Barbanza, por Certo: Ribeira: intentan implicar ao empresariado no novo ciclo de FP de elaboración de produtos alimentarios

28.6.12

Ribeira: intentan implicar ao empresariado no novo ciclo de FP de elaboración de produtos alimentarios

Ribeira, 28 de xuño de 2012- A Casa Consistorial acolleu o pasado 26 de xuño a última hora da mañá unha reunión explicativa do novo ciclo de FP de elaboración de produtos alimentarias que está previsto celebrarse no CIFP Coroso e respecto do cal está aberto o prazo de inscrición.

Na xuntanza, convocada polo Concello, estiveron presentes unha selección de entidades ligadas ao sector alimentario, como son Frinsa, Congalsa, Conservas Lou e Pescaldía, ademais da propia Asociación de Empresarios de Riveira e de Amicos. Tamén estiveron o alcalde e a concelleira de Educación no nome do Concello, así como o director e o secretario do CIFP Coroso.

Adáptase aos procesos produtivos

As empresas convocadas amosaron o seu interese por este novo ciclo de FP e indicaron que os contidos que se van impartir se adaptan aos seus procesos produtivos. Así mesmo, manifestaron a idoneidade da formación que van recibir os alumnos ao responder ás necesidades do perfil de posibles contratados.

Hai que salientar que o Ciclo de Elaboración de Produtos Alimentarios ten como obxectivo aprender a elaborar produtos alimentarios de acordo cos plans de produción e calidade, así como efectuar o mantemento de primeiro nivel dos equipamentos, aplicando a lexislación de hixiene e seguridade alimentaria, de protección ambiental e de prevención de riscos laborais.

As persoas con este perfil profesional exercen a súa actividade en pequenas, medianas ou grandes empresas. Son traballadores por conta allea que se integran nun equipo de traballo con persoas dun mesmo nivel de cualificación, ou inferior, onde desenvolven tarefas individuais e en grupo nas áreas funcionais de recepción de materias primas e materias, preparación e manexo de equipamentos de produción, control de operacións de elaboración, envasamento e embalaxe, apoio ao control de calidade, almacenamento e expedición de produtos acabados

Os módulos que comprenden este ciclo son:

En primeiro curso:

 Formación e orientación laboral 107 horas

 Materias primas na industria alimentaria 267 horas

 Operacións de acondicionamento de materias primas 213 horas

 Operacións e control de almacén na industria alimentaria 80 horas

 Seguridade e hixiene na manipulación de alimentos 53 horas

 Tratamentos de transformación e conservación 240 horas

E en segundo curso:

 Empresa e iniciativa emprendedora 53 horas

 Formación en centros de traballo 410 horas

 Principios de mantemento electromecánico 105 horas