declaración como Ben de Interese Cultural -categoría de zona arqueolóxica- o Castro de Baroña

  • O conselleiro de Cultura e Turismo visitou xunto ao alcalde de Porto do Son o xacemento esta mañá 
  • Varela sinalou que o castro de Baroña é “un enclave simbólico dentro da cultura castrexa de Galicia” e destacou que coa declaración aprobada hoxe “cúmprese o compromiso adquirido no Parlamento” de facela efectiva antes do remate de 2011
  • Nin chío do castro, pode que máis grande e máis interesante, atopado en Taramancos este verán, que está a escasos quilómetros do de Baroña

Porto do Son, 22 de setembro de 2011.- O conselleiro de Cultura e Turismo, Roberto Varela Fariña, visitou hoxe o Castro de Baroña, no concello de Porto do Son, na mesma xornada na que o Consello da Xunta vén de aprobar a súa declaración de Ben de Interese Cultural coa categoría de zona arqueolóxica. Durante a súa visita, o conselleiro asegurou que supón “unha inmensa satisfación” que o Castro de Baroña sexa BIC, xa que esta declaración “garante a maior protección que prevé a nosa lexislación para un ben cultural, facéndolle así xustiza a este xacemento pola súa relevancia histórica, cultural, social e turística”.

Durante a súa estancia en Baroña, o conselleiro estivo acompañado polo alcalde de Porto do Son, Luís Oujo Pouso; polo secretario xeral da Consellería de Cultura e Turismo, Antonio Fernández- Campa, e polo director xeral do Patrimonio Cultural, José Manuel Rey Pichel. Nas súas declaracións aos medios, o conselleiro de Cultura e Turismo fixo fincapé en que a protección que recolle a declaración BIC aprobada hoxe “é aínda máis exhaustiva que a prevista inicialmente”, xa que finalmente recolle a categoría de zona arqueolóxica, máis ampla que a de monumento coa que se incoou o expediente. Esta categoría, lembrou Roberto Varela,“permite ampliar considerablemente a área de protección, que mesmo se adentra no mar unha franxa de 200 metros”.

O conselleiro asegurou, ademais, que coa decisión tomada hoxe polo Consello da Xunta “cúmprese o compromiso que adquirín ao respecto no Parlamento de Galicia o pasado mes de marzo”, cando anunciou que a declaración sería efectiva antes de finais de 2011. Roberto Varela destacou que Baroña é “un enclave simbólico dentro da cultura castrexa de Galicia” e lembrou que supón un elemento de atracción turística de grande importancia para toda a comunidade.

O titular de Cultura e Turismo enmarcou esta acción en Baroña “no esforzo especial que estamos levando a cabo para protexer e poñer en valor algúns dos xacementos arqueolóxicos máis importantes da nosa comunidade”. Nesta liña, lembrou que nos últimos meses foron declarados BIC os castros de Neixón (Boiro), Borneiro (Cabana de Bergantiños), Saceda (Cualedro) e hoxe mesmo vén de aprobar o Consello da Xunta a declaración de Baroña. “A protección, conservación, posta en valor e difusión do noso rico patrimonio arqueolóxico está a ser unha das nosas prioridades”, rematou.

Declaración BIC
O Consello da Xunta deu luz verde hoxe á declaración BIC coa categoría de zona arqueolóxica como recoñecemento ao carácter senlleiro deste xacemento, castro costeiro representativo dun tipo de hábitat prehistórico da costa atlántica galega, amplamente investigado ao longo do século XX. En total, ocupa unha superficie de 53.733 metros cadrados.

A Dirección Xeral do Patrimonio Cultural incoou en abril de 2011 o expediente para a declaración do castro como ben de interese cultural coa categoría de monumento. Con posterioridade, e vistos os informes favorables da Comisión Territorial de Patrimonio Histórico da Coruña, da Real Academia Galega de Belas Artes, a Facultade de Xeografía e Historia da Universidade de Santiago de Compostela e do Consello da Cultura Galega, propúxose declarar o Castro de Baroña como Ben de Interese Cultural segundo a categoría de zona arqueolóxica, por entender que se axusta perfectamente á tipoloxía, entidade e especialidade deste conxunto arqueolóxico, ampliar cara o mar a súa contorna de protección cunha liña equidistante de 200 metros medidos desde o borde costeiro, e determinar os criterios básicos que deberán rexer as futuras intervencións.

