Ribeira: o alcaldable polo Psoe, Andrés Fariña, presentou unha batería de propostas para a cidade

Ribeira, 18 de febreiro de 2011. O alcaldable socialista por Ribeira presentouse esta semana: trátase de Andrés Fariña (Ribeira, 1957), que desenvolveu a súa última tempada en política como concelleiro do Psoe en Santiago de Compostela.

O candidato socialista presenta na web do Psoe de Ribeira unha batería de propostas para "un cambio radical ue traslade ós ribeirenses a necesidade vital dunha cidade ordenada como elemento esencial para o benestar e o progreso sostible da sociedade". Fariña cualifica a actual situación de "totum revolutum" e comprométese "a traballar e intentar solucionar as preocupacións e propostas dos veciños para transformalas en proxectos acadables e sostibles".

Entre os puntos que salienta na súa liña de actuación, se os veciños o escollen para presidir a alcaldía, estaría integrar Ribeira no territorio de Barbanza "como unha cidade que participe no desenvolvemento comarcal e metropolitano"; que sexa escoitada nas institucións, activa nos foros europeos; que teña a mesma universalidade que a súa flota pesqueira e que Ribeira sexa "un concello ben armado funcionarialmente". Tamén promete "unha cidade para as persoas, de xeito que os veciños participen activamente no debate das estratexias de desenvolvemento, onde o sol sexa de novo un ben común que non quede secuestrado pola avaricia especulativa dun urbanismo sen método".

Ao longo dos próximos días darase a coñecer a lista do Psoe ribeirense que lidera Andrés Fariña.

Posted via email from Certo.gl, o xornal dixital de Barbanza e Noia