- Considéraa "unha barbaridade" propia de "incompetentes" e cre que é inconstitucional
- Asegura que di en alto algo máis suave que o que "calan en privado os alcaldes do PP"
O alcalde de Noia, á esquerda, nunha recente imaxe do Entroido
Noia, 15 de febreiro de 2013. A través do seu blog e tamén no seu twitter, o alcalde socialista de Noia, Rafael García Guerrero, foi o primeiro destas bisbarras en pronunciarse contra a nova lei do Goberno central que presentou Cristóbal Montoro. esta mañá na rolda de prensa tralo Consello de Ministros. Cun explícito título "Feijóo para Madrid", o alcalde noiés considera que o equipo ministerial que lidera Mariano Rajoy non coñece a realidade municipal e mesmo o chama "incompetente", de paso que desliza a idea de que Alberto Núñez Feijóo faríao mellor que o actual galego na Moncloa, pois ante tanta incompetencia, "Feijóo é o listo da clase", asegura. García Guerrero tamén critica que se queira dar un papel máis potente ás deputacións, das administracións máis opacas que existen e que, segundo el e unha parte do seu partido, o Psoe, deberían ser eliminadas. Outra das conclusións que se extraen do seu texto é que esta reforma é inconstitucional. Velaquí o texto completo que poden ler no seu blog:"Non serei eu quen defenda nin minimamente a xestión do actual presidente da Xunta de Galicia, pero vendo o que fan os seus compañeiros de partido co goberno do estado, resulta doado entender que o nome de Alberto Núñez Feijóo soe constantemente como relevo de Rajoy. Comparado cos incompetentes de Madrid o Sr Feijóo é o listo da clase. A última trapallada do goberno do estado é o que, de xeito falaz, denominan "reforma da administración local". Faltan adxectivos no dicionario para calificar a trapallada desta pseudorreforma que non é máis que un ataque á autonomía local recollida na Constitución Española. Deputacións: órganos de xestión lonxanos e portas abertas á privatizaciónClaro que son moitos os cambios que se deben realizar no actual laberinto de competencias administrativas, e son moitas as medidas necesarias que se deben adoptar para mellorar as administracións, como o de regular os soldos de alcaldes e concelleiros. Pero a involución administrativa proposta como reforma non é máis que unha tentativa de centralización administrativa nas Deputacións, alonxando os órganos de xestión dos cidadáns, e unha porta aberta á privatización de servizos que se ten demostrado ineficaz e máis cara. Resulta curioso ese interese por defender as Deputacións, cando son unhas institucións que deberían desaparecer. Pregúntome cantos de vós sabedes como se elixe un deputado provincial, poucos probablemente, porque son uns organismos opacos e alonxados da cidadanía. Só alguen cun absoluto descoñecemento da administración local e de costas a realidade pode facer esta barbaridade que chaman reforma. E asegúrovos que estas palabras quédanse moi curtas co que din en privado os alcaldes do PP".E no twitter:
Señores de Madrid, nos este ano acabaremos a debeda e entramos en superavit, e vostedes? Pois atendede a vosa casa e deixadenos en paz
— rafaelguerrero (@rafaelguerrero) February 15, 2013
Non poden facer unha reforma da administración locais aqueles que non coñecen a politica de proximidade
— rafaelguerrero (@rafaelguerrero) February 15, 2013
Moito encherse a boca defendendo a constitución e logo fan unha reforma da administración local que a incompre.
— rafaelguerrero (@rafaelguerrero) February 15, 2013
Posted via email from Certo.gl, o xornal dixital de Barbanza e Noia
No hay comentarios:
Publicar un comentario