O Castro de Baroña é un dos xacementos máis visitados da comunidade galega e representa un dos mellores exemplos de castro dos chamados costeiros. A localización do xacemento sobre unha punta que se adentra no mar condiciona unhas boas defensas naturais e tamén a súa asociación cunhas formas de vida ligadas ao mar e aos recursos marítimos. O castro configúrase aproveitando a morfoloxía rochosa e abrupta da península sobre a que se asenta.

Nin palabra sobre o veciño castro de Taramancos

Na nota de prensa da Xunta non se fai nin unha soa mención sobre o veciño castro de Taramancos, que, pola súa morfoloxía e características descubertas ata o de agora, podería ser tan o máis interesante que o de Baroña. En Certo abordamos esa cuestión en diferentes noticias:


Variante: o atopado en Taramancos, mero trámite


Arqueoloxía: "Terra de Outes" pronúnciase a prol da conservación completa do atopado en Taramancos Vello


Arqueoloxía: piden á Xunta modificar a variante para conservar o de Taramancos

Pode que tamén lle interese:


Arqueoneixón: opinión sobre os milladoiros de Baroña


Xornadas: remate cun protagonista especial: o castro de Baroña


Castro de Baroña: 120.000 euros para consolidalo e poñer sinais


Centro de Interpretación de Baroña: 30.000 euros para actividades


Patrimonio: o castro de Baroña, por fin BIC este ano?


Arqueoloxía: os castros de Neixón, declarados BIC


Posted via email from Certo.gl, o xornal dixital de Barbanza e Noia

Lousame: 300.000 euros este ano e outros tantos en 2012 para rematar o centro de día

  • A conselleira de Traballo e Benestar, Beatriz Mato, visitou hoxe o Concello
  • No eido laboral, a Xunta investiu preto de 100.000 euros dos impostos de todos os galegos neste concello durante 2011

Lousame, 22 de setembro de 2011.- A Consellería de Traballo e Benestar está a investir preto de 700.000 euros para colaborar na construción do primeiro centro de día de Lousame. Este investimento está distribuído en catro anualidades. En 2009 e 2010 xa se investiron máis de 100.000 euros, este ano estánse a investir máis de 300.000 e o resto chegará en 2012.

A conselleira de Traballo e Benestar, Beatriz Mato, visitou hoxe o concello de Lousame onde se reuniu co alcalde, José Santiago Freire. Na súa intervención lembrou que no eido social o departamento está a investir tamén preto de 10.000 euros en 2011 para o mantemento da escola infantil municipal. Nembargantes, Mato sinalou que a colaboración de Traballo e Benestar co concello de Lousame non se limita tan só a área social, "senón que tamén se está a levar a cabo un importante esforzo no eido laboral, co fin de mellorar as opcións de empregabilidade dos seus habitantes".

De feito, en 2011 incrementouse nun 7,4 por cento o financiamento destinado ao Plan de cooperación, o que permitiu a contratación dun total de 11 traballadores, 3 contratacións máis que no 2010. Estes traballadores están a levar a cabo labores como de xardineiro, axuda no fogar, socorrista, ou operarios para servizos de interese xeral. A Xunta non deu nesta nota de prensa datos estatísticos sobre o paro neste concello rural do interior.

Tamén se financiou, con máis de 30.000 euros, un curso para formar a persoas desempregadas como coidadores de persoas con discapacidades psíquicas ou físicas, e se está a colaborar no fomento das cooperativas. Todas estas actuacións no eido laboral suman un investimento global de preto de 100.000 euros durante 2011.

Posted via email from Certo.gl, o xornal dixital de Barbanza e Noia

Twitter

Related Posts with Thumbnails Banner: Regale selva tropical