Ribeira: quéixanse de edificios abandonados na rúa de Galicia. Charlas e obradoiros no Liceo

• O luns 3 de outubro, charla no Liceo Marítimo sobre "A reordenación do territorio: os servizos mancomunados"
• Tamén no Liceo haberá obradoiros sobre saúde en outubro, previa inscrición
  

Ribeira, 29 de setembro de 2011. Veciños da rúa peonil Galicia de Ribeira manifestan o seu malestar e mesmo preocupación polo mal estado dalgúns edificios, casas e peches de solares -con taboeiros de madeira- que, ademais de afear esta rúa, poden ocasionar danos materiais e personais ante o inminente risco de derrube dalgúns deles. Para estes veciños cómpre que o Concello tome cartas no asunto e avise aos propietarios que os teñen abandonados ou se faga cargo o municipio mesmo e logo lles pase a factura aos propietarios, antes que ocorran males maiores.

CHARLA INFORMATIVA NO LICEO MARÍTIMO
 
O vindeiro luns, día 3 de outubro, ás 20:30 horas terá lugar nos locais do Liceo Marítimo de Ribeira unha charla informativa sobre "A Reordenación do territorio: os servizos mancomunados". Está organizada por parte do comité local do PSG-PSOE de Ribeira e será impartida pola conocida experta en Economía da Unión Europea, María Cadaval Sampedro. A conferencia está aberta ao público en xeral.

A Sociedade do Liceo Marítimo acubillará, ao longo de outubro dous obradoiros de saúde. A Escola Galega de Saúde para Cidadás dependente da Consellería de Sanidade da Xunta de Galicia impartirá, de balde e previa inscrición, os talleres de "Dolores Neuropáticas en relación con la Fibromialgia" e "Prevención y cuidados en la nutrición de las personas diabéticas". O límite de prazas é de trinta persoas.

 

Posted via email from Certo.gl, o xornal dixital de Barbanza e Noia