A Pobra do Caramiñal, 27 de outubro de 2010. "Gran Cambio", un programa da televisión autonómica galega que somete a probas aos seus concursantes para variar o seu aspecto físico, presentouse esta tarde na Casa do Concello. Ficción Producciones, a mesma produtora que gravou na illa de Sálvora "Mar libre", é a encargada deste espectáculo no que uns voluntarios se comprometen, aconsellados por expertos, a baixar os quilos de graxa que cren que lles sobran. O programa presume de que na tempada anterior fixo baixar 132 quilogramos a 13 concursantes (facíase de xeito colectivo), mais desta volta vai haber un só gañador, xa que, aínda que comezarán en grupos, logo de varias expulsións, só poderá quedar un (lembran aquela frase mítica da película protagonizada por Christopher Lambert, "Os inmortais"? Pois igual, pero aquí no canto de perder a cabeza, perdes sebo corporal).
Na imaxe, Isaac Maceiras no centro; a presentadora Mariana Carballal á dereita e o produtor do programa, Julio Casal, á esquerda. Nos extremos, dúas das concursantes pobrenses. "Gran Cambio" busca implicar a toda A Pobra no espectáculo. Para iso argallará visitas ao mercadillo para facer unha compra saudable, a tendas para mercar bo, bonito e barato, e tamén a algún restaurante para cociñar ao xeito os alimentos mercados. Falarán tamén en cada programa cunha famosa ou un famoso, aínda que non adiantaron ningún nome. Este personaxe mediático contará como se coida para lucir a súa figura (agardamos que traian gordos tamén, que non se convirta a televisión nunha ditadura dos esqueléticos). Entre pitos e frautas, botarán na Pobra uns tres meses. A produtora ofreceu datos e fotos dos que van concursar, que poñemos a continuación.
Posted via email from Certo.gl, o xornal dixital de Barbanza e Noia
No hay comentarios:
Publicar un comentario