Ribeira, 27 de xuño de 2011. O salón de actos do auditorio municipal, cheo a rebentar, viviu o venres pasado, día de San Xoán, o acto de clausura do Programa de Dinamización e Promoción Social dos nosos Maiores promovido e organizado polo Departamento de Servizos Sociais.
O alcalde Manuel Ruiz Rivas e o edil de Servizos Sociais, Promoción Social, Sanidade e Consumo, Vicente Mariño de Bricio asistiron a este acontecemento que estivo presentado pola xefa de servizo Francisca Vidal. O evento comezou coa proxección dun vídeo no que, baixo a música da Coral Polifónica Municipal de Riveira, foise describindo a base de fotografías os distintos contidos de que constou o programa, como o obradoiro Estimulemos A Mente (taller de memoria), o de Enriquecemento Educativo, os cursos de pandeireta, o taller de restauración de mobles, as clases de ximnasia para a terceira idade ou o curso de alfabetización dixital (introdución a Internet), así como as saídas culturais realizadas este ano a Santiago de Compostela e ás Médulas e León.
Acto seguido tivo lugar unha breve exposición sobre os cruceiros: un traballo realizado polas alumnas do obradoiros de enriquecemento educativo que estiveron en funcionamento en Ribeira, Aguiño, Palmeira, Artes e Oleiros durante o curso escolar. Todos eles foron impartidos por membros do programa de voluntariado social municipal, cun total de 90 persoas inscritas.
A continuación tivo lugar dúas actuacións de Pandereteiras coa participación de alumnas asistentes aos talleres que se impartiron en Riveira, Aguiño e Palmeira. Esta actividade atraeu a 43 persoas e fíxose en coordinación coa Asociación de Amas de Casa de Ribeira.
Ademais, con motivo da conmemoración do centenario de Álvaro Cunqueiro, unha alumnas do grupo de enriquecemento educativo de Artes fixeron unha breve exposición oral sobre a traxectoria do literato e mesmo declamaron un poema do mesmo.
Homenaxe
Un dos momentos máis emotivos da clausura foi o homenaxe que se realizou a Ana Sampedro Cores, persoa da terceira idade vinculada ao grupo de enriquecemento educativo dende a súa formación hai 13 anos, así como o programa de voluntariado local. Así mesmo, está moi vinculada ao traballo comunitario a través da súa dirección na xunta local de Ribeira da AECC (Asociación Española Contra o Cancro), dende a súa constitución, que actualmente continua presidindo. A homenaxeada recibiu un agasallo de mans do alcalde.
Logo chegou a quenda das intervencións por parte de Vicente Mariño e de Manuel Ruiz. O primeiro deles fixo fincapé no gran exemplo a seguir que son os maiores e na súa axuda para a conciliación da vida familiar e laboral e quixo poñerse a disposición dos presentes para escoitar as súas demandas e suxestións. Pola súa parte o rexedor local informou de que a política de austeridade impulsada non Concello non vai impedir que a partida de Servizos Sociais se incremente nos próximos orzamentos e ambos agradeceron o esforzo de todas as persoas que axudaron ao éxito deste programa de dinamización.
A continuación tivo lugar a entrega de diplomas de asistencia ao taller de Estimulación da Mente (Memoria) no que participaron máis de 150 alumnas e alumnos e ao Obradoiro Enriquecemento Educativo.
Por último, os presentes subiron ata a planta alta do Auditorio para proceder á inauguración dunha exposición cos traballos realizados do Obradoiro de Restauración do Moble, no que durante dous meses (maio e xuño) participaron 30 persoas.
Posted via email from Certo.gl, o xornal dixital de Barbanza e Noia
No hay comentarios:
Publicar un comentario